Gulli loftslagsmarxisti

Eftir tilkynningu um framboð til formanns Sjálfstæðisflokksins, og viðtöl við valda fjölmiðlamenn, fór Guðlaugur Þór á vinnufund um loftslagsmál. Líkt og á blaðamannafundinn hafði verið smalað á vinnufundinn, einkum væntanlegum landsfundarfulltrúum.

Guðlaugur Þór gerir loftslagsmarxisma hátt undir höfði í þann mun sem hægrimenn almennt þvo hendur sínar af Grétufræðum. Repúblíkanar í Bandaríkjunum hafna fræðunum. Nýr forsætisráðherra Bretlands, Risi Sunak, ætlar ekki á næstu loftslagsráðstefnu Sameinuðu þjóðanna.

Loftslagsmarxismi er um 30 ára gömul hugmyndafræði. Hún verður til um sama leyti og kommúnisminn hrundi. Vinstrimenn þurftu nýja hugmyndafræði um illsku borgaralegs kapítalisma. Loftslagsmarxismi er eins og vísindalegur sósíalismi; bábiljufræði. 700 loftslagsvísindamenn hafna grunnforsendum hugmyndafræðinnar. Vinstrimenn með háskólapróf og aðgerðasinnar kynna ruglið sem sannindi og krefjast ,,hugarfarsbreytingar." Gulli er ábekingur.

Í framboðstilkynningu sagðist Guðlaugur Þór ætla að lækka skatta. Gulli getur ekki þjónað tveim herrum, en hann kann að tala tugum tveim og sitt með hvorri. Loftslagsmarxismi krefst hærri skatta og stóraukinnar íhlutunar stjórnvalda í daglegt líf fólks. Loftslagsmarxisti sem boðar skattalækkun er álíka trúverðugur og sá sauðdrukkni sem talar fyrir bindindi.

Guðlaugur Þór var sem utanríkisráðherra málaliði alþjóðavæðingar. Hann nefndi ekki sjálfstæði þjóðarinnar í framboðsræðunni. Enda lagði hann ofurkapp á að keyra í gegnum alþingi 3. orkupakkann sem færir ESB ítök á íslenskum orkumarkaði.

Guðlaugur Þór viðurkenndi að 3. orkupakkinn hefði enga þýðingu fyrir Ísland á meðan enginn væri sæstrengurinn. Hvers vegna barðist hann fyrir samþykkt pakkans á alþingi? Jú, hann varð að játast hugmyndafræðinni. Loftslagsmarxisminn þekkir engin landamæri og virðir ekki fullveldið, allra síst smáþjóða. Formannsframbjóðandinn er innvígður og innmúraður í alþjóðafélagsskap loftslagsmarxista.

Áður en Guðlaugur Þór lauk framboðsfundinum veitti hann fáeinum fjölmiðlamönnum áheyrn. Einn þeirra sem fékk einkafund með Gulla er Helgi Seljan. Sá er ekki þekktur fyrir áhuga á loftslagsmálum.

Áhugi Helga Seljan beinist allur að dómsmálum, af skiljanlegum ástæðum. Hvað þeim Helga og Guðlaugi Þór fór á milli skal ósagt. Hitt er vitað að RSK-miðlar styðja af alhug framboð Guðlaugs Þórs til formennsku í Sjálfstæðisflokknum. Ástæðan er ekki að Glæpaleiti og hjáleigum sé umhugað um réttarríkið.

Guðlaugur Þór býður Bjarna birginn

Vinstra-Ísland ekki lengur stefna Samfylkingar

Mesti áhrifavaldur Samfylkingar fyrstu ár flokksins var Sjálfstæðisflokkurinn. Breiðfylking vinstrimanna var stofnuð til höfuðs Sjálfstæðisflokknum, átti að verða ,,hinn turninn". Ekki gekk það fyllilega eftir. Fljótlega var tekið að leita hófanna eftir samstarfi við móðurflokk íslenskra stjórnmála. 

Ríkisstjórnarsamstarf Sjálfstæðisflokks og Samfylkingar, 2007-2009, skildi eftir sig óbragð, einkum hjá sjálfstæðismönnum sem fannst Samfylking hlaupast undan merkjum þegar þjóðin þurfti á samstöðu að halda í kjölfar bankahrunsins.

Ríkisstjórn Samfylkingar og Vinstri grænna, Jóhönnustjórnin, var fyrsta og eina hreina vinstristjórn lýðveldissögunnar. Samfylkingin fékk um 30 prósent fylgi í kosningunum 2009 og Vinstri grænir nær 20 prósent.

Óformlegt slagorð Jóhönnustjórnarinnar var ,,Ónýta Ísland." Vinstra-Ísland skyldi leysa af hólmi 1944-lýðveldið. Ný stjórnarskrá og ESB-aðild voru hornsteinar. Jóhönnustjórnin gróf sína eigin gröf með stöðugum árásum á allt íslenskt. Bankahrunið var ekki í neinum skilningi til marks um að íslenskt samfélag væri misheppnað, - nema hjá vinstrimönnum.

Þjóðin gaf vinstriflokkunum tveim rauða spjaldið í þingkosningunum 2013. Fylgi Samfylkingar minnkaði um tvo þriðju, fór í 12,9% en Vinstri grænir töpuðu ,,aðeins" helming fylgisins, urðu tíu prósent flokkur.

Eftir að Vinstri grænir hófu stjórnarsamstarf við Sjálfstæðisflokk og Framsókn fyrir fimm árum var fyrsta viðbragð Samfylkingar að gagnrýna frá vinstri. Undir formennsku Loga Einarsson vildi flokkurinn bandalag vinstriflokka s.s. Pírata og Viðreisnar til að endurræsa stefnu Jóhönnustjórnarinnar sálugu. Ný stjórnarskrá og ESB-aðild voru áfram á dagskrá. Flokkurinn komst hvorki lönd né strönd með róttæka vinstripólitík liðins tíma.

Undir formennsku Kristrúnar verður stefnt til hægri. Markmiðið er að ryðja Vinstri grænum úr vegi og komast í landsstjórnina með Sjálfstæðisflokknum og Framsókn.

Verkefni Kristrúnar er snúið, svo ekki sé meira sagt. Vinstri grænir eru orðnir hagvanir í stjórnarráðinu. Það sem meira er: hvorki Sjálfstæðisflokknum né Framsókn dytti í hug að skipta út Vinstri grænum fyrir Samfylkinu. Samfylkingin, sem arftaki Alþýðuflokks, er til muna andstæðari framsóknarmennsku en Vinstri grænir. Sjálfstæðismenn sjá ekkert hjá krötum sem slægur er í og ekki fæst hjá Kötu.

Nú er ekkert sem segir að Sjálfstæðisflokkur og Framsókn haldi styrk sínum og enn síður að flokkarnir sitji í landsstjórn sjálfkrafa. En það verður að taka mið af veruleikanum. Þessir tveir flokkar eru með um 40% fylgi. Án Sjálfstæðisflokks og Framsóknar verður ekki mynduð þriggja flokka ríkisstjórn.

Leiðangur Kristrúnar að gera Samfylkinguna stjórntæka felur í sér hagnýta pólitík en fyrst og fremst ábyrga pólitík. Það þýðir óformlegt uppgjör við Pírata og Viðreisn í stjórnarandstöðunni. Til að hagur Samfylkingar vænkist þarf samvinnan við Pírata og Viðreisn að veikjast.

Til að verða stjórntæk þarf Samfylkingin að leggja á hilluna upphlaupspólitík. Það er til nokkuð mikils mælst, sé tekið mið af stefnu flokksins síðustu árin.

 

Breyta nafni Samfylkingarinnar

Þóra safnar liði gegn Stefáni RÚV-stjóra

Bróðir Þóru Arnórsdóttur, Auðunn, stillir Stefáni Eiríkssyni útvarpsstjóra upp við vegg í viðtali á press.is, málgagni Blaðamannafélags Íslands, sem samstarfsmaður Þóru, Sigríður Dögg Auðunsdóttir stýrir. Viðtalið ber með sér að brátt sverfur til stáls á Glæpaleiti.

Þóra er einn sakborninga í RSK-sakamálinu þar sem koma við sögu byrlun, gagnastuldur og brot á friðhelgi einkalífs. Ákærur eru væntanlegar. Staða Þóru á RÚV hangir á bláþræði.

Auðunn knýr útvarpsstjóra til að játa að hafa ekki staðið með Helga Seljan, vini og nánum samstarfsmanni Þóru, sem tók pokann sinn á RÚV um síðustu áramót.

Augljóst er að hér eru á ferðinni samantekin ráð blaðamannamafíunnar, sem kenna má við RSK-miðla. Auðunn flytur sama boðskap og Aðalsteinn Kjartansson, einn sakborninganna, flutti í lögregluyfirheyrslu í september; að Stefán útvarpsstjóri ætti að veita mafíunni meiri stuðning.

Helgi og Þóra bjuggu til leikrit í fyrra, tíu dögum eftir að fyrsta yfirheyrslan í RSK-sakamálinu fór fram. Helgi mætti í þátt hjá Gísla Marteini og þóttist geðveikur vegna andmæla Samherja við söguburði um mútur í Namibíu. Um áramótin fékk Helgi sér nýtt starf, alheill á geði, en jafn veikur á svelli siðferðisins, - sem kom honum í koll upphaflega. 

Stefán var ekki trúgjarn á geðveika leikritið og spilaði ekki með blaðamannamafíunni.  Tilfallandi bloggari var það ekki heldur og fékk á sig holskeflu frá RSK-miðlum, vinum þeirra og velunnurum. 

Í viðtali Auðuns við Stefán er látið eins og miðlægt atriði í Helga-málum hafi verið að RÚV kom ekki í veg fyrir notkun á fréttaklippum í youtube-ræmur sem Samherji gerði til að andmæla skáldskap Helga og félaga um aðild útgerðarinnar að mútugreiðslum í Namibíu. Það er fyrirsláttur. Stefán hefur afþakkað aðild að leikriti Helga og Þóru um að Samherji hafi gengið svo hart fram að sjónvarpsmaðurinn varð vitstola. Hvað sem um Stefán má segja býr hann að greind fyrir ofan frostmark.

Í reynd sýndi Stefán Helga langlundargeð langt umfram það sem eðlilegt getur talist. Helgi var úrskurðaður að hafa alvarlega brotið siðareglur RÚV í mars. Hann var á launum allt árið en vann lítið sem ekkert. RSK-sakamálið varð þekkt á RÚV snemma í október, eftir fyrstu yfirheyrslur lögreglu. Þá átti útvarpsstjóri vitanlega að grípa í taumana og rannsaka aðild starfsmanna RÚV að alvarlegu sakamáli. Stefán gerði ekkert til að upplýsa málið. Hann lét Rakel Þorbergsdóttir fréttastjóra róa í nóvember, sem var óbein viðurkenning á alvöru lögreglurannsóknarinnar. Stefán var í þeirri neyðarlegu stöðu að geta ekki auglýst starf fréttastjóra fyrr en um áramótin; hann vissi ekki hvaða starfsmenn voru til rannsóknar lögreglu. RSK-mafían skammtaði útvarpsstjóra upplýsingar eins og skít úr hnefa.

Þegar Stefán kvaddi Helga Seljan um áramótin lagði hann sig í líma að flaðra upp um manninn sem alvarlega braut siðareglur og sagði:

„Hvað Helga Seljan varðar sérstaklega þá er það sigur fyrir íslenska þjóð og blaðamennsku að þessi öflugi blaðamaður haldi áfram sínum störfum.“

Fyrir áratug valdi þáverandi útvarpsstjóri önnur orð um Helga Seljan:

Páll brást ókvæða við spurningunni eins og sjá má á meðfylgjandi myndbandi þar sem Páll segir: „Þú ættir að skammast þín, þú ert óþverri.“

Síðar heyrðist Páll kalla Helga skíthæl. Helgi svaraði því á þann veg að viðbrögð Páls væru barnaleg. Þá svaraði Páll um hæl: „Það er skárra að vera barn en skíthæll.“

Helgi hefði ekki haldið starfi stundinni lengur eftir siðadóminn ef útvarpsstjóri væri með bein í nefinu. Sé dómur siðanefndar yfir Helga frá 2022 borinn saman við orð Páls Magnússonar útvarpsstjóra árið 2013 um Helga Seljan sést hnignunarferli siðleysis og ósvífni sem endar í glæparannsókn. Stefán er eins og leir í höndunum á blaðamannamafíunni, gerir ekkert þótt rauðu ljósin á mælaborðinu séu við að springa undan álaginu.

Frá 14. febrúar í ár situr útvarpsstjóri uppi með sakborning, Þóru Arnórsdóttur, sem yfirmann á RÚV. Fyrir minni yfirsjónir hefðu flestir millistjórnendur og yfirmenn á opinberum stofnunum orðið að víkja, tímabundið í það minnsta. Þóra sat sem fastast og situr enn.

Ákærur eru væntanlegar. Hlutur Þóru í málinu verður afhjúpaður með gögnum, líklega svæsnari en þau sem þegar eru kunn. Stundaglasið tæmist. Starfandi yfirmaður RÚV á ákærubekk gerir Glæpaleiti að alþjóðlegu aðhlátursefni.

Sakborningarnir í RSK-sakamálinu vita hvað er í vændum og líst illa á. Arnar Þór, sakborningur á Kjarnanum, skrifaði málsvörn í þágu Þóru, klappar sama stein og bróðir hennar. Viðhlæjendur á öðrum fjölmiðlum taka undir. Íslensku blaðamannastéttina setur alla niður þegar fjórir verðlaunablaðamenn eru á sakabekk. Dómgreindarleysið er slíkt blaðamenn RSK-miðla fengu verðlaun eftir að uppvíst varð um stöðu þeirra sem sakborninga.

Takist Þóru að safna nægu liði til að beygja Stefán heldur hún kannski stöðu sinni um hríð. En skriftin er á veggnum og öllum læs.

Sitjandi útvarpsstjóri gæti orðið sá síðasti. Glæpaleiti sekkur með manni og mús ef RSK-mafían heldur áfram um stjórnvölinn. 

 

Stóðu ekki nægjanlega vel við bakið á fréttamönnum

Aðalsteinn gagnrýnir Stefán útvarpsstjóra

Sakborningur í RSK-málinu, Aðalsteinn Kjartansson blaðamaður á Stundinni, gagnrýnir Stefán Eiríksson útvarpsstjóra fyrir að styðja sig ekki í starfi á RÚV. Aðalsteinn var liðsmaður Kveiks á RÚV en hætti fyrirvaralaust 30. apríl 2021.

Í lögregluskýrslu, sem tekin var af Aðalsteini 9. september síðast liðinn er haft eftir blaðamanninum að meginástæðan fyrir uppsögn á RÚV sé þessi: ,,En það sem hafði mestu áhrif hafi verið meðhöndlun fyrrum vinnuveitanda á áreiti starfsmanna Samherja sem hann varð fyrir."

Sneiðin er bersýnilega til Stefáns útvarpsstjóra. Hvaða ,,áreiti" Aðalsteinn varð fyrir er óljóst, sennilega tilbúningur manns á höttunum eftir samúð sem hann sýnir ekki öðrum.

Aðalsteinn er þrautþjálfaður í blekkingum. Hann mætti sem fórnarlamb í Kastljós á RÚV eftir lögregluyfirheyrsluna og sagðist ætla að kæra meðferðina á sér til Mannréttindadómstóls Evrópu. Engin kæra hefur verið send. Kæran var tilbúningur til að úr yrði frétt sem réttlætti að Aðalsteinn fengi Kastljósþátt fyrir sig.

Önnur veigameiri skýring er á snöggum vistaskiptum Aðalsteins 30. apríl í fyrra. 

Þrem dögum eftir að Aðalsteinn hætti á RÚV og fór samdægurs á Stundina var Páli skipstjóra byrlað og síma hans stolið. Síminn fór upp á Efstaleiti þar sem hann var afritaður. Gögnum úr símanum var komið til Aðalsteins á Stundinni og Þórðar Snæs á Kjarnanum.

RÚV var miðstöðin í glæpnum gegn skipstjóranum. En RÚV ætlaði aldrei að birta, og birti aldrei, fréttir upp úr stolnum símanum. Stundin og Kjarninn sáu um þá hlið. RÚV kom í kjölfarið, endursagði áður birtar fréttir og krafði stjórnmálamenn um viðbrögð.

Almenningur stendur í þeirri trú að RÚV, Stundin og Kjarninn séu þrír sjálfstæðir fjölmiðlar. En þetta er einn mafíu-fjölmiðill sem lýtur sameiginlegri ritstjórn. Hvergi er opinberlega greint frá bandalaginu. Samráðið er á bakvið tjöldin. Sjálfir krefja fjölmiðlar aðra um gagnsæi og að allt sé upp á borðum. Um þá sjálfa gildir leyndarhyggja. Í myrkrinu eru skipulögð lögbrot sem ekkert heiðarlegt fólk getur réttlætt.

Fyrir föstudaginn 30. apríl 2021 vissu RSK-miðlar að von væri á stolnum gögnum. Aðalsteinn var sendur á Stundina til að taka við þýfinu og koma í umferð. Það gekk eftir. Það átti að láta líta svo út að ,,rannsóknarblaðamenn" Stundarinnar og Kjarnans hefðu komist af sjálfsdáðum yfir upplýsingar. Því fer fjarri. Engin rannsóknarvinna fór fram, aðeins byrlun og stuldur.

Byrlun og þjófnaður eru almennt ekki viðurkenndar starfsaðferðir blaðamanna. Nema á Íslandi. Þar fá blaðamenn verðlaun að virkja minnimáttar til óhæfuverka. 

Hvort Aðalsteinn hafi eingöngu verið viðtakandi stolinna gagna er opin spurning sem verður svarað þegar ákærur birtast. Lögregluyfirheyrslan gefur til kynna að lögreglan viti mun meira en hún lætur uppi. Gögnin sem gera fjóra blaðamenn að sakborningum eru fyrst og fremst símtöl og fjarskipti á milli blaðamannanna sjálfra annars vegar og hins vegar blaðamanna við veiku konuna sem fengin var til að byrla og stela.

Trúlega kann Stefán útvarpsstjóri Aðalsteini litlar þakkir fyrir gagnrýnina. Vandræðin eru næg fyrir á Glæpaleiti.

Siða-Sunna: RÚV-umræða um Samherja

Dóttir starfsmanns RÚV, Þórhildur Sunna, eini þingmaður sögunnar með siðadóm á bakinu, boðar RÚV-umræðu um Samherja á alþingi í dag.

Í framsögu mun Siða-Sunna eflaust réttlæta byrlun, gagnastuld og brot á friðhelgi til að ,,taka niður Samherja." RSK-sakamálið er á lokastigi og ákærur væntanlegar. RÚV sendir út neyðarkall, vinstriþingmenn setja í gang viðbragðsáætlun. Það er ástæða umræðunnar.

Helga Vala, þingmaður Samfylkingar og móðir starfsmanns RÚV, leggst á árarnar að bera blak af glæpum blaðamanna sem búa til pólitískan áróður og kalla fréttir.

Báðar eru þær bullandi vanhæfar; ein er dóttir starfsmanns RÚV en hin móðir innherja ríkisfjölmiðilsins.

Í RSK-sakamálinu skipulagði RÚV byrlun og þjófnað en lét Kjarnann og Stundina um að koma þýfinu í umferð. Til verknaðarins var fengin andlega veik kona. Áhangendur RSK-miðla hljóta að vera stoltir. 

Fjórir blaðamann eru sakborningar. Þóra Arnórsdóttir á RÚV, Þórður Snær Júlíusson á Kjarnanum Aðalsteinn Kjartansson, á Stundinni og Arnar Þór Ingólfsson á Kjarnanum. 

Siða-Sunnu og Helgu Völu verður ekki skotaskuld að fegra glæpinn enda þjónaði hann pólitískum tilgangi. Ekki er ólíklegt að fyrrum starfsmenn RSK-miðla, nú þingmenn, láti ljós sitt skína í umræðunni. Að ógleymdum þeim sem RÚV á hönk upp í bakið á. Fróðlegt verður að sjá hvaða þingmenn ganga fram fyrir skjöldu og réttlæta glæpi. 

Á heimasíðu alþingis heitir dagskrárliðurinn: ,,Sérstök umræða um rannsókn á Samherjamálinu og orðspor Íslands."

Málshefjandi er sjálfur með stórskaddað orðspor, dóm fyrir að brjóta siðareglur þingmanna. Þingmaðurinn líklegastur til að styðja Siða-Sunnu sá sig knúinn að leggja fram vottorð að vera ekki búðaþjófur.

Siðbrjótur og ekki-þjófur með vottorð láta sér annt um orðspor Íslands.  Bein útsending er kl. 11. Æruverðugir þingmenn sýna úr hverju þeir eru gerðir. Handhafar löggjafarvaldsins sem verja lögbrot eru sérstök tegund stjórnmálamanna sem vert er að leggja á minnið.

 

Þórður Snær og glæpur Páls skipstjóra

Síminn hringir hjá Páli skipstjóra Steingrímssyni 20. maí í fyrra kl. 14:56. Á línunni er Þórður Snær Júlíusson, ritstjóri Kjarnans. Daginn eftir ætlar Þórður Snær að birta frétt upp úr stolnum síma skipstjórans. Samtalið er eftirfarandi:

Þórður Snær: Páll?

Páll: Það er hann.

Þórður Snær: Heill og sæll ég heiti Þórður Snær og er ritstjóri Kjarnans. Hvernig sæki ég að þér?

Páll: Bara ágætlega.

Þórður Snær: Þú kannast alveg við mig?

Páll: Jú, jú.

Þórður Snær: Ég ætlaði að segja að við... að okkur hafa borist talsvert magn gagna sem sýna fram á að greinarnar sem þú hefur verið að skrifa undanfarin ár séu unnar í samvinnu við launaða starfsmenn og ráðgjafa innan Samherja.

Páll: Okei.

Þórður Snær: Og vildi einfaldlega gefa þér tækifæri til að bregðast við þessu.

Páll: Þú hefur sem sagt þessi gögn undir höndum?

Þórður Snær: Já.

Páll: Glæsilegt að þú sért búinn að viðurkenna það.

Þórður Snær: Já.

Páll: Ég mun þá afhenda lögreglunni þessar upplýsingar. Þetta samtal er tekið upp. Þú verður spurður út í þetta af lögreglu.

Þórður ítrekar spurninguna um hvort skipstjórinn vilji bregðast við en Páll kveðst ekkert hafa að segja. Samtalinu er slitið. Það mælist rúmlega mínúta að lengd.

Sex dögum fyrir símtalið hafði Páll kært til lögreglu byrlun og símastuld. Skipstjórinn vissi ekki hverjir stæðu að baki atlögunni að sér fyrr en hann fékk símtalið. Verðlaunablaðamaðurinn afhjúpaði sjálfan sig.

Spurningin sem Þórður Snær leggur fyrir Pál, hvort hann hafi fengið aðstoð við að skrifa greinar, er efst í huga ritstjórans. Annars væri það ekki fyrsta og eina spurningin.

Höfuðsynd Páls skipstjóra var að fá aðstoð við að skrifa greinar í fjölmiðla. Fæstir myndu kenna athæfið við stórglæpi. Í meðförum Þórðar Snæs og félaga á Stundinni og RÚV, RSK-miðla, verður þessi fjöður að fimm hænum: skæruliðadeild Samherja. Af símtalinu að dæma væri nær að tala um ritvinnsludeild Samherja.

Til að gögnin kæmust í hendur Þórðar Snæs þurfti að byrla Páli skipstjóra, stela síma hans og afrita. Það eru alvarlegir glæpir, banatilræði, þjófnaður og brot á friðhelgi. Nokkuð langt seilst til að upplýsa hvernig skipstjóri ber sig að við greinarskrif.

Þórður Snær er sakborningur í lögreglurannsókn. Ekki Páll skipstjóri, sem varð fyrir árás á líf, heilsu og einkahagi til að fjölmiðlar mættu upplýsa hvernig stæði á ritstörfum hans.

Í huga ritstjórans er Páll aftur sekari en syndin. Þórður Snær á hinn bóginn maður mannréttinda og sannleikans ,,sem valdið vill kæla." 

Blaðamenn standa að baki líkamsárás og þjófnaði og verðlauna sjálfa sig fyrir verknaðinn. En kalla það ,,kælingu" er lögregla rannsakar glæpinn.

Kómedía mannlífsins gerist ekki svartari.

 

Skítugar sprengjur í hreinu stríði?

Ef kjarnorkusprengja, skítug eða ekki, verður sprengd í Úkraínu færist heimurinn nær ragnarökum. Eftir Híroshíma og Nagasaki í lok seinna stríðs er kjarnavopnum ekki beitt í stríðsátökum. Ein sprengja réttlætir aðra sem aftur kallar á þá þriðju. 

Eyðingarmáttur kjarnorku er slíkur að siðmenningunni stendur ógn af. Notkun þessara vopna fæli í sér meiri manngerðar hamfarir en nokkur sögulega dæmi eru um og gæti bókstaflega gert heiminn óbyggilegan.

Vísun í geislavirk vopn sem ,,skítugar sprengjur" gefur til kynna að stríðið á gresjum Garðaríkis sé hingað til í einhverjum skilningi ,,hreint". Því fer víðsfjarri. Fallnir og særðir eru líklega á skrifandi stundum milli 300 og 400 þúsund, mest ungir karlmenn. Akrar og innviðir ónýtast og milljónir flýja.

Sporin hræða. Stórstríðið sem hleypti öllu í bál og brand á öðrum áratug síðustu aldar hófst með ,,skítugu" morði á ríkiserfingja Austurríkis-Ungverjalands miðsumars 1914. Enginn ráðamaður stórríkjanna ætlaði að efna til fjögurra ára stríðs sem kostaði milljónir mannslífa og bjó í haginn fyrir grimmilega öfgahugmyndafræði er stefndi lóðbeint til seinna stríðs. Samt varð það niðurstaðan.

Sé haft í huga um hvað barist er þar eystra, öryggishagsmuni Rússlands annars vegar og hins vegar fullveldisrétt Úkraínu, er þyngra en tárum taki að siðmenningin sé ekki lengra komin en svo að blóðfórnir á iðnaðarskala þurfi til vegna ágreinings sem má leysa með samningum.

Orðræða um beitingu kjarnavopna í Úkraínu vekur vonandi nægan hroll með siðmenntuðum að friðarúrræði komist á dagskrá. Ellegar má örvænta um þetta skrítna fyrirbæri, mannkyn.

„Skítug sprengja“ ekki á dagskrá

Frjálslyndar öfgar

Giorgia Meloni er fyrsti kvenkyns forsætisráðherra Ítalíu. Hún mætti á litlum Fíat í embættistökuna. Meloni er umhugað um ítalskan iðnað, hún er kosin til að vinna í þágu ítölsku þjóðarinnar.

Nýr forsætisráðherra Ítalíu talar fyrir kristni, fjölskyldusamheldni og samfélagsgildum. Meloni gagnrýnir neysluhyggju og alþjóðlega forræðishyggju sem rænir þjóðir sjálfsvitund. 

Sú ítalska er sögð öfgamaður. Þeir sem helst gagnrýna hana fyrir öfga kenna sig við frjálslyndi og fjölbreytni.

Frjálslyndið og fjölbreytnin krefst skilyrðislausrar hlýðni við alþjóðavæðingu sem þolir hvorki kristni né fjölskylduna og hatast við samfélagsgildi. Þeir frjálslyndu og fjölbreyttu átta sig ekki á að án kjölfestu trúar, fjölskyldu og sameiginlegra gilda er úti um samfélagsfriðinn.

Í ófriði, eðli málsins samkvæmt, er fátt um fína drætti hvað áhrærir frjálslyndi og fjölbreytni. Ófriður býr til hatrammar fylkingar, ekki umburðarlyndi og skilning.

Vestrænt frjálslyndi á upptök sín í andófi gegn gerræði og forréttindum þeirra fáu á kostnað alþýðu manna. Nú um stundir er það einmitt gerræði, t.d. skoðanakúgun og útilokun, sem einkennir meint frjálslyndi. Forréttindastétt frjálslyndra skipa æðstuprestar nýsannleika sem trúa að kynin séu þrjú, fimm eða seytján og að loftslagið sé manngert.

Í nafni nýsannleikans skal almenningur fylkja liði frá raunheimi inn í alþjóðavæddan bábiljuheim þar sem ímyndanir eru teknar fram yfir skynveruleikann.

Meloni sagði nei, takk, sama og þegið. Fyrir það er hún stimplaður öfgamaður.

Meloni formlega tekin við embætti

Að klúðra flokki, - og ríki

Íhaldsflokkurinn breski fær brátt sinn fimmta leiðtoga á 12 ára samfelldum valdatíma. Cameron, May, Johonson, Truss reyndu öll hönd sína á stjórnveli. Nú skal fimmti stýrimaður fundinn. 

Cameron og May má afsaka með Brexit ársins 2016. Sá fyrrnefndi boðaði þjóðaratkvæði um aðild að Evrópusambandinu og tapaði. May gat ekki framfylgt Brexit og varð að víkja.

Johnson féll að nafninu til fyrir yfirsjónum í einkalífi, hélt partí í útgöngubanni kófsins, en meira bjó undir. Hann gerði transmenningu að sinni. Stjórnmálamaður sem ber ekki skynbragð á einfaldar líffræðilegar staðreyndir, að kynin eru tvö, er vís með að klúðra öðrum málefnum. Það gerði Johnson svo sannarlega; tók upp Grétufræði í loftslagsmálum. Trans- og Grétufræði eru manngerður hliðarveruleiki án tengsla við raunheim.

Þriðja stórklúður Johnson er Úkraínustríðið. Þegar Selenskí og Pútín voru komnir með drög að friðarsamningi í mars gerði Johnson sér ferð til Kænugarðs og lagði að Selenskí að halda stríðinu áfram. Sex mánuðir af dauða, tortímingu og efnahagshörmungum sýna að margfalt betra hefði verið að semja í mars.

(Innan sviga má velta fyrir sér hvort nokkur mannlegur máttur gat stöðvað uppgjörið í Garðaríki eftir innrás Rússa í febrúar. Annar hvor aðilinn verði að tapa, og tapa stórt, þegar sögulegir meginflekar vesturs og austurs rekast á. Burtséð frá sögulegri nauðhyggju hafa einstaklingar val. Johnson valdi að tala fyrir stríði en ekki friði.)

Truss tók við gjaldþrota búi. ,,Ég er kona og veit hvað kona er," sagði hún til að vinda ofan af transrugli forverans. Aftur hélt hún í Grétufræðin og var ástkona stríðsguðsins á gresjum Garðaríkis.

Truss veðjaði á að hagspeki síðasta stóra leiðtoga íhaldsmanna í Bretlandi, Margrétar Thatcher, yrði stríðshagkerfinu til bjargar. Truss tapaði veðmálinu og var knúin til afsagnar.

Íhaldsflokkurinn breski tapaði áttum í meginmálum. Þannig klúðrast bæði flokkur og ríki. Fimmti formaður flokksins á tólf árum fær það hlutverk að tapa næstu þingkosningum.

 

 

 

Boris Johnson og Rishi Sunak funduðu

Kerson og Stalíngrad: uppgjöf eða gildra?

Syðsta héraðið í Úkraínu, sem Rússar hafa á valdi sínu, er Kerson. Aðdrættir Rússa fara yfir ána Dnípró. Brýr og ferjur eru undir stöðugum eldflauga- og stórskotaliðsárásum úkraínskra hersins. Það er ástæða brottflutnings borgara frá héraðinu og samnefndri borg.

Án birgðaflutninga yfir Dnípró fellur Kerson. Það yrði stóráfall fyrir Rússa að missa eitt af fjórum nýinnlimuðum héruðum til óvinarins. 

Úkraínumenn hafa dregið saman mikið herlið, 30 til 60 þúsund manns, til að hertaka Kerson. Á móti hafa Rússar flutt nýjar herdeildir í héraðið, samtímis sem óbreyttir borgarar eru ferjaðir austur, yfir til Rússlands.

Tvennt er í stöðunni. Í fyrsta lagi að Rússar undirbúi uppgjöf í Kerson. Nýtt herlið sé til að tefja framrás Úkraínuhers og leysa af hólmi bardagaþreytta. Sé það áætlunin má búast við skipulögðu undanhaldi næstu vikur.

Í öðru lagi gæti áætlun Rússa verið að nota Kerson sem tálbeitu fyrir meginher Úkraínu og sigra hann á vígvellinum.

Á þessu stigi stríðsins eru Úkraínumenn og Rússar með ólík markmið. Úkraínumenn leggja allt kapp á að vinna tilbaka sem mest land sem tapast hefur. Landvinningar herða liðsandann og eru forsenda fyrir áframhaldandi stuðningi frá vesturlöndum. Forgangur Rússa er aftur að tortíma úkraínska hernum og þvinga stjórnina í Kænugerði að samningaborðinu.

Liðstyrkur andstæðinganna er ókunnur. Í sumar var talið að Úkraínuher hefði milli 300 til 500 þús. menn undir vopnum. Rússneska innrásarliðið var talið um 200 þús. Eftir herkvaðningu Rússa í september bætast við að minnsta kosti 300 þús. hermenn, mögulega fleiri.

Úkraína er örlátari á blóð en Rússland. Tölur um fallna í liði Úkraínu liggja á bilinu 60 til 100 þús. Fallnir Rússar eru sennilega helmingi færri. Til að námunda fjölda særðra má margfalda tölu fallinna með þrem.

Innviðir Úkraínu eru undir stöðugum flugvéla-, dróna- og eldflaugaárásum. Innviðir Rússlands er að stærstum hluta utan vígvallar, mínus Kerch-brúin til Krím. Eyðilegging innviða torveldar hernaðaraðgerðir og veldur ómældum efnahagslegum skaða. Að ekki sé talað um þjáningar óbreyttra borgara.

Með yfirtölu á vígvellinum og óskerta innviði stefnir ótvírætt í rússneskan sigur. Stríð, á hinn bóginn, segja bæði sagan og sérfræðingar, eru óútreiknanleg. Stríðið í gamla Garðaríki er aðeins öðrum þræði slavnesk innansveitarkróníka. Hinum þræðinum er ófriðurinn um heimsfrásögn.

Stjórnin er Kænugarði stendur fyrir vestræna heimsfrásögn. Lykilorðin eru Bandaríkin, ESB og Nató. Austan megin víglínu talar Pútín fyrir margpóla heimi.

Í seinna stríði varð borgin Stalíngrad táknmynd tveggja heimsfrásagna. Stalíngrad, nú Volgograd, stendur á vesturbakka Volgu. Kerson borg liggur á vesturbakka Dnípró. Baráttan um Kerson mun ekki standa í fáeina daga heldur vikur og mánuði. Þegar kurlin í Kerson eru öll komin til grafar verður aðeins önnur heimsfrásögnin ofan jarðar. 

Eitt einkenni stríða er að þau byrja í pólitík. Endastöðin er einnig í stjórnmálum. Þeir sem kunna best hverju sinni að lesa tímanna tákn eru líklegastir til afreka. Biden, Johnson/Truss og Stoltenberg fara fyrir vestrænu frásögninni en Pútín margpóla heimi.

Margur er knár þótt hann sé smár.

 

Saka Úkraínumenn um að hafa orðið 4 að bana