ESB-lýðræði og Biden-lýðræði

Evrópusambandið endurtekur kosningar ef ekki fæst ,,rétt" niðurstaða í þeim fyrstu. Þetta er alkunn staðreynd, sem Írland fékk að kenna á. Bandaríska útgáfan af ESB-lýðræði hljóðar upp á að búa til atkvæði, þ.e. kosningasvindl, til að fá ,,rétta" niðurstöðu.

Joe Biden forsetaefni Demókrata gortaði sig af því fyrir kosningar að flokkur sinn ætti harðsnúnasta skipulagið til að falsa atkvæði í sögu Bandaríkjanna.

Lýðræðisútgáfur ESB og Biden eiga það sammerkt að sjálfskipaðir valdahópar telja lýðinn ekki eiga að skipta sér af hverjir stjórna.

Að kenna útgáfur ESB og Biden við lýðræði er að segja að svart sé hvítt.

 

 

„Ætlum að vinna þennan slag“

Trump-Ísland

Af íslenskum fjölmiðlum að dæma eru forsetakosningarnar í Bandaríkjunum innanríkismál á Íslandi. Ekki það að fjölmiðlar víða um heim fylgist ekki náið með talningu atkvæða en hér á Fróni er borið í bakkafullan lækninn.

Trump er helsta skýringin á elsku íslenskra fjölmiðla á bandarískum stjórnmálum. Allur þorri fjölmiðlanna hér heima telur sitjandi forseta rót alls ills í heiminum og taka þar með sömu afstöðu og frjálslyndir fjölmiðlar í Bandaríkjunum sjálfum.

Nú er það ekki svo að pólitísk álitamál á Íslandi séu þau sömu og Bandaríkjunum. Landið í vestri er heimsveldi, Ísland er örríki.

Möguleg skýring á fyrirferð Trump í íslenskri umræðu er að pólitíska kerfið á Ísland er enn í leit að jafnvægi eftir hrunið þegar glókollur sigraði 2016. Einhverjir óttuðust að Trump-pólitík héldi innreið sína í örríkið.

En aldrei var hætta á því. Trump-Ísland er ímyndun vinstrimanna og fjölmiðla.

 

Hvar stöndum við núna?

Vinna er líka lærdómur

Íslensk ungmenni vinna löngum með námi, bæði á sumrin og yfir skólaveturinn. Á vinnumarkaði lærir ungt fólk hvernig kaupin gerast á eyrinni og fær veganesti er kemur til góða að skólagöngu lokinni.

Hliðaráhrif af vinnu með skólagöngu er að námstími íslenskra ungmenna er heldur lengri en það sem tíðkast í nágrannaríkjum.

Á hinn bóginn er algengara í útlöndum en hér heima að námsmenn útskrifist beint á atvinnuleysisskrá.

72% segjast verða að vinna með námi

19 þingmenn: drepum fóstur - sem flest

19 þingmenn vinstriflokka á alþingi Íslendinga vilja hefja innflutning á þunguðum konum til fóstureyðinga. Já, þið lásuð rétt: Til­laga til þings­álykt­un­ar um aðgengi ein­stak­linga sem ferðast til Íslands að þung­un­ar­rofi.

Inga Sæland er skrifuð fyrir snjallri ádrepu i Morgunblaðið um málefnið. Þar segir m.a.:

Nú vilja þess­ir þing­menn, og lík­lega flest­ir flokks­fé­laga þeirra á þingi, að Ísland verði eins kon­ar fríríki fóst­ur­eyðinga í Evr­ópu. Að ís­lenska heil­brigðis­kerfið, sem berst nú þegar í bökk­um vegna álags og fjár­skorts, taki að sér að eyða ófull­b­urða börn­um allt til loka 22. viku meðgöngu fyr­ir fólk sem vill kom­ast fram hjá lög­um í eig­in heimalandi.

Ástæða er að halda til haga nöfnum þessara þingmanna vinstriflokkanna sem sýna sig gjörsneydda dómgreind og mannúð. Þeir eru: 

Rósa Björk Brynjólfsdóttir, Oddný G. Harðardóttir, Helga Vala Helgadóttir, Þorgerður K. Gunnarsdóttir, Ágúst Ólafur Ágústsson, Albertína Friðbjörg Elíasdóttir, Þorbjörg Sigríður Gunnlaugsdóttir, Andrés Ingi Jónsson, Björn Leví Gunnarsson, Jón Steindór Valdimarsson, Halldóra Mogensen, Þórhildur Sunna Ævarsdóttir, Hanna Katrín Friðriksson, Guðmundur Andri Thorsson, Ólafur Þór Gunnarsson, Helgi Hrafn Gunnarsson, Steinunn Þóra Árnadóttir, Logi Einarsson, Guðjón S. Brjánsson.

 

Alþjóðahyggjan fagnar ekki lýðræðinu

Enginn stjórnmálamaður nema einn í víðri veröld fær til sín reglulega tugþúsundir til að ræða pólitík á opnum fundum undir beru lofti. Enginn stjórnmálamaður nema einn í seinni tíma sögu lýðræðisins virkjar betur kjósendur til þátttöku í stjórnmálum og snarhækkar kjörsókn.

Enginn stjórnmálamaður nema einn er jafn hataður af sjálfskipuðum talsmönnum alþjóðahyggjunnar (Pútín kemur öruggur í annað sætið).

Sérstakur maður hann Trump, óneitanlega.

ÖSE segir Trump grafa undan trausti almennings

Alþýðuforinginn Trump

Repúblíkanaflokkurinn var fyrir daga Trump pólitískur flokkur forstjóra og atvinnurekenda. Trump 2016 og 2020 breytir flokknum í stjórnmálasamtök alþýðuunnar. Hann skorar stórt meðal ófaglærðra í iðnaðarhéruðum, meðal kjósenda úr röðum þjónustufólks í stórborgum og verkafólks í dreifðum byggðum.

Frjálslyndir fjölmiðlar kynna Trump sem mesta rasista sögunnar, frá Dolla austurríska að telja, en mildingurinn tekur atkvæði rómanskra í tonnavís; þannig sigraði hann í Flórída.

Á talandi stundu eru meiri líkur á að Trump tapi en sigri. Alþýðuforinginn getur gengið hnarreistur frá borði með fallega spúsu klædda í Gucci.

Melania Trump kaus í kjól frá Gucci

Sögulegar kosningar í Bandaríkjunum

Um tveir af hverjum þrem kosningabærum Bandaríkjamönnum greiddu atkvæði í gær eða um 67%. Í venjulegu árferði tekur rétt rúmur helmingur þátt í kosningunum.

Enn er óljóst á hvorn veginn kosningarnar fara. Mögulega skera dómstólar úr gildi síðustu atkvæðanna.

Merkileg nótt að baki og spennandi dagar framundan.

 

Lokastaða: Biden fær 306 kjörmenn

Trump, valdaelítan og veiran

Bandaríkin eru tveggja flokka ríki. Demókratar og Repúblíkanar, þ.e. ráðandi öfl innan flokkanna, eru sammála í meginatriðum. Frjálslynd alþjóðahyggja þar ráðandi og herská í meira lagi: Írak, Úkraína og Sýrland er meðal afreka hennar á þessari öld.

Utanríkisstefnan er kennd við leðju (blob) og var ekki skemmt þegar Trump fækkaði bandarískum hermönnum í Evrópu.

Í innanríkismálum er meiri meiningarmunur. Þeir frjálslyndu trúa á þriggja, sjö eða níu kynja heimi á meðan þeir íhaldssömu halla sér ýmist að Kristi eða Darwin. Í heimi frjálslyndra er veðurfarið manngert en hægrimenn telja náttúruna ráða ferðinni. Grunnt er á sjálfsfyrirlitningu frjálslyndra, einkum hvítra, en íhaldið er sátt í eigin skinni.

Trump er til hægri en ekki dæmigerður repúblíkani. Árið 2016 var hann maður fólksins í Ameríku meginlandsins. Valdaelítan á strandhéruðin nánast skuldlaus.

Ef það er eitthvað eitt sem fellir Trump verður það Kínaveiran. Það yrði hómerískt að glókollur hristi af sér veiruna prívat og persónulega en verði án embættis á morgun vegna hennar.  

 

 

 

Verður það Biden eða Trump?

Macron: við erum að tapa Evrópu

Skothvellirnir i Vín voru vart hættir þegar Macron Frakklandsforseti gaf út yfirlýsingu. ,,Þetta er okkar Evrópa," sagði sá franski í örvæntingu.

Múslímar drápu mann og annan um daginn í Frakklandi og nú er Vín vettvangur íslamista og tilkynna sig höfunda lífs og dauða á meginlandi Evrópu, sem þangað til í gær kenndi sig við fjölmenningu.

Evrópa er að deyja í höndunum á þeim sem opnuðu flóðgáttir vítis og hleyptu óhindrað í meginlandið fylgismönnum spámannsins.

Þrír látnir – fjöldi árásarmanna enn óljós

Lýðræði á bakvið grímu

Trump, fólkið í kringum hann og fjölmiðlar til hægri (þeir fáu) sjást sjaldnast með grímu. Þessu er öfugt farið með Biden og hans lið og fjölmiðla til vinstri (þeir mörgu), þar sést fólk varla án grímu.

Gríman er sóttvörn, að sögn, en líka tjáning á ótta. Þegar sjónvarpsmaður talar í hljóðnema með grímu í ljósvakamílna fjarlægð frá áhorfendum eru skilaboðin ótti en ekki sóttvörn. Gríman verður yfirlýsing um hörmungar handan við hornið.

Sigri Biden, sem meiri líkur en minni eru á, boðar meiri breytingar en margur hyggur. Það verður ekki afturhvarf til áranna fyrir Trumpsigurinn 2016. 

Lýðræði á bakvið grímu mun reynast heldur síðra en það grímulausa.

Trump eigi 5-10% líkur á sigri