Gísli og arabíski læknirinn

Shaden Salameh-Youssef er arabísk kona og yfirmaður bráðadeildar á ísraelsku háskólasjúkrahúsi. Hún er fyrsta ísrael-arabíska konan til að stjórna bráðadeild á ísraelsku sjúkrahúsi. Í viðtali við Jerusalem Post segir Salameh-Youssef að arabar og gyðingar verði að læra að lifa í sátt í Ísraelsríki.

Víkur nú sögunni að RÚV-aranum Gísla Marteini sem tekur undir málstað Hama-hryðjuverkasamtakanna um að tortíma Ísrael. Í skýrslu Amnesty International segir að Hamas stundi á heimastjórnarsvæðinu Gaza morð, pyntingar og misþyrmingar, ekki síst á konum og minnihlutahópum eins og samkynhneigðum.

Gísli Marteinn og viðhlæjendur hans eru sérstök tegund af fólki sem bláeygt og brosandi keppist við að fegra illskuna.

Sagði kynningarnar ekki pólitíska pistla

Hamas-stuðningur á alþingi

Hamas eru hryðjuverkasamtök sem nota íbúa Gaza sem mannlega skildi. Hamas skjóta síðustu daga yfir tvö þúsund flugskeytum á Ísrael frá þéttbýlinu í Gaza gagngert til að fórna almennum borgurum, ísraelskum og arabískum, á altari trúarhaturs.

Nokkrir þingmenn á alþingi Íslendinga fordæma varnarstríð Ísraela en halla ekki orði á hryðjuverkasamtökin.

Þingmennirnir segjast ,,standa með mann­rétt­ind­um og að beita sér fyr­ir frjálsri Palestínu." Mannréttindi og frelsi í hryðjuverkaríki? Ætlast þetta fólk til að vera tekið alvarlega?

Þingmenn fordæma aðgerðir Ísraels

Nýr Hitler óskast, CNN og RÚV

Fréttamaður CNN tísti að heimurinn þyrfti nýjan Hitler. Andúð á gyðingum tekur á sig ýmsar myndir í Bandaríkjunum, Bretlandi, sbr. viðtengda frétt, og í Þýskalandi. 

RÚV segir fréttir af átökum Hamas og Ísraelshers sem skilja má þannig að Ísraelsmenn geri sér að leik að drepa almenna borgara.

Yfirvaraskegg á Efstaleiti.

Ráðist á breskan rabbína

Trump-stefnan í fullu gildi: öxullinn Grænland-Ísland

Biden-stjórnin í Washington fylgir utanríkisstefnu Donald Trump. Brotthvarf Bandaríkjahers frá Afganistan er eitt dæmi og annað er áherslan á norðurslóðir. 

„Stutta svarið er nei,“ svaraði bandaríski utanríkisráðherrann Antony Blinken, þegar hann var spurður hvort Bandaríkin hefðu enn áhuga á að kaupa Grænland.

Langa svarið er já, Washington lítur á Grænland og Ísland sem nærsveitir meginlands Bandaríkjanna.  Árið 2006 afbyggði Bandaríkjaher Keflavíkurstöðina til að nota vígtólin í Írak og Afganistan. Núna er annað hljóð í strokknum og Sámur frændi reisir mannvirki á Miðnesheiði.

Stefna Donald Trump var afleiðing endurmats á brýnum hagsmunum Bandaríkjanna. 

Áhrifamikið framlag í þeirri endurskoðun er bók Stephen M. Walt, The Hell of Good Intentions, frá 2018. Walt tilheyrir þeirri hefð í utanríkispólitík sem kennd er við raunsæi.

Biden-stjórnin er nógu tengd veruleikanum til að hverfa ekki frá raunsæisstefnu Donald Trump.

 

Vilja ekki lengur kaupa Grænland

Guðrún var væn og kurteis - ég trúi

Guðrún Þórðardóttir var ,,kvenna vænst og kurteisust," segir í Guðmundar sögu dýra. Hún átti bú eftir föður sinn og þótti bestur kostur jafnborinna kvenna.

Fyrst giftist Guðrún Símoni Þorvarðarsyni, vinsælum manni og hógværum. Guðrún undi sér ekki með Símoni, ,,fór stundum frá búinu en stundum heim." Símon drukknaði í sendiferð Guðrúnar.

Næst giftist Guðrún Hrafni Brandssyni. Guðrún ,,hljóp úr hvílu hina fyrstu nótt er Hrafn var inn leiddur." Guðrún eignast ástmann, Hákon Þórðarson frá Laufási. 

Einn dag mælti Guðrún til Hákonar, kvaðst eigi vilja komur hans meðan Hrafn væri á lífi ,,en ger sem þér sýnist síðan."

Hákon lagði til Hrafns með spjóti. Guðrún bað Hrafn ekki vega á móti sem dó eftir þau orð að svöðusárin væru grunn en svikin særðu. Þórður, faðir Hákonar, vildi að Guðrún bætti að hálfu manngjöld eftir vígið þar eð hún lagði á ráðin. Guðrún neitaði og við það sat. Frændur Hákons og Þórðar bættu Hrafn.

Síðan fékk Hákon Guðrúnar og var við hana harður og kvað sér eigi skyldu það verða að hennar menn stæðu yfir höfuðsvörðum hans.

Ekki gekk það eftir. Hákon tók þátt í Önundarbrennu með frænda sínum, Guðmundi dýra. Í eftirmálum var sótt að Hákoni, bræðrum hans og vinum. Hákon og félagar gáfust upp og vildu flestir gefa honum grið. Hákon þótti mildur, kom t.d. í veg fyrir aftöku Ögmundar sneis er hafði fíflað móður hans. Kom þá til skjalanna Sigurður grikkur og bauðst til verksins. 

Hákon svarar: ,,Það myndi ég helst kjósa því að frá þér er ég ómaklegastur þeirra manna er hér eru. Ég tók við þér félausum er þú komst út [þ.e. til Íslands] og veitti ég þér vist.En ég stóð þig þrisvar í hvílu hjá Guðrúnu konu minni."

Guðrún er ekki til frásagnar um hvað þeim Sigurði grikk fór á milli við hvílubrögðin. Ég trúi að Guðrún hafi verið leiksoppur vondra manna. 

 

 

ESB efast um Schengen - misheppnuð flóttamannastefna

Stefna Evrópusambandsins gagnvart flóttamönnum virkar ekki, viðurkennir einn af æðstu ráðamönnum sambandsins, Michel Barnier. Hann vill banna viðtöku flóttamanna til ESB í þrjú til fimm ár og endurskoða Schengen-samstarfið.

Barnier var aðalsamningarmaður ESB gagnvart Bretum í Brexit-útgöngunni og nýtti hvert tækifæri til að kenna Breta við rasisma, skrifar dálkahöfundur Telegraph.

Annar dálkahöfundur sömu útgáfu rekur sinnaskiptin til Frakklands, heimalands Barnier.

Opingáttarstefna síðustu ára gagnvart flóttamönnum er að syngja sitt síðasta í Brussel. Vandræðin sem sköpuðust í Evrópu eru rétt að byrja.

Skakki Samfylkingarturninn og uppgjör Blair

Samfylkingin var stofnuð um aldamótin til að verða ,,hinn" turninn í íslenskri pólitík. Sameinaðir vinstrimenn gáfu sér Sjálfstæðisflokkinn sem viðmið. Í fyrstu kosningunum eftir hrun virtist Samfylkingin ná markmiðinu, varð stóri turninn með 30 prósent fylgi.

En það reyndist misskilningur. Kjósendur skáru fylkinguna niður í 12,9% í þingkosningunum 2013. Þar mallar flokkurinn síðan og þarf að sætta sig við þá háðung að smælkið Vinstri grænir er stórbygging íslenskra vinstristjórnmála.

Tony Blair fyrrum formaður breska Verkamannaflokksins er hugmyndafræðingur Samfylkingarinnar. Bæði Össur og Björgvin G. státuðu sig um aldamótin að vera ,,Blairistar" og með skírteini breska systurflokksins upp á það.

Blair skrifar grein í New Statesman til að útskýra ógöngur Verkamannaflokksins og óbeint Samfylkingarinnar.

Verkamannaflokkurinn/Samfylking eru í höndum fólks sem hatast við siði og gildi almennings. Sjálfhverfustjórnmál, identity-politics, eru aðall róttæklinganna sem  fyrirverða sig fyrir sögu og menningu þjóðarinnar sem fóstraði þá. Hægrimenn sigra auðveldlega menningarstríðið sem róttækir vinstrimenn fitja upp á í einni útgáfu eða annarri. Einfaldlega vegna þess að almenningur kýs að líða vel í eigin skinni og lifa í sátt við sögu sína og menningu.

Til að bjarga valkosti við Íhaldsflokkinn þarf að afbyggja og endurbyggja Verkamannaflokkinn, skrifar Blair. Án umskipta er flokkurinn dauður.

Bretland er í reynd tveggja flokka stjórnmálakerfi. Ísland er fjölflokkakerfi. Samfylkingin stefndi að tveggja turna kerfi Sjálfstæðisflokks og Samfylkingar, með lággróðri smáflokka er leituðu í skuggsælu turnanna eftir stöðu veldissólarinnar á hverjum tíma.

Samfylkingin kom ekki fyrir sjónir eins og turn heldur skopparakringla. Í hrunstjórninni 2007-2008 var fylkingin til hægri við Sjálfstæðisflokkinn, gekk erinda auðmanna af slíkri ákefð að varaformaður flokksins lagði til að enska yrði opinbert tungumál á Íslandi. Í vinstristjórninni 2009-2013 var Samfylkingin til vinstri við Vinstri græna og efndi til pólitískrar borgarastyrjaldar gegn stjórnarskrá lýðveldisins.

Samfylkingin er flokkur án kjölfestu. Eða, svo notað sé líkingarmál úr verkfræði, turninn var skakkt byggður þegar í upphafi. 

Íslenskuð ráðlegging Blair til Samfylkingar er: leggið þið flokkinn niður. Þá er kannski hægt að byggja lítið sætt kratískt hús á traustum grunni. Nafnið er þegar komið, Viðreisnarfylkingin.

 

 

Darwin bannfærður

Höfundur þróunarkenningarinnar, Charles Darwin, breytti skilningi okkar á þróun lífs á jörðinni. Fyrir daga Darwin réðu trúarkenningar ferðinni í frásögn af upphafi jarðlífs. Einhver útgáfa af Adam og Evu í eingyðistrúarbrögðum og önnur í goðafræðum fjölgyðistrúar sagði alþjóð upphafið.

Þróunarkenningin, aftur á móti, útskýrir að lífverur þróist samkvæmt náttúruvali. Maðurinn er ein afurð rétt eins og aðrar lífverur. Tegundin, Homo Sapiens, verður til fyrir um 200 þúsund árum og sumir eiginleikar hennar, t.d. að tjá sig með tungumáli, eru yngri, líklega um 70 þúsund ára gamlir.

Frá og með útgáfu þróunarkenningarinnar um miðja 19. öld eigum við skipulega frásögn byggða á tiltækri vísinda- og fræðiþekkingu um upphaf lífs á jörðinni.

En, því miður, var Darwin hvítur Evrópumaður. Og sem slíkur er hann ótækur að áliti pólitíska rétttrúnaðarins sem telur vísindi og fræði kukl hvíta mannsins. Í háskólanum í Sheffield, heimalandi Darwins, er höfundur þróunarkenningarinnar settur í skammarkrókinn fyrir að hafa verið sem hann var; hvítur Evrópumaður.

Ritskoðun á Darwin er liður í menningarstríði þar sem öfl hjátrúar og hindurvitna skora á hólm raunsæi og rökfærslu. Bandarískir háskólar eru margir andsetnir hjátrú og hindurvitnum og þeir bresku berjast fyrir lífi sínu.

Dálkahöfundur Telegraph segir nýjar miðaldir á næsta leiti með andlegri myrkvun. Trúðar með háskólapróf frá menntastofnunum sem bannfæra Darwin eru nýju páfarnir.

Rasismi, þjóðhernishyggja og gyðingahatur

Um 20 prósent íbúa Ísraels eru arabar. Þeir njóta mannréttinda og eiga 14 fulltrúa í Knesset, ísraelska þinginu. Enginn gyðingur nýtur mannréttinda í Gaza eða Vesturbakkanum. Þar eru ekki frjálsar kosningar og minnihlutahópar, s.s. samkynhneigðir, eru ofsóttir.

Vinstrimenn taka málstað rasisma, arabískrar þjóðernishyggju og gyðingahaturs þegar þeir úthúða Ísraelsríki fyrir að verja líf og limi borgara sinna gegn hryðjuverkaárásum Hamas og arabískra öfgamanna.

Ísrael er eina lýðræðisríkið fyrir botni Miðjarðarhafs. Þeir sem undir merkjum frjálslyndis og mannúðar taka undir kröfu um tortímingu Ísraelsríkis ganga erinda illskunnar.

Hundruð mótmæla Ísraelsher og stefnu stjórnvalda

Játningar illmenna og aumingja

Eftirspurn er eftir körlum sem annað tveggja lýsa sig stórgallaða vegna frekju, yfirgangs og ofbeldis eða aumingja. Listamenn, vanir að svara eftirspurn og fara í hlutverk, ryðja brautina og játa sig gerendur eða þolendur.

Samfélagið batnar ekki ef ungum körlum er kennt að þeir séu væntanlegir ofbeldismenn annars vegar og hins vegar að hafa lúkuna fyrir afturendanum af ótta við aðskotahluti.

Það er hægt að vera íslenskur karlmaður og hvorki berja né misþyrma eða vera nauðgað. Allar líkur er á að þorri íslenskra karla sé einmitt í þeirri stöðu. En það eru ekki fréttir og tíðindalítið að einhver játi sig normal.