Þingeyingar bandingjar 101-sósíalista

Hvernig í veröldinni dettur Framsýn, stéttafélagi Þingeyinga, í hug að semja um kaup og kjör í Reykjavík fyrir Húsavík og nærsveitir?

Geta Þingeyingar ekki lesið ársreikninga fyrirtækja? Kunna þeir ekki prósentureikning? 

Er það svo að í Reykjavík vita menn betur en heimamenn hvort þingeysk fyrirtæki séu aflögufær? Vita kaffihúsaspekingar í 101 betur en Þingeyingar hver framfærslukostnaðurinn er á Norð-Austurlandi?

Hvernig stendur á því dómsdagsrugli að skrifstofublækur í Reykjavík semji um kaup og kjör Þingeyinga?

Einu sinni var metnaður í Þingeyjarsýslum. Þar stofnuðu menn fyrsta kaupfélag landsins en biðu ekki eftir vinki frá höfuðborgarskrílnum.

En nú stendur sem sagt til að sósíalistar í borg óttans taki öll ráð Þingeyinga í sínar hendur. 

Þingeyingurinn Jónas frá Hriflu hlýtur að snúa sér við í gröfinni og ranghvolfa augunum yfir aumingjahætti sveitunganna.

 

Framsýn afturkallar samningsumboð SGS

Óttinn við einelti verkó - menn þora ekki að semja

Verkó stundar skipulegt einelti á samfélagsmiðlum gagnvart þeim sem sitja ekki og standa eins og sósíalistum þóknast.

Gunnar Smári formaður Sósíalistaflokksins slær tóninn með því að fara í manninn en ekki boltann.

Óttinn við að verða fyrir einelti sósíalista hamlar því að samningar náist í kjaraviðræðum.

Aðgerðahópurinn fundar í dag

Flóttamenn, vanvirðing og Egill Helga

Flóttamenn vanvirtu Austurvöll og styttu Jóns Sigurðssonar. Agli Helga finnst það ekki tiltökumál.

Flóttamenn eru eðli málsins samkvæmt ekki þjóðin. Í fyllingu tímans gætu þeir orðið hluti íslensku þjóðarinnar. Ekki er til of mikils mælst að umsækjendur um Ísland sýni þjóðinni lágmarksvirðingu.

En Egill skilur ekki þessi einföldu sannindi,enda tekur hann jafnan undir þegar landi og þjóð er hallmælt.

Mótmælendur brutu skilmála borgarinnar

Meira atvinnuleysi, lægri laun

Atvinnuleysi eykst, hagkerfið kólnar með loðnubresti og færri ferðamönnum. laun munu lækka.

Þess vegna er ekki talað um launahækkun í kjaraviðræðum heldur vinnutíma.

ASÍ-félögin semja um lágmarkslaun. Í þenslu hækka lágmarkslaunin með launaskriði en lækka í samdrætti.

Þess vegna er ekki talað um launahækkun í kjaraviðræðum heldur vinnutíma.

Verkföll skapa ekki verðmæti heldur tortíma þeim.

Þess vegna er ekki talað um launahækkun í kjaraviðræðum heldur vinnutíma.

Almenningur veit að það er ekki meira til skiptanna, þótt forysta verkó láti eins og hún viti það ekki.

Þess vegna er ekki talað um launahækkun í kjaraviðræðum heldur vinnutíma.

 

Vinnutíminn eldfimur

Krakkar, loftslag og útlandaferðir

Ef nemendur sem skrópa fyrir loftslagið undir kjörorðinu ,,aðgerðir strax" meina eitthvað með afstöðu sinni ættu þau að harðneita öllum útlandaferðum.

Þotueldsneyti myndar koltvísýring við bruna, veldur gróðurhúsaáhrifum og, samkvæmt kenningunni sem börnin aðhyllast, hækkar lofthitinn í framhaldi.

Ferðalögin ættu að vera innanlands, helst fótgangandi en til vara á reiðhjólum.

Maður á fyrst að gera kröfu á sjálfan sig. Vonandi hafa börnin lært það í uppeldinu.

Reyna að múta nemendum með pítsu

Láglaunaríkidæmi: senda út 50 þús. kr. á mánuði

Sá sem á 50 þús. krónur í hverjum mánuði til að senda frá sér getur ekki verið fátækur. Að meðaltali gera útlendingar einmitt þetta í hverjum mánuði.

Útlendingar koma til Íslands í uppgrip, verða vel fjáðir á skömmum tíma.

En verkó segir láglaunafólk lepja dauðann úr skel.

Láglaunaríkidæmið á Íslandi er eftirsótt á alþjóðavísu.

Leiðir velmegunarkúna ekki til slátrunar

Vinstriparadís: myglaðir skólar og flóttamannabúðir á Austurvelli

Skólar mygla vegna þess að vinstrimeirihlutinn í Reykjavík forgangsraðar í þágu bragga, pálmatrjáa og ókyngreindra salerna.

Til að vinstripólitíkin fari ekki framhjá neinum eru settar upp flóttamannabúðir á Austurvelli í boði borgarstjórnar Reykjavíkur.

Virkilega flottir á því, vinstrimenn.

Skoða mygluvanda í fleiri skólum

Skelfingin: loft- og trúarhiti

Sameinuðu þjóðirnar sögðu fyrir 30 árum - árið 1989 - að um aldamótin 2000 myndi heilu þjóðríkin verða náttúruhamförum að bráð og þurrkast af yfirborði jarðar vegna hækkandi lofthita af mannavöldum.

Fréttastofan AP, sem þykir nokkuð áreiðanleg, flutti hamfaraspásögn Sameinuðu þjóðanna fyrir 30 árum. Aldamótin komu og engar hamfarir urðu vegna lofthita af mannavöldum.

En nú stelur senunni sextán ára gömul sænsk skólastúlka með munninn fyrir neðan nefið og segir ,,Ég vil ekki að þið séuð vongóð, ég vil að þið verðið skelf­ingu lost­in."

Án efa er stúlkan velmeinandi, hugsjónafólk er það yfirleitt. En hún veit ekkert um vísindi og loftslag.

Norskættaði Bandaríkjamaðurinn Ivar Giaever veit sitthvað um vísindi og hefur Nóbelsverðlaun til að sanna það. Á hálftímafyrirlestri afhjúpar Giaever botnlaust rugl þeirra sem halda fram manngerðu veðri.

Loft- og trúarhiti gata farið saman og valdið skelfingu. En þeir sem eru með óbrjálaða dómgreind vita að veðurfar lýtur ekki mannlegri trú eða skelfingu heldur náttúrulegum ferlum.

„Ég vil að þið grípið til aðgerða“

Öfgar, ferðalög og föðurmissir

Fjöldamorðingjarnir Tarrant og Breivik eiga ferðagleðina sameiginlega. Báðir misstu þeir föður sinn, Tarrant bókstaflega en Breivik óeiginlega; faðir hans sinnti honum ekki.

Hvítu morðóðu millistéttastrákarnir voru föðurlausir glóbalistar. 

Rótleysi er ein leið til öfga.

 

Hryðjuverkamaðurinn kom til Íslands

Neikvæð pólitík Samfylkingar og Pírata

Logi segir Vinstri græna svíkja lit; Helgi Hrafn pírati segir allt betra en Sjálfstæðisflokk.

,,Fúll á móti"- orðræða formanns Samfylkingar annars vegar og hins vegar þingmanns Pírata afhjúpar í senn neikvæðnina sem tröllríður húsum þessara flokka og jafnframt hve innantómir þeir eru.

Þeir Logi og Helgi Hrafn hafa ekkert jákvætt og uppbyggilegt fram að færa. Þeir sjálfir og flokkarnir sem þeir tilheyra þrífast á óánægju og nöldri.

Vanmetakennd í bland við öfund er pólitík Samfylkingar og Pírata. Flokkarnir eru báðir best geymdir í stjórnarandstöðu.

„Raunalegt að horfa á Vinstri græn“