Lygari til leigu í framboði

Óopinbert starfsheiti almannatengla er ,,lygari til leigu." Kemur það til að almannatenglar selja þjónustu sína að hygla einum en fordæma annan í opinberri umræðu. Eða, svo notað sé orðalag úr Njálu, berja í brestina og selja ónýt málefni sem þjóðþrifamál.

Almannatengill sækist eftir eftir öruggu þingsæti Sjálfstæðisflokksins í höfuðborginni. Eðli málsins samkvæmt veit alþjóð ekki hverra hagsmuna almannatengillinn gengur í prófkjörinu. Hagsmunaskrá almannatengla liggur í bankareikningum þeirra og þeir eru ekki opnir almenningi til athugunar.

Síðast þegar að var gáð gekk tengillinn erinda þeirra sem vilja framselja frumburðarrétt Íslendinga til Brussel með þriðja orkupakkanum.

Í lýðfrjálsu landi er öllum heimilt að sækjast eftir umboði almennings. Að sama skapi er almenningi frjálst að synja mönnum umboðs sem ekki eru trúir almannahag. 

Slegist um efstu sætin í borginni

Gréta styður Hamas

Gréta Thunberg, sænski loftslagsunglingurinn, tekur afstöðu með hryðjuverkasveitum Hamas gegn Ísrael með færslu á félagsmiðli. Samkvæmt þýsku útgáfunni Die Welt sakar Gréta Ísraelsmenn um stríðsglæpi.

Þjóðverjar eru, af sögulegum ástæðum, næmir á gyðingahatur. Kanslaraefni Kristilegra demókrata, Armin Laschet, segir orð Grétu ekki vel ígrunduð.

Þýski græninginn Volker Beck spyr Grétu í tísti hvort eldflaugaárásir Hamas bæti loftslagið. Sú sænska á eftir að svara.

 

RÚV virkjar Panama-bandalagið fyrir Helga Seljan

Helgi Seljan var úrskurðaður brotlegur við siðareglur RÚV í ákefð sinni að koma höggi á Samherja. Eftir úrskurðinn leggur hagsmunahópurinn á Efstaleiti ofurkapp á að sannfæra alþjóð að Samherji sé vondi kallinn en Helgi góði gæinn. Nýjasta tilraunin er að virkja bandalag fréttadeildar RÚV við þýska dagblaðið Süddeutsche Zeitung.

Eins og menn eflaust muna bjó hagsmunahópurinn á Efstaleiti til fjölmiðlastorm fyrir fimm árum sem felldi ríkisstjórn Íslands og svipti nokkra menn ærunni. Í kynningu RÚV á Panamaskjöldum segir:

Þátturinn var unnin í samstarfi við Reykjavik Media, Alþjóðasamtök rannsóknarblaðamanna og þýska blaðið Süddeutsche Zeitung.

Og núna, fimm árum síðar, er bandalag RÚV og Süddeutsche Zeitung endurvakið til að rétta hlut Helga Seljan í Samherjamálinu. ,,Hryðjuverk gegn fjölmiðlum," segir þýski fjölmiðillinn og lætur eins og Helgi siðabrotlegi megi ekki vamm sitt vita í sannleiksleitinni. 

Velþekktur samstarfsfjölmiðill RÚV á Íslandi, vinstriútgáfan Kjarninn, er svo fenginn til að útlista á íslensku boðskap þýska samstarfsaðila hagsmunahópsins á Efstaleiti.

Á meðan heldur RÚV áfram að gera hlut Samherja sem verstan og grefur í leiðinni undan íslenskum viðskiptahagsmunum.

Panamaskjölin voru ekki til, rétt eins og meint skjal sem Helgi veifaði í upphafi Samherjamála fyrir bráðum áratug. En hagsmunahópurinn á Efstaleiti svífst einskins við að telja alþjóð trú um að hvítt sé svart.

 

Kínaveiran og farsóttarvarnir

,,Færð eru rök fyr­ir því að taka þurfi viðvör­un­ar­kerfi í gegn á heimsvísu," segir í viðtengdri frétt um upphaf faraldursins sem veiran frá Kína er ábyrg fyrir.

Til að það gangi eftir má ekki láta skjólstæðinga Kínaveldis ráða ferðinni í alþjóðastofnunum.

Til þess eru vítin að varast.

Röð mistaka leiddi til heimsfaraldursins

Meiri CO2 þýðir meiri skógur - hver er á móti því?

Koltvísýringur, CO2, er fæða plantna. Aukið magn koltvísýrings í andrúmlofti jarðar eykur fæðuframboðið og skóglendi þrífst betur. 

Til skamms tíma var sú skoðun einráð að koltvísýringur væri eiturgufa er ylli hækkandi hitastigi jarðar og gerði hana óbyggilega innan fárra áratuga.

En koltvísýringur er náttúruleg lofttegund og forsenda lífs á jörðinni. Á seinni hluta 19. aldar mældist CO2 undir 300 ppm í andrúmsloftinu, sem er hættulega lítið. Magnið hefur stigið upp í rúm 400 ppm sem er gott mál og eykur grænan vöxt. Þeir sem efast ættu að gera tilraun á sjálfum sér. Fara inn í gróðurhús, en kjörvöxtur plantna er við um 1200 ppm, og spyrja sig hvort endalok lífs á jörðinni séu nærri.

Loftslagsvísindamaðurinn William Happer gerir prýðilega grein fyrir hversu heppilegt það er að koltvísýringur eykst í andrúmslofti. Þá er hægt að afla sér upplýsinga á vefsíðum eins og CO2.

Svo er auðvitað hinn kosturinn, að trúa á manngert veðurfar og að heimurinn sé að farast vegna koltvísýrings í andrúmslofti. Þá er maður kannski til vinstri en alls ekki grænn, - fjarri því.

Endurheimt skóglendis á stærð við Frakkland

Sósíalistar í rekstri, tapa 48 milljónum

Efling, rekstarfélag sósíalista á vinnumarkaðnum, tapaði 48 milljónum króna á síðasta ári.

Launþegar eru skyldaðir að greiða í sjóði Eflingar. Í fyrra innheimti sósíalistafélagið yfir tvo milljarða í nauðungargjöld af vinnandi fólki.

Þrátt fyrir áskrift að tekjum tekst Eflingarsossum að skila taprekstri.

Sósíalistar í félagi með Viðreisn og Samfylkingu boða stóraukin ríkisafskipti í sjávarútvegi og fasteignamarkaði. 

Rökin eru þau að sósíalistar og vinstrimenn kunna svo vel til verka í rekstri.

Jamm.

Efling tapaði 48 milljónum

Gemmér pening, ég á fjölmiðil

Ritstjóri Kjarnans skrifar langan leiðara með þeim skilaboðum að hann eigi fjölmiðil og vilji fá peninga úr ríkissjóði til rekstursins. Stjórnmálamenn sem ekki opna pyngju almennings í fjölmiðlahítina, tja, þeir hata fjölmiðla. Segir ritstjórinn.

Á mælistiku ritstjóra Kjarnans leggja stjórnmálamenn ofurást RÚV enda er mokað þangað ótöldum milljörðum króna á ári af almannafé.

Ekki svo að skilja að Þórður Snær Júlíusson krefjist aukins aðhalds gagnvart hagsmunahópnum á Efstaleiti. Öðru nær, Þórður Snær er fastagestur í settinu hjá RÚV að tjá sig um menn og málefni, og vill alls ekki að skorið sé á fjárstreymið til hagsmunahópsins.

En ritstjórinn vill líka opinbert fé til sín og Kjarnans, sem er valinkunn samfylkingarútgáfa og gerir ekki annað en að skila tapi. Tómstundaiðju vinstrimanna skal ríkið borga með góðu eða illu. Þingmenn sem ekki spila með hata fjölmiðla.

Viðreisn og Samfylking stefna á bæjarútgerð

Af umræðum á alþingi er að skilja að Þorgerður Katrín Viðreisnarforingi og Logi fylkingarformaður stefni á bæjarútgerðir.

Ekki kemur á óvart að Samfylkingin vilji opinberan rekstur en nýrra ber við er Viðreisn daðrar við sameignarstefnuna.

Hætt er við að heldur drægi úr arðseminni þegar útgerðin er komin á forræði stjórnmálamanna. En þá má alltaf skammta lífskjörin með margvíslegum höftum. Stjórnmálamenn kæmust í feitt en almenningur fengi sult og seyru.

 

Mestu útflutningsverðmætin á þessari öld

Hvaða kreppa?

Störfum fjölgar, ferðaþjónusta glæðist, bankar skila auknum hagnaði, farsóttin lætur undan síga og vorið er blítt.

Kreppan virðist farin áður en hún almennilega nam land.

Ástandið er að vísu kvikt, eins og sagt er á hagfræðimáli, þegar óvissa er á markaði. En það erfitt að vera ekki bjartsýnn á framhaldið. 

Bókunum fjölgar ört

Sölva saga Tryggvasonar og réttlætið

Maður er nefndur Sölvi Tryggvason. Hann kemur fram opinberlega og segir sóst eftir mannorði sínu með tilhæfulausum ásökunum um kynferðisbrot. Líða svo tveir til þrír dagar. Kemur þá fram ákæra og vitnisburður um að Sölvi sé ekki jafn saklaus og hann vill vera láta. Sölvi tékkar inn á geðdeild en sölvískur stormur skekur samfélagið.

Sölva saga Tryggvasonar er um tilraun til að afla sér samúðar sem snýst upp í andhverfu sína, leiðir til fordæmingar. Í upphafi sögu er Sölvi fórnarlamb en varla er tveim blaðsíðum flett og sá grátbólgni er orðinn gerandi. Sagan er sögð í fjölmiðlum og á félagsmiðlum. Sölvi er nafnkenndur í aðalhlutverki, ónefndar konur í stórum hlutverkum og heil hrúga af fólki í aukahlutverki; þeir sem studdu aðalleikarann í upphafi, sneru síðan við honum baki og svo hinir sem keyptu ekki fyrstu útgáfu fórnarlambsfrásagnarinnar en biðu færis.

Á yfirborðinu virðist sagan um réttlæti og ranglæti, sakleysi og sekt, tilræðismann og fórnarlamb. En undir niðri er önnur frásögn um samfélagið okkar. Þar takast á tvö meginsjónarmið. Í fyrsta lagi að hér þrífist stórglæpamenn í kynferðismálum sem að mestu óáreittir komast upp með að leggja líf kvenna í rúst með nauðgunum og ofbeldi. Í öðru lagi að við búum í réttarríki þar sem sekt þarf að sanna áður en menn eru dæmdir. 

Í orði kveðnu eiga fylkingar meginsjónarmiðanna það sameiginlegt að krefjast réttlætis. En sá misskilningur svífur yfir vötnum að ásakanir og gagnásakanir í fjölmiðlum og félagsmiðlum skili sér í réttlæti. Forsenda réttlætis er íhygli og yfirvegun um málsatvik, atvikalýsing og sönnunarfærsla. Sú málsmeðferð er ekki í boði á félagsfjölmiðlum.

Hliðarafurð yfirstandandi frásagnar er að fólk fær tækifæri að játa syndir sínar á altari félagsfjölmiðla. Trúarleg stef er þar að finna. Sölvi er til dæmis ekki nefndur á nafn í viðtengdri frétt. Í frumstæðri trúariðkun er djöfullinn svo alltumlykjandi að það eitt að nefna hann er synd.

Lærdómurinn í Sölva sögu Tryggvasonar er að trúa frekar hægt en hratt. Jafn freistandi og það er að stökkva á fordæmingarvagninn þegar hann fer framhjá verður óþægilegt að sitja eftir með sárt ennið þegar annar vagn sýnu stærri og margmennari þýtur í gagnstæða átt.

Svo er það þetta lítilræði með samfélagið okkar. Það er ekki fullkomið en í samanburði við flest ef ekki öll önnur þá er það harla gott. Gleymum því ekki.

„Ég gerðist skólabókardæmi um meðvirkni“