Lygarar til leigu í ferðaþjónustunni

Lygarar til leigu, stundum kallaðir almannatenglar, eru komnir í verktöku hjá ferðaþjónustunni til að útmála hrun atvinnugreinarinnar ef hún greiðir skatta eins og önnur starfsemi í atvinnulífinu.

Lygarar til leigu, oft fyrrum fjölmiðlamenn, búa að kunnáttu og samböndum til að setja á flot falsfréttir í þágu verkkaupa. Fjölmiðlar gína við enda undirmannaðir og í sífelldum efnisskorti.

Á næstunni má búast við flaumi falsfrétta um óheyrileg vandræði ferðaþjónustunnar. Jafnvel þeir trúgjörnustu mega hafa sig alla við að innbyrða ósköpin.

Hótel verða rekin með tapi

Samfylkingin og tvær rangar hugmyndir

Tvær rangar hugmyndir urðu Samfylkingunni að falli. Sú fyrri er að Samfylkingin yrði að koma sér upp auðmannabandalagi. Borgarnesræða Ingibjargar Sólrúnar Gísladóttur árið 2003 boðaði bandalag auðmanna og Samfylkingar. Jafnaðarmannaflokkur sem gengur auðmönnum á hönd er vitanlega eitthvað allt annað en, tja, jafnaðarmannaflokkur.

Seinni ranga hugmyndin var að Ísland ætti að verða aðildarriki Evrópusambandsins. Hugmyndin byggir tækifærismennsku annars vegar og hins vegar vankunnáttu, ef ekki réttri og sléttri heimsku.

Strandríki við Norður-Atlantshaf; Noregur, Grænland, Færeyjar og nú síðast Bretland eiga ekkert erindi í Evrópusambandið sem er félagsskapur meginlandsþjóða álfunnar. Kjánaprikin í Samfylkingu töldu sig vita betur.

Þeir sem ákváðu að Samfylkingin skyldi verða ESB-sinnaður auðmannaflokkur bera alla ábyrgðina á falli flokksins.

„Dómur almennings liggur fyrir“

Benedikt tryggir sér kosningastjóra Samfylkingar

Ólafía B. Rafnsdóttir stýrði kosningabaráttu tveggja formanna Samfylkingar, Ingibjargar Sólrúnar og Árna Páls, og var einnig með hlutverk í tvennum kosningum Ólafs Ragnars til forseta.

Benedikt Jóhannesson formaður Viðreisnar tryggir sér þjónustu Ólafíu og veitir ekki af; Viðreisn mælist með fimm prósent fylgi.

Vandi Viðreisnar er ekki skortur á frambærilegu fólki heldur ónýtar hugmyndir.

Ólafía aðstoðarmaður Benedikts

Eiturkoss Junckers og grýlan Pútín

Macron sigurvegari fyrri umferðar forsetakosninganna í Frakklandi varð fyrir því óláni að fá stuðningsyfirlýsingu frá Juncker forseta framkvæmdastjórnar Evrópusambandinu.

Eiturkoss, segir Euractive, enda orðspor ESB í henglum: vildi Hillary, fékk Trump og sagði nei við Brexit en útkoman varð já.

Til að bæta ímynd Macron helsta grýla Evrópusambandsins sett á flot, Pútín Rússlandsforseti. Ef Pútín er almáttugt illmenni, eins og ESB heldur fram, er kyndugt að hann skuli kominn í það hlutverk að geta ekki afgreitt eins og eitt forsetaframboð í Frakklandi. En betra er að veifa röngu tré en öngvu í pólitík.

Macron fyrir árásum rússneskra hakkara

Jón Baldvin: Samfylkingin var mistök

Jón Baldvin Hannibalsson var kallaður guðfaðir Samfylkingar þegar flokkurinn var stofnaður um aldamótin. Þessi fyrrum formaður Alþýðuflokksins segir núna:

Við lít­um svo á og það var ráðandi skoðun á fund­in­um að til­raun­in með Sam­fylk­ing­una hefði í stór­um drátt­um mistek­ist.

Samfylkingin var stofnuð eftir að Jón Baldin og félagar höfðu í áratugi talað um mistökin sem urðu þegar Alþýðuflokkurinn klofnaði 1930 með stofnun Kommúnistaflokks Íslands. Eftir þá höfuðsynd klofna flokkar vinstrimanna á eins til tveggja áratuga fresti: Sósíalistaflokkurinn 1938, Alþýðubandalagið 1956, Samtök frjálslyndra og vinstrimanna 1969, Bandalag jafnaðarmanna 1983 og Þjóðvaki 1994.

Í stuttu máli klofna vinstrimenn þriðja eða fjórða hvert kjörtímabil alla lýðveldissöguna. Saga vinstriflokka er saga mistaka. Ástæðan er einföld. Við höfum Sjálfstæðisflokk sem dekkar hægrivíddina í þjóðlegum stjórnmálum og Framsóknarflokkinn sem er heimili félagshyggjuarms þjóðlegra stjórnmála.

Vinstriflokkar, hvaða nafni sem þeir nefnast, eru boðflennur í tveggja turna stjórnmálum Sjálfstæðisflokks og Framsóknarflokks. Eingöngu þegar höfuðflokkum verður á í messunni eiga vinstriflokkarnir færi á landsstjórninni.

Eftir hrunið 2008 var fyrsta hreina vinstristjórn lýðveldissögunnar mynduð. Og það var eins og við manninn mælt, klofningsárátta vinstrimanna klauf þjóðina í herðar niður - í málum sem kennd eru við Icesave og ESB.

Óopinbert slagorð Samfylkingarinnar er ,,ónýta Ísland". Slagorðið endurspeglar pólitíska sjálfsvitund vinstrimanna. Aðeins í rústum lýðveldisins fá vinstriflokkar hljómgrunn.

Vill sameina jafnaðarmenn

Ákæruvaldið stundar pólitískt einelti

Ákæruvaldið er hluti ríkisvaldsins. Tjáningarfrelsið er varið í stjórnarskránni. Nú liggur fyrir að ákæruvaldið er í höndunum á fólki sem fótum treður stjórnarskrána með tilhæfulausum ákærum á hendur þeim sem taka til máls á opinberum vettvangi.

Hrein og klár pólitík liggur að baki ákærunum. Ríkissaksóknari telur sumar skoðanir óæskilegar og herjar á mann og annan sem þær hafa í frammi.

Þegar ríkisstofnun, sem á að vera hlutlæg og málefnaleg, stundar hernað gegn stjórnarskrárvörðum rétti borgaranna hlýtur það að hafa afleiðingar.

Jón Valur sýknaður af hatursorðræðu

Föðurlandsvinur gegn þjóðernissinna

Gömlu flokkarnir í Frakklandi, sósíalistar og íhaldsmenn, eiga ekki fulltrúa í seinni umferð forsetakosninganna. ,,Áfram gakk" flokkur Macron, sem var ekki til fyrir einu ári, etur kappi við þjóðarfylkingu Marine Le Pen.

Macron lýsir sjálfum sér sem föðurlandsvini og Le Pen er þjóðernissinni.

Alþjóðahyggja er ekki vinsæl í Frakklandi.

Baráttan um Frakkland

Frosti, Ann Coulter og frjálslyndur fasismi

Frosti Logason og Ann Coulter virðast ekki margt sameiginlegt, nema kannski áhuga á fallegum konum. En bæði andæfa þau, hvort með sínum hætti, sjálfhverfustjórnmálum sem á ensku kallast ,,identity-politics".

Frosti skrifar í Fréttablaðið, sjá endursögn Eyjunnar, um sjálfhverfustjórnmál: 

Málfrelsið er úrelt afsprengi feðraveldis. Við afnemum það fyrir fólk sem við höfum ákveðið að þarfnist sérstakrar verndar. Við trúum ekki á samræður og rök, sumir mega einfaldlega ekki tjá sig.

Ann Coulter fær ekki að tala í Berkeley-háskólanum sökum þess að hún er með rangar skoðanir að dómi sjálfhverfusinna, sem þola ekki að heyra þær.

Sjálfhverfustjórnmál ganga út á að óþol sumra fyrir skoðunum annarra sé rétthærri en tjáningarfrelsið. Sjálfhverfusinnar búa til hugtök eins og ,,hatursorðræða" og efna til ofsókna gegn einstaklingum með rangar skoðanir.

Rökleg afleiðing sjálfhverfustjórnmála er eins og til er stofnað, hugtakamótsögn: frjálslyndur fasismi.

Kæra fái Ann Coulter ekki að mæta

Frakkland, Evrópa í uppnámi

Fjórir frambjóðendur eiga möguleika að komast í seinni umferð forsetakosninganna í Frakklandi: þjóðernissinni - Le Pen, sósíalisti - Mélenchon, miðjumaður - Macron og íhaldsmaður - Fillon.

Róttækasta niðurstaðan yrði að Le Pen og Mélenchon næðu seinni umferðinni. Þau eru bæði andvíg Evrópusambandinu og boða uppstokkun á ríkjandi fyrirkomulagi.

Líklegast er að Le Pen og miðjumaðurinn Macron nái seinni umferð. Og nær allar spár gera ráð fyrir að Macron yrði sigurvegari í þeim slag.

Fjölmiðlar, t.d. Guardian og Telegraph, segja kosningarnar þær mikilvægustu í seinni tíma sögu Frakklands. Ekki síst vegna þess að niðurstaðan gæti orðið banabiti Evrópusambandsins.

Síðustu tvö ár hafa múslímskir hryðjuverkamenn orðið 230 manns að bana í Frakklandi. Múslímar eru um 8 prósent af íbúafjölda landsins. Allt frá frönsku byltingunni fyrir 200 árum er trúarstef víkjandi í stjórnmálum. Herskáir múslímar breyta þeirri stöðu. Uppgangur þeirra veldur misklíð í landinu þar sem ósætti er um hvernig skuli brugðist við.

 

Mikil öryggisgæsla í Frakklandi

Vísindi, trú og lýðræði

Vísindi eru góð fyrir sinn hatt ef þau eru skilin sem frjáls umræða og frjálsar rannsóknir. Gamanið fer aftur að kárna ef vísindin eru tekin sem safn óhrekjanlegra kennisetninga, líkt og trúarbrögð.

Lýðræðinu er ekki vel þjónað með því að setja vísindin á stall til að vegsama. Vísindin eru mistæk eins og önnur mannanna verk. Einu sinni voru mannkynbótafræði háalvarleg vísindi.

Vísindi eru, þegar öllu er á botninn hvolft, aðeins það sem þeir er þau stunda taka gott og gilt á hverjum tíma.

Gengið fyrir vísindin