RÚV rústar Namibíu

Þróunarhjálp RÚV til Namibíu er að rústa sjávarútvegi landsins. RÚV tók höndum saman við uppljóstrara í hefndarhug og namibísk yfirvöld, sem alræmd eru fyrir spillingu, og bjó þá mynd til að Samherji arðrændi landið.

Herferð RÚV leiddi til þess að alþjóðleg útgerðafyrirtæki telja ekki þjóna hagsmunum sínum að stunda sjávarútveg í Namibíu. Það er aldrei að vita hvenær einhver tekur rúv á viðskiptin og gerir þau glæpsamleg.

Fréttamenn RÚV hljóta að vera ánægðir með framlag sitt til fátæks ríkis í Afríku.

Kvótauppboð í Namibíu í vaskinn

Strákar í kvennaskóla

Grunnskólinn er kvennaskóli. Níu af hverjum tíu kennurum eru konur. Kvenmenning grunnskólans jaðarsetur drengi sem fá þau beinu og óbeinu skilaboð að menntun sé fyrst og fremst fyrir stúlkur.

Kvenlægar hugmyndir eins og ,,yndislestur" gera drengi fráhverfa lestri, sem er grundvöllur alls náms.

Afleiðingarnar blasa við. Drengir koma verr undirbúnir í framhaldsskóla en stúlkur. Munurinn eykst í háskólum, um 70 prósent útskrifaðra eru konur en karlar aðeins 30 prósent. 

Þegar annað kynið leggur undir sig menntakerfið blasir við kynjaskekkja í samfélaginu sem er öllum óholl, bæði konum og körlum.

Kynbundinn munur verði kannaður

Tyrkja-Villi og Albaníu-Ásdís

Jaðarfólk í Sjálfstæðisflokknum leitar gjarnan fyrirmynda til suðaustur Evrópu fyrir Ísland. Ásdís Halla vildi á sínum tíma að við tækjum albanska heilbrigðiskerfið okkur til fyrirmyndar. Núna kemur Vilhjálmur Egilsson og boðar Tyrkland sem fyrirmynd í sóttvörnum.

Vilhjálmur segir Tyrki giska snjalla í túrismanum, þeir fái aðeins ósmitaða ferðamenn til landsins. Öll Evrópa logar í faraldrinum en Tyrkir eru í fínum málum, segir Villi.

Tyrkneskar sóttvarnir og albanskt heilbrigðiskerfi eru glæsilegar fyrirmyndir. Áfram XD.

Lágt nýgengi í Tyrklandi og landið galopið

Trump og heimsfriðurinn

Trump er pólitísk mótsögn. Kjör hans 2016 leiddi til innanlandsófriðar í Bandaríkjunum en friðsælla varð í heiminum. Trump dró úr átökum í Austur-Evrópu og stefna hans eykur friðarlíkur í miðausturlöndum.

Í heimalandi forsetans er aftur vargöld menningarstríðs.

Trump er hvorki upphaf né endir á álitamálum friðar og ófriðar, í Bandaríkjunum eða á alþjóðavísu. Falli Trump, hvort heldur fyrir Kínaveirunni eða bandarískum kjósendum, er ekki um það að ræða að af-trumpvæðast, láta eins og veröldin hverfi til baka í fyrra horf.

Hitt er líklegra að lausung aukist á milli þjóða. Blóðsúthellingar verði í Austur-Evrópu og miðausturlöndum á meðan andstæðingar í þessum heimshlutum lesa í spil nýrra ráðamanna í Washington. Hvað Bandaríkin sjálf áhrærir er nær öruggt að menningarstríðinu linnir ekki í bráð.

Hætt er við að margir svarnir andstæðingar Trump munu horfa til kjörtímabilsins 2016-2020 og sakna leiðtogans. Óvissutímar án leiðtoga eru eins og geðsjúkrahús í höndum sjúklinga.

 

Trump: „Mér líður mun betur núna“

Stjórnarskrárbrölt í þágu EES og Evrópusambandsins

Í gær birti norska Stórþingið greinargerð um Íslandi og EES-samninginn. Ástæðan er vitanlega sú að Noregur er ásamt Íslandi aðili að EES, sem aftur er aukaútgáfa af Evrópusambandinu.

Fyrirsögn greinargerðarinnar upplýsir meginatriði hennar: ,,Ísland gefur ekki EES/ESB forgang á þjóðarrétt." Í meginmáli er útskýrt að deilan við íslensk stjórnvöld sé frá árinu 2012, já tvöþúsund og tólf. Íslensk stjórnvöld bera því við að framsal á valdheimildum til EES/ESB stangist á við stjórnarskrá íslenska lýðveldisins.

Hvað var að gerast á Íslandi árið 2012? Jú, vinstristjórn Jóhönnu Sig. reyndi sitt ítrasta að framselja fullveldið til Brussel með því að gera Ísland að hjálendu Evrópusambandsins og í leiðinni að breyta stjórnarskrá okkar.

Umsóknin um ESB-aðild dagaði uppi áramótin 2012/2013. En ESB-sinnar gefast ekki upp. Með Bessastaðabóndann í broddi fylkingar segja þeir: ,,Stjórn­ar­skrá verður aldrei meitluð í stein." 

Guðni Th. forseti lifir í fortíðinni, líkt og sálufélagar hans. Heimsmyndin frá 2012 er gerbreytt, Evrópusambandið er vandamál en ekki lausn fyrir Ísland. Brexit, úrsögn Breta úr ESB og þar með EES, gerir bandalagið í Brussel að meginlandsklúbbi Evrópuþjóða. Þangað á Ísland ekkert erindi.

Síðustu 200 árin er Ísland á bresk-bandarísku áhrifasvæði. Jörundur hundadagakonungur kom hingað á bresku skipi 1809 og reyndi byltingu. Breskur floti tók Ísland hernámi vorið 1940 og framseldi landið Bandaríkjunum ári síðar, með samþykki Íslendinga. Í valdapólitísk Norður-Atlantshafsins er Evrópusambandið núll og nix.

Guðni Th. forseti og aðrir ESB-sinnar reyna að troða Íslandi með góðu eða illu inn í Evrópusambandið. Stjórnarskrármálið er prófsteinn.  

„Við höfum séð það svartara“

Mannréttindi, smit og samfélag

Sóttvarnir snuða fólk um mannréttindi, eins og tíðkast nú orðið að kalla það sem einu sinni hét frelsi einstaklingsins til orðs og æðis.

Mannréttindi eru til í samfélagi manna. Á eyðieyjunni átti Róbinson Krúsó engin mannréttindi, þurfti þau ekki. Í umræðunni vill gleymast að mannréttindi eru vernd ekki síður en réttur.

Á móti mannréttindum í samfélagi koma skyldur einstaklinga, en lítil umræða er þá hlið jöfnunnar. Hvert og eitt okkar ber þá siðferðilegu skyldu, og á tímum farsóttar er skyldan formleg í lögum/reglugerðum, að smita ekki aðra sjúkdómi sem er sumum lífshættulegur.

Ef við létum nú einstaklingana sjálfa um að ákveða hvaða sóttvarnir ætti að viðhafa er augljóst að lítið yrði um varnir. Ef öllum er í sjálfsvald sett hvaða viðmið og reglur skuli viðhafa er stjórnleysi. Sóttvarnir eru merkingarlausar í stjórnleysi.

Spurningin um mannréttindi ætti aðeins erindi í umræðuna ef lög og reglur væru verulega íþyngjandi. Og þar getum við sett stopp á umræðuna á Íslandi. Hér eru sóttvarnir ekki þess eðlis að þær höggvi í helg vé mannréttinda.

Það eru einfaldlega ekki mannréttindi að smita aðra.

Landamæraskimun óbreytt til 1. desember

Trump, kófið og kosningarnar

Ef Trump fer í gegnum Covid-19 án öndunarvélar og aukaverkana verður það staðfesting á orðum hans að vinstrimenn og frjálslyndir nota Kínaveiruna til að hræða fólk og lama samfélagið - en það er sérgreinin þeirra. 

Trump sigrar 3. nóvember.

Ef Trump leggst í öndunarvél en nær sér fær hann samúðarkjör 3. nóvember.

En það er alltaf þriðji möguleikinn.

Trump-hjónin með COVID-19

Fræðileg kynþáttahyggja skotmark Trump

Fræðileg kynþáttahyggja er á ensku kölluð critical race theory. Alfræðiútgáfan Britannica skilgreinir fyrirbærið:

Fræðileg kynþáttahyggja er sú skoðun að lög og stofnanir samfélagsins séu með innbyggða kynþáttafordóma (rasisma) og að kynþættir séu hvorki líffræðilegir né náttúrulegir heldur félagslega skilgreindar hugmyndir sem hygla efnahagslegum og pólitískum hagsmunum hvítra á kostnað litaðra.

Donald Trump forseti segir fræðilega kynþáttahyggju samfélagslegt krabbamein og skar upp herör gegn útbreiðslu kennisetningarinnar. Helstu hugmyndafræðingar stefnunnar eru vinstrisinnaðir háskólaprófessorar í Bandaríkjunum.

Fræðileg kynþáttahyggja gefur sér að hvítir menn séu almennt og yfirleitt rasistar, segir James Lindsay sem hefur skrifað bók um þessa hugmyndafræði sem á víðar hljómgrunn en í Bandaríkjunum. Til dæmis á Íslandi.

Stuðningur við guð - og risaeðlur

Guði var skipt út fyrir náttúruna af menntamönnum fyrir 300 árum. Heill kafli í sígildri bók Paul Hazard um hugarfarskreppu Evrópu er tileinkaður þessum umskiptum. Almenningur var heldur seinn að tileinka sér boðskapinn. En afleiðingarnar blasa við. Guðstrú er einkamál annars vegar og hins vegar til hátíðarbrigða á jólum, páskum og við athafnir eins og fermingu og brúðkaup. 

Trúin á náttúruna og meint lögmál hennar er aftur allsráðandi. Vinstrimenn stukku síðast á þann vagn, eftir fall kommúnismans þegar veraldleg Paradís á jörðu breyttist í martröð.

Náttúrutrúin er með embættismenn á sínum snærum að útskýra opinberunina fyrir fáfróðum almenningi, líkt og prestar höndla með guðstrú.

Ekki þarf að leita lengi til að koma auga á mótsagnir náttúrutrúar. Í viðtengdri frétt, um stuðningsyfirlýsingu við náttúruna (les guð), segir að ,,end­ur­heimt vist­kerfa" sé forgangsmál.

Náttúran - óvart - bæði býr til og tortímir vistkerfum. Einu sinni gengu risaeðlur á guðs grænni jörð. Náttúran tortímdi þeim. Vill Gummi umhverfis ,,endurheimta vistkerfi" risaeðla? Kannski að Gumminn vilji aðeins fara 12 þúsund ár aftur í tímann og ,,endurheimta vistkerfi" síðustu ísaldar? Eða, nær í tíma, má bjóða Gumma greinda miðaldahlýskeiðið frá 900 til 1300 þegar kornakrar voru á Grænlandi?

Trú, hvort heldur á guð eða náttúruna, er manngerð. Karl gamli Marx vissi það og bætti við: trúin er ópíum fólksins.

Stuðningsyfirlýsing við náttúruna undirrituð

Össur Kínavinur ekki á listanum

Þekktasti Kínaagent Íslands, Össur Skarphéðinsson, er ekki á kínverska listanum yfir íslenskt áhrifafólk. Samstarfsráðherra Össurar í vinstristjórninni, Katrín Júl., er aftur á listanum. En hvorki Kata Jakobs forsætis né Steingrímur J.

Sigmundur Davíð er ekki á listanum og hvorki Davíð Oddsson né Bjarni Ben.

Konur eru áberandi í Kínaskránni en síður þær guðhræddu, Agnesar biskups er í engu getið.

Kínalistinn vekur spurningar en fátt er um svör. 

411 Íslendingar á skrá