Píratar i fangi Soros milljarðamærings

Píratar eru sagðir hluti af pólískri áætlun milljarðamæringsins George Soros að gera vinstriflokka handgengna alþjóðahyggju, sem á í vök að verjast eftir Brexit og Trump-sigur.

Í fréttaskýringu er rakið hvernig Soros kaupir vinstriflokka í Evrópu til fylgilags við Evrópusambandið og opin landamæri. Píratar eru þar nefndir sérstaklega.

Helsta verkfæri Soros í þessum tilgangi er Open Society Foundations. Í fréttabréfi samtakanna er sagt frá vexti og viðgangi skjólstæðinganna. Fréttabréfið kemur út tvisvar í mánuði. Þegar Píratar fengu stjórnarmyndunarumboð í desember síðast liðnum var það fyrsta fréttin. 

Salerni og réttindaofbeldi

Réttindaofbeldi er það þegar einhver tekur sér réttindi á kostnað annarra. Hefðir helga siðvenjur okkar; salerni í heimahúsum eru fyrir bæði kynin en opinber salerni eru kyngreind.

Nú kann einhver að búa yfir þeirri sjálfsvitund að erfitt sé að velja á milli karlasalernis og kvenna. Viðkomandi á rétt á sinni sjálfsvitund á meðan hún truflar enga aðra.

En það er réttindaofbeldi þegar sjálfsvitund fárra neyðir karla og konur að nota sama salernið, - þvert á siðvenjur.

Kynlaus klósett í Háskólanum

Landamæri, alþjóðavæðing og óvinaímyndir

Fjölgun landamæragirðinga víða um heim, ekki síst í Evrópu, er til marks um endalok alþjóðavæðingar síðustu áratuga.

Eftir fall kommúnismans í kringum 1990 virtist alþjóðavæðingu og opnun landamæra engin takmörk sett. En þegar á daginn kom að alþjóðavæðingin jók efnahagslegt misrétti á vesturlöndum kom bakslag. Vaxandi flóttamannastraumur til vesturlanda gróf enn undan alþjóðavæðingunni og landamærin tóku að lokast.

Óvinaímyndir eru fylgifiskur einangrunarhyggju. Í stað fjölmenningar kemur þjóðerniskennd. Þar sem áður voru vinsamleg samskipti ríkir nú tortryggni.

Hvergi er tortryggnin augljósari en í samskiptum Evrópusambandsins og Rússlands sem deila um áhrifasvæði í Austur-Evrópu. ESB stendur fyrir sérstöku áróðursátaki gagnvart Rússlandi til að kenna Rússum um flest sem aflaga fer í opinberri umræðu í ríkjum Evrópusambandsins.

Óvinaímyndir eru fyrsta stig stríðsundirbúnings.

Landamæraveggir víða um heim

Falsfrétt Viðreisnar um ESB-aðild Íslands

Varaformaður Viðreisnar og fyrrum starfsmaður Evrópustofu, Jóna Sólveig Elínardóttir þingmaður, er aðalheimildin fyrir frétt Washington Times um að Ísland sé á leið inn í Evrópusambandið.

Í fréttinni segir Jóna Sólveig að áhrif Íslands á alþjóðavettvangi aukist við inngöngu og stjórnun gjaldmiðilsins, sem kallaður er ,,crown", verði styrkari.

Falsfréttir af þessu tagi spilla fyrir íslenskum hagsmunum á alþjóðavettvangi. Þjóð sem talin er á leið inn í ónýtt Evrópusamband er meðhöndluð eins og henni sé stjórnað af dómgreindarlausum kjánum.

Tvípólastjórnmál: Sjálfstæðisflokkur og Vinstri grænir

Tvípólastjórnmál með sterka flokka til hægri og vinstri, Sjálfstæðisflokk og Vinstri græna, eru að myndast hægt og hljóðlega.

Restin af stjórnmálakerfinu er á pólitísku einskinsmannslandi. 

Í tvípólastjórnmálum er Sjálfstæðisflokkurinn með sögulega yfirburði. Vinstri grænir byggja hvorki á hefðum málamiðlana né ríkisstjórnarreynslu sem þarf til að eiga raunhæft tilkall til stjórnarráðsins.

 

Sjálfstæðisflokkurinn aftur stærstur

Skoðanakúgun í háskólum

Frelsi til að ræða hugmyndir er aðall háskóla. Framþróun vísinda og fræða er háð vitsmunalegu frelsi. Án þess verða til kreddur, rétttrúnaður, sem bælir skilning.

Eyjan segir frá bandarískum háskólamanni sem varar við áhrifum rétttrúnaðar í háskólasamfélaginu. Varnaðarorðin eru borin undir íslenskan prófessor sem staðfestir orð þess bandaríska.

Sá íslenski kemur ekki fram undir nafni. Líklega af ótta við að fá á sig þann stimpil að vera haldinn röngum skoðunum.

Trump fær SDG-meðferð

Nú er það staðfest. Donald Trump er kominn í flokk með Sigmundi Davíð Gunnlaugssyni.

Það eru stórfréttir þegar kapparnir mæta ekki á fundi.

Alveg eins og hjörtum manna svipar saman í Súdan og Grímsnesinu eru fjölmiðlar sjálfum sér líkir, hvort heldur í Washington eða Reykjavík.

Trump mætir ekki í árlegan kvöldverð

Ögmundarflokkurinn sameinar 3 stjórnmálaöfl

Stærsta stjórnmálaaflið utan alþingis er flokkurinn sem má kenna við Ögmund Jónasson, fyrrum þingmann Vinstri grænna. Ögmundarflokkurinn sameinar stóra hluta af þremur stjórnmálaflokkum: Vinstri grænum, Sjálfstæðisflokknum og Framsókn.

Staðfastir íhaldsmann eins og Halldór Jónsson taka undir með Ögmundarflokknum í stórum málum eins og hvort áfengi skuli selt í matvörubúðum og hvort innflutningur skuli leyfðir á smitsjúkdómum í kjöti.

Ögmundarflokkurinn er með alla burði til að verða stjórnmálaafl til höfuðs þeirri lausung og óreiðu sem tröllríður húsinu við Austurvöll.

Myndi auka líkur á smitsjúkdómum

Juncker boðar Kjarna-Evrópu

Evrópusambandið gæti skiptst upp í tvo eða fleiri hluta, gangi hugmyndir forseta framkvæmdastjórnar ESB eftir. Jean-Claude Juncker telur tímabært að þau ríki sem vilja dýpka samstarfið á sviði hermála, efnahags- og stjórnmála fái tækifæri til þess þótt ekki feti öll ESB-ríkin sömu slóðina.

Aðeins 19 af 28 ríkjum ESB er með evru sem gjaldmiðil og þau væru líklegust í Kjarna-Evrópu, þótt vafasamt sé að þau myndu öll fylgja. Grikkland er til dæmis ekki í uppáhaldi annarra evru-ríkja.

Hugmyndir Juncker eru dæmi um hve Evrópusambandð er orðið brothætt. Valdamenn í Brussel telja farsælla að eiga frumkvæðið að breytingum fremur en láta þær gerast í glundroða.

Vald verkalýðshreyfingarinnar til góðs og ills

Verkalýðshreyfingin er sterkt þjóðfélagsafl og jók styrk sinn verulega eftir hrun. Í heildina fer verkalýðshreyfingin varlega með völd sín. Það má þakka verkalýðshreyfingunni að hér hélst friðarskylda á vinnumarkaði árin eftir hrun.

Í gegnum lífeyrissjóðina jukust áhrif verkalýðshreyfingarinnar eftir hrun þegar einkaframtakið var meira og minna lamað vegna gjaldþrota og ofurskuldsetningar. Og lífeyrissjóðirnir hafa í megindráttum reynst farsælir í fjárfestingum sínum eftir hrun, þótt sumir þeirra voru nánast glæpsamlega mistækir fyrir hrun.

Samtenging verkalýðshreyfingar og lífeyrissjóða er að því leyti jákvæð að hún er með innbyggða hvöt til jafnvægis á milli launakrafna í dag og getu sjóðanna til að greiða lífeyri í framtíðinni.

Ef verkalýðshreyfingin og lífeyrissjóðir temja sér varkárni og vönduð vinnubrögð getur þetta þjóðfélagsafl orðið kjölfesta í samfélaginu. En um leið og verkalýðshreyfingin ætlar sér dagskrárvald í samfélaginu, eins og hún gerði með stuðningi við misheppnuðustu pólitísku tilraun lýðveldissögunnar, ESB-umsókn Samfylkingar, er friðurinn úti. Verkalýðshreyfingin á ekki að stunda pólitík nema á mjög þröngu sviði.

87% telja launafólk þurfa sterk verkalýðsfélög