Helga Vala misnotar stöðu sína

Helga Vala Helgadóttir er formaður stjórnskipunar- og eftirlitsnefndar alþingis. Hún tilkynnir opinberlega að hún ætli að misnota stöðu sína til að fá upplýsingar um sjálfa sig í úr upplýsingakerfi lögreglunnar.

Upplýsingarnar ætlar þingmaðurinn að nota til ,,að geta slengt fram gögn­um" í fjölmiðlum vegna ,,söguburðar" um að hún sé haldin stelsýki.

Helga Vala misnotar opinbert vald sem henni er treyst fyrir. Hverjar verða pólitísku afleiðingarnar? 

Óskar eftir gögnum úr LÖKE

Zizek: siðmenning þarf landamæri

Marxistinn Slavoj Zizek greinir ástand frjálslyndra vinstrimanna þannig að þeir séu góða fólkið sem keppist við að hata aðra samtímis sem góðverkin, frjáls innflutningur múslíma, uppsker góða fólkinu aðeins fyrirlitningu.

Í framhjáhlaupi kemur Zizek íslensku Klaustursþingmönnunum til varnar.

Lykilhugsun Ziek er þessi: frjálslyndir vinstrimenn sem vilja afnema landamæri og hleypa óheft inn flóttamönnum uppskera aðeins fyrirlitningu og kröfur um að vestrænir siðir verði aflagðir á vesturlöndum; t.d. svínakjötsát og aðgreining trúar og ríkisvalds.

Í hnotskurn: siðmenning þarf landamæri.

Samherji, pólitískar ofsóknir og hótanir

Strax eftir hrun voru sett á gjaldeyrishöft. Grunur kviknaði að stórnotendur gjaldeyris, útgerðafélög eins og Samherji og Vinnslustöðin, færu á svig við reglur um skil á gjaldeyri.

Vinstristjórn Jóhönnu Sig. 2009-2013 hafi hag af því að lama útgerðina enda stóð hún gegn stærstu pólitísku mistökum seinni ára, ESB-umsókninni, sem fól í sér afsal fiskimiðanna til Brussel.

Í samvinnu við fjölmiðil vinstrimanna, RÚV, var mál byggst upp gegn Samherja. Þegar málið var orðið þroskað, næg sönnunargögn talin liggja fyrir, var Seðlabankanum, sem yfirvaldi í gjaldeyrismálum, gert að hefja rannsókn.

Rannsóknin ónýttist, sönnunargögn voru ekki næg; lög og reglugerðir ekki skýr. Samherji var sýknaður fyrir dómstólum. 

Til hliðar við fjölmiðlapólitískar ofsóknir, sem að hluta eru opinberar, eru hótanir sem sjaldnast fara hátt.

Eftir sigur Samherja fyrir dómstólum hefði verið farsælast að málið yrði sögulegur minnisvarði um þjóðfélagsástand eftirhrunsins. En Samherji kaus að halda málinu áfram og krefst afsagnar seðlabankastjóra. Það heitir að hengja bakara fyrir smið.

Kastljós misnotaði „gróflega viðtal“

Bragginn og Klaustur, hægri og vinstri

Braggamál borgarinnar snýst um misferli með opinbert fé, brot reglum um verkferla og spillingu í samskiptum arkitekta og verktaka annars vegar og hins vegar embættismanna og borgarfulltrúa. Í braggamálinu eru hægrimenn sem sækja en vinstrimenn verja hendur sínar.

Klaustursmálið snýst um orðræðu nokkurra þingmanna og ólögmæta upptöku á samtali þeirra. Hér eru vinstrimenn sóknaraðili en hægrimenn í vörn.

Niðurstaða: hægrimenn hafa áhyggjur af meðferð fjármuna og opinberri spillingu en vinstrimenn eru uppteknir af orðfæri fólks í einkasamtölum.

„Mun ekki taka þátt í þessari sýningu“

Annar Brexit sigur

Útgöngusamningur May forsætisráðherra var ekki nógu skýrt uppgjör við ESB til að breska þingið gæti samþykkt hann. Bretar vilja fullveldi sitt tilbaka og engar refjar.

Umræðan og atkvæðagreiðslan á breska þinginu sýndi starfhæft lýðræði andspænis grímulausri valdahyggju Evrópusambandsins.

Bretum var ólíft innan ESB og Brussel-valdið er einbeitt í afstöðu sinni að Bretum úrsögnina eins dýrkeypta og nokkur kostur er.

Allt ferlið frá Brexit þjóðaratkvæðagreiðslunni 2016 til dagsins í dag er sýnidæmi um hve hættulegt það er að leggja lag sitt við Evrópusambandið.

Brexit-samningi May hafnað

Gylfi sækir um ráðuneyti, Hallur um starf hjá Eflingu

Forseti ASÍ til margra ára, Gylfi Arnbjörnsson, sækir um að stjórna ráðuneyti heilbrigðis. Hallur Hallsson, blaðamaður og almannatengill, sækir aftur um starf kynningarstjóra Eflingar, en þar eru fyrir á fleti Sólveig Anna, Viðar og fleiri fótgönguliðar Gunnar Smára sósíalistaforingja. Hallur skrifar á skruddu:

Þann 11. nóvember skilaði ég inn umsókn til Capacent um starf kynningarstjóra Eflingar. Þann 12. desember fékk ég þessi skilaboð: "Úrvinnslu umsókna um starf "Efling - Kynningarstjóri" tefst um tíma. Gert er ráð fyrir að málið klárist á næstu vikum."

Gylfi á meiri líkur að verða ráðuneytisstjóri, þótt hann sé ekki af réttu kyni, en að Hallur hreppi stöðu kynningarstjóra enda ekki með ,,réttan" pólitískan lit.

Gylfi sækir um stöðu ráðuneytisstjóra

Ríkið skuldar okkur samfélagsbanka

Þrír bankar starfa á Íslandi, ríkið á tvo. Bankarnir þrír stefnu þjóðinni í gjaldþrot fyrir áratug og voru þá á annarri kennitölu og í einkaeigu. Áður en ríkisbankarnir tveir fara aftur í einkaeigu skuldar ríkið okkur samfélagsbanka, einn eða fleiri, er tækju að sér svipað hlutverk og sparisjóðirnir höfðu - áður en þeir voru gleyptir af þríveldi bankanna.

Frosti Sigurjónsson fyrrverandi þingmaður Framsóknarflokksins skrifar á Facebook:

Var að glugga í hvítbók um fjármálakerfið. Finn varla stafkrók í þeirri skýrslu um þýsku samfélagsbankana "sparkassen" sem hafa verið kjölfesta í þýsku efnahagslífi [...] Þetta er skandall í ljósi þeirrar miklu umræðu sem hefur verið um þetta fyrirkomulag hérlendis.

Sanngjörn og eðlileg krafa er að ríkið, áður en það selur ríkisbankana tvo, búi svo um hnútana að almenningur, sem ekki hefur áhuga á bankabraski einkaaðila, fái valkost fyrir viðskipti sín - samfélagsbanka.

Ríkið selji Íslandsbanka

ESB vill gera Brexit dýrkeypt Bretum

Evrópusambandið má ekki til þess hugsa að úrsögn Breta úr sambandinu gangi fljótt og vel fyrir sig. Bretar gætu spjarað sig vel utan ESB og þar með væri komið stórhættulegt fordæmi - fleiri þjóðir gætu fylgt i kjölfar Breta.

Brussel leggur sig fram um að torvelda Bretum útgöngu enda er ráðandi sjónarmið í ESB að úrsögn sé svik við svokallaða ,,Evrópuhugjón" sem verði að refsa.

,,Evrópuhugsjónin" gengur út á að embættismenn í Brussel án nokkurs lýðræðislegs umboðs viti hvaða íbúum álfunnar sé fyrir bestu. Embættismannaveldi komi í stað lýðræðislegra kjörinna þjóðþinga.

Brexit sýnir svart á hvítu að lýðræði og ESB eru andstæður.

May vill ekki fresta Brexit

Jón Baldvin: hættan við samkeppni um sekt og sýknu

Jón Baldvin Hannibalsson fyrrverandi formaður Alþýðuflokks og utanríkisráðherra er skotspónn þessa dagana vegna ótilhlýðilegrar framkomu sinnar gagnvart stúlkum og konum.

Inn í umræðuna blandast fjölskyldumál Jóns Baldvins.

Þær konur sem segja farir sínar ekki sléttar í samskiptum við Jón Baldvin telja að trúverðugleiki hverrar konu styrkist eftir því sem fleiri segja sambærilega sögu.

Rökin ganga í báðar áttir. Ef ein frásögn reynist tilbúningur kastar það rýrð á allar hinar.

Dómstóll samfélagsmiðla er ekki heppilegasti vettvangurinn til að leiða sannleikann í ljós.

En kannski er sannleikurinn aukaatriði.

 

Heilsustyrkir eru launauppbót

Verkalýðsfélög reyna að ganga í augun félagsmanna sinna með úthlutun heilsustyrkja. Þetta var gert með því að safna í sjóði verkalýðsfélaga framlögum frá launþegum til endurúthlutunar.

Tilgangurinn var upphaflega göfugur, að bæta launþegum tekjumissi og kostnað vegna veikinda. En eins og vill verða þegar auðveldir peningar eru innan seilingar fór fólk að líta á heilsustyrki og sjúkradagpeninga sem launauppbót.

Núna tæmast sjóðirnir og verkalýðsfélög, sem upphaflega ætluðu að kaupa sér velvild félagsmanna, fá skömm í hattinn.

Tal um að heilsufar launþega sé lélegra en áður á ekki við nein rök að styðjast. Huglægt ástand launþega er ef til vill í lakara lagi. En þar getur verkalýðshreyfingin sjálfri sér um kennt. Hún keppist við að útmála hve ömurleg tilvera það er að vera launþegi.

Furða sig á að heilsustyrkur sé skorinn niður