Fjöldi þingmála og gott stjórnarfar

Mörg þingmál eru til óþurftar. Þau skekkja og brjála heilbrigða stjórnsýslu, líkt og síðasti þingdagur 147. löggjafarþingsins sýndi svart á hvítu.

Stjórnarfar á gæta að allherjarreglu, vera réttlátt og endurspegla þjóðarvilja.

En þjóðarviljinn er brotinn og ósamstæður. Þess vegna verða ein tólf framboð til þings þann 28. október. Raunverulegir pólitískir valkostir eru kannski þrír eða fjórir og þyrfti ekki fleiri flokka en samsvarar þeim. Hitt er froða.

 

Fjöldi mála fellur niður

Fréttabarnið og stjórnarskráin

Stjórnarskráin er að stofni til frá 1874. Í bráðum 150 ár hefur hún virkað. Fréttabarnið sem skrifar þennan inngang

Eins og staðan er í dag hef­ur hinn al­menni kjós­andi enga beina aðkomu að ákvörðun um breyt­ing­ar á stjórn­ar­skrá Íslands.

hefði alveg eins getað skrifað

Eins og staðan er í dag hef­ur hinn al­menni kjós­andi enga beina aðkomu að ákvörðun um breyt­ing­ar á löggjöf alþingis.

Lýðræðisfyrirkomulag okkar byggir á óbeinni aðild kjósenda. Fréttabarnið skilur ekki einfaldasta atriði stjórnskipunar landsins en ætlar samt að fræða okkur um stjórnarskrána.

Beint lýðræði, þar sem almenningur setur lög og stjórnskipun, er ekki tíðkað á vesturlöndum. Ráðandi fyrirkomulag heitir fulltrúalýðræði, almenningur kýs sér þingmenn að setja lög.

Almennt er ætlast til þess að blaðamenn búi að aðeins meira en hundsviti á þeim málum sem þeir fjalla um. Er til of mikils ætlast að Morgunblaðið og mbl.is tryggi lágmarksgæði?

 

 

Hvað er málið með þessa stjórnarskrá?

Flóttabörn; féþúfa glæpasamtaka

,, Við sjáum fjölda barna flutt á flugvelli með fölsuð skilríki," segir í frétt Independent um glæpahringi sem gera sér börn að féþúfu.

Smygl á fólki er stóriðnaður, segir í skýrslu MPI-stofnunarinnar.

En auðvitað kemur enginn til Íslands á vafasömum forsendum, að ekki sé sagt ólöglegum. Glæpahóparnir myndu ekki gera góða fólkinu þann grikk.

Ekkert í lögunum eykur hættu á mansali

Nammipólitík Pírata

Píratar bjóða ekki heildstæða stefnu í þeim málefnum sem helst brenna á þjóðinni Menntun, atvinna, heilbrigði, hagstjórn og fullveldi eru allt stórmál þar sem Píratar skila auðu, bjóða í mesta lagi upp á drög að stefnu.

En Píratar vilja sitt nammi. Eitthvað einfalt sem útskýrir í burt öll málin sem til samans eru ramminn um samfélagið. 

Stórasta nammimál Pírata er stjórnarskráin. Ef við fáum nýja stjórnarskrá breytist Ísland úr ,,skítamixi", eins og Birgitta orðar það svo smekklega, yfir í sæluríki.

Nammipólitík hentar eilífðarunglingum sem aldrei vaxa upp úr gelgjunni. Fullorðið fólk veit að nammið er óhollt þótt fyrsti bitinn svali sárustu sykurþörfinni.

„Hvað ætlið þið að gera í því?“

Norska yfirstéttin hafnar ESB (loksins)

Norska þjóðin hafnaði aðild að Evrópusambandinu í tvennum þjóðaratkæðagreiðslum, 1972 og 1994. Yfirstéttin í Noregi var aftur hlynnt aðild, sem og ýmsir hópar sérfræðinga er töldu sínum hagsmunum betur borgið í ESB.

Þingmenn á Stórþinginu voru úr takti við norsku þjóðina á meðan meirihluti þingheims var hlynntur aðild. Þingmenn eru oftar en ekki nánari ráðandi öflum en almenningi.

En eftir síðustu þingkosningar er traustur þingmeirihluti andsnúinn aðild. Ekki að það skipti máli - norska þjóðin er afgerandi á móti - en það er heilnæmara lýðræðinu að þjóðþingið endurspegli þjóðarvilja í jafn stóru máli og hér um ræðir.

Meirihluti þingmanna vill ekki í ESB

Vinstriflokkar opna á verslun með fólk

Skipulögð glæpasamtök standa á bakvið ólöglega fólksflutninga inn í Evrópu. Vinstriflokkar á alþingi senda til umheimsins tilkynningu um að flóttabörn fái sérmeðferð á Íslandi.

Hvað gerist?

Jú, til Íslands verða send börn í auknum mæli að biðja um hæli, þegar búið er að borga réttum glæpahópum uppsett verð.

Vinstriflokkarnir selja útlendingum aðgengi að íslenskri velferð til að kaupa atkvæði góða fólksins.

 

Skapi hættu á mansali

Hverjir senda börn til Íslands?

Vinstriflokkarnir eru samstíga um að opna landamærin fyrir börnum í neyð. En það eru ekki börn sem kaupa sér farmiða til Íslands á netinu og arka svo út á flugvöll til að komast í sæluríkið.

Fullorðnir senda börnin til Íslands og það er ekki gert í þágu barnanna. Ástæðan er að börnin komast milli stafs og hurðar á landamærunum. Á eftir kemur strollan af ættingjum sem eru í leit að betri lífskjörum.

En vinstriflokkar á atkvæðaveiðum hugsa málið ekki til enda. Enda væri það ólíkt þeim.

Ekki mikilvægast að koma börnum í skjól

Trump bíður eftir fyrsta skotinu

Trump kann pólitík, annars væri hann ekki forseti. Hann bíður eftir að taugar stjórnvalda í Norður-Kóreu og að þau hleypi af fyrsta skotinu.

Í bandarískri sögu er það alltaf vondi kallinn sem skýtur fyrst. Suðurríkin hleyptu af fyrsta skotinu sem gaf Norðurríkjunum kærkomið tækifæri að sýna vígtennurnar. Sama minnið er í ótal vestrum. Hetjan byrjar ekki ofbeldið, heldur bregst við óréttlætinu.

Trump býst við að Norður-Kóreumenn bíti á agnið hvað úr hverju. Þess vegna er hann að atast í íþróttamönnum sem hylla ekki bandaríska fánann. Á ófriðartímum eru það landráð.

Trump þarf stríð og kommúnistarnir skaffa það.

Kjöraðstæður fyrir hættulegan misskilning

Tveir straumar íslenskra stjórnmála: hrunið og Trump/Brexit

Hrunið og eftirmál þess eru annar meginstraumur hérlendra stjórnmála í bráðum tíu ár. Með Brexit-kosningunum og sigri Donald Trump, báðir atburðir urðu í fyrra, kom nýr meginstraumur inn í íslensk stjórnmál.

Eftirmál hrunsins voru uppgjör við fjármálakerfi sem fór fram úr sér í spillingu og lögleysu annars vegar og hins vegar reikningsskil við þá sjálfsmynd þjóðarinnar sem kenna má við útrás.

Brexit/Trump er andóf gegn alþjóðavæðingu vesturlanda. Á Íslandi birtist alþjóðavæðingin í ESB-umsókn Samfylkingar.

Stjórnmálaflokkar á Fróni kunna misvel sundtökin í meginstraumum samtímans. En það er ekki tilviljun að Samfylkingin er sokkin til botns, að Vinstri grænir fljóta og Sjálfstæðisflokkurinn sé sterkastur flokka.

Sameiginlegt Vg og XD er að báðir flokkarnir byggja á löngum hefðum og í færum að móta trúverðug svör, hvor flokkur á sínum kanti stjórnmálanna.

Föst skot á milli forystumanna

Píratar og Samfylking gegn lýðveldinu, Vinstri grænir ekki

Eftir hrun var alþingi dregið niður í svaðið, forsetaembættið beið hnekki en stjórnarskráin hélt velli þótt hart væri að henni sótt.

Stjórnarskráin geymir og verndar stjórnskipun landsins. Ef farið er að hringla með hana er fokið í flest skjól. Hún er síðasta vörnin gegn upplausnaröflunum.

Píratar og Samfylking vildu nota síðustu daga alþingis, sem er án umboðs eftir þingrof, til að brjóta undan stjórnarskránni.

Vinstri grænir tóku ekki þátt í þeim ljóta leik. Takk fyrir það.

„Hótaði að taka þingið í gíslingu“