RÚV, Sigríður og Svandís

Ef Sigríður Andersen væri heilbrigðisráðherra myndi RÚV fara hamförum og leiða fram vitni eftir vitni um klúður ráðherra Sjálfstæðisflokksins við að tryggja þjóðinni bóluefni.

En það er Svandís Svavarsdóttir úr Vinstri grænum sem er heilbrigðisráðherra. Og RÚV stendur með sínum en glefsar í aðra.

Á Efstaleiti þykjast menn reka fréttastofu. Í raun er þar áróðursmiðstöð vinstrimanna sem dregur fjöður yfir mistök skjólstæðinga sinna en gerir úlfalda úr mýflugu þegar Sjálfstæðisflokkur og Miðflokkur eiga í hlut.

Katrín leitar að bóluefni

Ísland í ESB-klúðrinu (staðfest)

Evrópusambandið klúðraði skipulagi á bólusetningum vegna Kínaveirunnar, skrifaði Morgunblaðið fyrir tveim dögum og byggði á Der Spiegel: 

Vegna seina­gangs og rangra ákv­arðana mun bólu­setn­ing ganga mun hæg­ar fyr­ir sig í ríkj­um Evr­ópu­sam­bands­ins en gert var ráð fyr­ir og far­ald­ur­inn ráða leng­ur ríkj­um en ella.

Nú staðfestir heilbrigðisráðuneyti Vinstri grænna að Ísland er í miðju klúðrinu.

Hvernig í veröldinni stendur á því að Ísland er hlekkjað við ónýtt ESB-kerfi? Hvað er að mannskapnum í stjórnarráðinu? Hvers vegna er bóluefni ekki keypt beint frá framleiðanda?

 

Ísland fái hlutfallslega sama magn bóluefna

Náttúruvinir - og óvinir

Til skamms tíma naut náttúrvernd almenns stuðnings. Fólk studdi sjálfbærni, skildi verðmæti ósnortinna víðerna og galt varhug við hagvexti á kostnað náttúru.

Öfgamenn úr röðum meintra náttúruvina nýttu sér undirtektir almennings til að skerða og skammta þau lífsgæði sem náttúran býður. Í ofanálag tók að bera á mannfjandsamlegum viðhorfum þeirra meintu réttlátu.

Ef meintir náttúruvinir temja sér ekki meiri hófstillingu í afstöðu og málflutningi mun náttúruvernd líða fyrir. Sem ekki er vel gott.

Umræðunni ekki lengur handstýrt af fámennum hópi

ESB tekur æðiskast gegn Bretlandi

Með engum fyrirvara loka ESB-ríki á samgöngur við Bretland. Tylliástæðan er nýtt afbrigði Kínaveirunnar sem greindist í Bretlandi.

Ráðgjafi þýskra stjórnvalda í farsóttarfræðum segir allar líkur á að breska afbrigðið af Kínaveirunni sé löngu komið til meginlandsins.

Úrsögn Breta úr Evrópusambandinu, Brexit, er raunveruleg ástæða skyndilokunar á eyríkið.

Fjöldi Evrópuríkja lokar á Bretland

ESB-trygging fyrir bóluefni einskis virði

Fyrir nokkrum dögum var aðaluppsláttur RÚV og fleiri fjölmiðla að Evrópusambandið tryggði Íslandi næg bóluefni gegn Kínaveirunni.

Eitthvað er sú trygging léleg að mati fréttaveitunnar Bloomberg.

Hvað eru íslensk yfirvöld að hugsa þegar þau veðja á Evrópusambandið til að útvega bóluefni?

Stjórnarráðið leiðréttir Bloomberg

Arabíska vorið tíu ára

Tíu ár eru síðan ungur maður í Túnis, Mohamed Bouazizi, kveikti í sér til að mótmæla spillingu yfirvalda. Íkveikjan hratt af stað mótmælaöldu í múslímaríkjum í Norður-Afríku og miðausturlöndum sem kölluð er arabíska vorið.

Arabíska vorið var kynnt sem lýðræðisvakning. Uppgjöri við ríkjandi þjóðskipulag fylgja blóðsúthellingar heima fyrir og útlend hernaðarafskipti, gerðist bæði í frönsku byltingunni 1789 og þeirri rússnesku 1917.

Sýrlenska borgarastríðið var afleiðing arabíska vorsins. Þar hélt Assad forseti völdum með stuðningi Rússa á meðan Bandaríkin studdu uppreisnarhópa. Í Líbýu tapaði Gadaffi völdum og lífi og landið klofnaði.

Breska útgáfan Guardian stóð fyrir könnun á viðhorfum Araba til pólitíska vorsins fyrir áratug. Almennt finnst fólki lítið sem ekkert hafa áunnist. Frelsi og hagsæld láta á sér standa en spillingin jafn víðtæk og fyrrum.

Franska byltingin og rússneska voru öðrum þræði uppgjör við kaþólska trúarmenningu annars vegar og hins vegar rétttrúnaðarkirkjuna. Trúarmenning löghelgar skipan samfélagsmála. 

Í arabíska vorinu fór lítið fyrir uppgjöri við múslímska trúarmenningu. Klerkaríkið Íran og fjölskylduríkið Sádí-Arabía stóðu keik, og standa enn, hvort fyrir sína útgáfu af íslam, shíta og súnní.

Á meðan trúarmenningin stendur á miðaldastigi er borin von fyrir múslíma að búa sér til samfélag mannréttinda, hagsældar og lýðræðis.

Ekki kaldara á Íslandi i 8000 ár - ný rannsókn

Meðalhiti á Íslandi er 3-4 gráður lægri en síðustu  átta þúsund árin, samkvæmt nýrri rannsókn Áslaugar Geirsdóttir jarðvísindamanns og félaga. Niðurstöður Áslaugar eru stórfréttir í loftslagsumræðunni, sjá hér og hér.

Aðeins í lok 19. aldar var álíka kalt á Íslandi og nú um stundir.

Pólitísk umræða gengur út á hamfarahlýnun. Vísindin segja allt aðra sögu. Fyrr á tíð var hlýrra. Ef maðurinn gæti stjórnað veðrinu, sem hann getur ekki, ætti að snarhækka meðalhita. En Vinstri grænir og alþjóðlegir sálufélagar heimta að við eyðum stórfé í að lækka hitastigið sem þegar er alltof lágt í sögulegu samhengi.

 

Trump getur og kann, ESB ekki

Trump bólusetur Bandaríkjamenn með skilvirkni og hraða en Evrópusambandið er eins og þriðja heims ríki. Evrópa verður ekki bólusett fyrr en næsta vetur. Á þessa leið greinir þýska útgáfan Der Spiegel stöðu mála.

Evrópusambandið gerði flest vitlaust i upphafi Kínafaraldursins. Þjóðríkin tóku málin í sínar hendur og reistu farsóttarvarnir á landamærum. Þegar kom að bólusetningu tryggði Brussel sér forræði mála og hugðist sýna mátt sinn og megin. En það fór allt í klúður, segir Der Spiegel.

Trump þótti ekki standa sig nógu vel í farsóttinni og bandarískir kjósendur skiptu honum út. Evrópskir kjósendur sitja máttvana uppi með Evrópusambandið og fá ekki að kjósa burt ónýtt yfirvald.

ESB missti af bóluefnislestinni

Örlítill grenjandi fávitaháttur

Vinstri grænir eiga bágt. Uppruni þeirra er marxismi sem, eins og þeir vita er kunna að draga til stafs í pólitík, er illgjörn fáviska uppmáluð.

Eftir marxískan kapítalisma stukku Vinstri grænir á manngert veður sem helstu ógn mannkyns. Aðeins sá sem ekkert kann um náttúruna trúir því að hún sé stöðug með meðalhita er hentar stofukomma.

Hliðarafurð náttúrumarxisma Vinstri grænna er að þeir trúa að karlkyn og kvenkyn séu manngerðar hugmyndir en ekki líffræðileg staðreynd. Kynin hjá Vinstri grænum eru jafnmörg jólasveinunum.

Og nú þegar Vinstri grænir fá ekki að stjórna hálendi Íslands segja þeir landsmenn ,,örlítinn grenjandi minnihluta." Vinstri grænir eru, þrátt fyrir allt, trúir uppruna sínum: illgjarnri fávisku.

Tekist á um hinn „grenjandi minnihluta“

Sænsk, dönsk og íslensk farsótt

Danir loka landinu yfir hátíðarnar vegna Kínaveirunnar. Svíar eru með böggum hildar og segja óþarflega marga látna í farsóttinni.

Á Íslandi er aðra sögu að segja. Víst hefur farsóttin tekið sinn toll, bæði í andlátum, veikindum og efnahagslegum búsifjum.

En í samanburði við danska og sænska frændur erum við í góðum málum.

Konungurinn telur að Svíum hafi mistekist