Viðreisn, tilgangslaus flokkur

Viðreisn er sex ára gamall flokkur, stofnaður til að Ísland yrði ESB-ríki, - fjórum árum eftir að ESB-umsókn var lögð ofan í skúffu.

Viðreisn var stofnuð til að verða hægri-hækja Samfylkingar inn í sæluríkið fyrir austan haf. Nú þegar kratarnir eru hættir ESB-daðrinu og gefa aðild upp á bátinn bíður Viðreisnar skipbrot.

Helsti talsmaður flokksins er gamall RÚV-ari sem lifir á athyglinni sem  fyrrum starfsfélagar á Efstaleiti veita honum.

Málefnalega er Viðreisn í mótsögn við sjálfa sig. Í einn stað gagnrýnir flokkurinn íslenska ríkisbáknið en í annan stað krefst flokkurinn aukins skrifræðis frá Brussel. Hjörtur J. Guðmundsson fer í saumana á rökfærslu flokksins og skrifar: ,,Með öðrum orðum telur Evrópusambandið það allt of lítið sem forystumenn Viðreisnar vilja meina að þeir telji allt of stórt."

Í sölum alþingis eyða þingmenn Viðreisnar súrefni á þjóðarsamkundunni og er haldið uppi með almannafé. 

Sex ára raunasaga smáflokksins með rangnefnið - flokkurinn ætlaði ekki að reisa neitt við heldur farga lýðveldinu - er áminning um fáránlegt flokkakraðak á alþingi. Á alþingi eru átta flokkar en málefnin hrökkva ekki til að gera fleiri en þrjá stjórnmálaflokk, í mesta lagi fjóra, þokkalega heilsteypta. Fitulagið, sem fylgir smáflokkum, tekur til sín orku og fjármuni sem betur væri ráðstafað í annað og verðugra en tilgangslausar flokksnefnur.

 

Líkamsami

Nýtt hugtak, líkamsami, nær yfir óánægju með líkamann annars vegar og hins vegar löngun til líkamslagfæringar, - helst á kostnað annarra.

Fyrir er hugtakið kynami, sem nær yfir þá sem telja að meðvitundin og líkaminn séu hvort af sínu kyni.

Líkamsami getur verið svekkelsi með hæð eða smæð skrokksins, litarhaft, lögun útlima, hár og neglur, vöðvamassa - eða skort þar á - og ekki síst þyngd.

Þeir sem óhressir eru með líkamann sem þeir fengu með meðvitundinni í fæðingu eiga von á góðu. Það stendur til að gera kynama að sjúkdómi.

Kynami er eitt einkenni þess að vera trans sem fylgir oft. Hann leiðir oft til óvinnufærni ef hann er ekki meðhöndlaður.

Segir talsmaður fólks með kynama. Sérfræðingur, auðvitað.

Eftir að kynami verður skilgreindur sem sjúkdómur opnast flóðgáttir fyrir fólk með líkamsama. Það verður hægt að skrá sig óvinnufæran, á kaupi hjá vinnuveitanda og sjúkrasjóði stéttarfélaga, ef maður hefur ama af rýrum upphandleggsvöðvum.

Meðhöndlunin fælist í líkamsrækt, kostnaðurinn greiddur af almannasjóðum. Ef maður er ókátur með næpulegan húðlit yrði lítið mál að búa til ama úr óánægjunni og fá nokkurra vikna uppihald á suðrænum slóðum að byggja upp vöðva og brúnku á kroppinn.

Líkamsami er þægileg sjúkdómsgreining til að láta samfélagið líða önn fyrir hugdettu um að sniðugt væri að búa í öðrum líkama en maður fékk við fæðingu. Eins og kynami.

 

 

Loftslagshelvíti er hjátrú, ekki vísindi

Kjörhitastig jarðar óþekkt stærð. Trúboðar loftslagshelvítis láta eins og meðalhiti plánetunnar sé valkvæður. Maðurinn geti hækkað eða lækkað hitastigið með athöfnum eða athafnaleysi. Það er hjátrú.

Loftslagsvísindamaðurinn Judith Curry fjallar um þróun hjátrúarinnar síðustu árin. Fyrir áratug hótaði trúboðið að meðalhiti jarðar hækkaði um 4 til 5 gráður fyrir lok aldar. Árið 2015 var spáin lækkuð í 2-3 gráður en er núna komin í 1,5 gráður. Samt er helvíti ávallt handan við hornið.

Eftir hundrað ár verður ekki talað um loftslagsvá, segir sænski loftslagsvísindamaðurinn Lennart Bengtsson í nýrri bók. Aftur verður orðspor þeirra sem mylja undir trúboðið rjúkandi rúst.

Fjölmiðlar átta sig vonum seinna á blekkingunni. Curry tilfærir nokkur dæmi. Þýska útgáfan Die Welt segir í gær að hryllingsspádóma verði að endurskoða. Trúboðið, segir Die Welt, rígheldur samt í bábiljuna um hamfarahlýnun. Það gefur svo vel í aðra hönd að halda leiksýningunni gangandi. Orðspor, auður og valdastaða er í húfi. 

Sameinuðu þjóðirnar veðsettu sitt pólitíska kapítal í loftslagshjátrú. Ótaldir stjórnmálaflokkar og margvísleg samtök eru undir sömu sökina seld. Það þýðir ekki fyrir viðkomandi að segja hræðsluáróðurinn settan fram í góðri trú.

Í langan tíma hefur legið fyrir að hjátrúin hefur ekkert með vísindi að gera. Þótt einhverjir illa að sér með háskólapróf ábeki fáfræðina þarf ekki nema almenna þekkingu á veðurfarssögu jarðarinnar til sjá í gegnum blekkingarvefinn.

Kjörhitastig jarðar er óþekkt stærð vegna þess að fyrirbærið er aðeins til sem hugtak, ekki veruleiki. Margir nútímamenn eiga erfitt með að skilja að heimurinn varð til án þess að maðurinn kæmi þar nærri. Maðurinn sjálfur, sem tegund, er afurð ferla sem eru ómennskir. 

Frá ómunatíð hefur hiti sveiflast frá einu skeiði til annars. Síðasta ísöld var í gær mælt á tímabili jarðsögunnar eða fyrir 12 þúsund árum. Á sögulegum tíma er rómverska hlýskeiðið þekkt, sömuleiðis miðaldahlýskeiðið og litla ísöld, sem lauk í kringum 1900. Allt er þetta þekking sem krefst engrar sérfræðikunnáttu að tileinka sér. Ekki ætti að vera nokkrum manni meðalgreindum ofviða að draga rökrétta ályktun af þekkingunni. Það er náttúran sem ræður loftslagi en ekki mennskur máttur. 

Þeir sem halda á lofti bábiljunni um manngert loftslag vinna tjón bæði til lengri og skemmri tíma. Fátæk samfélög hafa ekki efni á ódýru eldsneyti sökum skattlagningar sem réttlætt er með loftslagsvá. Trúboðið er sagt byggja á vísindum, þótt því sé alls ekki til að dreifa. Tiltrú almennings á vísindum mun veikjast stórum þegar það rennur upp fyrir fólki að það var haft að fíflum í áratugi. 

„Á hraðri leið til loftslagshelvítis“

Kjör Kristrúnar vissi á sigur Bjarna

Bjarni Benediktsson fékk endurnýjað umboð til að leiða Sjálfstæðisflokkinn í kjölfar pólskipta  Samfylkingar. Þegar Bjarni tók við flokknum var hann í sárum. Samfylkingin hafði skipað móðurflokknum að halda landsfund eftir hrun og samþykkja að gera ESB-aðild að stefnu sinni.

Sjálfstæðisflokkurinn hlýddi Samfylkingu eins og kratískur kjölturakki og hélt landsfund - en samþykkti ekki ESB-stefnu. Tækifærissinnar klufu sig úr flokknum og stofnuðu Viðreisn.  Hugmyndalegt forræði var hjá Samfylkingu eftir hrun. Borgaraleg stjórnmál hafa fengið uppreist æru í formannstíð Bjarna. Samfylking eltir Sjálfstæðisflokkinn, samanber kjör Kristrúnar í liðnum mánuði. Viðreisn einangrast sem ESB-klúbbur sérvitringa.

Núverandi ríkisstjórnarsamstarf hófst fyrir fimm árum með sögulegum sáttum Sjálfstæðisflokks og Vinstri grænna/Alþýðubandalags/Sósíalistaflokks. Bjarni leiddi samstarfið, sem hefur reynst farsælt og var besti kosturinn eftir viðvarandi stjórnarkreppu frá hruni. Samfylkingin reyndi að skapa sér stöðu til vinstri við Vinstri græna, undir formennsku Loga, en gafst upp í haust og Kristrún tók við keflinu. 

Það hefði verið stílbrot af sjálfstæðismönnum að skipta út Bjarna fyrir Guðlaug Þór. Gréturáðherrann er fulltrúi samræðustjórnmála sem er annað orð yfir að elta viðreisnarkrata út í fúamýri frjálslyndrar óreiðu.

Í framboðsræðu sagðist Bjarni láta sér annt um að skila góðri afkomu þjóðarbúsins, til að búa í haginn fyrir skattalækkun. Guðlaugur Þór talaði um samverupólitík, líkt og móðurflokkurinn væri saumaklúbbur. Guðlaugur Þór sagði í fyrirlitningartón að ekkert ytra starf væri í höndum flokksins, aðeins innra starf. En það er ytra starfið, í þágu almannahags, sem ræður úrslitum um brautargengi flokka.

Bjarni veit að Sjálfstæðisflokkurinn er verkfæri til að ná árangri, standa vörð um fullveldið og hamla vexti ríkisvaldsins til að einstaklingurinn megi njóta ávaxta erfiðisins. 

Guðlaugur Þór talaði um allskonar fyrir alla; það er orðavaðall vinstrimanna sem ávallt draga fjöður yfir þá staðreynd að einhver þarf að borga fyrir herlegheitin. Þyngstu skattbyrðina ber millistéttin. Þótt Bjarni verði seint sakaður um að vera millistéttarplebbi er hann ekki laus við skilning á hag launþeganna með breiðu bökin.

Ein stuðningsgrein Gulla þótti tilfallandi höfundi sérlega fyndin. Þar var Guðlaugi Þór talið til tekna að hafa efnast vel. Maðurinn er á ríkisframfæri alla starfsævi og orðinn sterkefnaður. Á ríkislaunum? Hér vantar eitthvað inn í frásögnina. Enginn opinber starfsmaður verður loðinn um lófana af launatekjum einum saman.

Eftir sigur Bjarna eru líkur á að stjórnfesta núverandi ríkisstjórnar haldi áfram. Það skiptir máli eftir pólitíska ólgu eftirhrunsins. Sjálfstæðismenn létu Bjarna njóta verka sinna. Það er vel.

Fólki mokað á fundinn og þinggjöld þess greidd

Leiðrétting á kyni, veðri og landamærum

Börn vita hvort þau séu af réttu kyni eða ekki. Þá vita börn, sbr. Gréta Thunberg, að veðurfarið sé ekki náttúrulegt heldur manngert.

Bernskir fullorðnir halda þeim bábiljum að börnum að hvorki sé kyn né veðurfar gefið af náttúrunni heldur mannasetningar. Alla skráða mannkynssöguna er þessu á annan veg farið. Það er aðeins á tímum netsins og samfélagsmiðla sem hugdettunni vex fylgi að kyn og veðurfar séu mannlegar afurðir en ekki náttúrulegar.

Rökrétt ályktun er að auknar upplýsingar geri fólk grunnhyggið. Það trúir á bábiljur, sem dreift er á félagsmiðlum, fremur en það sem liggur í augum uppi og almenn skynsemi segir.

Ef fólk trúir að hægt sé að leiðrétta kyn og veðurfar er auðvelt að telja því trú um að náttúruleg landamæri séu meira upp á skraut en að þau hafi einhverja merkingu. Á Fróni fá aldraðir Íslendingar ekki inni á hjúkrunarheimilum vegna þess að fólk frá framandi menningarheimum sækir Ísland heim í leit að velferðarþjónustu. Viðhorfið er að nóg sé til í örríkinu til að bjarga megi heimsbyggðinni frá þeim ömurleika að búa annars staðar en hér á landi.

Þeir eru nógu margir sem telja bráðnauðsynlegt að sinna útlendingum með íslenskri velferð fremur en að búa öldruðum Íslendingum áhyggjulaust ævikvöld. Hópurinn sem um ræðir kallast góða fólkið og er kjósendahópur sem allir stjórnmálaflokkar óttast að fá upp á móti sér.

Það er meira og minna sama fólkið sem heldur að kyn, veðurfar og náttúruleg landamæri séu tilbúningur sem megi breyta með hugdettu. Merkilegast af öllu að þorri þessa fólks telst upplýst, margt með háskólapróf og er sínettengt með alla heimsins þekkingu við fingurgómana. En fingurgómarnir á lyklaborðinu leita frekar uppi bábiljur en harðar staðreyndir. Bábiljurnar hljóma betur, sefar taugaveiklun fólks án jarðtengingar. 

Upplýsingar án almennrar skynsemi leiða fólk inn í heim ímyndunar handan veruleika. Til að ímyndin verði ekki afhjúpuð sammælist góða fólkið um að leggja í einelti þá sem ekki kyssa vöndinn er sópar undir teppið hörðum staðreyndum; að kyn er líffræði en ekki hugarfar, að náttúran ræður loftslagi og að þjóðfélag án landamæra er óreiða. 

Banna kynleiðréttingar á börnum

Loftslagskreddur, skattar, kristni og vanlíðan

Kjarni gróðurhúsakenningarinnar um manngert verður er að brennsla jarðaefnaeldsneytis, bensín og dísil, auki koltvísýring, CO2, í andrúmsloftinu. Koltvísýringur hindrar útöndun jarðarinnar, líkt og gler gróðurhúsa, og hitastig jarðar hækkar.

Kenningin hvílir á þeim flugufæti að CO2, sem er ósýnileg loftegund, hamlar útgeislun, en útöndun jarðar er geislun. Þetta er þekkt eðlisfræði. Flugufóturinn stendur ekki undir gróðurhúsakenningunni.

Ástæðan er m.a. sú að vatnsgufa H2O er þrisvar sinnum öflugri gróðurhúsalofttegund en CO2. Í umhverfinu sjáum við vatnsgufu í skýjum. Blaðamaður Die Zeit, með doktorsgráðu í eðlisfræði, ræddi við einn fremsta loftslagsvísindamann Þjóðverja og forstöðumann veðurfræðistofnunar Max Planck, Bjorn Stevens, og spurði hvort jörðin yrði brátt óbyggileg vegna áhrifa gróðurhúsalofttegunda.

Það er bull sem hefur ekkert með vísindalegan veruleika að gera, svaraði Björn Stevens. (Sjá hér enska útgáfu). Stevens segir skýjahugmyndir gróðurhúsasinna í ætt við skýin í myndabókum fyrir börn. Veruleikinn er flóknari en einfeldningsleg tölvulíkön hamfarasinna.

Spyrja má hvers vegna loftslagskreddur taka ekki á vatnsgufunni, frekar en CO2, til að hamla gróðurhúsaáhrifum. Ástæðan er að engin tök eru á búa til skattpíningu, lög og reglugerðir til að hamla myndun vatnsgufu. En það er hægt að skattleggja og setja lög um koltvísýring. Loftslagstrúin ræðst á garðinn þar sem hann er lægstur og hengir bakara fyrir smið.

Nýtt dæmi um kredduna klædda í pólitík. Helga Barðadóttir fer fyrir sendinefnd Íslands á loftslagsráðstefnu í Egyptalandi. Hún segir:

Okkar helstu væntingar eru að menn haldi áfram að horfa á markmið um eina og hálfa gráðu eins og kallað er. Að hitastig Jarðar hækki ekki meira en um eina og hálfa gráðu frá iðnvæðingu,

Hitahækkun sem Helga nefnir, 1,5 gráður, er nákvæmlega sama hækkun á hita og við fáum ef horft er tilbaka um þúsund ár. Við kristnitök á Íslandi var hitastigið 1,5 gráðum hærra en það er í dag. Vísindalega sannað með borkjörnum úr Grænlandsjökli. 

Helga og sálufélagar tefla fram tölvulíkönum sem segja að hitastig muni hækka nema og aðrir af sama sauðahúsi fái heimildir til að skattleggja og stýra samfélaginu. (Og ferðast á kostnað okkar til Egyptalands). En tölvulíkönin eru hönnuð til að gefa niðurstöðu sem styðja kreddurnar. William Happer loftslagsvísindamaður útskýrir á 5 mín. að tölvulíkönin geta ekki spáð fyrir um hækkun eða lækkun hita til framtíðar.

Ekki aðeins eru tölvulíkön hamfarasinna því marki brennd að vera rusl inn, rusl út heldur hafa þeir endaskipti á orsök og afleiðingu.

,,Breytingar á CO2 í andrúmsloftinu fylgja breytingum á lofthita, sem aftur fylgir yfirborðshita sjávar," skrifar loftslagsvísindamaðurinn Ole Humlum. Það er ekki aukið magn koltvísýrings í andrúmsloftinu sem veldur hækkandi hita heldur er hærra magn koltvísýrings afleiðing hækkandi lofthita.

Hamfarasinnar tala aldrei um að vegna hækkandi koltvísýrings grænkar jörðin. CO2 er aðalfæða plantna. Það spillir trú að skilja samhengi náttúrunnar. Einfaldar trúarkreddur haldast í hendur við valkvæða heimsku.

Einn helsti boðberi kreddunnar, sænski unglingurinn Gréta Thunberg, kom úr skápnum sem öfgavinstrimaður og segir borgaralegu samfélagi stríð á hendur. Trú á bábiljur leiðir óhjákvæmilega til öfga.

Loftslagstrúin, að maðurinn stjórni veðurfarinu, er pólitísk hugmyndafræði og menningarsjúkdómur. Stjórnmálamenn af ómerkilegri gerðinni sjá sér hag í að halda bábiljunni að fólki til að réttlæta skatta og gjöld og lagasetningar.

Það tekur sinn toll af geðheilsu ungmenna þegar fullorðnir tala af heimsendafávisku. ,,Ungviðinu líður verr á sálinni," segir í fréttum. Jón Viðar rýnir teflir fram þeirri tilgátu að áður lærði ungdómurinn um Jesú, kærleika og sáluhjálp.

Trúarstefið í hamfarahyggjunni er kýrskýrt. Stefið er endurómur úr Gamla testamentinu; syndugur maður og reiður guð.

Falskri hugmyndafræði um að heimurinn sé á heljarþröm vegna orkunýtingar mannsins er haldið að ungmennum. Kaldrifjaðir fullorðnir taka lífsgleði æskunnar í gíslingu hindurvitna. Með hjarta úr steini ætla þeir kaldrifjuðu að frelsa heiminn í nafni góðmennsku og skattheimtu. 

Blaðamenn: tjáningarfrelsi aðeins fyrir okkur

Blaðamenn harma að fá ekki tækifæri til að búa til reiðibylgju með dramatískum myndum af brottflutningi ólöglegra hælisleitenda. Heilagur réttur blaðamanna til gagnrýninnar umfjöllunar er brotinn, segir Sigríður Dögg formaður BÍ. 

Samtímis vilja blaðamenn banna gagnrýni á þeirra eigin störf. Þeir stefna tilfallandi bloggara, kæra Pál skipstjóra og koma í veg fyrir að hann megi tjá sig.

Hér fer ekki saman hljóð og mynd.

Blaðamenn haga sér eins og pólitískur upphlaupsflokkur en ekki fagstétt upplýsingamiðlara.

Blaðamenn og samtök þeirra geta ekki í einn stað fordæmt aðför að tjáningarfrelsi en í annan stað farið með offorsi gegn tjáningarfrelsi annarra. Ekki ef þeir vilja láta taka mark á sér.

Íslenskir blaðamenn eru ekki beittustu hnífarnir í skúffunni.

 

Furðar sig á fyrirmælum lögreglu

Samstillt RSK-árás á Pál skipstjóra

Sex nafnlausir einstaklingar tilkynntu síðdegis í gær til Facebook að reikningur Páls skipstjóra Steingrímssonar væri falsreikningur. Facebook lokaði reikningi Páls, sem hefur verið  virkur á miðlinum frá 2009. Undanfarið hefur skipstjórinn reglulega birt færslur þar sem hann m.a. fer yfir bók blaðamanna RSK-miðla (RÚV, Stundarinnar og Kjarnans) um Namibíumálið og hrekur lið fyrir lið rangar staðhæfingar og mistúlkanir.

Á þriðjudag var Páll kallaður til yfirheyrslu vegna langsóttrar kæru Stefáns útvarpsstjóra og tveggja blaðamanna á Stundinni og Kjarnanum.

Í gær sendi starfsmaður RÚV, og formaður Blaðamannafélagsins, kröfu til umboðsmanns alþingis að hefja athugun á rannsókn lögreglu á blaðamönnum sem bendlaðir eru við að byrla Páli skipstjóra og stela síma hans í byrjun maí í fyrra.

Málsvörn blaðamannanna er að þeir hafi fengið síma Páls frá þriðja aðila og það eitt til saka unnið að skrifa fréttir upp úr símanum en hvergi komið nærri byrlun og stuldi.

Skýtur skökku við að RSK-miðlar skuli berjast um hæl og hnakka gegn framgangi málsins í réttarkerfinu ef aðkoma þeirra að málinu er jafn óveruleg og þeir vilja vera láta.

Það sem hingað til er vitað um málið gefur til kynna að aðild blaðamannanna sé stórum meiri. Lögreglan er með samskiptagögn er sýna regluleg samskipti blaðamanna við gerandann, sem byrlaði Páli, stal síma hans og afhenti blaðamönnum.

Lögreglan leggur gögn sín fram þegar ákærur er birtar og fyrir rétti. Blaðamenn RSK-miðla mega ekki til þess hugsa að alþjóð fái vitneskju um starfshætti blaðamannanna, sem í þokkabót eru allri hlaðnir verðlaunum frá Blaðamannafélagi Íslands.

Það er sérstakt íhugunarefni að Páll skipstjóri er nánast einn um að koma sinni hlið á framfæri á opinberum vettvangi - og notar til þess Facebook. Fjölmiðar í stórum stíl skrifa fréttir í þágu RSK-miðla, spyrja ekki gagnrýnna spurninga og leyfa sakborningum að stýra umræðunni þar sem hagsmunir þeirra sjálfra eru í húfi.

RSK-málið sýnir íslenska fjölmiðlun í höndum sakborninga. Dapurt, svo ekki sé meira sagt.

Umboðsmaður skoði mál lögreglu gegn blaðamönnum

Stefán RÚV-stjóri, hælbítar og meindýr

Stefán Eiríksson útvarpsstjóri, Þórður Snær ritstjóri Kjarnans og Aðalsteinn Kjartansson á Stundinni kæra Pál skipstjóra fyrir að hóta sér. Meint hótun var tölvupóstur Páls til Stefáns, svohljóðandi:

Góðan daginn Stefán

Nú fer ég fram á að þið samstarfsfélagar látið [nafn, tekið út af pv] í friði, það ónæði sem þið hafið valdið fjölskyldunni með vinnubrögðum ykkar er til háborinnar skammar, og ef þið látið ekki af þessari háttsemi ykkar neyðist ég til að grípa til annarra ráða til þess að stoppa ykkur...

Kv. Páll Steingrímsson

Þórður Snær og Aðalsteinn fá afrit.

Ekki er hægt lesa úr tölvupósti Páls annað en hann ætli að fara með málið lengra, t.d. vekja athygli yfirvalda eða siðanefndar á einelti blaðamanna RSK-miðla. Tölvupósturinn var sendur í sumar.

Í haust var konan, sem Páll biðst vægðar fyrir, öryggisvistuð á sjúkrastofnun. Hún kiknaði undan álaginu og þótti sjálfum sér og öðrum hættuleg. Þegar konan var færð á sjúkrastofnun hrópaði hún ítrekað nafn fjölmiðlamanns á RÚV og vildi að haft yrði samband við hann. Andleg veikindi taka á sig ýmsar myndir.

Þremenningarnir krydda kæruna með tveggja ára spjalli Páls við meindýraeyði, já starfandi meindýraeyði, um hvernig ætti best að lóga meindýrum og hælbítum. Þeir sem þekkja til sveita vita að hælbítar eru hundar sem narta í fé, bíta það í hælinn.

RSK-miðlar (RÚV, Stundin og Kjarninn) eru alræmdir fyrir fréttaskáldskap þar sem ein fjöður verður að fimm hænum á augabragði. Sama aðferð eru notuð í kærumálinu gegn Páli skipstjóra. Tölvupósturinn frá í sumar á ekkert sameiginlegt með tveggja ára gömlu fésbókarspjalli um hvernig dýrum er lógað til sveita. 

Kæra þremenninganna er fyrst og fremst upplýsandi um hugarfar. Stefán, Þórður Snær og Aðalsteinn flokka sig með meindýrum og hælbítum.

Játningin kemur þeim, sem þekkja til vinnubragða RSK-miðla, ekki á óvart. Nýmæli, á hinn bóginn, er hreinskilni þremenningana.

 

Páll mætir til yfirheyrslu í dag

Fjárkúgun Gulla er ekki vandamálið

Guðlaugur Þór heimtaði af Bjarna fjármálaráðuneytið ellegar myndi hann skora Bjarna á hólm í einvígi um formennsku Sjálfstæðisflokksins.

Guðlaugur Þór er með sterkt bakland í flokknum. Í mörg herrans ár er hann duglegri en flestir dauðlegir að taka í hendur flokksmanna og sitja stærri og smærri fundi. Dugnaðurinn skilar sér í persónufylgi.

Á blaðamannafundi, þar sem Guðlaugur Þór kynnti framboðið, og á samfélagsmiðlum, mátti finna fyrir ýktu persónufylgi þar sem aðdáendur ákalla goðið eins og poppstjörnu.

Ég hef tvisvar eða þrisvar tekið í hönd goðsins og varð ekki uppnæmur. Ekki fyrir það, Gulli er ábyggilega þekkilegur strákur.

Vandamál Gulla er að hann er til sölu. Það hefur afleiðingar sem ég varð sjálfur vitni að.

Fyrir prófkjör sjálfstæðismanna í Reykjavík haustið 2006 fékk Guðlaugur Þór fúlgur fjár frá auðmönnum, einkum Jóni Ásgeiri kenndum við Baug. Markmiðið var að fella Björn Bjarnason þáverandi dómsmálaráðherra í prófkjörinu. Guðlaugur Þór var með 500 til 700 manns í vinnu fyrir sig. Samkvæmt úttekt DV 23. apríl 2010 var Guðlaugur Þór ,,mestur fjáraflamanna" úr röðum stjórnmálamanna á árunum fyrir hrun.

Guðlaugur Þór felldi Björn Bjarnason úr öðru sætinu og varð ráðherra í hrunstjórninni skammlífu.

Eftir hrun tók við vinstristjórn Jóhönnu Sig. sem stefndi á ESB-aðild. Ég starfaði í Heimssýn, samtökum andstæðinga aðildar. Breski stjórnmálamaðurinn Daniel Hannan, góðvinur Guðlaugs Þórs, og eitilharður ESB-andstæðingur kom í heimsókn. Á fundi með Heimssýn var rætt um að krefjast þjóðaratkvæðagreiðslu um ESB-umsóknina, sem þá var farin til Brussel. Hannan taldi hugmyndina góða enda var vinstristjórnin ekki með umboð þjóðarinnar til að sækja um aðild.

Tvísýnt var um baráttuna fyrir fullveldinu á þessum tíma. ESB-sinnar réðu ferðinni. Flugvélaframar af áhrifafólki fóru vikulega til Brussel að kynnast gósenlandinu og framselja fullveldið. Aðlögunarferlið innlimaði Ísland sneið fyrir sneið, bút fyrir bút. Það skipti máli hvort menn voru heilir í afstöðu sinni eða ekki.

Guðlaugur Þór var alfarið á móti tillögu sem tefldi pólitískri framtíð hans sjálfs í tvísýnu. Hann sagði að ef það yrði þjóðaratkvæðagreiðsla gæti vinstristjórnin sprungið og þá yrði efnt til þingkosninga. Hann mætti ekki við kosningum núna, vegna umræðunnar um fjárstuðninginn sem hann fékk frá auðmönnum fyrir hrun.

Það hefur afleiðingar að selja sig. Æ síðan ég varð vitni að þessum ummælum Guðlaugs Þórs hef ég vantreyst honum. Þegar hann barðist fyrir innleiðingu þriðja orkupakkans sem utanríkisráðherra velti ég fyrir mér hvaða tök Norðmenn hefðu á Guðlaugi Þór. Það var norskt hagsmunamál en ekki íslenskt að taka orkupakkann inn í EES-samninginn.

Guðlaugur Þór má mín vegna haga sér eins og pólitískur gangster og stunda fjárkúgun á samherjum. En aldrei, aldrei treysti ég manni sem selur fullveldið fyrir pólitískan frama.

Segir Guðlaug hafa velt fyrir sér breytingum á verkaskiptingu