Franska útgáfa Kínaveirunnar og ferðamenn

Tveir franskir ferðamenn virðast, sjálfsagt óviljandi, stóraukið nýgengi smita í yfirstandandi farsótt.

Ekkert athugavert er kenna smit við Frakkland, ekki frekar en að kenna kórónuveiruna við Kína en það er upprunaland veirunnar.

Kórónuveiran berst með ferðamönnum, hvort heldur íslenskum eða erlendum. Það er mergurinn málsins. Öflugar smitvarnir á landamærum er forsenda árangurs í baráttunni innanlands við veiruna.

Ummæli Þórólfs um Frakkaveiru óheppileg

Veiran þjappar saman pólitíkinni

Ólíkt hruninu 2008, sem splundraði pólitíkinni hér á landi, þá þjappar farsóttin 2020 saman pólitíska litrófinu.

Hrunið framkallaði niðurbrot þar sem hver höndin var uppi á móti annarri. Á meðan hrunið var manngerðar hamfarir er veiran utanaðkomandi ógn.

Það verður minna svigrúm fyrir pólitíska sérvisku, meiri áhersla á það sem sameinar.

Fátt er svo með öllu illt að ei boði nokkuð gott.

Allir flokkar í samstarf á Akureyri

Strax er ekki í boði í kórónukreppunni

Enginn veit hve kreppan kennd við farsóttina varir lengi. Hitt er vitað að kreppan er alþjóðleg. Við þessar aðstæður er ekki hægt að móta efnahagsstefnu til framtíðar.

Aðeins er að hægt að grípa til skammtímaráðstafana er taka af mesta höggið og huga að innviðum. Stjórnvöld vinna í þeim anda og gera það nokkuð vel.

Bjartsýnar spár gera ráð fyrir að um áramótin sé veiran gengin um garð. En kannski ekki fyrr en næsta vor. með hækkandi sól og bóluefni.

Farsóttin er æfing að lifa við óvissu. Samfellt góðæri síðustu ára hefur gert fólk ryðgað í þeim fræðum.

Veiran dekkir horfurnar

Fótboltamenn hættir að krjúpa

Enskir knattspyrnumenn tóku upp á því að krjúpa kné í upphafi leiks í vor. Ástæðan er að vinstrimenn í Bandaríkjunum gáfu út að allir væru rasistar er ekki krupu í upphafi kappleiks. Við búum í heimsþorpi með allri þeirri vitleysu er fylgir og sauðirnir fylgja hjörðinni.

Nema hvað, enskir eru smátt og smátt að hætta að krjúpa áður en tuðrunni er sparkað. Gamall framherji, Les Ferdinand, sem nú er hjá QPR útskýrir: þetta er þykjustusamúð.

Að krjúpa sýnir auðmýkt. Þegar menn falla á kné fyrir rætinni vinstrimennsku blasir ekki við auðmýkt heldur aumingjaháttur.

Skimun á landamærum, forsenda vægari aðgerða

Tvöföld skimun á landamærum er forsenda þess að ekki þarf að fara í harðar almennar aðgerðir þótt upp komi hópsmit á afmörkuðum stöðum innanlands, s.s. skemmtistöðum.

Á meðan nýgengi smita erlendis frá er nær útilokað þarf ekki að hafa jafn harkalegar sóttvarnir innanlands og annars þyrfti.

Þokkalegar líkur eru á að smittölur síðustu daga nái hratt hámarki og lækki í kjölfarið.

Það má alveg vera bjartsýnn.

 

Hertra aðgerða ekki þörf

Múslímska bræðralagið og vinstrimenn

Múslímska bræðralagið er alþjóðlegt fyrirbæri sem stefnir á múslímavæðingu.

Náttúrulegur bandamaður þeirra eru vinstrimenn.

Hér er áhugavert 15. mín. myndband um starfsemi Bræðralagsins.

Sjónvarp, félagsmiðlar, bölsýni án sannleika

Netflix sýnir heimildaþátt um félagsmiðla, The social dilemma. Helstu viðmælendur eru ungir menn sem tóku þátt í þróun félagsmiðla en óttast afleiðingarnar.

Rökin fyrir slæmum áhrifum félagsmiðla eru, að breyttu breytanda, áþekk gagnrýni á yfirvald sjónvarpsins yfir samfélaginu undir lok síðustu aldar. Tvær kenningar úr þeirri átt, Miðillinn er merkingin eftir Marshall McLuhan og Skemmtun til ólífis eftir Neil Postman, enduróma í gagnrýninni á félagsmiðla.

Þó er einn veigamikill munur á. Sjónvarpsgagnrýnin á síðustu öld ól á þeim ótta að sjónvarpið steypti okkur öll í sama mót. Sjónvarpssannleikurinn myndi kæfa sjálfstæða einstaklinga. Þarna eimdi af hugsun kalda stríðsins um tvískiptingu heimsins, svart eða hvítt, kommúnismi eða kapítalismi. Félagsmiðlar, aftur á móti, eru ekki tvípóla heldur óreiða.

Undir lok þáttarins á Netflix segir aðalheimildarmaðurinn að við þurfum sannleika, einfaldlega til að skilja á milli þess sem er satt og ósanninda. Óreiða félagsmiðla skilar engu nema sífellt fleiri útgáfum af sannleika - sem þýðir, auðvitað, engan sannleika.

Sannleikurinn mun gera yður frjálsa, segir bók bókanna. Hafa skal það sem sannara reynist, skrifaði Ari Þorgilsson á skinnhandrit á 12. öld.

Tæknin kann að þróast en eilífðarspurningarnar fylgja okkur.

Reglur, frelsi og kæruleysi í kófinu

Sóttvarnarreglur eru virtar, segir lögreglan í Reykjavík. Í Osló er aftur kæruleysi og nýgengi smita rýkur upp. Þarna á milli liggur frelsið, að fylgja reglum til að skaða ekki samfélagið annars vegar og hins vegar að gera það sem ég vil án tillits til annarra.

Sumir í umræðunni líta svo á að allar sóttvarnir séu skerðing á frelsi. Svo er ekki. Lög og reglur þarf til að njóta frelsis. Án þeirra ríkir ástand náttúrunnar, sem er siðleysi án laga og reglna.

Lög og reglur geta kæft frelsi manna til orðs og æðis. Einkenni alræðisríkja er að ríkisvaldið skerðir athafnafrelsi einstaklinganna til að gera það úr lífi sínu sem hugurinn stendur til. 

Meðalhófið er aðalatriðið. Reglurnar þurf að vera í samræmi við aðstæður. Sameiginlegur skilningur þarf að liggja til grundvallar, annars er litið á reglurnar sem ólög.

Á Íslandi tekst að hafa sóttvarnir í því formi að allur þorri almennings sættir sig við þær. Í svokölluðum þróuðum lýðræðisríkjum austan hafs og vestan er því ekki að heilsa. Mótmæli og pólitísk ókyrrð fylgir þar glímunni við veiruna.

Það er frelsi að vera Íslendingur.

 

Allir voru með lokað og sóttvarnir til fyrirmyndar

Lilja til bjargar síðasta háskólastráknum

Ef fram heldur sem horfir útskrifast síðasti karlmaðurinn úr íslenskum háskóla á líftíma þeirra sem nú stunda háskólanám. Lilja Alfreðs er drengur góður að sporna við óheillaþróun síðustu áratuga.

Konur ráða ferðinni í skólakerfinu. Níu af hverjum tíu kennurum í grunnskóla eru konur. Þær eru í meirihluta kennaraliðs framhaldsskóla.

Kvenvæðing grunn- og framhaldsskóla leiðir til að færri drengir eru tækir í háskóla. Í skólakerfinu er litið á drengjamenningu sem aðskotahlut í helgum véum kvenna.

Háskólar mennta kennara og þar verður til sérfræðistéttin sem fer með mannaforráð í samfélaginu.

Ef annað kynið ræður ferðinni í háskólum blasir við gjaldfall menntunar. Nú þegar kvartar formaður stéttafélags háskólamenntaðra, BHM, sem auðvitað er kona, um að menntun sé ekki metin til launa.

Hvað akademíuna sjálfa varðar blasir við eyðimörk einsleitninnar. Án karla verða fræðin kerlingarbækur. Vísir þeirrar þróunar sést á sextán ára sænskri skólastelpu sem trompar viðurkennd raunvísindi með kenningu um að loftslag jarðarinnar sé manngert. Viðstöðulítil kerlingarfræði taka við og gera bábiljuna að trúarjátningu.

Lilja á verk fyrir höndum. 

Ein stærsta áskorun samfélagsins

Icelandair, almenningur og verkalýðshreyfing á villigötum

Icelandair er þjóðarflugfélag sem almenningur styður með hlutabréfakaupum. Stór verkalýðsfélög, Efling og VR sérstaklega, reyndu að bregða fæti fyrir hlutafjárútboðið en varð ekki ágengt.

Verkalýðshreyfingin er í höndum öfgafólks sem vill samfélaginu illt. Á meðan svo háttar veikist verkalýðshreyfingin jafnt og þétt.

Veik verkalýðshreyfing er ekki heppileg staða mála. En því miður verður sú raunin þegar hreyfingin er í tröllahöndum úrkynjaðrar hugmyndafræði sósíalisma.

 

Eftirspurn umfram framboð: 11 þúsund hluthafar