Jákvætt að efnahagshorfur versni

Hrunið kenndi okkur að spenna bogann ekki of hátt. Eftir sjö feit ár koma sjö mögur, segir í gamalli bók, og haft til marks um að efnahagslegur vöxtur er ekki línulegur heldur kemur hann með rykkjum og skrykkjum.

Við teljum okkur trú um að kerfisbreytingar eftir hrun komi í veg fyrir annað hrun. En kerfisbreytingarnar hafa ekki þurft að standast neina prófraun. Kreppan eftir hrun stóð aðeins yfir í fáeina mánuði. Krónan og samstaða á vinnumarkaði komu okkur á beinu brautina í efnahagsmálum.

Pólitíkin glímir aftur enn við afleiðingar hrunsins. Stjórnmál eru brú á milli fortíðar og framtíðar. Samtíminn er á hverjum tíma á miðri brú og sjaldnast glöggt hvers vegna vegferðin var farin og hvert hún stefnir. Stjórnmál eiga að gefa hugmynd um hvað var og hvert stefnir. En þau líkjast meira drukknum manni en allsgáðum á miðri brú sem gæti farið afturábak eða áfram en líka fallið ofan í hyldýpið.  

Fréttir um versnandi efnahagshorfur eru jákvæðar. Við þurfum að prufukeyra lærdóminn af hruninu, hvort við séum með fyrirkomulagi okkar mála og viðhorfum í stakk búin að takast á við samdrátt og mótbyr.

Verri efnahagshorfur

Samherjagröf RÚV dýpkar

Aðeins 30 prósent tölvupósta Jóhannesar uppljóstrara Stefánssonar voru birtir á Wikileaks og eru gagnagrunnur RÚV fyrir ásakanir um spillingu Samherja í Namibíu. 

Gagnagrunnur sem nær ekki að vera nema þriðjungur af upplýsingum um Jóhannes og starf hans fyrir Samherja er ónothæfur til að bregða ljósi á hvað gerðist á vakt Jóhannesar.

Þetta er ekki í fyrsta sinn sem RÚV ræðst með offorsi á fólk og þykist veifa gögnum sem ekki eru til. RÚV leikur ítrekað þann leik að þykjast hafa heimildir sem ýmist eru ekki til eða standast ekki skoðun.

RÚV reiddi hátt til höggs og hjó í blindu hatri til Samherja. Þegar slíkt högg geigar fylgja afleiðingar. Vonandi er prestur meðal umsækjenda um stól útvarpsstjóra. Þeir kunna jarðafarir. 

„Kæri Kristinn“

Píratar í siðaklemmu Ásmundar

Píratar eru siðapostular. Þeir sjá spillingu í hverju horni og bjóðast til að ,,tækla" hana. Eftirlætisaðferð Pírata er að kreista fram úrskurð frá útlöndum um spillingu á Íslandi, samanber landsréttarmálið og mannréttindadómstólinn í Strassborg.

Nú stendur svo illa á að þingmaður Pírata, Þórhildur Sunna Ævarsdóttir, er eini þingmaður Íslandssögunnar til að hljóta þann dóm siðanefndar alþingis að hafa brotið siðareglur. Tilefnið var að Þórhildur Sunna ásakaði Ásmund Friðriksson um þjófnað.

Píratar eru sérlegir áhugamenn um að setja reglur til að lemja á mönnum og studdu heilshugar siðareglur alþingis í þeirri von að hanka mann og annan fyrir brot. En þeir gerðu aldrei ráð fyrir að siðareglurnar myndu bitna á þeim sjálfum. Þar varð þeim píratísku hált á spillingarsvellinu.

Þegar Ásmundur Friðriksson vekur athygli í útlöndum á siðabroti Pírata verður höggið þungt. Píratar vita af reynslu að þegar útlönd tala kikna hnjáliðirnir í hjörðinni. 

Siðaklemman sem Ásmundur setti Pírata í er tvöföld. Í fyrsta lagi verða Píratar að gera upp við sig hvort Þórhildi Sunnu sé sætt á alþingi eftir brot á siðareglum. Í öðru lagi hvort mark sé takandi á útlöndum þegar yfirvofandi er úrskurður óhagfelldur Pírötum.

Píratar eru ekki djúpir hugsuðir. En þeir skynja að siðaklemma Ása skekur þá píratísku hornsteina sem halda nokkrum félögum inn á þingi - í þægilegri innivinnu án mætingaskyldu.  

„Þetta bréf hans er algjör viðbjóður“

RÚV: Namibía merkilegri en hamfarir norðan heiða

RÚV sendir ítrekað fréttamenn hálfa leið yfir hnöttinn, til Namibíu, en lætur vera að senda fréttamann á hamfarasvæði á Íslandi.

Í Namibíu eru aðstæður sem hvorki fréttamenn RÚV né íslenskur almenningur þekkir til. Fréttir þaðan má kríta liðugt.

Norðurland Íslands er aftur vettvangur sem kemur okkur öllum við sem byggjum þessa eyju. Þegar RÚV afsakar fjarveru sína frá hamfarasvæðum á Íslandi með þeim orðum að ,, stund­um voru upp­lýs­ing­ar frá einni stofn­un þvert á upp­lýs­ing­ar frá ann­arri" blasir spurningin við: hvers vegna voru fréttamenn RÚV ekki á staðnum?

Hvers vegna sátu fréttamenn RÚV við símann í Efstaleiti þegar náttúruhamfarir skullu á norðurlandi en flugu reglulega til Namibíu í ómerkilegum erindagjörðum?

RÚV misnotar almannafé til að stunda fréttaskáldskap í Namibíu en sinnir ekki lögbundnu hlutverki sínu á Íslandi. RÚV er ekki trúverðug stofnun og ætti ekki að vera á framfæri almennings. 

RÚV bregst við umræðu vegna fréttaflutnings

Þórdís, orkupakkar og óskilvirkni

Beint samband er á milli orkupakka 1-3 frá ESB annars vegar og hins vegar óskilvirkum raforkumálum Íslendinga, sem leiddu til hamfaratjóns.

Orkupakkar ESB miðast við að brjóta upp raforkumál á markaði sem telur 500 milljónir íbúa. Raforkumarkaður á Íslandi á að þjóna 300 þúsund landsmönnum. Orkupakkar ESB ganga í þveröfuga átt við þarfir Íslendinga.

Það þarf pólitíska forystu til að framfylgja þjóðarhagsmunum í raforkumálum Íslendinga. Er Þórdís iðnaðar að vakna upp af þyrnirósasvefni ESB-lausna?

„Tætingslegt og óskilvirkt“

Ónýta Ísland vinstrimanna: pólsk-íslenska dómaramálið

Vinstrimenn, með aðstoð RÚV og heimaríkra lögmanna, báru Ísland út og gerðu þjóðinni skömm til með því að afflytja ástæður þess að Sigríður Á. Andersen, þáverandi dómsmálaráðherra, gætti kynjajafnréttis við skipun dómara í landsrétt.

Ónýta Ísland, var viðkvæði vinstrimanna í málflutningi. Dómur Mannréttindadómstólsins í Evrópu var svindl æskuvinanna Robba og Villa.

Svindlið þjónaði tilgangi sínum. Íslandi var stillt upp sem pólsku vandamáli þar sem ríkisvaldið hlutast til um niðurstöður dómstóla.

Heimaríku lögmennirnir, sem öllu vilja ráða um skipan dómara, breyttu aðferðafræði sinni þar sem hún hélt ekki vatni. Lögmannaelítan sýndi sig dómgreindarlausa í landsréttarmálinu. Enda vinstrimenn þar fyrirferðamiklir.

Horfið frá reiknileið í dómaravali

Kristinn og RÚV blekkja - birtu einkapósta

Tölvupóstar Jóhannesar uppljóstrara voru ekki birtir af ,,til­lits­semi við al­menna starfs­menn fyr­ir­tæk­is­ins sem ég er viss um að eru upp til hópa sóma­fólk," segir Kristinn Hrafnsson ritstjóri Wikileaks. RÚV birtir frétt Kristni til stuðnings. En Kristinn og RÚV fara með rangt mál.

Viljinn birtir fjölmörg dæmi um að tölvupóstar um einkamálefni fóru úr tölvu Jóhannesar á síðu Wikileaks.

Kristinn og RÚV eru flæktir í eigin spuna. Tölvupóstar Jóhannesar voru valdir með það í huga að sýna fram á sekt Samherja og draga fjöður yfir hlut Jóhannesar. Allar líkur stand til að tölvupóstum sem féllu ekki að spunanum hafi verið sópað undir teppið.

Eins og Kristinn sagði í upphafi RÚV-spunans: það þarf að ,,mat­reiða og verka þessi mál."

Rangt að Jóhannes hafi handvalið tölvupósta

Trump, Kína og hugmyndafræðin

Hvers vegna nær Trump árangri gagnvart Kína, sem misbeitir ríkisvaldinu í þágu útflutningsiðnaðar?

Jú, Trump notar sömu vopn og Kínverjar, setur á tolla eftir þörfum.

Obama, Bush og Clinton, forverar Trump, voru allir fangar hugmyndafræði. Ekki þeirrar kommúnísku heldur hugmyndafræðinnar um að frjáls viðskipti séu æðst gæða. 

Trump er ekki maður hugmyndafræði heldur hagnýtra lausna.

Markaðir bregðast vel við yfirlýsingu Trumps

Viljinn tekur RÚV í nefið

Jóhannes Stefánsson uppljóstrari sagði RÚV eina sögu um mútugjöf í Namibíu en útskýrði sömu mútugreiðslu á annan hátt í viðtali við Al Jazeera, að því er kemur fram í Viljanum.

Þá kemur einnig fram að Jóhannes hafi kokkað upp langtímaleigusamninga eftir að lögfræðingur Samherja krafði hann um skýringar á fjárútlátum. Einleiknum í Namibíu pakkaði uppljóstrarinn saman í ótrúverðuga frásögn sem RÚV keypti hráa.

Viljinn er lítill netmiðill sem tekur RÚV í nefið. Milljarðarnir sem renna frá ríkinu í Efstaleiti eru ekki notaðar til að segja fréttir heldur búa þær til.

Dregur mútugreiðslur í efa

Ríkisvald, landamæri og lýðræði: Trump, Boris og Pútín

Frjálslyndir og vinstrimenn aðhyllast hugmyndafræði sem felur í sér mótsögn: lýðræði án landamæra. Blekkingin að baki hugmyndafræðinnar er að frjálsri verslun fylgi algild mannréttindi.

Frjáls verslun kemur úr ranni frjálslyndra en lýðræði án landamæra frá sósíalistum. Evrópusambandið er háborg blekkingarinnar.

Boris Johnson þakkar kjósendum Verkamannaflokksins stuðninginn í nýafstöðum þingkosningum í Bretlandi, sem Íhaldsflokkurinn sigraði í undir formerkjunum ein þjóð, ein landamæri. Boris strýkur meðhárs þeim sósíalistum sem sáu ljósið, rifu sig frá blekkingunni. 

Sigur Johnson og Íhaldsflokksins var tap Frjálslynda flokksins, sem vill Bretland áfram í ESB, og Verkamannaflokksins sem krafðist opinna landamæra.

Öflugustu stjórnmálamenn síðustu ára; Trump í Bandaríkjunum, Pútín í Rússlandi og Johnson í Bretlandi fylgja þeirri stefnu að lýðræði er óhugsandi án landamæra. Borgaraleg réttindi, mannréttindi, eru aðeins tryggð með ríkisvaldi og landamærum. Samræmt hatur frjálslyndra og vinstrimanna á þremenningunum staðfestir meginvíglínu vestrænna stjórnmála.

Hugmyndafræði frjálslyndra og vinstrimanna um lýðræði án landamæra leyfir hvaða öfgamanni sem er að vaða á skítugum skónum inn í vestrænt lýðræðisríki og haga sér eins og apaköttur í nafni mannréttinda sem öfgamaðurinn þó fyrirlítur.

Almenningur skynjar mótsögnina og kýs til valda menn sem virða landamæri, trúa á fullveldi þjóða og hafna mótsögninni um lýðræði án landamæra. 

Aðeins ríkisvald tryggir mannréttindi. Á vesturlöndum fær ríkisvaldið umboð sitt frá almenningi sem framselur einstaklingsrétt sinn í nafni sameiginlegra gilda um hvernig málefnum samfélagsins skuli háttað. Af þessu leiðir getur ekki hvaða apaköttur sem er orðið þegn samfélagsins. Hann þarf að játast grunngildum samfélagsins sem hann æskir aðild að.

Hér heima eru eftirfarandi stjórnmálaflokkar bandingjar blekkingarinnar um lýðræði án landamæra: Samfylkingin, Viðreisn, Vinstri grænir og forysta Sjálfstæðisflokksins. Framsókn ekur seglum eftir vindi, eins og jafnan. Aðeins Miðflokkurinn er réttu megin víglínunnar.  

Þakkar stuðningsmönnum Verkamannaflokksins