Hugarfar fötlunar og andlegra veikinda

40 prósent háskólanema eru ýmist fatlaðir eða langveikir og sjúkrasjóður kennara er að tæmast vegna andlegra veikinda stéttarinnar.

Engar breytingar í starfsumhverfi skóla skýra verra heilsufar nemaenda og kennara. Í tilfelli háskólanema blasir sú mótsögn við að þeir vinna langtum meira með skóla en nemendur erlendis. 

Hugarfarið og aukin velmegun er líklegasta skýringin á verra heilsufari nemenda og kennara.

Háskólanemar vinna mikið

ESB tapar í Ungverjalandi; sniðmát lýðræðis umskrifað

Sigur Viktor Orban í Ungverjalandi er tap Evrópusambandsins. Orban er valdhöfum í Brussel óþægur ljár í þúfu. Hann leiðir andóf Austur-Evrópuþjóða gegn tilskipunum um viðtöku múslímskra flóttamanna og afskiptum af innanríkismálum.

Pólsk stjórnvöld taka sigri Orban fagnandi og hægristjórnin í Austurríki sömuleiðis. Í þýskum fjölmiðlum er Orban ýmist kenndur við harðlínulýðræði eða foringjalýðræði sem er andstaða við frjálslynt lýðræði.

Fjölmenningin var til skamms tíma pólitísk stefna frjálslynds lýðræðis. Í áratugi gróf fjölmenningin undan þjóðlegum samfélagsgildum. Stjórnmálamenn eins og Orban, Kaczynski í Póllandi og Kurz í Austurríki fá lýðræðislegt umboð almennings til að stemma stigu við fjölmenningunni.

Í félagi við leitoga í Mið- og Austur-Evrópu eru Trump í vestri og Pútín í austri að umskrifa sniðmát vestræns lýðræðis.

Flokkur Orban með meirihluta

Vinstrikonur - kommúnistar 21stu aldar

Vinstrikonur hyggja á framboð til borgarstjórnar undir sömu formerkjum og marxistar á 19. öld: öreigar (konur) allra landa sameinist.

Íslenska vinstrikonan er á góðri leið með að útrýma karlkyninu í framhaldsskólum og háskólum. Þeir fáu drengir sem hætta sér í skóla fá á sig holskeflu af áróðri um að þeir tilheyri ,,nauðgunarmenningu" og séu almennt vont fólk.

Vinstrikonum finnst ekki nóg að veikara kynið sé jaðarsett í skólakerfinu - 80 prósent kennara eru konur - nú skal tekið til í sveitarstjórnum. Og hvar er betra að byrja en í borg Dags?

Kvennaframboð býður fram í vor

Ísland er ekki hjálenda Noregs - Osló þarf skýr skilaboð

Norskir embættismenn, sem upp til hópa eru ESB-sinnar, líta á EES-samninginn sem verkfæri til að gera Noreg að ESB-ríki. Þeir taka fagnandi allri útvíkkun EES-samningsins enda færist Noregur þar með nær því að verða aðildarríki Evrópusambandsins.

Norsku embættismennirnir líta á Ísland eins og Gamli sáttmáli sé enn í gildi. Ef konungsríkið tekur ákvörðun skal hún gilda fyrir hjálenduna.

Alþingi Íslendinga á að standa vörð um fullveldið og yfirráð þjóðarinnar yfir auðlindum okkar. Embættismennirnir í Osló verða að fá skýr skilaboð. Við eigum að hafna yfirtöku ESB á rafmagnsframleiðslu á Ísland í gegnum EES-samninginn.

Miklar áhyggjur af orkulöggjöfinni

Þegar Þjóðverjar tóku Noreg á undan Bretum

Í dag eru 78 ár síðan Bretar afturkölluðu innrásarflota á leið til Noregs. Þjóðverjar sigldu - og flugu - fram úr Bretum og gerðu samræmda innrás í alla landshluta Noregs 9. apríl. Markmið Þjóðverja var tvíþætt. Í fyrsta lagi að tryggja sér járngrýti frá Narvik í Norður-Noregi og í öðru lagi að koma í veg fyrir hafnbann á Þýskaland, líkt og í fyrri heimsstyrjöld, með aðgangi flotastöðvum í Suður-Noregi.

Þýska herstjórnin gerði kvikmynd um herförina (takk, Magnús Þór) sem sýnir innrásina frá þeirra sjónarhóli. Kvikmyndin er stórmerkileg. Hún rekur tæknilega útfærslu á umfangsmikilli hernaðaraðgerð. Þjóðverjar litu svo á að innrásin í Noreg væri varnarstríð. Bretar ætluðu sér Noreg til að herja á Þýskaland og norsk yfirvöld voru ekki tilbúin að verja hlutleysi landsins með vopnum. Þjóðverjar töldu sig nauðbeygða til aðgerða. 

,,Þegar vopnin tala," er setning sem kemur fyrir í inngangi kvikmyndarinnar. Pólitík og hugmyndafræði víkja til hliðar. Verkefnið er að sigra andstæðinginn. Til þess þarf mannskap, vopn og skipulag.

Þjóðverjar sýndu sig meiri kunnáttumenn í hermennsku í Noregsleiðangrinum en Bretar. Yfirstjórnin í London var fálmkennd og óskipulögð. Þeir sendu breskt-franskt herlið til Narvik og börðust þar við Þjóðverja í fjórar vikur en hörfuðu að lokum. 

Fall Noregs leiddi til stjórnarkreppu í London. Neville Chamberlain forsætisráðherra sagði af sér og Churchill tók við stjórnartaumunum. Gráglettni örlaganna er að Churchill bar sinn hluta ábyrgðarinnar af tapi Noregs. Þegar leið á stríðið reyndist Churchill þó Bretum drjúgur.

Lykillinn að árangri Þjóðverja í Noregi voru samræmdar aðgerðar skipaflota og flugvéla. Bretar áttu mun stærri herskipaflota og stjórnuðu úthöfunum. Ekki var raunhæft fyrir Þjóðverja að sækja lengra vestur, til Íslands og Færeyja.

Bretar viðurkenndu ósigur í Noregi 10. maí 1940 og drógu tilbaka herliðið í Narvik. Sama dag hernámu þeir Færeyjar og Ísland með lítilli fyrirhöfn og óverulegum mannskap. 

Seinni heimsstyrjöld þróaðist i meginlandastríð Ameríku, klofinnar Evrópu og sterkasta Asíuríkisins, Sovétríkjanna. Noregur og Ísland skiptu máli sem útverðir, fyrir hernað Þjóðverja gegn skipalestum bandamanna til Sovétríkjanna annars vegar og hins vegar liðsflutninga Bandaríkjanna til Bretlands. 

Geðbilaður, ekki múslími

Fyrsta auðkenni Die Welt á ökumanni bifreiðarinnar sem ök inn í mannþröng í Münster í Þýskalandi: geðbilaður, ekki múslími. Fréttinni var síðar breytt.

Þjóðverjar eru nákvæmir - en vilja líka forðast alhæfingar.

 

 

 

Ók bíl inn í mannfjölda

Jordan Peterson og stríðið um vestræna siðmenningu

Menningarstríð stendur yfir á vesturlöndum. Kanadískur sálfræðingur, Jordan Peterson, ber um þessar mundir höfuð og herðar yfir þann aragrúa menntamanna, álitsgjafa, blaðamanna og bloggara sem taka til máls í menningarstríðinu.

Peterson varð fyrir tilviljun miðlægur í menningarstríðinu. Kanadísk stjórnvöld ákváðu að skylda háskólakennara til að nota þau persónufornöfn sem nemendur kusu sér. Ef nemandi vildi hvorki vera hún eða hann heldur ,,hán" ætti kennarinn að tileinka sér orðfærið. Peterson neitaði, kvaðst ekki láta stjórnvöld taka af sér málfrelsið. Úr varð hvellur þar sem tekist var um tjáningarfrelsi og valdi minnihlutahópa til að stjórna málfari samfélagsins.

Peterson gaf út bók, 12 lífsreglur, sem kalla má sjálfshjálparbók fyrir aumingja. En, eins og alþjóð er kunnugt, elur vestræn siðmenning af sér ógrynni aumingja síðustu áratugi. Á Íslandi birtist aumingjavæðingin m.a. þannig að stjórnmálaflokkar leita skipulega að fórnarlömbum á framboðslista. Það er smart að vera afturúrkreistingur.

Sumir töldu sig sjá kvenfyrirlitningu í sjálfshjálparbók Peterson. Stórskytta úr röðum spjallþáttastjórnenda í Bretlandi, Cathy Newman, var fengin til að leiða Peterson til slátrunar. Til að gera langa sögu stutta svaraði sá kanadíski þannig fyrir sig að vélbyssukjafturinn varð að gjalti.

Spjallið við Newman skaut Peterson á stjörnuhiminn netsins og þaðan í fjölmiðla. Virðulegir og íhaldssamir fjölmiðlar skrifa stórt og smátt um Peterson og samfélagstaugarnar sem hann snertir. Tímaritið Foreign Affairs birtir grein er lýsir framgangi Peterson sem helsta spámanni samtímans. Greinin er neikvæð gagnvart kanadíska sálfræðingnum en er fyrst og fremst staðfesting á þeim menningarpólitíska krafti sem Peterson leysir úr læðingi.

Jóhönnustjórnin og hryðjuverkin 2009-2013

Pólitískt hryðjuverk stóðu yfir á Íslandi í tíð ríkisstjórnar Jóhönnu Sigurðardóttur. Í fyrsta sinn í lýðveldissögunni réð vinstristjórn landsstjórninni. Vinstrimenn, sem höfðu verið klofnir frá 1930, þegar kommúnistar í Alþýðuflokknum stofnuðu flokk, náðu loks saman. Afleiðingarnar urðu skelfilegar.

Arfur Jóhönnustjórnarinnar er dómsmorð fyrrverandi forsætisráðherra, atlaga að stjórnskipun lýðveldisins, framsal á efnahagslegu fullveldi þjóðarinnar til Breta og Hollendinga, með Icesave, og tilraun til að gera Ísland að hjálendu Evrópusambandsins, með ESB-umsókninni.

Ríkisstjórn Sjálfstæðisflokks og Framsóknarflokks batt endi á pólitísku hryðjuverkin. Nema dómsmorðið, sem var fullframið. Tímabært er að leiðrétta það.

 

Vilja að beðist verði afsökunar

Innanlandsófriður í Noregi, Ísland í gíslingu

ESB-sinnar í Noregi ætla að verja EES-samninginn til síðasta blóðdropa, enda líta þeir svo á að samningurinn sé fyrsta skrefið inn í Evrópusambandið. Samtímis vex þeim fiskur um hrygg í Noregi sem vilja út úr EES.

Bretland er á leið úr Evrópusambandinu og ætla ekki inn í EES-samninginn enda vilja þeir fullveldið sitt tilbaka.

Ísland, eins og Noregur, er aðili að EES-samningnum. Norðmenn koma fram við okkur eins og hjálendu og ætlast til að Ísland samþykki útvíkkun EES-samningsins þegar það þjónar eingöngu norskum hagsmunum.

Ísland ætti að höggva á hnútinn og segja upp EES-samningnum. Hann gerir meira ógagn en gagn.

Vilja ekki að Bretar fái betri samning

Birgitta tekur gnarrinn á Pírata, fer í Vinstri græna

Birgitta Jónsdóttir vildi fá ráðgjafastöðu hjá Pírötum eftir að hún hætti þingmennsku. Þingflokkar fá tugi milljóna til að kaupa sérfræðiþjónustu og Birgitta vildi komast í þá peninga.

Birgitta eftir þingmennsku var í sömu stöðu og Jón Gnarr eftir borgarstjóraembættið. Bæði í leit að þægilegri innivinnu, fá nokkurs konar borgaralaun ónytjunga.

Vinstri grænir sáu aumur á Birgittu og búin var til nefnd fyrir hana á vegum forsætisráðuneytisins.

En, vitanlega, við getum bókað að Birgitta og Jón Gnarr, sem bæði eru hámenntuð í héraðsskólanum að Núpi í Dýrafirði, stunda opinbert líf algjörlega í þágu almannaheilla. 

Birgitta hætt í Pírötum