Menning, fjármagn og fótbolti

Þeir sem halda að karlmenn eigi erfitt að tjá tilfinningar sínar ættu að fylgjast með umræðu á samfélagsmiðlum um evrópska ofurdeild í fótbolta.

Ofurdeildin er hugarfóstur eigenda þekktustu vörumerkja fótboltans. Tilgangurinn er að auka arðsemina.

Fyrir utan peninga og skemmtun er fótbolti menning með langa sögu, sé miðað við skemmtanamenningu. Ensku liðin eiga meira en 100 ára sögu. Þau lifðu af tvær heimstyrjaldir og nokkrar heimskreppur. Fram til síðustu aldamóta eða svo lifuðu þessi lið á stuðningsmönnum sínum. Núna eru það sjónvarpstekjur sem skipta sköpum.

Skemmtilegasta útkoman úr brölti ofurfélaganna væri að liðin yrðu rekin úr deildar- og bikarkeppnum í heimalöndum sínum og leikmenn liðanna yrðu ekki gjaldgengir með landsliðum.

Í því tilfelli færi í hönd barátta menningar og peninga í heimi fótboltans. Everton og Leeds ættu líka möguleika á enska meistaratitlinum. Það yrði bónus.

Manchester United hætt í Evrópusamtökunum

Vinstri grænir afsanna lifseiga kenningu

Vinstriflokkur í ríkisstjórn með Sjálfstæðisflokknum tapar fylgi er gamalt viðvæði í íslenskum stjórnmálum. Vinstri grænir eru á góðri leið með að afsanna þá kenningu.

Þrátt fyrir að hart hafi verið sótt að ráðherrum Vinstri grænna, einkum heilbrigðisráðherra, stefnir flokkurinn á gott mót í haust.

Upprisa Framsóknarflokksins í skoðanakönnun gefur til kynna að ríkisstjórnin í heild sé í meðbyr.

Tvær skýringar eru nærtækar. Í fyrsta lagi að almenningur sé giska ánægður með hvernig hefur til tekist í sóttvörnum. Í öðru lagi að væntur efnahagsbati næstu misseri sé viðkvæmur og ekki ráðlegt að skipta um hest í miðri á.

Vel að merkja eru allmargar vikur til kosninga. Og vika í pólitík getur orðið býsna löng.

Könnun: Miðflokkurinn nálægt því að detta af þingi

Heimsendir, trú og loftslag

Engin hamfarahlýnun af mannavöldum hefur orðið á jörðinni. Aldrei. Aftur hefur loftslag breyst hratt af náttúrulegum ástæðum. Í rannsókn þar sem bæði Hekla og Grænlandsjökull koma við sögu segir:

Ískjarn­arn­ir benda til þess að á síðustu ís­öld, fyr­ir u.þ.b 25-40 þúsund árum, kunni loft­hiti á Græn­landi að hafa hækkað um 10-15°C á skömm­um tíma, jafn­vel ekki nema tveim­ur ára­tug­um.

Náttúran sér alfarið um loftslagsbreytingar. Spár um hamfarahlýnun af mannavöldum eru sannanlega rangar.

Síðustu tvö þúsund ár eru þrjú þekkt og skjalfest loftslagstímabil. Það fyrsta er rómverka hlýskeiðið, um 500 ára tímabil frá upphafi okkar tímatals. Miðaldahlýskeiðið er frá um 900 til 1300. Þar á eftir kemur litla ísöld til um 1900. Koltvísýringur í andrúmslofti var stöðugur á þessum tíma.

Ef loftslag breytist án breytinga á koltvísýringi í andrúmslofti er kenningin um manngert veðurfar fallin.

Eina sem eftir stendur er ástæðulaus ótti. Trúarbrögð hafa löngum nýtt sér ótta við heimsendi til að berja fólk til fylgis við hindurvitni. Boðskapurinn um manngert veðurfar hvílir á sama grunni, ástæðulausum ótta.

 

Boða samstarf á sviði loftslagsmála

Á svörtum lista: gíslataka í stafrænum heimi

Íslenskur maður er settur á svartan lista kínverskra stjórnvalda fyrir þær sakir að hafa aðrar skoðanir en þeim kínversku geðjast að. Tilefnið er þó annað og meira. Jónas Haraldsson er svartlistaður sökum þess að íslensk stjórnvöld skipta sér af kínverskum innanríkismálum, segir í yfirlýsingu kínverska sendiráðsins. 

Samkvæmt þessu er Jónas settur á svartan kínverskan lista þar sem hann hefur óæskilegar skoðanir, að áliti Kínverja, og er íslenskur ríkisborgari og að íslensk stjórnvöld ybba sig út af mannréttindabrotum í Kína.

Í raun er Jónas tekinn sem gísl fyrir málefni sem hann ber enga ábyrgð á; stefnu íslenskra stjórnvalda gagnvart Kína. 

Í milliríkjadeilum, t.d. Bandaríkjanna og Rússlands, þekkist að einstaklingar nákomnir Pútín Rússlandsforseta séu settir á svartan lista bandarískra stjórnvalda. En það ber nýrra við þegar einstaklingur út í bæ, sem Jónas er, er allt í einu kominn á svartan lista stórþjóðar. Kínverjar gætu allt eins tekið upp á því að setja á svartan lista alla íslenska karlmenn sem hafa Þ sem upphafsstaf í eiginnafni.

Í stafrænum heimi er gíslataka af þessu tagi möguleg. Jafnvel þó menn ætli sér ekki til Kína eða eiga nokkur viðskipti við Kínverja er allur þorri manna með stafrænt vistspor. Á netinu er eru keyptar vörur og margvísleg þjónusta og þar er stunduð afþreying og félagsleg og pólitísk samskipti. Kínverjar eru stafrænt stórveldi og með víðtæk ítök í grunnkerfum alnetsins.

Fælingarmáttur Kína er orðinn slíkur að fjölmiðlar á Íslandi þora ekki fyrir sitt litla líf að kenna yfirstandandi faraldur við Kínaveiruna en tala fjálglega um breska og brasilíska afbrigðið.

Kínversk gíslataka á íslenskum borgara er ekkert grín. Hér er á ferðinni grafalvarlegt dæmi um ósvífna tilraun til ritskoðunar í einn stað og í annan stað er óbreyttur borgari notaður í diplómatískum sálfræðihernaði.

Maður bíður eftir því að íslensku gúlag-lögmennirnir rjúki upp til handa og fóta og gefi út digrar yfirlýsingar um mannréttindabrot. En líklega verðu sú bið löng. Kjölturakkar eru fremur til heimabrúks. 

 

 

 

Skrif ellilífeyrisþega flækt í milliríkjadeilu

Helgi Seljan skorar sjálfsmark

Í störfum sínum skulu blaðamenn vera málefnalegir og gæta hlutlægni. Þetta gildir sérstaklega um fréttamenn RÚV. Í vinnureglum fréttamanna RÚV segir:

Fréttamenn og dagskrárgerðarmenn skulu gæta hlutlægni og sanngirni í störfum sínum. Fréttamenn og dagskrárgerðarmenn taka ekki efnislega afstöðu til mála sem þeir fjalla um.

Helgi Seljan fréttamaður á RÚV telur sjálfan sig hafinn yfir vinnureglur RÚV. Hann segir í kröfu um endurupptöku úrskurðar  siðanefndar RÚV:

Að mati kærða [þ.e. Helga Seljan] er aug­ljóst að öll um­mæli hans um kær­anda og for­svars­menn hans eru gild­is­dóm­ar hvort held­ur sem þau eru virt ein og sér eða heild­stætt. Að sama skapi er ljóst að um­mæl­in voru lát­in falla í tengsl­um við mik­il­væga þjóðfé­lagsum­ræðu.

Gildisdómur í þjóðfélagsumræðu er einfaldlega allt annað fréttaflutningur. Annað er svart en hitt hvítt. Sá sem fellir gildisdóm lýsir skoðun sinni og afstöðu. En vinnureglur RÚV segja skýrt og skorinort að það megi ekki. ,,Fréttamenn og dagskrárgerðarmenn taka ekki efnislega afstöðu til mála sem þeir fjalla um." Skýrara getur það ekki verið.

Sem borgari í lýðfrjálsu landi er Helgi með sama rétt og aðrir að tjá sig um menn og málefni. En sem fréttamaður RÚV er Helgi ekki með réttindi að flétta saman gildisdómum og fréttum. En það er einmitt það sem hann gerði í málefnum Samherja.

Sami einstaklingurinn getur ekki í starfi sínu í skjóli opinberrar stofnunar þóst fjalla málefnalega og af hlutlægni umviðfangsefni en dundað sér síðan við að fella gildisdóma um sama viðfangsefni á samfélagsmiðlum. Það er siðleysi.

Að Helga Seljan skuli detta í hug þessi málsvörn er með ólíkindum. Málsvörnin lýsir bæði dómgreindarleysi og botnlausri fákunnáttu um siðaviðmið í blaða- og fréttamennsku. 

 

Helgi Seljan unir ekki úrskurði siðanefndar

Erindi Samfylkingar: vinavæðing

,,Nú hef­ur er­indi Sam­fylk­ing­ar­inn­ar breyst frá því að vera breiðfylk­ing yfir í póli­tískt jaðarsam­fé­lag vina," skrifar Pétur G. Markan sem hættir í Samfylkingunni líkt og fjölmargir aðrir.

Vinavæðing í stað pólitískra málefna veit ekki á kjörfylgi.

Vinir Samfylkingar eru fáir.

Pétur Markan segir sig úr Samfylkingunni

Sóttvarnarríkið og stafræna alþjóðaríkið

Kínaveiran og varnir gegn henni gætu breytt samfélagi okkar til langframa og um leið tekið frá okkur tilveru sem við áður gengum að vísri.

En nei, það er ekki sóttvarnarríkið sem trompar réttarríkið, líkt og norski prófessorinn óttast. Þórólfur sótti verður ekki einræðisherra yfir Íslandi og enginn norskur starfsbróðir hans verður Haraldur farsóttarfagri í gamla ættlandinu. Staðbundnar aðgerðir í smáríkjum eins og Íslandi og Noregi eru aðeins vörn gegn bráðavanda sem gengur yfir. Norræn stjórnmálamenning snýst ekki upp í sóttvarnarfasisma er lifir lengur en Kínaveiran. Ekki er einu sinni ástæða til að hugleiða möguleikann.

Önnur umræða gæti orðið frelsi okkar og mannréttindum skeinuhætt. Í Bandaríkjunum og Bretlandi er ákall um stafrænt veiruvegabréf er veiti handhöfum ferðafrelsi og réttindi í almannarými. Sjálfkrafa felur það í sér að þeir sem ekki eiga veiruvegabréf verða annars flokks borgarar. 

Ákallið um veiruvegabréf kemur frá stóru tæknifyrirtækjum annars vegar og hins vegar frá stjórnvöldum. Uppistandarinn og samfélagsrýnirinn Russel Brand gerir umræðunni skil og hún kemur við sögu í nýjum þætti á Unheard.

Daginn sem Evrópusambandið tekur upp hugmyndina um veiruvegabréfið erum við komin skrefi nær stafræna alþjóðaríkinu. Og það má éta hatt sinn upp á það að fái hugmyndin framgöngu í Bandaríkjunum mun Brussel marka sömu stefnu. Í þeim samanburði er Þórólfur sótti ljósberi einstaklingsfrelsis.

 

Segir Noreg sóttvarnaríki

Barneignir og jafnrétti

Fylgni, en ekki endilega orsakasamhengi, er á milli aukins kynjajafnréttis, einkum á vinnumarkaði, og færri barneigna.

En það er flókið mál að skrifa um samhengið. Maður þyrfti helst að heita Pálína til að það sé óhætt.

Fólk gleymi ekki ferðalögum í svefnherbergið

Hvaða kóf?

Umferðin er orðin sú sama og fyrir faraldur hér heima. Í Bretlandi segir rannsókn að fjórðungur dauðsfalla vegna kófsins sé rangt greindur. Það er munur að deyja með COVID-19 og vegna COVID-19. 

Hér heima eru vaxandi áhyggjur af öndunarfærasjúkdómum vegna túristagossins við Grindavík. Bretar eru leiðir yfir því að eldri drykkjumenn fái ekki afgreiðslu á öldurhúsum sökum þess að þeir eiga ekki snjallsíma til að greiða snertilaust fyrir veigarnar.

Kófið virðist á útleið sem áhyggjuefni númer eitt, tvö og þrjú. Margir munu sakna vinar í stað.

Umferðin svipuð og fyrir faraldur

Afléttingar í útlöndum, óþarfar á Íslandi

Í útlöndum er talað um afléttingaráætlanir þegar dregið er úr eða fellt úr gildi víðtækt bann á samkomuhald, ferðafrelsi og allsherjarsóttkví með útgöngubanni.

Slíkar áætlanir í útlöndum eru til marks um víðtækt inngrip yfirvalda í þjóðríkjum og landssvæðum, stórfelld mannréttindabrot myndu íslenskir gúlag-lögmenn kalla þetta.

Á Íslandi er annar háttur hafður á. Við höfum búið við minni röskun á daglegu lífi okkar og sætt mildari úrræðum en tíðkast víðast hvar erlendis.

Tal um ,,afléttingaráætlun" á Íslandi er út í bláinn. Eigum við kannski að búa til ,,afléttingaráætlun" fyrir sundstaði og líkamsræktarstöðvar?

20 manna fjöldatakmörkun