Einkaframtakið lagði Ísland í rúst

Áður en einkaaðilum er afhent landið og miðin er rétt minna á að einkaframtakið svokallaða ber stærsta ábyrgð á hruninu. Einkaframtakið græðgisvæddi Ísland í útrás sem fékk rökrétta niðurstöðu í október 2008 með orðum Geirs H. Haarde forsætisráðherra ,,guð blessi Ísland."

Einkaframtakinu er ekki treystandi fyrir innviðum landsins, t.d. rekstri flugvalla, hafna og vega. Sjálfsagt er að leyfa einkaaðilum að reka úrelta flugvelli og vegaspotta hingað og þangað en ekki að hleypa þeim að mikilvægum og viðkvæmum samgönguæðum.

Einkaframtaksmenn eyddu á tíu árum eða svo öllu trausti.  Það tekur um það bil 100 til 200 ár að sýna fram á að einkaframtakinu sér treystandi fyrir mikilvægri samfélagsstarfsemi. 

Fjárfestar reki hafnir og flugvelli

Ungir Vg-liðar: ekki orð um ESB

Í ítarlegum landsfundarsamþykktum Ungra vinstri grænna um stórt og smátt úr stjórnmálaumræðu síðustu missera er ekki minnst einu orði á umsókn Íslands um aðild að Evrópusambandinu frá 16. júlí 2009 sem meirihluti þingflokks Vg studdi.

Þessi hrópandi þögn um mál sem klýfur Vg niður í rætur og er beinlínis ástæðan fyrir því að þingmenn hrökkluðust úr flokknum, að ekki sé talað um fjölda stuðningsmanna, er illskiljanleg.

Er það ofviða Ungum vinstri grænum að hafa skoðun á því hvort Ísland eigi heima í Evrópusambandinu eða ekki?

Gunnar K. fyllti salinn - landnámið staðfest

Húsfyllir var á fyrirlestri Gunnars Karlssonar sagnfræðings þar sem hann tók saman stöðu þekkingar um landnámssögu Íslands.

Meginniðurstaða Gunnars er að fornleifarannsóknir og geislakolsmælingar staðfesta ritheimildir, Íslendingasögu og Landnámu, sem tímasetja landnámið á seinni hluta níundu aldar.

Að auki rakti Gunnar helstu kenningar um landnám fyrir landnám. Það er hundrað ára gömul aukabúgrein í íslenskum alþýðufræðum að setja saman slíkar tilgátur. Þar finnst margt skemmtilegt en fátt trúlegt.

Konur mennta sig: nám gjaldfellt á vinnumarkaði

Aðalfréttin úr könnun VR er ekki að karlar fái frekar síma hjá vinnuveitanda sínum en konur heldur hitt að menntun er komin í kerfisbundna gjaldfellingu. Í frétt í pappírsútgáfu Morgunblaðsins segir

Hins vegar benda niðurstöður launakannana VR undanfarin ár til þess að nám skili minni hækkun í launaumslagið í dag en það gerði fyrir fimm árum, að teknu tilliti til annarra þátta sem hafa áhrif á launin.

Konur eru fleiri en karlar í háskólanámi, í nær öllum deildum. og hafa verið í nokkur ár. Afleiðingin er gjaldfelling á menntun.

Þegar konur komust í meirihluta kennara í grunn- og framhaldsskólum, fyrir nokkrum áratugum, fór kennarastarfið í kerfisbundna gjaldfellingu. Núna er komið að háskólamenntun almennt; konur verða meirihluti háskólamanna og þar með lækkar gildi menntunar í launaumslaginu. 

Karlar með meiri hlunnindi en konur

Hugtak skapar lífshættu

,,Túristagos" er heiti sem gosið í Holuhrauni fékk fljótlega eftir að ljóst varð að það myndi hvorki ógna mannabyggð né flugumferð.

Þegar saklaust heiti var komið á fyrirbærið töldu ferðaþjónustuaðilar óhætt að nálgast gosstöðvarnar.

Og lögðu sjálfa sig og aðra í lífshættu.

Orð eru máttug.

Vísindamenn yfirgáfu svæðið

Greiðir RÚV málskostnað fréttamanns gegn bloggara?

Fréttamaður RÚV, Anna Kristín Pálsdóttir, stefndi síðuhaldara vegna gagnrýni á frétt um ESB og krafðist ómerkingar og skaðabóta. Síðuhaldari var sýknaður í héraðsdómi og gagnrýnin stóð óhreyfð.

Síðuhaldari sá sjálfur um sína málsvörn. Liður í undirbúningi málsvarnarinnar var að fá upplýsingar frá RÚV um það hvort stofnunin stæði að baki stefnu Önnu Kristínar. Síðuhaldari skrifaði Magnúsi Geir útvarpsstjóra tölvupóst þann 27. mars sl. til að fá upplýsingar um hvort RÚV veitt fréttamanni atbeina til að stefna þeim sem gagnrýna fréttir stofnunarinnar.

Magnús Geir hefur enn ekki svarað. 

 

Sæll Magnús Geir og til hamingju með stöðu útvarpsstjóra,

í haust stefndi fréttamaður RÚV, Anna Kristín Pálsdóttir, mér fyrir blogg sl. sumar þar sem ég gagnrýndi frétt sem Anna Kristín flutti 16. júlí sl. um ESB-mál.

Lögmaður Önnu Kristínar er Kristján Þorbergsson, sem lengi hefur starfað fyrir RÚV. Bæði sú staðreynd og ummæli sem Anna Kristín lét falla benda til þess að stefna hennar sé studd beint eða óbeint af RÚV, þ.e. að fyrrverandi útvarpsstjóri og/eða framkvæmdastjóri fréttadeildar hafi haft milligöngum um stefnuna.

Af því tilefni langar mig að spyrja þig að tvennu:

a) veist þú til þess að yfirmenn RÚV hafi með einhverjum hætti skuldbundið stofnunina til að styðja við málssókn fréttamanns RÚV, Önnu Kristínar Pálsdóttur, gegn undirrituðum?

b) telur þú eðlilegt að fréttamenn RÚV stefni einstaklingum út í bæ sem gagnrýna fréttaflutning RÚV?

Frávísunarkröfu minni var hafnað og málflutningur fer fram í næsta mánuði. Mér þætti vænt um að fá svar frá þér innan ekki of langs tíma.

Í viðhengi sendi ég þér greinargerðina sem ég sendi héraðsdómi og hér að neðan er hlekkur á blogg þar sem helstu efnisatriði koma fram.

bestu kveðjur
páll

 

Greiða ekki málskostnað Más

Bændur í skotlínunni

Mjólkursamsalan gerir bændum grikk þegar þeir mega síst við því. Viðskiptahættir MS eru ættaðir frá tíma Ráðstjórnarríkjanna og ættu ekki að sjást á 21stu öld.

Einokunarverslun, Hagar og Krónan, er með bændur í skotlínunni og MS framleiðir skotfærin með því að haga sér eins og einokunarrisi er lætur sér fátt finnast um almannahag. Og þegir í ofanálag líkt og ómálga óknyttastrákur er veit upp á sig skömmina.

Bændur verða að gyrða sig í brók en láta ekki fyrirtæki eins og MS um að vera útvörð hagsmuna sinna. Meðal bænda eru öflugir talsmenn, t.d. þingmaðurinn Haraldur Benediktsson.

Stjórnvöld ekki sinnt ábendingum

Búsetuhættir manna og veðurfar

Ísland og Grænland byggðust norrænum mönnum á hlýnunarskeiði jarðarinnar. Norrænir menn gáfust upp á að búa Grænland þegar kólnaði og byggð á Íslandi stóð tæpt. Í frumskógum Kambódíu voru borgir yfirgefnar á miðöldum vegna veðurfars.

Maðurinn var ekki áhrifaþáttur á veðurfar fyrr á öldum en þó voru öfgarnar nógu miklar til að flæma fólk frá áður byggðu bóli.

Núna virðist samstaða í vísindasamfélaginu að lífshættir mannsins valdi stórfelldum breytingum á veðurfari. Þessari samstöðu verður að taka með þeim fyrirvara að öfgar í veðurfari þekktust löngu áður en maðurinn skipti máli í því samhengi. 

Fundu forna borg

Þjóðaratkvæði um poppmál vinstrimanna

Vinstrimenn eru búnir að eyðileggja um langa framtíð möguleikann á því að efna til þjóðaratkvæðagreiðslu hér á landi, - nema í ýtrustu neyð, líkt og gerðist í Icesave-málinu.

Popúlismi vinstrimanna leiðir þá enn og aftur í ógöngur. Þeir knúðu fram þjóðaratkvæði um kirkjuna og tillögur stjórnlagaráðs, sem var arftaki ólögmæts stjórnlagaþings, og fengu á kjaftinn í fyrra tilvikinu og að sama skapi lélega kjörsókn.

Aftur komu vinstrimenn í veg fyrir að prinsippmál eins og ESB-umsóknin færi í þjóðaratkvæðagreiðslu.

Ögmundur Jónasson vildi ekki þjóðaratkvæði um ESB-umsóknina sem var á allra vörum sumarið 2009 en hann vill að þjóðin kjósi núna um Nató, sem fæstir gefa gaum, og er sáralítið í umræðunni.

Með því að flagga til þjóðaratkvæðis poppmálum, sem aðeins skora hjá pólitískum sérvitringum, auglýsa vinstrimenn hversu galið það væri að gera þjóðaratkvæðagreiðslu að reglulegum þætti í þjóðmálum. 

 

 

 

Þjóðin kjósi um NATO

Össur tekur Japan fram yfir ESB

Evrópustefna Samfylkingar, um að Ísland gangi í Evrópusambandið, er í beinni mótsögn við fríverslunarsamninga milli Íslands og annarra ríkja. Evrópusambandið gerir fríverslunarsamninga fyrir hönd aðildarríkja sinna.

Í utanríkisráðherratíð sinni gekkst Össur Skarphéðinsson fyrir fríverslunarsamningi við Kína, sem raunar var kominn á rekspöl í tíð ríkisstjórnar Geirs H. Haarde. Þar með gaf Össur upp á bátinn ESB-umsóknina, sem annars var hornsteinn vinstristjórnarinnar.

Með því að Össur leggur nú áherslu á fríverslun við Japan er Evrópustefna Samfylkingar í henglum.

Kalla eftir fríverslun við Japan