Sjálfstæðisflokkurinn eykur fylgið vegna MDE-málsins

Píratar, Viðreisn og aðrir vinstriflokkar ætluðu að skora stórt með MDE-málinu. Síðasti hluti þess hófst fullveldisdaginn.

Almenningur keypti ekki áróður vinstrimanna um ónýta Ísland og jánkaði móðurflokknum í skoðanakönnun sem stóð yfir þá daga sem málið geisaði í umræðunni.

Vinstriflokkarnir eru sérfræðingar að skjóta sjálfa sig í fótinn.

Sjálfstæðisflokkurinn bætir við sig

Kennarar kæri foreldra fyrir ofbeldi

Ekki er það góð hugmynd að kennarar fái það sérstaka hlutverk að finna nemendur er ,,verða fyr­ir og/eða verða vitni að heimilisofbeldi" og kæri til lögreglu.

Hlutverk kennara er að mennta, ekki að hnýsast í einkamál nemenda og fjölskyldna þeirra.

Áhugafólk um ofbeldi fer himinskautum í umræðunni og vill að ríkisvaldið hefji umsátur um heimili landsmanna í leit að misfellum í fjölskyldulífi. Nú heitir það ofbeldi ef foreldrar eiga það til að öskra. Víst er það ekki til fyrirmyndar en sumum liggur hátt rómur.

Á meðan það er frjálst val einstaklinga að geta börn og stofna heimili er viðbúið að sumir sem ættu ekki að eignast börn geri það engu að síður.

Gagnvart þeirri óheppilegu staðreynd mannlífsins að sumir eru ofbeldishneigðir ber ekki að tefla fram ríkisvaldi er hefji víðtækt eftirlit með fjölskyldum landsins.

 

Aðeins 13% tilkynninga frá skólum

Mín samsæriskenning og þín

Við tvennar aðstæður verða samsæriskenningar vinsælar. Í fyrsta lagi þegar yfirvald þykist vita meira og betur en almenningur, án þess að hafa órækar sannanir. Í öðru lagi þegar ráðandi hugmyndafræði lætur undan síga en ný er enn í mótun.

Í kófinu skortir aðrar sannanir en að Kínaveiran er smitandi og getur drepið. Hvernig best er að stemma stigu við útbreiðslu er meira byggt á líkum og almennri skynsemi, sem raunar ekki ýkja almenn, þegar að er gáð, fremur en órækum sönnunum. Skiljanlega. Kínaveiran er ný af nálinni og þekking verður til jafnt og þétt, eftir því sem faraldrinum vindur fram.

Alþjóðahyggjan er sem hugmyndafræði að hrynja, nánast í þessum töluðu orðum. Alþjóðasamvinna var til skamms tíma kennisetning alls þorra stjórnmálamanna á vesturlöndum. Hugmyndafræðin varð til eftir seinna stríð, fékk fjörkipp eftir kalda stríðið en er núna í andarslitrunum. Með kjöri Trump og Brexit, hvorttveggja árið 2016, var fótunum kippt undan alþjóðahyggjunni en ekkert nýtt heildstætt er komið  í staðinn. Til marks um örvæntinguna er að elliært aflóga hross er gert að forseta Bandaríkjanna og það talið marka tímamót í endurreisn alþjóðahyggju. Neibb, sagan fer ekki í bakkgír.

Í andrúmslofti efa, tortryggni og óvissu grassera samsæriskenningar. En höfum í huga að einu sinni var samsæriskenningasmiður frá Nazaret sem fékk uppreist æru eftir sinni dag og lagði grunn að þúsund ára tímabili sögunnar sem kallast kristnar miðaldir.

Samsæriskenning í dag verður að viðteknum sannindum á morgun. Spurningin er aðeins hvaða kenning. Í millitíðinni er orðið frjálst. 

Segir samsæriskenningar ekki mega grassera

Allt breytist með Brexit, Gulli utanríkis

Brexit felur ekkí í sér smávægilegar breytingar, eins og Gulli utanríkis og starfslið hans vill vera láta, heldur þýðir Brexit uppstokkun á samskiptum Íslands við Evrópuþjóðir. Hvorki meira né minna.

Útganga Bretlands úr Evrópusambandinu er endalok á samrunaþróun álfunnar. Bretland finnur sér nýja tilveru utan ESB sem verður meginlandsklúbbur, að vísu með eyríkið Írland innanborðs. Að öðru leyti er vestasti hluti Evrópu; Bretland, Færeyjar, Noregur, Ísland og Grænland, raunar landfræðilega Ameríka, utan ESB.

Af Evrópulöndum á Ísland mest viðskipti við Bretland. Að Norðurlöndum frátöldum og samskiptin um menntir og menningu meiri við Bretland en önnur Evrópuríki.

Bretar kom hingað á undan Þjóðverjum í lok miðalda, síðan er talað um ensku öldina í íslenskri sögu. Þá komu Bretar, góðu heilli, á undan Þjóðverjum yfir hafið í upphafi seinni heimsstyrjaldar. Norðmenn og Danir voru ekki jafn lánsamir.

Ísland var á bresku áhrifasvæði frá Napóleonsstríðum að telja þangað til landið færðist undir bandarísk ítök með sérstökum samningi 1941. Á meðan Bretland var í ESB hafði sambandið aðdráttarafl, helst hjá þeim með hvolpavit á utanríkismálum. Án Bretlands í ESB er enginn möguleiki að Ísland gangi í meginlandsklúbbinn.

Bretland mun standa utan EES-samningsins, sem Íslendingar eiga illu heilli aðild að. Samningurinn var gerður fyrir aldamót og hugsaður fyrir þjóðir á leið inn í ESB.

Verkefni næstu ára er að losa Ísland undan EES-samningnum og tryggja hagsmuni okkar með tvíhliða samningum, einkum við Bandaríkin og Bretland, en einnig ESB.

Gulli utanríkis og starfslið hans er heldur værukært á vaktinni ef það heldur að Brexit sé smámál fyrir Íslendinga.

Hvað breytist á Íslandi við Brexit?

Maður, náttúra og frásögn

Náttúran er án meðvitundar. Í náttúrunni eru staðreyndir. Maðurinn býr að meðvitund. Í meðvitundinni verða til sögur.

Til eiginleika mannsins að setja saman sögur má rekja öll heimsins trúarbrögð, vísindi og skáldskap. Undir þessa þrjá frásagnarhætti má fella allar tilraunir mannsins að skilja sjálfan sig og heiminn.

Iðulega ruglast maðurinn í ríminu og slær saman trú, vísindum og skáldskap. Útkoman verður ógeðugur hrærigrautur sem sumir vilja troða ofan í aðra með kennivaldi, pólitísku valdi og hreinu og kláru ofbeldi ef ekki vill betur.

Meðvitundin er viðsjál. Til hennar má rekja allt gott og illt.

Náttúran, frjáls í sínu meðvitundarleysi, er stikkfrí frá tilburðum mannsins að skilja heiminn. Eflaust nokkur léttir fyrir hana, blessaða móður náttúru, að vera ekki mennsk. 

Jafnvægi á Íslandi, sjálfsmorðshlýnun í heiminum

Náttúran velgir og kælir á víxl, vitum við á Íslandi. Trausti okkar Jónsson rekur skilmerkilega hvernig náttúran gefur og tekur yl og svala síðustu 200 ár hér á Fróni.

Út í heimi er verri sögu að segja. Þar stefnir í sjálfsmorðshlýnun á næstunni ef við hættum ekki að nota jarðefnaeldsneyti, segir Ant­onio Guter­res, aðal­fram­kvæmda­stjóri Sam­einuðu þjóðanna.

Ætli náttúran hætti að virka um leið og við sleppum henni út fyrir landsteinana? Eða getur verið að Guter­res, Gréta Thunberg og Al Gore kunni eitthvað lítið fyrir sér í náttúrufræðum en þess meira í pólitískum áróðri og aðgerðastjórnun til að hræða fólk til fylgis við hindurvitni?

Heimurinn gengur reglulega af göflunum. Ekki vegna manna eins og Trausta Jónssonar heldur af sortinni Guter­res, Thunberg og Gore. 

Náttúran, aftur, heldur sínu striki, bæði gefur og tekur.

Meðalhiti í ár lægri en undanfarin ár

Píratar og tveir formenn verða undir í MDE-málinu

Píratar ætluðu sér ökumannssætið í vandlætingarvagninum er færi á blússferð eftir MDE-dóminn í Evrópu vegna excel-skjals um skipun í landsrétt fyrir þremur árum. Siða-Sunna steig á stokk og krafðist afsagnar Katrínar forsætis. RÚV hlóð undir, eins og við var að búast, bjó í haginn fyrir lamandi réttaróvissu og pólitískt blóðbað í beinni útsendingu.

Aftursætisökumenn í Sunnuvagni urðu strax Logi í Samfó, sem er svo illa gáttaður að hann þarf aðstoð í kjörklefanum og formaður Viðreisnar, sem ýmist spilar golf í Hveragerði í sóttkví eða fær afskrifuð lán í þrotabúi Kaupþings utan sóttkvíar.

En málsefnin í MDE-dómnum létu á sér standa. Sérfræðingar, vandir að virðingu sinni, finna varla flugufót fyrir staðhæfingum ökuþóranna þriggja. Stofnandi Vinstri grænna og siðameistari, Ögmundur Jónasson, klykkir út með að málið snúist um dópaðan bílstjóra í Kópavogi og sýndardómstól í Evrópu sem heiðrar mannréttindaböðul í Tyrklandi en níðir réttvísina á Fróni.

Tvennt ólíkt er að stökkva á vandlætingarvagninn og verða undir honum. Siða-Sunna, Samfó-Logi og Tobba Kata sitja dösuð í vegkantinum og vita hvorki í þennan heim né annan.

Dópaður bílstjóri og Mannréttindadómstóllinn

Frakkar óttast múslímska aðskilnaðarhreyfingu

Frönsk yfirvöld loka 76 moskum múslíma með þeim rökum að þar hreiðri um sig íslamskir öfgamenn er krefjist aðskilnaðar frá frönskum siðum og háttum.

Múslímar í Frakklandi eru um 5 milljónir. Síðustu ár hafa íslamskir öfgamenn stundað hryðjuverk gegn almenningi í Frakklandi.

Múslímar hafa með sér sína eigin trúarmenningum sem er ósamrýmanleg vestrænum gildum. Að frönsk yfirvöld telji íslamska aðskilnaðarhreyfingu ógna öryggi ríkisins ber vitni um mistök fjölmenningar síðustu áratuga. Annað tveggja verður að víkja, vestræn siðmenning eða trúarmenning múslíma. Að öðrum kosti klofnar ríki og þjóð.

Þingkosningar: 42% til hægri, 51% til vinstri

Mið- og hægriflokkarnir þrír, Sjálfstæðis, Framsókn og Miðflokkur mælast samtals með 42 prósent fylgi. Vinstriflokkarnir Samfó, Píratar, Vg og Viðreisn fá 51 prósent stuðning.

Þegar minna en ár er til þingkosninga stendur þjóðin frammi fyrir skýrum valkostum. Í einn stað borgaralega stjórn en í annan stað vinstristjórn.

Útkoman frá 2017 gæti endurtekið sig, að illskásta vinstrið fari yfir á miðjuna.

En það er ekki á vísan að róa.

Sjálfstæðisflokkurinn stærstur

Prófessorinn, skríllinn og Dómgreindur

Á alþingi er skríll. Þegar lýðurinn fær aðkomu að stjórnvaldinu fylgir skríllinn. Livíus skrifar um Rómarlýð í árdögum lýðveldisins, múgurinn dæmdi Sókrates til dauða í Aþenu. Í fulltrúalýðræði á götulýðurinn sína fulltrúa á löggjafasamkundunni: Pírata, Samfylkingu og Viðreisn.

Einkenni skrílsins er að hafa eina sannfæringu fyrir hádegi og allt aðra síðdegis en fylgja í blindni þeirri tunnu er hæst bylur í. Annað samkenni margra er að klúður í starfi eða einkalífi er skrifað á reikning samfélagsins. Rennusteinsliðið á þingi er oft með sögu persónulegra vandræða á bakinu en ólmast við að segja okkur hinum hvernig eigi að lifa lífinu. Þriðja sérkennið er fals og hégómi: þriðjungur þingflokks Pírata lýgur upp á sig háskólagráðum. Í stuttu máli, fólk án sjálfsvirðingar sem er ófært að sýna virðingu samfélaginu er fóstrar það. Ísland er ónýtt, kyrjar holræsakórinn.

Í upphafi landsréttarmálsins 2017 lét skríllinn til sín taka á alþingi og bjó til samsæriskenningu um að móðurflokkur íslenskra stjórnmála, Sjálfstæðisflokkurinn, stæði fyrir atlögu að réttarríkinu. Samsæriskenningin var úr lausu lofti gripin, eins og þær eru jafnan. Þáverandi dómsmálaráðherra var aðeins að leiðrétta kynjahalla á tilnefningu dómnefndar. 

Prófessor í stjórnskipun við Háskóla Íslands tók upp á því að framleiða skotfæri fyrir götustráka og stelpur með ,,faglegum" álitsgerðum í ræðu og riti. Hvað prófessor gekk til er á huldu (með litum staf). Líklegt þó að hann hafi vegna fjölskyldu og tengsla í dómarakreðsum talið snjallt að gera bandalag við lýðinn og koma höggi á dómsmálaráðherra er ekki lét vel að stjórn.

Víkur þá sögunni að stjörnulögmanni, sem afhjúpaður var sem ritþjófur í laganámi, og gengur með minnimáttarkomplex, er bæði lágvaxinn og lítilsigldur en hégómlegur fram úr hófi. Hann ákvað að kæra dómsmál, sem hann tapaði fyrir landsrétti, til MDE í Evrópu. (Þúsund ára ríkið er röð skammstafa, sbr. GRU, STASI, NKVD, ESB og GESTAPO).

Í MDE var fyrir á fleti Dómgreindur frá Íslandi, æskuvinur stjörnulögmannsins. Þeir kokkuðu saman lagatexta í anda lögin-banna-ekki-að-hengja-bakara-fyrir-smið. Útkoma félaganna var að rangur dómari felldi réttan dóm í landsrétti. Heima á Íslandi varð úlfaþytur. Dómsmálaráðherra glataði embættinu og ríkisstjórnin riðaði til falls, eins og til var stofnað af skrílnum.

Stjörnulögmaðurinn var borinn á höndum skrílsins og rénaði minnimáttarkomplexinn um hríð en hégómi óx. Hann opinberaði að sofa í náttfötum úr silki. Óekta fólk skreytir sig gjarnan falslausum efnum. Þau er hægt að kaupa. Velgengnin steig Dómgreindi til höfuðs. Gerðist hann gistivinur Erdógan í Tyrklandi, flutti heiðursræðu um mannréttindin í landi þar sem þau engin eru. Spangól í eyðimörkinni heitir það víst þar syðra.

Prófessorinn á Íslandi, sá er skaffaði skrílnum skotfærin, innheimti greiðann hjá dómarakreðsunni, og naut fjölskyldutengsla, til að komast í feitt embætti. Björg dregur þar í bú skrílræðisins. Efst situr hænan sjálf á mykjuhaug - sem einu sinni var íslenska réttarkerfið. 

Dómstóllinn sitji á þeirri hillu sem hann á heima