Múslímaríkið og kommúnismi gærdagsins

Sádí-Arabía er múslímaríki kennt við eina fjölskyldu, Sáda. Fyrir utan olíu eru þekktustu útflutningsvörur Sádí-Arabiu Osama Bin Laden, fjöldamorðingjarnir sem kenndir eru við 11. september 2001 og Ríki íslams.

En vegna olíunnar, sem hélt efnahagskerfi vesturlanda í gangi áratugina eftir seinna stríð, er Sádí-Arabía helsti bandamaðurinn í arabalöndunum fyrir botni Miðjarðarhafs.

Múslímaríkið er á andlegu og trúarlegu miðaldastigi. Konur eru aðeins skör hærri en húsdýr og grimmilegar refsingar eru viðhafðar opinberlega - líkt og tíðkaðist í Evrópu á miðöldum og í trúarstríðum þar á eftir þegar kveikt var í fólki á götum og torgum.

Í stað þess að vesturlönd þvoi hendur sínar af miðaldafyrirbærinu er mulið undir hatursríkið á alþjóðlegum vettvangi. Sádar eru t.d. í forystu mannréttinda á vettvangi Sameinuðu þjóðanna. Það er ígildi þess að láta barnaníðing sjá um dagheimili.

Nú eru vesturlönd í nokkrum vanda. Æðstu yfirvöld í Riyadh létu myrða og búta í sundur mann sem þeim var ekki að skapi, Jamal Khashoggi, og var sá þó enginn fermingardrengur. Upp komst um strákinn Tuma og vesturlönd rötuðu í siðferðisklemmu.

Er þá ekki sniðugt að drífa sig að skapa óvin annan verri en miðaldafyrirbærið? Jú, kommúnismi gærdagsins hlýtur að vera svakalega hættulegur. Í öllu falli má reyna að selja óttann auðtrúa fólki og fjölmiðlum.

Vestræna elítan vill telja okkur trú um að brýnast sé efna til ófriðar við Rússa. Þeir voru jú einu sinni kommúnistar og eiga enn kjarnorkuvopn. Kjarnorkuvopnasamkomulag sem var gert meðan enn voru Sovétríki er allt í einu orðið mál málanna í samskiptum austurs og vesturs. 

Uppsögn samkomulags um kjarnorkuvopn frá 1987 er efnislega merkingarlaus. En uppsögnin yrði táknræn yfirlýsing um að vesturlönd, sem einu sinni voru kennd við kristni, vilja gera Rússland að höfuðóvini til að halda lífi í múslímaríki sem hatast við allt vestrænt.

Ef það væri til önnur pláneta að búa á myndi maður tékka út af jörðinni.

 

Bretar kaupa ekki skýringar Sádi-Araba

Efling: öryrkjar og launþegar sama fólkið

Skilgreining á öryrkja er að hann býr skerta starfsgetu; getur ekki unnið. Launþegi er aftur einstaklingur í starfi. Verkalýðsfélag sem leggur þessa tvo hópa að jöfn, eins og Efling gerir, er ekki lengur launþegafélag heldur framfærslufélag undir kjörorðinu ,,minnst vinna, mest laun."

Sjúkrasjóður VR er að tæmast segir í nýlegri frétt RÚV. Ferlið er svona: 

Þegar fólk brennur út vegna álags nýtir það fyrst veikindadaga á vinnustað, sé það í vinnu, og fær svo greiðslur úr sjúkrasjóði stéttarfélags. Ef fólk nær ekki bata eftir ákveðinn tíma fer það á örorku.

Það er vitanlega álag að mæta í vinnuna. Maður þarf að vakna fyrir allar aldir og vera fjarri heimilinu (tölvunni, rúminu, tjillinu) í heila átta tíma og stundum gott betur. Er þá ekki mun huggulegra að kæla sig, kulna, melda sig veikan og vera bara alveg búinn á því?

Framfærslufélög eins og Efling og VR sjá um afganginn. Í fyrsta lagi ráðstafa félögin digrum sjúkrasjóðum vinnandi fólks og þar er matarhola. Í öðru lagi sjá framfærslufélögin um orðræðu sem réttlæta kulnun: þetta er allt yfirstéttinni að kenna sem lætur mig vinna svona mikið. Í þriðja og síðasta lagi hóta framfærslufélögin að lama atvinnulífið með allsherjarverkföllum ef maður fær ekki kulnaður mannsæmandi framfærslu.

Einu sinni voru menn stoltir af vinnunni sinni. Þeir töldu sig gera gagn í samfélaginu og launin voru umbun. Launavinna var leið til sjálfsbjargar, að sjá um sig og sína. Ekki lengur. Nú eiga aðrir að sjá um þarfir manns. Til þess höfum við framfærslufélög eins og Eflingu og VR.

Og ef illa gengur að rukka aðra um lífsviðurværið er það auðvitað helvítis yfirstéttinni að kenna.

Stjórn­völd í herferð gegn tekjulágum

Verkó lifir á vinnu annarra

Forysta verkalýðshreyfingarinnar býr ekki til nein verðmæti, ekki einu sinni félagsauð. Þátttaka í stjórnarkjörum er innan við tíu prósent.

Forysta verkalýðshreyfingarinnar lifir á launum sem aðrir vinna fyrir, launþegar í sveita síns andlits, og enn aðrir borga - atvinnurekendur.

Launþegar eru skyldaðir til að borga undir forystuna sem gengur um efnahagskerfið eins og fíll í postulínsbúð og hótar almenningi öllu illu.

,,Kostnaðarmatið" á forystu verkó er býsna hátt, þegar allt er reiknað. 

„Menn lifa ekki á kostnaðarmötum“

Sæstrengur í gegnum EES-samninginn

Ísland gæti ekki bannað eða komið í veg fyrir lagningu sæstrengs til Evrópu, samkvæmt EES-samningnum eftir að orkupakkinn verður innleiddur.

Þetta kemur fram í áliti norsks sérfræðings í Evrópurétti.

Orkupakkinn sem Evrópusambandið vill að Ísland samþykki að verði hluti af EES-samningnum er framsal á umráðarétti Íslendinga yfir raforkunni og virkjun fallvatna.

Alþingi á vitanlega að hafna þessari viðbót við EES-samninginn.

RÚV tekur Trump á sannleikann

Á meðan Trump Bandaríkjaforseti veltir fyrir hvort og hvernig hann ætlar að refsa Sádí-Arabíu fyrir að myrða blaðamann er RÚV ekkert að tvínóna við hlutina:

Örfáum klukkustundum eftir að Donald Trump, forseti Bandaríkjanna, viðurkenndi að sádiarabíski blaðamaðurinn Jamal Khashoggi væri að öllum líkindum látinn, hrósaði hann bandarískum þingmanni fyrir að hafa haft bandarískan blaðamann undir í fyrra.

RÚV lætur sem sagt að því liggja að Bandaríkjaforseti hvetji til morða á blaðamönnum. Nokkuð langt gengið.

Segir skýringar Sádi-Araba trúverðugar

Konur sýna Jóni Steinari undirgefni

Konur láta aðdáun sína á körlum með ýmsum hætti. Ein aðferð er formælingar, gjarnan viðhafðar í lokuðu rými kynsystra sem eru líkt þenkjandi. Jón Steinar Gunnlaugsson lögmaður á sér stækan hóp aðdáenda í röðum kvenna sem dunda sér við að formæla honum af ástríðu.

Þegar Jón Steinar lætur svo lítið að hringja í aðdáanda og inna konuna nánar eftir hverju sætir þessi undirgefni rýkur hún af stað og montar sig af áhuga goðsins.

Vinkonurnar ákveða að skjóta á sérstakan fund til að hylla þá heppnu sem fékk símtalið.

Sumar konurnar sem dagdreymir um Jón Steinar krefjast jafnframt valdeflingar kvenna - eru herskáir femínistar. Valdefld undirgefni kallast þýlyndi.

Aðdáun femínista á feðraveldum, til dæmis því múslímska, verður fullkomlega skiljanleg í ljósi undirgefninnar sem Jón Steinar nýtur.

Níða Jón Steinar á lokuðu vefsvæði

Verkó hótar kreppu og fólk hættir innkaupum

Verkalýðshreyfingin er allt árið búin að tala upp kreppu í hugum landsmanna. Um næstu áramóti mun efnahagskerfið lamast, segja forkólfar launþegahreyfingarinnar.

Herskár tónn verkó hvetur almenning til að halda að sér höndum í innkaupum, einkum á dýrum vörum eins og bílum. Áhrifin á gjaldeyrismarkaðinn, þar sem krónan fellur vegna hótana um kreppu, auka enn á fælingarmáttinn.

Heimatilbúin kreppa verkalýðshreyfingarinnar eykur ekki líkurnar á hagfelldum samningum fyrir launþega. Í kreppu versnar samningsstaða þeirra sem selja vinnuafl sitt. Þökk sé verkó.

Hrun í bílasölu eftir að krónan gaf eftir

Oddný: kratar á móti norrænni samstöðu

Á Norðurlöndum er samstaða um að evran sé óæskilegur gjaldmiðill fyrir norrænt velferðarþjóðafélag. Noregur, Danmörk og Svíþjóð halda sinni krónu en fúlsa við evru.

Oddný G. Harðardóttir þingmaður og fyrrum formaður Samfylkingar vill að Íslandi skeri sig frá Norðurlöndum, fargi krónunni en taki upp evru.

En kannski er Oddný aðeins í læri hjá sitjandi formanni, sem heldur að evran sé lögeyrir á Norðurlöndum.

Komumst ekki úr hjólförum með krónuna

Lögreglan gramsar í fordómum

Lögreglan fann fjöður í athugasemdakerfi DV og gerði úr haturshænu, öllu heldur hana, ákærði og fékk mann dæmdan. Ef lögreglan ætlar að fínkemba athugasemdakerfi fjölmiðla og færslur á samfélagsmiðlum í leit að hatri til að draga mann og annan fyrir dómstóla er hætt við að tvennt gerist.

Í fyrsta lagi að lögreglan mismuni. Hatrið sem lögreglan leitar að er í daglegu tali kallað fordómar. Þeir eru margvíslegir og hluti af mannlífinu. Lögreglan verður að forgangsraða og hafi uppi á fordómum sem hún telur sérdeilis henta að fá stimplaða sem hatur. Lögreglan er komin í pólitískt hlutverk sem þekkist aðeins í alræðisríkjum þar sem einum fordómum er hampað en öðrum úthýst.

Í öðru lagi verður það sport að daðra opinberlega við fordóma til að leita eftir viðbrögðum lögreglunnar, kanna hvar hún dregur mörkin og hvaða rétttrúnaðartíska gildir þá og þá stundina. Það beinlínis hvetur til fordóma að vita af áheyrendum sem vilja leggja við hlustir.

Hatur er tilfinning rétt eins og ást. Lögregla ræður ekki yfir tilfinningalífi fólks, a.m.k. ekki enn sem komið er. Af því leiðir er tómt mál að tala um hatursorðræðu. Hatrið getur verið ískalt, yfirvegað og fágað. Líkt og ástarjátningar eru einatt kauðskar, óheflaðar og lítt ígrundaðar.

Talsmenn refsinga fyrir meinta hatursorðræðu eru hlaðnir fordómum. Þeir vilja refsa fólki fyrir rangar skoðanir og leggjast einkum á þá sem kunna illa að koma fyrir sig orði, eru minnimáttar. Lögregla í lýðræðisríki á ekki að láta hafa sig út í slíka vitleysu.

Dæmdur fyrir hatursorðræðu

Verkó lækkar krónuna, skerðir kjör almennings

Herskár sósíalismi verkalýðshreyfingarinnar grefur undan lífskjörum almennings. Krónan hefur lækkað um tíu prósent í haust vegna ótta við yfirvofandi verkfallsaðgerðir. Sigurður Már Jónsson blaðamaður rekur samhengið í yfirlitspistli.

Lækkun krónunnar er í lóðbeinu framhaldi af herskáum tón sósíalíska hluta verkalýðshreyfingarinnar. Löngu áður en kjarasamningar hefjast hækkar verkalýðshreyfingin verð á nauðsynjum, gerir ferðir almennings til útlanda dýrari - allt vegna gengislækkunar.

Sósíalistar komust til valda í Eflingu og VR í skjóli félagslegs doða, innan við tíu prósent af félagsmönnum tók þátt í stjórnarkjöri.

Verkó-gengisfallið er sjálfskaparvíti sósíalískrar verkalýðshreyfingar sem þykist bera almannahagsmuni fyrir brjósti en er í reynd klíkuveldi sem hugsar mest um eigin hag. Eins og sést á sjálftökunni í Eflingu.