Helga krefst virðingar en sýnir sjálf virðingarleysi

Helga Björg skrifstofustjóri Reykjavíkurborgar var dæmd fyrir virðingarleysi og ólögmæta áminningu sem hún veitti undirmanni sínum.

Tvö ár eru liðin frá dómnum og Helga Björg Ragnarsdóttir er í stöðugri herferð fyrir æru sinni, sem hún taldi hafa beðið hnekki vegna dómsorða um að hún hefði hagað sér eins og ,,hring­leika­hússtjóri".

Í löngum pistli sér til varnar dettur Helgu Björg ekki í hug að biðja undirmann sinn afsökunar og sýnir í engu tilburði til að draga lærdóm af dómnum.

Helga Björg vill frekjast áfram og sýna öðrum virðingarleysi en krefst samtímis virðingar fyrir sig og sína persónu.

Kostulegt, svo ekki sé meira sagt.

„Súrrealísk atburðarás“ eftir dóm héraðsdóms

Helga Vala og einræði tilfinninganna

Helgu Völu þingmanni Samfylkingar finnst hún búa í einræðisríki með því að alræmdur vinstrimaður fær ekki að ritstýra norrænu tímariti um hagpólitík.

Einræði er vald án meðalhófs, réttvísi og skynsemi. Einræði leiðir einatt til öfga, hvort heldur einstaklingur eða samfélag eigi í hlut.

Helga Vala líður fyrir einræði tilfinninganna. Einráð tilfinning þingmannsins heitir á íslensku frekja.

Segir sjálfstæðismenn færa sig æ meira nær einræði

Vinstrimenn: 3 tilraunir til að brjálast

Ekki-ráðning Þorvaldar Gylfasonar var sumartilraun vinstrimanna að brjálast. Brandari í afmælisveislu var í boði Semu Erlu Serdar tilraun til að tryllast. Leiðtogi sósíalista, Gunnar Smári, vill ekki láta sitt eftir liggja og býður styttu Ingólfs Arnarsonar sem tilefni til að ganga af göflunum.

Má ekki gera ráð fyrir málþingi í Háskólanum, upplestri í Borgarleikhúsinu og mótmælafundi á Arnarhvoli?

Svona þegar vinstrimenn eru búnir að ákveða hvað tryllir þá mest sumarið 2020.

Þorvaldur eigi tæplega samleið með ráðuneyti Bjarna

Farsóttin felldi lífskjörin

Aðeins verkalýðsrekandi skilur ekki að farsóttin felldi lífskjörin. Atvinnustarfsemi býr til lífskjör, eins og þau eru mæld í krónum og aurum. Samdráttur í atvinnustarfsemi þýðir síðri lífskjör.

Hvernig getur það verið flókið?

Verkalýðsrekendur halda að peningar vaxi á trjánum eða komi með félagsgjöldum óháð efnahagslegum veruleika.

Samningurinn að óbreyttu fallinn

Þorvaldur, gasgrillið og vinstrimenn

,,Sjálfstæðismenn sem tala um lýðræði orka nú orðið á mig eins og nasistar að auglýsa gasgrill," skrifaði Þorvaldur Gylfason á Fésbókarsíðu sína.

Maður skilur af hverju Þorvaldur er í uppáhaldi vinstrimanna.

„Sjálfstæðisflokkurinn treystir honum ekki“

Göbbels og menningin

Þegar ég heyri orðið menning gríp ég til byssunnar, er tilsvar haft eftir Göbbels, áróðursráðherra Þriðja ríkisins. 

Tilsvarið er raunar eftir eftir nasískt leikskáld, Hanns Johst, en haft til marks um fasískt viðhorf til menningar.

Söguleg vestræn menning geymir bæði mannúð og grimmd, fegurð og ljótleika, fordæmi til að fylgja og afglöp að varast.

Bannfæring á menningararfi er hreinn og klár fasismi klæddur í búning pólitísks rétttrúnaðar. 

Á hverfanda hveli fjarlægð úr streymisveitu

Viðreisnarfasismi: Trump, Hitler og Stalín

Stofnandi Viðreisnar, Benedikt Jóhannesson, leggur til nýja skilgreiningu á fasisma í Moggapistli. Hann hrúgar saman þeim bandaríska Trump, þýska Hitler og sovéska Stalín.

Andstæðingar fasista eru ,,góða fólkið", að sögn Benedikts.

Í meðförum fyrrum formanns Viðreisnar er fasismi ekki lengur hugmyndafræði heldur manngerðir. Fasisti er sá sem notar ofbeldi, íkveikjur og hótanir til að fá sínu framgengt.

Fasistar samtímans búa til ímyndaðan óvin, ,,kerfið", til að réttlæta skemmdarverk og vandalisma.

Hvað gerir góða fólkið? Jú, það hvetur fasista til dáða í von um pólitísk tækifæri. Því hvað er aumara en að vera á besta aldri með mikla löngun að láta að sér kveða, en samt fyrrverandi?

 

Brennum Bristol, borgin er byggð á þrælasölu

Bristol er byggð á þrælasölu, segir sagnfræðingur sem fagnar eyðileggingu borgarminja. Sagnfræðingurinn leggur þó ekki til að borginni sé eytt.

En hvers vegna ekki? Borg byggð á þrælasölu hlýtur að vekja álíka andstyggð og bronsstytta af þrælasala. Og hvað með íbúana. Einhverjir þeirra eru afkomendur þrælasala. Er ekki rétt að þeir fái makleg málagjöld?

Hugmyndafræðin um hreinan kynstofn fékk sína stund um miðja síðustu öld. Nú er komið að hugmyndafræðinni um sögulegt sakleysi. Við hljótum að krossa fingur í von um að sögulega sakleysið fái ekki viðlíka hljómgrunn. Minnumst þess að keltnesku þrælanna er enn óhefnt á íslenskri grundu.

Og þrælahaldarinn er drap tíu þræla Hjörleifs með köldu blóði stendur keikur á Arnarhvoli.

 

 

Styttan af Colston verði ekki endurreist

Skógur eða mýri

Hvort á að græða landið skógi eða gera það að mýri? Ungmennafélagshugsjónin segir já við skógi en mýrin er fyrsti kostur þeirra sem trúa á manngert veðurfar.

Auðvitað er algjör tilviljun að Skógræktarfélag Íslands segi sig úr Landvernd mýrarfólksins.

Engin ,,styggð" er þar á milli, aðeins ólík heimssýn.

 

Skógræktarfélag Íslands segir sig úr Landvernd

Réttlæti er jöfn tækifæri, ekki jöfn útkoma

Til að samfélag sé réttlátt verða borgararnir að eiga jöfn tækifæri til að gera það úr lífi sínu sem hugurinn stendur til.

Sumir skilja réttlæti þannig að útkoman úr lífsbrölti fólks eigi að vera söm og jöfn fyrir alla. En það er ómögulegt. Við erum ólík að upplagi með mismunandi skoðanir á góðlífi og tilviljanir ráða oft meiru en ásetningur.

Krafa um réttlæti er oft dulin krafa um ríkisforsjá á lífi okkar. Við höfum gert tilraun með slíkt samfélag. Tilraunin heitir sósíalismi og skilaði neikvæðri niðurstöðu.

 

Eiga það sameiginlegt að krefjast réttlætis