Rósa B. skiptir um flokk og gerir hávaða

Þingmaður Samfylkingar frá í gær, Rósa B. Brynjólfsdóttir, gerði hávaða á alþingi í dag.

Tilefni hávaðans er MDE-dómurinn sem m.a. kvað á um að alþingi hefði átt að greiða atkvæði um hvern og einn dómara til landsréttar en ekki alla í heild.

Hávaðinn í Rósu gekk út á að gera dómsmálaráðherra ábyrgan fyrir afgreiðslu alþingis.

Ekki smekklegt, en talar til innvígðra í Samfylkingu sem á næstunni ákveða hvort Rósa fái úthlutað sæti á framboðslista er gefi von um þingmennsku.

Hróp og frammíköll í þinginu

EES-andstaða vex í Noregi

Andstaða við EES-samninginn, sem bæði Ísland og Noregur eiga aðild að, vex í Noregi. Miðflokkur þeirra Norðmanna, sem mælist stærstur í könnunum, er fylgjandi tvíhliða samningi við Evrópusambandið er kæmi í staðinn fyrir EES.

EES-samningurinn er 25 ára gamall og var hugsaður fyrir þjóðir á leið inn í Evrópusambandið. Bæði Íslendingar og Norðmenn hafna aðild að sambandinu og því er samningurinn tímaskekkja.

En Evrópusambandið hótar lokun markaða ef þjóðir segja sig frá EES. Á seinni tíð er samningurinn notaður til að auka ítök ESB í náttúruauðlindum Íslands og Noregs, samanber orkupakka frá Brussel þar sem ESB tekur sér heimild til að setja orkustefnu fyrir fullvalda ríki eins og Ísland og Noreg.

 

Lífskjörin best í Noregi

ESB-sinni í Samfylkinguna

Rósa Björk var kjörin á þing fyrir Vinstri græna en var aldrei innanbúðar þótt þingsætið væri gott. Rósa Björk sagði sig úr þingflokknum með þeim rökum að henni hugnaðist ekki samstarfið við Sjálfstæðisflokkinn.

Nú er Rósa Björk gengin til liðs við Samfylkinguna.

En Samfylkingin getur ekki beðið eftir því að komast í eina sæng með Sjálfstæðisflokki.

Hvað gerir Rósa Björk þá?

Rósa Björk gengur til liðs við Samfylkinguna

Ódeigur þingmaður á huglausu alþingi

Alþingi lét MDE-dómstólinn í Evrópu vaða yfir sig á skítugum skónum með þeirri athugasemd að þingheimur hefði átt að greiða atkvæði um hvern og einn dómara sem skipaðir voru í nýjan landsrétt.

Ólafur Ísleifsson þingmaður afþakkar sameiginlegt hugleysi þingheims og segir:

Hver og einn alþing­ismaður gat kallað eft­ir ann­arri fram­kvæmd. Þetta þýðir að at­kvæðagreiðslan fór fram sam­kvæmt ákvörðun Alþing­is, ákvörðun lýðræðis­lega kjör­inna full­trúa á full­valda lög­gjaf­ar­sam­komu þjóðar­inn­ar.

Alþingi í heild sinni, hver og einn þingmaður, ákvað sem sagt að greiða atkvæði um einn lista dómara. Fyllilega lýðræðisleg og lögmæt afgreiðsla sem enginn með óbrjálaða dómgreind getur efast um. Í stað þess að standa í ístaðinu og vísa spanóruglinu til evrópskra föðurhúsa lyppast fulltrúar þjóðarinnar niður og kyssa vöndinn. Næsta haust þarf virkilega að grisja þingheim.

„Enginn segir Alþingi fyrir verkum. Enginn!“

Líkami, hugmynd og heimska

Fyrsta setningin í greinargerðinni með frumvarpinu um kynrænt sjálfstæði, þar sem Simmi og Palli skiptust á skotum, er svohljóðandi:

Hluti fólks með ódæmigerð kyneinkenni skilgreinir sig sem intersex, sem stundum er útskýrt svo að það nái yfir breitt svið af meðfæddum líkamlegum einkennum sem liggi á milli staðlaðra hugmynda um karl- og kvenkyn. (Undirstrikun pv)

Líkami og líkamshlutar eru, eins og flestir ættu að vita, áþreifanleg fyrirbæri. Hugmyndir á hinn bóginn eru hugsanir, stundum studdar rökum en oft bull, heimska og kjaftæði.

Efnislegt innihald setningarinnar er þetta: kyn er hugmynd.

Sá sem trúir því að kyn sé hugmynd en ekki líffræðileg staðreynd heldur sennilega líka að Vestmannaeyjar séu stöðuvatn.

 

„Hvers lags þvættingur er þetta?“

Konur 85% í hópi um kynfræðslu, karlar 15%

Í starfshópi um eflingu kynfræðslu í grunn- og framhaldsskólum eru 11 konur en 2 karlar. Hlutföllin eru 85 prósent á móti 15.

Snjallar konur en heimskir og utangátta karlar, eru skilaboðin frá ráðuneyti mennta.

Hlutverk hópsins er að gera ,,til­lögu að fram­kvæmd kennslu í kyn­fræðslu og of­beld­is­for­vörn­um." Kynlíf og ofbeldi er sem sagt tvær hliðar á sömu myntinni. Í gamla daga var talað um býflugurnar og blómin. 

Nútímalegt og í anda kvenvæðingar skólakerfisins að spyrða ofbeldi saman við æxlun.

 

 

 

Sólborg leiðir starfshóp um kynfræðslu

Kófið, opin samfélög og lokuð

Öðrum þræði eru sóttvarnir samfélagsverkfræði. Yfirvöld í hverju þjóðríkinu á fætur öðru meta hversu langt má ganga í lokun áður en upp úr sýður. Þolinmæði almennings er viðmiðið. Hversu mikla sýkingu almenningur þolir annars vegar og hins vegar hve miklar lokanir.

Drög að niðurstöðum tilrauna með samfélagsverkfræði liggja fyrir. Ein er að ríkisvaldið í vestrænum ríkjum er sterkara en af var látið. Ekki er langt síðan að samhljómur var um að alþjóðavæddur markaður í einn stað og í annan stað alþjóðastofnanir myndu ganga af þjóðríkinu dauðu. Kófið sýnir á hinn bóginn þjóðríkið sterkt og tilbúið til átaka.

Önnur niðurstaða er að vinstrimenn í töluverðum mæli rífa sig lausa frá bandalagi við frjálslynda um opið samfélag og krefjast harðari lokunarstefnu en hægrimenn. Þetta sést á jafnólíkum stöðum og Íslandi og Nýja-Sjálandi.

Samfélög geta bæði lokað sig út á við, gagnvart umheiminum, og inn á við með takmörkunum - lokunum - á innlendri starfsemi.

Sterkara ríkisvald, og hvernig á að beita því, verður sennilega fyrirferðamikið pólitískt álitamál þegar kófi linnir.

„Hollandi verður lokað í fimm vikur“

Unglingar í kófinu, frá staðnámi til fjarnáms

Óvænt niðurstaða könnunar á líðan framhaldsskólanema í farsótt. Í nokkrar vikur komast þeir ekki skólann, stunda fjarnám, og líður tiltölulega vel. Þeir sofa betur og verða síður fyrir einelti, áreitni og ofbeldi. 

Umhugsunarvert. Fréttir segja að unglingum dauðleiðist og foreldrar séu í basli með að halda börnunum sínum sæmilega upplitsdjörfum.

Mannlífið er þannig að fólk þrífst misjafnlega við ólíkar aðstæður. Án efa getur margur unglingurinn ekki beðið eftir að hitta reglulega jafnaldra sína. Aðrir eru giska sáttir að losna undan skólasókn og þroska með sér sjálfstæð vinnubrögð.

Skólaþróun næstu ára breytist við þessi tíðindi, fái þau frekari staðfestingu. Ef vænt hlutfall nemenda kýs fremur fjarnám en staðnám verður óskað eftir framhaldi þegar kófi lýkur.. Kennarar eru komnir með þjálfun og reynslu í fjarkennslu og margur eflaust tilbúinn að halda áfram á þeirri braut.

Þegar saman fer eftirspurn og framboð hljóta skólar að auka fjarnám á kostað staðnáms. Ekki síst þegar ríkið kveikir á sparnaði sem af hlýst. Skólabyggingar binda mikið fjármagn.

Sofa betur og upplifa minni kvíða

Vinstri grænum ekki treystandi fyrir náttúrunni

Náttúran er ekki manngerð, það gerir hana spennandi og eftirsóknarverða. Vinstri grænir, á hinn bóginn, vilja manngera náttúruna og setja reglur hægri vinstri um aðgang að henni.

Í höndum Vinstri grænna eru víðernin tannhjól í gangverki ríkisvaldsins. Náttúran verður álíka spennandi og skattaframtalið.

Þess vegna erum við örlítill-grenjandi-minnihlutinn sem afþökkum forræðishyggju Vinstri grænna.

Hálendisþjóðgarður umdeildur

Lilja niðurgreiðir Helga og Viðreisn

Helgi Magnússon fjárfestir gerir út stjórnmálaflokk, Viðreisn, og útgáfu, Fréttablaðið og fleiri miðla. Samlegðaráhrif eru töluverð. Fjölmiðlaútgáfa styður við flokksútgerð og á alþingi eru sett lög sem m.a. hafa áhrif á fjölmiðla.

Nú setur Helgi 600 milljónir í útgáfuna enda kosningaár í vændum. Allir raftar skulu á sjó dregnir. Helgi útskýrir að kófið sé ástæðan. Líklega dýrt að láta blaðamenn fylgjast með fundum þríeykisins á einum skjá og skrifa fréttir á annan skjá.

Á alþingi lagði Lilja Alfreðs ráðherra mennta fram frumvarp um fjárhagsstuðning við fjölmiðla. Viðreisn, sem nýlega lagði áherslu á frjálshyggju og einkaframtak, sneri við blaðinu og studdi framlag úr ríkissjóði til fjölmiðla Helga. Samlegðaráhrifin eru sterkari en pólitísk sannfæring.

Helgi setur 600 milljónir inn í Torg