Við töpum öll peningum, en fleiri halda lífi

Farsóttin verður okkur dýr í peningum talið. En heppnast þær varnir sem yfirvöld hvetja okkur til að viðhafa munu færri landar okkar deyja. Og það er verðugt markmið.

Krónan, mesti jafnaðarmaður sem Ísland hefur alið, lækkar og það verður dýrara að kaupa erlenda vöru og ferðast til útlanda. Lækkun krónunnar hjálpar aftur þeim fyrirtækjum sem fyrirsjáanlega fara verst úr farsóttinni.

Við erum nokkuð vel í sveit sett sem sitjum þetta land. Ef ekki væri fyrir samfylkingarveðrið sem geisar úti þessa dagana væri maður bara nokkuð sáttur.

Stefnir í 100 milljarða króna halla ríkissjóðs

ESB lokar Íslandi, Áslaug í taugaáfalli

Íslenska stjórnkerfið er ESB-sinnaðra en aðildarþjóðir Evrópusambandsins. Allt er gott sem kemur frá Brussel, er viðkvæðið í stjórnarráðinu. Að sama skapi er ríkjandi andstyggð á Bandaríkjunum, eins og Gulli utanríkis túlkaði eftirminnilega.

Ákvörðun ESB um að loka Íslandi veldur taugaáfalli í 101 stjórnarráðinu. Dómsmála-Áslaug gengur betlandi um upplýsingar fyrir dyr sendiherra ESB sem býður það eitt að lesa upp fréttatilkynningu frá ESB. Ísland hefur framselt fullveldi landamæra sinna og er lokað inn í pestarbæli Evrópusambandsins.

ESB-dúkkulísunum er nokkur vandi á höndum. Gulli yfirdúkkulísa er óvelkominn í Washington og ætti ekki að vera ráðherra.

Við borgum stjórnmálamönnum til að hugsa sjálfstætt. Hvað heitir aftur flokkur þeirra Áslaugar og Gulla?

Hafa hingað til talið bann hafa litla þýðingu

Schengen er búið að vera, Áslaug - segðu Gulla það

Evrópa gefst upp á sameiginlegum landamærum, kenndum við Schengen-samstarfið, en ríkisstjórn Ísland þarf sérstakan fund til að skilja skriftina á veggnum.

Tornæmi er ríkjandi stjórnarstefna þegar kemur að málefnum Evrópusambandsins. EES-samningurinn lagðist á líknardeild 2016 þegar Bretar ákváðu Brexit. Glamúrliðið í utanríkisráðuneytinu heldur enn að EES sé á vetur setjandi og lét okkur kokgleypa 3 orkupakkanum í þágu Norðmanna.

Covid-18 farsóttin leggur Schenegn á líknardeild í ár. Öll ríki ESB loka landamærum sínum en íslensk stjórnvöld vita ekki í hvorn fótinn þau eiga að stíga.

Covid-19 gengur yfir á fáeinum mánuðum. ESB-veiran í stjórnarráðinu í Reykjavík er aftur viðloðandi andskoti í mörg herrans ár.

Fundað um mögulega landamæralokun

Veiran, óvissan og þolinmæðin

Yfirvöld vita ekki hvenær C-19 farsóttin gengur yfir. Enginn veit það. Umræðan um að mynda hjarðónæmi er fræðileg fremur en að hún þjóni hagnýtum tilgangi.

Ef veiran lognast ekki útaf í vor, líkt og flensufaraldur, verður að taka nýjar ákvarðanir, sem bíða síns tíma. Ef bóluefni við veirunni kemur næsta haust verður strax bjartara yfir.

Þjóðin heldur þolinmæði sinni og sættist á óvissuna á meðan yfirvöld sýna trúnað og segja hlutina eins og þeir eru. Sem yfirvöld virðast hafa gert hingað til.

Misskilningur í gangi um hjarðónæmi

Veiran og vestræn hnignun

Asíuþjóðir ráða betur við COVID-19 faraldurinn en vestrænar. Kórónuveiran drepur og spurt verður hvers vegna asísk þjóðríki veita íbúum sínum betri lífslíkur en vestræn.

Fyrsta svarið verður að meiri virðing er borin fyrir yfirvaldi í Asíu en á vesturlöndum. Annað svarið er að einstaklingshyggja er komin úr öllum böndum á vesturlöndum á meðan samfélagsleg ábyrgð er ríkari meðal Asíubúa. Þriðja svarið er að vestræn menning gekk í barndóm og lét vanrækta sænska stúlkukind telja sér trú um að maðurinn stjórni náttúrinni en sé ekki hluti hennar.

Fyrsta svarið, virðingarleysi gagnvart yfirvöldum, er sjálfssannað og þarf ekki umræðu. Ábyrgðarlaus einstaklingshyggja lýsir sér t.d. í velgengni samtaka eins og No Borders. Engin landamæri þýða einfaldlega að hver og einn getur vaðið á skítugum skónum hvert hann vill. Með veirusmit eða ekki, með trúarfasisma eða kvenfyrirlitninu, - og krafist þjónustu. Bjálfatrúin á manngert veðurfar er nýju fötin keisarans, trú á það sem ekki er.

Vestræn hnignun er sjálfskaparvíti. Þau eru verst.

 

Gæti varað til næsta vors og 7,9 milljónir á spítala

Veirubónus: vinstrimenn þegja

Fyrir C-19 faraldurinn tóku vinstrimenn reglulega til máls að hóta okkur dauða og tortímingu vegna manngerðs veðurfars. Viðreisn, Samfylking, Vinstri grænir og Píratar minntu okkur í tíma og ótíma á yfirvofandi heimsendi.

Nú þegja vinstrimenn sem fastast en voru áður óstöðvandi í málæði.

Borgarfulltrúi Samfylkingar gat þó ekki á sér setið og gaf yfirlýsingu þar sem efnahagslegum afleiðingum faraldursins var fagnað. Annars er grafarþögn í herbúðum vinstrimanna. 

 

 

97% og þrjú prósentin - ónæmiskerfi þjóðarinnar

Breski sóttvarnarlæknirinn, starfsbróðir Þórólfs íslenska, segir að tveir af hverjum þrem Bretum þurfi helst að fá kórónuveiruna til að byggja upp ónæmiskerfi þjóðarinnar. Þannig yrði ónæmisvörn tryggð til framtíðar. Að öðrum kosti er hætta á að veiran skjóti upp kollinum annað veifið með tilheyrandi heilsuvá.

Þórólfur segir góð tíðindi að aðeins eitt prósent Íslendinga séu smitaðir. Ef sú prósenta helst verða 99 prósent þjóðarinnar óvarin til framtíðar gegn veirunni, sem er lífshættuleg fyrir aldraða og sjúka.

Annað hvort er breski sóttvarnarlæknirinn út í móa eða hann Þórólfur okkar.

Haft er fyrir satt að 97 prósent af þeim sem smitast af kórónuveirunni fái væg eða alls engin einkenni. En um 3% smitaðra deyja.

Bretar ætla að biðja alla yfir 70 ára að fara í sjálfskipaða sóttkví. Sömu tilmæli fara án efa til allra með undirliggjandi sjúkdóma. Þetta er þrjú prósent hópurinn.

Ef sá breski hefur rétt fyrir sér er hrein og klár hörmung að aðeins eitt prósent Íslendinga fái smit. Við yrðum algerlega óvarin gegn kórónuveirunni í framtíðinni.

Þetta er stórt ef.

Viðbót 12:59: Þórólfur okkar er á sömu skoðun og sá breski. Sjá hér. Í framhaldi þarf að svara hversu hratt æskilegt sé að veiran fari yfir. Þúsundir eru e.t.v. í sóttkví að nauðsynjalausu, með tilheyrandi röskun á hversdagslífi og efnahagskerfi.

Skimun ÍE bendir til að 1% landsmanna beri veiruna

Alþjóðavæðingin í einangrun

Kórónuveiran er útlensk, nema, auðvitað, í Kína þar sem hún varð til. Sérhvert ríki reynir að einangra sig frá útlensku veirunni. Að faraldri loknum verður alþjóðahyggjan enn í einangrun.

Veiran ferðast með fólki, ekki vörum og þjónustu. Af því leiðir verða takmarkanir á fólksflutningum sjálfsagðar í framtíðinni. 

Faraldurinn kennir þjóðum heims mikilvæga lexíu. Staðbundið vald, ekki alþjóðlegt, virkar til að hemja útlenda vágesti.

Á miðöldum óx staðbundnu valdi fiskur um hrygg í Evrópu þegar álfunni var ógnað úr þrem áttum. Víkingar herjuðu úr norðri, múslímar úr suðri og Ungverjar úr austri. Í tímans rás varð staðbundið vald að þjóðríkjum. 

Þjóðríkið er einmitt skásta fyrirkomulagið til að verja og viðhalda samfélagi.

 

 

Útgöngubann á Spáni og hluta Frakklands lokað

Gulli ekki velkominn í Washington, afsögn strax

Gulli utanríkis stórmóðgaði Bandaríkin þegar hann í reiðikasti aflýsti heræfingunni Norðurvíkingi í hefndarskyni við ferðabann Trump. Utanríkisráðherra Bandaríkjanna neitar að tala við Gulla.

Ísland er komið í skammarkrókinn vegna vanstillingar utanríkisráðherra.

Gulli getur ekki verið utanríkis lengur. Þjóðarhagsmunir eru í veði, Gulli verður að víkja.

Fundi Guðlaugs og Pompeos aflýst

Björn: Ísland samþykkti 3OP vegna Noregs

Það var ekki vegna íslenskra hagsmuna sem 3. orkupakkinn var leiddur í lög hér á landi. Björn Bjarnason fór fyrir þeirri nefnd utanríkisráðherra sem beitti sér fyrir samþykktinni. Björn skrifar í dag:

Úrlausn þessa máls [þ.e þriðja orkupakkans]skipti Norðmenn hins vegar miklu vegna þess að sæstrengir frá vatnsaflsstöðvum þeirra skapa Dönum, sem treysta mjög á vindorku, orkuöryggi. 

En hvers vegna fengu Íslendingar ekki undanþágu? Björn svarar því ekki og sú þögn segir mikla sögu um hve óhagstæður EES-samningurinn er okkur Íslendingum. Hagsmunir Norðmanna ríkja, íslenskir hagsmunir víkja.