Namibíumálið og glæpurinn gegn Páli skipstjóra

RÚV, Stundin og Kjarninn, RSK-miðlar, bjuggu til Namibíumálið á grunni upplýsinga frá Jóhannesi Stefánssyni, fyrrum starfsmanns Samherja í Namibíu. RSK-miðlar töpuðu Namibíumálinu í fyrrahaust þegar dómstóll í Namibíu vísaði frá ákærum á hendur Samherjamönnum. Ekkert er að frétta af þeim anga Namibíumálsins sem er til rannsóknar hér heima. 

Namibíumálið snýst um meintar mútugreiðslur Samherja til namibískra aðila. Jóhannes heldur fram þessum ásökunum en þær eru óstaðfestar og ósannaðar. Öll gögn málsins hafa verið lögð fram en það er ekkert að frétta.

Allar líkur eru á að ásakanir Jóhannesar haldi ekki. En af pólitískum ástæðum, hér á Íslandi og í Namibíu, eru málin ekki felld niður. Athygli vakti að þegar namibísk sendinefnd kom til Íslands um daginn hitti Jóhannes ekki Namibíumennina, sem hann þó segist í bandalagi við. Jóhannes vill undir engum kringumstæðum fara til Namibíu. Uppljóstrarinn er í felum frá raunheimum. Til hans sést aðeins á samfélagsmiðlum.

Páll Steingrímsson skipstjóri hjá Samherja gagnrýndi málflutning RSK-miðla. Í framhaldi skipulögðu RSK-miðlar aðför að Páli. Skipstjóranum var byrlað. Á meðan hann var á gjörgæslu var síma hans stolið og hann afritaður á Efstaleiti.

Glæpurinn gegn Páli skipstjóra er sjálfstætt sakamál, algerlega óháð Namibíumálinu. Fjórir sakborningar eru í byrlunar- og símastuldsmálinu, svo vitað sé, allt blaðamenn á RSK-miðlum. Líkt og uppljóstrarinn Jóhannes eru blaðamennirnir í felum frá raunheimum, neita að mæta í yfirheyrslu, sjást aðeins í fjölmiðlum.

Kjarninn birti frétt um helgina þar sem látið var líta út eins og Namibíumálið og glæpurinn gegn Páli skipstjóra væru eitt og sama refsimálið. Ekkert er fjarri sanni. Páll skipstjóri kom hvergi nærri Namibíumálinu. Jóhannes Stefánsson hefur aldrei borið sakir á skipstjórann. Eina ,,afbrot" Páls er að taka þátt í opinberri umræðu um óvandaðan fréttaflutning RSK-miðla. Blaðamannaböðlarnir tóku til sinna ráða og skipulögðu aðför að heilsu og eigum skipstjórans. 

Frétt Kjarnans er tilraun til að fela glæpi blaðamanna RSK-miðla gegn Páli skipstjóra.

 

 

 

Ekki hægt að fæðast í röngum líkama

Staðhæft er að sumir fæðist í röngum líkama. Að ,,kona" fæðist í líkama karls og öfugt; ,,karl" í kvenlíkama. En það er ekki hægt. Ástæðan er eftirfarandi.

Við barnsfæðingu verður til einstaklingur heill og óskiptur. Meðvitundin og líkaminn eru eitt. Hvernig einstaklingurinn vex og dafnar er háð erfðum annars vegar og hins vegar atlæti. Aðeins andvana fæddir eru án meðvitundar. Lifandi fædd börn eru ein óskiptanleg heild, líkami og meðvitund. Hvorugt getur án hins verið.  

Einstaklingurinn er annað tveggja karlkyns eða kvenkyns. Í örfáum tilvikum, vel innan við 1% lifandi fæddra, eru kyneinkenni óræð. Þau tilvik eru læknisfræðilegt úrlausnarefni.

Til að einstaklingur fæðist í röngum líkama þarf meðvitundin að verða óháð líkamanum. En meðvitund utan líkama er ekki til. Meðvitundin gerir fólk lifandi. Án meðvitundar er maðurinn sofandi/meðvitundarlaus eða hreinlega dauður. 

Meðvitundin skapar upplifun. Einhver getur verið tík án þess að vera geltandi; annar ljónstyggur en samt ekki ferfætlingur. Maður getur verið lúsiðinn en ekki skordýr.

Mörgum finnst líkami sinn ekki nógu stæltur eða grannur; brjóstin of lítil eða manndómurinn væskilslegur. Óánægja með líkamann og líkamsparta er viðtekinn þáttur í menningunni og snar þáttur í efnahagskerfinu. Margvísleg fegrun, húðflúr, líkamsrækt, megrun og lýtalækningar velta milljörðum.

Fullorðið fólk má gera hvað það lystir við líkama sinn, tortíma honum ef því er að skipta. En það er ábyrgðarhluti af fólki, sem á að heita fullorðið, að telja ungmennum trú um að hægt sé að fæðast í röngum líkama.

Löngun til að vera annað kyn en manni var úthlutað við fæðingu er allt annað. Drengur getur hagað sér eins og stúlka og stúlka eins og drengur. Hlutverkaleikur er barnagaman sem sumir vaxa ekki upp úr. Það hafa alltaf verið til kvenlegir karlar og karlmannlegar konur. En hugmyndafræðin, blekkingin, um að fæðast í röngum líkama fær sumt ungt fólk til að gangast undir óafturkræfar aðgerðir og lyfjameðferð. Löngun er ein í dag en önnur á morgun. Ekki síst hjá ungu fólki. Óafturkræf inngrip í líkamann vara fyrir lífstíð. 

Þeir sem telja sjálfum sér trú um að vera í röngum líkama eru í reynd að segja meðvitundina og líkamann sitthvað. Ef meðvitundin er ekki líkamleg og náttúruleg hlýtur hún að vera yfirnáttúrleg, guðleg. En þá færi meðvitund aldrei í rangan líkama. Guð, samkvæmt skilgreiningu, gerir ekki mistök.

 

 

Úkraína í ESB, eftir tap gegn Rússum

Úkraína getur ekki barist við Rússa án aðstoðar frá ESB og Bandaríkjunum. Vesturveldin sannfærðust í vor að Úkraína mun tapa. Vestræn aðstoð gæti framlengt stríðið en ekki breytt óhjákvæmilegri niðurstöðu.

Heimsókn leiðtoga stærstu ESB-ríkjanna, Þýskalands, Frakklands og Ítalíu, til Kænugarðs var með tvöföld skilaboð, segir þýskur sérfræðingur hjá Die Welt. 

Í fyrsta lagi að vesturveldin myndu áfram senda Úkraínu vopn. Í öðru lagi að Selenskí forseti yrði að semja við Rússa og sætta sig við að Úkraína tapi landi. Selenskí yrði að ná friði í sumar. Evrópa er á barmi efnahagskreppu. Ófriðurinn dýpkar kreppuna.

Tilboð ESB um að gera Úkraínu að formlegu umsóknarríki gefur Úkraínu von um að þegar friður kemst á gæti landið orðið ESB-ríki. Okkur er alveg sama, segir Pútín. Sennilega þykist hann vita að fremur lítið verði eftir að Úkraínu þegar líður á árið.

Stjórnvöld í Kænugarði hafa tvo mánuði til að landa friðarsamningum. Ef þeir standa sig verður hægt að sækja í sjóði Brussel. Ef Selenskí og félagar þverskallast verður dregið úr stuðningi.

Stjórnin í Kænugarði algerlega háð vestrænum stuðningi. Í reynd leppstjórn Bandaríkjanna og ESB. Látið er eins og fullvalda ríki eigi hlut að máli. En það er innrásarher í landinu og án vestræns stuðnings er allt glatað.  

Úkraínumenn gáfu út í upphafi stríðs 24. febrúar að sérhver tomma af úkraínsku landi sem færi undir Rússland væri tap. Heimsókn vestræna þríeykisins til Kænugarðs þýðir að Úkraína verði að segja skilið við allnokkrar tommur af landi. Valkosturinn er að rússneski björninn hirði allt.

Í mars voru samningaviðræður milli Kænugarðs og Moskvu. Vesturveldin stöðvuðu þær með heimsókn Boris Johnson forsætisráðherra Bretlands. Betur að marsviðræður hefðu skilað vopnahléi. Minna land hefði tapast og fleiri væru á lífi. Boris hélt í skyndiheimsókn til Kænugarðs í gær, í kjölfar ESB-þríeykisins, og bauðst til að þjálfa úkraínska hermenn. 

Úkraínsk yfirvöld segja að á hverjum degi falli 200 til 500 hermenn þeirra. Best þjálfuðu hermennirnir láta jafnt og þétt undan siga og raðirnar þynnast dag frá dagi. Bresk þjálfun á nýliðum valdur ekki straumhvörfum.

Straumhvörf í stríðinu á sléttum Garðaríkis geta aðeins orðið með tvennum hætti. Í fyrsta með pólitík, þ.e. vopnahléi og friðarsamningum. Í öðru lagi á vígvellinum. Þar tapar Úkraína jafnt og þétt. Engar líkur eru á að það breytist í bráð. Tíminn vinnur með Rússum, ekki Selenskí og félögum.

 

Möguleg aðild Úkraínu að ESB komi Rússum ekki við

Lýðveldið, Framsókn og 16. júlí

Við fögnum lýðveldinu 17. júní. Í dag er það 78 ára. Sumir vinstrimenn vildu ekki stofna til þess 1944. Ekki frekar en þeir vildu fullveldi 1918. Þeim leið betur sem Stór-Dönum en Íslendingum.

Í dag eru vinstrimenn á flótta. Helstu tíðindin á vígaslóðum stjórnmálanna er sókn Framsóknar. Þríeykið sem skipar herráðið, Sigurður Ingi, Lilja og Ásmundur Einar, skrifar grein í Morgunblaðið um samhengi fullveldis og Framsóknar.

Síðasta stórárás vinstrimanna á lýðveldið var gerð 16. júlí 2009 er sitjandi ríkisstjórn Jóhönnu Sig, eina hreina vinstristjórn sögunnar, fékk samþykkta ESB-umsókn á alþingi Íslendinga.

16. júlí er ofbeldisdagur í íslenskri sögu. Þann dag 1627 gekk óþokkalýður á land í Vestmannaeyjum, á Ræningjatanga, og drap, brenndi og hneppti fólk í þrældóm. Ekki voru það fylgismenn Marx heldur Múhameðs er voru þar að verki. 

Það er framsóknarlegt að hafa fullan fyrirvara á boðskap útlendra spámanna. Síðast þegar sæmilega tókst til, á alþingi árið 1000, var sérstakur gaumur að gefinn að því hvort hinn nýi siður, kristni, félli sæmilega að viðurkenndum háttum landsmanna, heiðni.

Sigurður Ingi þess tíma, kallaður Þorgeir Ljósvetningagoði, fann þá málamiðlun að menn skyldu taka kristni formsins vegna en máttu bera heiðni í hjarta sér og stunda heima fyrir blót, útburð og hrossakjötsát.

Engri framsóknarmennsku var til að dreifa rúmu hálfu árþúsundi síðar, þegar landsmenn skiptu úr einni kristni í aðra. Siðaskiptin voru djöfulgangur. Fyrsta frjálsræðishetjan, Jón Arason og synir hans Björn og Ari, allt framsóknarmenn, voru teknir af lífi án dóms og laga af stór-dönsku leiguþýi.

Eftir fall feðganna var fátt um innlendar varnir gegn alþjóðahyggju nýaldar. Vinstrisinnaðar háskóladeildir í Evrópu kenndu að galdrar væru helsta meinsemd mannanna, líkt og amerískar háskóladeildir kenna í dag að kynin séu ýmist þrjú, fimm eða seytján. Ósköpin bárust að strönd ísa kalda lands með svokölluðum menntamönnum, auðvitað. Þar eð engir framsóknarmenn voru til andmæla létu 25 alþýðufræðarar lífið, flestir á báli. Var sprekið þó af skornum skammti í skóglausu landi. Útlenda trúarspekin krafðist aftur lífláts með brennslu.

Allt er þetta saga sem endurtekur sig að breyttu breytanda. Lærdómurinn er að stíga skal varlega til jarðar er spámenn hefja upp raust sína. Sannleikurinn liggur í litlu atriðunum, í hversdagslífinu. Framsókn er þar á heimavelli.

Gleðilega þjóðhátíð, bæði framsóknarmenn og aðrir. 

 

 

 

Þjóðhátíðardegi fagnað

Hvað er kona? Hvað er vitsmunavera?

Sumarsmellur heimildamynda er Hvað er kona? Jú, það er flókið mál að skilgreina það sem eitt sinn voru sannindi öllum kunn. Áður en menningarmarxisminn kenndi okkur að kona sé hver sá sem segist vera kona. Karl getur orðið kona með yfirlýsingunni einni saman. Orð sem áður hafði merkingu verður innihaldslaust.

Ef kona er orðið óljóst hugtak er skammt í að vafi leiki á skilgreiningu tegundarinnar, homo sapiens. Samkvæmt viðtengdri frétt segist hugbúnaðarverkfræðingur hjá Google hafa búið til vitsmunaveru, forrit með mennska greind.

Forrit og menningarmarxismi eiga það sameiginlegt að vera mennsk afurð. Maðurinn sjálfur, tegundin, er aftur ekki mennsk afurð í sama skilningi. Samkvæmt viðurkenndri líffræði, fyrir daga menningarmarxisma, er maðurinn afurð þróunar. Darwin útskýrði samhengið um miðja 19. öld. Þar áður notuðu menn trúarskilgreiningar.

Þegar það er á huldu hvað ofureðlilegt fyrirbæri eins kona sé verður vafa undirorpið hvað hinn viti borni maður sé fyrir nokkuð. Og höfum við forrit sem er ,,eins og maður" er nærtæk ályktun að maðurinn sé í reynd ekkert annað en hlutur, sem má farga að vild.

Menningarmarxismi, stundum kallaður ,,woke", er fyrirbæri sem þarf að kveða í kútinn. Áður en það er um seinan.

 

 

 

Stundin, ekki-fréttin um 750 m.kr. arð

Höskuldur Höskuldsson eigandi Lyru tók sér 750 milljón króna arð úr fyrirtækinu eftir vel heppnuð viðskipti við Landspítala.

Morgunblaðið og Fréttablaðið segja frá.

Stundin segir ekki neitt. Er útgáfan þó áhugasöm þegar grætt er á viðskiptum við Landspítala. Fyrir ári gerði Stundin númer úr fyrrum þingmanni Sjálfstæðisflokksins sem seldi spítalanum þjónustu - fyrir smápeninga í samanburði við Höskuld.

Þó er Stundin komin með rannsóknaritstjóra, Helga Seljan. Ekkert að frétta þegar sumir græða á viðskiptum við Landspítala en fréttaefni þegar aðrir maka krókinn. 

Samkvæmt hluthafalista Fjölmiðlanefndar er stór hluthafi Stundarinnar Höskuldur Höskuldsson. Skyldi þó ekki vera sami Höskuldur og malar gull á viðskiptum við Landspítala?

Tveggja milljarða afgangur hjá Lyru vegna faraldurs

Lögreglan leitar transhatara, finnur sálfræðing

Arnar Sverrisson sálfræðingur skrifaði grein í Vísi fyrir tveim árum um kynröskun stúlkna og sagði m.a.

Fram að þessu hafa drengir og karlar aðallega þjáðst af kynröskun – jafnvel sex til níu sinnum oftar. En nú virðist hafa brotist út faraldur meðal unglingsstúlkna – jafnvel snemma á gelgjuskeiði - sem eru ónógar sjálfum sér, angistarfullar og daprar í bragði. Faraldurinn er í eðli sínu svipaður öðrum sálsýkisfaraldri, t.d. sjálfsmeiðingum og lystarstoli. Þróunin er uggvænleg.

Arnar skrifar yfirvegaðan texta og vísar í heimildir. Hann vekur máls á lýðheilsuvanda. Hægt er að vera sammála eða ósammála. Kynna sér efnið og hafa skoðun. Eða leiða málið hjá sér. En hvað gerist?

Jú, Fréttin segir frá því að Arnar sé boðaður í skýrslutöku hjá lögreglu fyrir hatursorðræðu gegn transfólki. Einhver móðgast og kærir hatur. Einhver þolir ekki umræðu og sigar lögreglunni á mann með skoðun.

Frumrannsókn sýndi engan glæp og málinu var vísað frá. En þá kom pólitíkin til skjalanna. Lögreglunni var skipað að endurvekja málið; það vantar að fylla upp í ákærukvótann fyrir hatursorðræðu.

Pólitískur rétttrúnaður er kominn á það stig að skotleyfi er á menn með rangar skoðanir. Búið er að ákveða fyrirfram að hatur sé þarna úti í samfélaginu. Finna þarf blóraböggul til að rannsaka og ákæra. Sálfræðingur vekur athygli á lýðheilsuvanda og er boðaður í yfirheyrslu lögreglunnar. Rétttrúnaðurinn þarf sinn bikar af blóði.

Menningarmarxismi, eins og efnishyggjuútgáfan, þarf sitt KGB. Sovét-Ísland 2022.

Finnland og Níkaragva, Bandaríkin og Rússland

Finnland ætlar að ganga í Nató ásamt Svíþjóð. Vestræn afstaða er að fullvalda ríki eigi rétt að ganga í hernaðarbandalag og vista í sínu landi erlenda heri, kjarnorkuvopn ef því er að skipta.

Daníel Ortega forseti Níkaragva tekur fagnandi vestrænum boðskap og rétt fullvalda ríkja. Samkvæmt Washington Post býður Ortega Rússum að senda til sín herlið og vopn.

Síðast þegar þjóðríki í Suður-Ameríku bauð til sín rússnesku herliði lá við kjarnorkustyrjöld. Í sögubókum heitir atvikið Kúbúdeilan og er sextug í ár.

Bandaríkin telja Suður-Ameríku bakgarð sinn og leyfa engu erlendu stórveldi afskipti þar um slóðir. Stefnan er kölluð Monroe-yfirlýsingin og er 200 ára gömul.

Ef Suður-Ameríka er bakgarður Bandaríkjanna er Finnland kálgarður Rússa. Og verður nú spurningin sérlega athyglisverð um rétt fullvalda ríkja til að velja sér hernaðarbandalag.

Finnar ganga ekki í NATO án Svía

Biden: Selenskí tapaði Úkraínustríðinu

Vesturlönd vita að Úkraína tapar stríðinu við Rússa. Biden Bandaríkjaforseti leggur grunn að frásögninni að tapið sé Selenskí forseta Úkraínu að kenna.

Selenskí er í raun leiksoppur tveggja aðila, vesturlanda annars vegar og hins vegar úkraínskra olígarka. Hann lék forseta í sápuóperu. Þótt leika af innlifun og var gerður að forseta. 

Eftir innrás Rússa 24. febrúar varð Selenskí alþjóðleg stórstjarna. Hann var á beinu streymi á ráðstefnum og þjóðþingum um víða veröld, einnig á alþingi Íslendinga. Þetta var á fyrstu vikum stríðsins þegar Úkraína átti að sigra Rússa með vestrænum vopnum. Selenskí var Davíð sem sigraði pútínískan Golíat.

Stöðugar fréttir vestrænna fjölmiðla um stórsigra Úkraínuhers á innrásarliðinu, ásamt breiðsíðum um fjöldamorð Pútínhersins á saklausum borgurum sannfærðu marga um að réttlátur Davíð hefði betur gegn ranglátum Pútín.

Leiktjöldin voru trúverðug en á bakvið þau var Úkraínuher á undanhaldi. Rússar sóttu fram og lögðu undir sig lönd. Vesturlönd áttuðu sig á ekki síðar en í apríl að Úkraína myndi tapa stríðinu. Það þurfti að hanna frásögn til að útskýra fyrir alþjóð niðurlæginguna. Finna blóraböggul. 

Drög að nýju handriti eru að Selenskí sé ekki Davíð gegn Golíat heldur breysk hetja, er glímir við veruleikafirringu. Á næstum dögum fáum við fréttir um að Selenskí beri ábyrgð á slæmri herstjórn og gífurlegu mannfalli. 

Samhliða nýrri frásögn lætur vestrið eins og það vilji bjarga Úkraínu. Úrsúla von der Leyen forseti framkvæmdastjórnar heimsótti Kænugarð. Úkraínuforseti sagði að á sléttum Garðaríkis réðist framtíð hins vestræna heims. Úrsúla klappaði forsetanum á bakið og sagði Úkraínu bráðum í ESB. En Úkraína fer aldrei inn í ESB án þess að hafa viðurkennd landamæri. Stórir hlutar landsins eru undir hernámi Rússa.

Fréttir herma að forseti Frakklands, forsætisráðherra Ítalíu og kanslari Þýskalands heimsæki Kænugarð innan skamms. Stórfrétt, ef satt reynist. Mögulega ætlar þríeykið að bjóða Selenskí afarkosti. Að hann semji strax við Rússa, gefi frá sér það land sem þarf til að kaupa frið. Eða að vestrið yfirgefi Úkraínu og kenni Selenskí um að tapa stríðinu.

Vesturlönd hafa ekki lengur efni á stríðinu í Garðaríki. Efnahagskerfi þeirra eru í uppnámi, hrávöruskortur vegna viðskiptaþvingana gerir illt verra.  

Segir Selenskí hafa hundsað viðvaranir

Elko, N1, Krónan og skilaboð eigenda

Eggert Þór Kristófersson forstjóra Festar, sem á Elko, N1 og Krónuna, var rekinn fyrir að hlusta á unga konu, Vítalíu Lazarevu, sem sagði farir sínar ekki sléttar í samskiptum við Þórð Má Jóhannesson stjórnarformann Festar. Eggert Þór hefur að öllum líndum kynnt stjórn Festar sjónarmið sem ekki sýndu sparihliðina á Þórði Má stjórnarformanni.

Vítalía lagði fram kæru vegna framkomu Þórðar Más og tveggja annarra frammámanna í viðskiptalífinu, Ara Edwald og Hreggvið Jónsson. Þórður Már sagði af sér stjórnarformennsku í kjölfar ásakana ungu konunnar. Hinir tveir fóru sömu leið, undir þrýstingi eigenda og almenningsálits. 

Þótt kurlin séu ekki öll komin til grafar um samskipti Vitalíu og þremenningana virðist augljóst að þau uppfylltu ekki eðlileg viðmið í siðuðu samfélagi.

Mótsagnakenndar yfirlýsingar eigenda Festar um ástæður uppsagnar Eggerts eru ótrúverðugar. Engar líkur eru að fimm manna stjórn Festar hafi nokkrum vikum eftir skyndilegt brotthvarf stjórnarformanns komist að málefnalegri niðurstöðu um að félagið þyrfti nýjan forstjóra. Annað býr að baki. Nærtækasta skýringin er að Þórður Már sé skuggastjórnandi Festar og ráði ferðinni á bakvið tjöldin.

Vitalía segir að Eggert hafi reynst sér vel. Það er líklegasta skýringin á óvæntri uppsögn forstjórans. Hefnd fyrir að taka ekki þátt í yfirhylmingu.

Festi er almenningshlutafélag og lífeyrissjóðir eiga þar stóran hlut. Þórður Már er hluthafi og fékk stuðning annarra hluthafa til stjórnarformennsku. Hann brást trausti, sýndi af sér framkomu sem er óboðleg stjórnarformanni almenningshlutafélags. 

Í stað þess að vinna í sínum málum og bíða niðurstöðu kærunnar gengur Þórður fram undir formerkjunum ,,ég á þetta, ég má þetta."

Þetta 2007-viðhorf auðmanna á ekki að líðast. Rík skylda hvílir á meðeigendum Þórðar Más, ekki síst lífeyrissjóðum, að skera upp herör gegn ósómanum.

Gangi það fram að skuggastjórnandi með stórskaðað orðspor komist upp með að reka þá sem ekki hylma yfir siðleysið, að ekki sé talað um meint afbrot, eru kolröng skilaboð send til atvinnulífsins og út í samfélagið.

Stjórn Festi staðfestir brottrekstur Eggerts