Engin skýrsla, heldur Excel-skjal, sem Helgi rangtúlkaði

Helgi Seljan sagði ósatt þegar hann sagðist vera með skýrslu Verðlagsstofu skiptaverð er sýndi lögbrot Samherja í útflutningi á karfa. Helgi var með í höndunum tölfræðigögn, Excel-skjal, sem fór með á milli ríkisstofnana til að fá þær til að rannsaka Samherja.

Skattrannsóknastjóri gerði RÚV-Helga afturreka með tölfræðina. Seðlabankinn beit á agnið og hóf rannsókn sem kostaði fyrirtækið og ríkissjóð töluvert margar milljónir. Samherji var sýknaður.

Dómskerfið hafnaði Tölfræði-Helga sem enga hafði skýrsluna.  En strákurinn á Hinstaleiti situr við sinn keip. Víst er Samherji stórspillt fyrirtæki sem braut lög um gjaldeyri.

Yfirstjórn RÚV, samtök blaðamanna og vinstrimenn, a.m.k. margir hverjir, styðja rannsóknablaðamanninn sem, að eigin sögn, sbr myndband, ,,gúgglaði" sig fram til niðurstöðu sem byggði ekki á skýrslu heldur tölfræði sem Helgi skildi ekki.

RÚV ber ábyrgð á Helga og vinnubrögðum hans. Almenningur ber tvöfaldan kostnað. RÚV og Helgi eru á framfæri almennings og samfélagið verður verra að búa í þegar óþokkar bera sakir á saklaust fólk.

„Excelskjal sem unnið var af starfsmanni Verðlagsstofu“

Konan sem bjargar ekki Helga Seljan

Engin skýrsla er til hjá Verðlagsstofu skiptaverðs sem rennir stoðum undir ásökun Helga Seljan á RÚV um að Samherji hafi brotið lög með því að selja karfa á undirverði til dótturfélags. En það var sú ásökun Helga sem hratt úr vör rannsókn Seðlabankans á gjaldeyrismisferli.

Helgi getur ekki lagt fram skýrsluna og enginn á Verðlagsstofu skiptaverðs kannast við að skýrsla með þessu efni hafi verið samin.

Hvað gerir Helgi Seljan? Jú, hann skáldar upp heimildarmenn - í fleirtölu - að skýrslunni, sem ekki er til, og segist hafa ,,átt við" gögnin til að ljóstra ekki upp nöfnum heimildarmanna.

Hmmm.

Verðlagsstofa skiptaverðs gerir ekki skýrslu en Helgi er með nafnlausa heimildarmenn sem segja jú, víst er til skýrsla frá þessari stofnun um karfaverð Samherja til dótturfélags.

Fyrst skáldar Helgi upp skýrslu, síðan leyndó heimildarmenn. Og ekki linnir hugarburði fréttamannsins.

Í upptöku af frásögn Helga um skýrsluna segist hann vera með undirritaða skýrslu ,,af þessari konu, sko". Sjá myndband 6:06.

,,Þessi kona" getur ekki verið nafnlaus heimildarmaður fréttamannsins því hún er undirritaður höfundur skýrslunnar sem ekki er til - samkvæmt frásögn Helga.

Ósvífni krúttpjakkurinn á Hinstaleiti skáldar upp skýrslur, heimildamenn og konur. En við eigum sem sagt að trúa að fréttir Helga Seljan séu byggðar á traustum heimildum.

 

 

 

 

Afmáði upplýsingar til verndar heimildamönnum

Fréttamenn RÚV falla á blaðamennskuprófi

Engin frétt er betri en heimildin fyrir henni, er meginregla í blaðamennsku. Sá sem ekki kann þessa reglu er ónýtur blaðamaður. Vinir og félagar Helga Seljan í stjórn Félags fréttamann senda frá sér stuðningsyfirlýsingu vegna þess að Helgi sagði frétt - um lögbrot Samherja - sem byggði á skáldskap en ekki heimild.

Helgi segist hafa heimild, skýrslu Verðlagsstofu skiptaverðs, en sú skýrsla er einfaldlega ekki til. Það er skorað á Helga að birta skýrsluna en hann þegir þunnu hljóði.

Fréttastjóri RÚV, ásamt útvarpsstjóra, bera blak af Helga, auk stjórnar Félags fréttamanna. Allt Efstaleiti er þar með meðsekt Helga í að skálda upp lögbrot fyrirtækis út í bæ.

Rúsínan í pylsuendanum. Í aðalfréttatíma RÚV kl. 18 í kvöld var ekki ein einasta frétt um skálduðu heimildina og Helga. RÚV þegir um aðalfrétt dagsins, - en sagði okkur að laxveiði hafði verið nokkuð góð í Hofsá í sumar. Efstaleiti er orðið söguvettvangur Kafka.

Gagnrýna Samherja harðlega

Helgi Seljan, saksóknari RÚV

Fréttastofur segja fréttir en búa þær ekki til. Enn síður er fréttastofum ætlað að saksækja mann og annan, - til þess höfum við opinber yfirvöld, lögreglu og embætti ríkissaksóknara.

Helgi Seljan fréttamaður RÚV fór langt út fyrir starfssvið sitt þegar hann fékk fund í Seðlabankanum í því skyni að hefja saksókn gegn Samherja. Ef Helgi í ofanálag beitti fyrir sig fölsuðum gögnum er glæpurinn tvöfaldur.

Saksóknarahlutverk RÚV er ekki tilviljun. Stofnunin er í formlegu og óformlegum samstarfi við aðra fjölmiðla og stjórnmálamenn að magna upp ásakanir gegn völdum einstaklingum og fyrirtækjum. Fárið eirir engu og allra síst sannleikanum.

Vald RÚV til að sækja fólk til saka er fjármagnað með ríkisfé. Fremur óhugnanlegt, satt að segja.

Helgi hafi ekki haft nokkurn hlut í höndunum

Fen-eyjar og íslenska lýðveldið

Þegar Íslendingar lögðu grunn að lýðveldinu, með heimastjórn 1904 og fullveldi 1918, dundaði Evrópu sér við að steypa veröldinni í heimsstríð. Þegar Íslendingar stofnuðu lýðveldi á afmælisdegi Jóns Sigurðssonar var Evrópa á kafi í öðru heimsstríði.

Starfandi er Feneyjarnefnd til að ,, styrkja þar með hin sam­eig­in­legu evr­ópsku gildi stjórn­skip­un­ar."

Ísland á ekkert erindi með sína stjórnarskrá til nefndar í Evrópu. Við búum á eyju og kunnum fótum okkar forráð. Fenið er evrópskt.

Leitað til Feneyjanefndar

Þorgerður Katrín þorir ekki, sakar stjórnina um hugleysi

Formaður Viðreisnar sakar ríkisstjórnina um að hafa ekki skýra stefnu í farsóttarvörnum. En sjálf hefur Þorgerður Katrín enga skoðun hvaða leið á að fara til að verjast Kínaveirunni.

Pólitískt klókt hjá formanni Viðreisnar, en ekki stórmannlegt.

Ríkisstjórnin hefur stefnu, sem er að halda landinu sem mest opnu og glíma við smit eftir því sem þau koma upp. Þessi stefna var mótuð í sumar þegar vonir stóðu til að farsóttin væri í rénun. 

Seinni bylgja farsóttarinnar gerði farsóttarvarnir yfirvalda tortryggilegar. Þegar það rann upp fyrir fólki að mögulega yrði skólahaldi frestað, nemendur yrðu heima, var spurt hvort ávinningurinn af því að halda landinu opnu sé ekki léttvægður miðað við samfélagslegan kostnað.

Þessi umræða stendur yfir. Það liggur fyrir að ríkisstjórnin þarf að aðlaga stefnu sína nýjum veruleika.

En, svo það sé sagt, það er ekki hægt að loka landinu si svona. Aftur er hægt að herða reglur. T.d. um skimun og sóttkví þeirra sem ferðast til útlanda.

Komið að stjórnmálamönnum

Farsóttarpólitík: opið eða lokað, vinstri og hægri

Frjálslyndir og vinstrimenn eru hallari undir bönn og höft í farsóttarvörn en hægrimenn, sem taka vara á skerðingu frelsis er fylgir boðum og bönnum.

Miðjumenn reyna að finna raunsæja málamiðlun með hóflegum höftum.

Fjórði hópurinn er tækifærissinnar sem sitja á grindverkinu en hoppa af því þegar öllu er óhætt og segjast alltaf hafa vitað hvernig ætti að gera hlutina.

Ein breyting, sem farsóttinni fylgir, er að persónuleg ábyrgð hvers og eins verður meiri. Það er brýnt að smitast ekki og, sé maður smitaður, að smita ekki aðra. Takmörk opinbers valds verða augljósari. Hægt er að setja reglur en ef ekki er tiltrú á stjórnvaldinu verður ekki farið eftir reglunum.

Farsóttin breytir lífi fólks. Breytingum á lífsháttum fólks fylgja pólitískar breytingar.

 

Ferðaþjónustan beitti þrýstingi, ráðherrar voru linir

Ferðaþjónustan beitti þrýstingi til að opna landið hratt og sem mest upp á gátt í sumar. Talsmaður ferðaþjónustunnar getur neitað en ótal fréttir með hamfaralýsingum ferðaþjónustunnar segja annað.

Ráðherrar beygðu sig fyrir þrýstingnum og lækkuðu gjald vegna skimunar úr 15.000 í 9.000 kr.

Veruleikinn er sá að við opnuðum landið of hratt og of bratt.

Einfaldast er fyrir alla viðkomandi er að játa mistökin. Lífið heldur áfram. 

 

Norskur dugnaður, íslensk vertíð

Bandarísk kona, búsett í Noregi, þakkar norskri hefð hveru vel landið kemur undan farsótt. Hefðin nefnist einu orði, dugnad eða dugnaður. Norðmenn kalla það dugnad þegar samfélag (íþróttafélag, bæjarhverfi eða landshluti) leggst á eitt að koma einhverju í framkvæmd sem horfir til heilla.

Íslendingar búa að sömu hefð. Ótal framkvæmdir hér á landi eru unnar í sjálfboðavinnu af fórnfúsu fólki. En við höfum ekkert orð yfir hugarfarið að baki, segjum einfaldlega að eitthvað sé unnið í sjálfboðavinnu.

Aftur eigum við annað orð yfir átaksverkefni, vertíð. Það er vertíð þegar bjarga þarf verðmætum.

Nú stendur yfir farsóttarvertíð.

Smitrakningateymið verður þrefaldað

Helga Vala lofsyngur Trump

Farsóttarvarnir eru frábærar í Bandaríkjunum, segir Helga Vala þingmaður Samfylkingar: 

Það er búið að skipuleggja hvert smáatriði þegar kemur að sóttvörnum, skólastarfi og íþróttastarfi. 

Helga Vala ber lof á Trump til að fordæma Ísland. Slagorðið ,,ónýta Ísland" er yfirsterkari Trump-hatri vinstrimanna.