Katrín felur klofning Vinstri grænna

Stjórnarmyndun er málamiðlun. Vinstri grænum stóð til boða tveggja flokka stjórn með Sjálfstæðisflokknum. Vinstri grænir voru klofnir í afstöðu sinni og formaðurinn, Katrín Jakobsdóttir, tók ekki af skarið. Hún lúffaði fyrir hreintrúarfólki.

Vinstri grænir munu aldrei geta breytt Íslandi í sósíalískt lýðveldi. Aftur gæti flokkurinn haft áhrif á hvernig málum er skipað í blönduðu hagkerfi.

Kjarni málsins er að Vinstri grænir eiga eftir að gera upp við sig hvernig flokkur þeir ætla að vera. Valkostirnir eru tveir: í eilífri stjórnarandstöðu, sem aðeins er rofin undir sérstökum kringumstæðum - t.d. vegna hruns - eða stjórntækur flokkur málamiðlana.

Samstarfið lá í loftinu allan tímann

Pólitík er trú með djöflum og guðum: Trump, Pútín og ESB

Einu sinni voru nornir brenndar (karlar á Íslandi) vegna rangrar trúar. Vesturlönd skiptu út trú fyrir pólitík eftir frönsku byltinguna en áfram er fólk brennt fyrir ranga trú. Dauðinn birtist í mörgum myndum.

Pólitík er trúarvald í veraldlegu samfélagi. Þeir sem ráða pólitíkinni í helstu höfuðborgum eru í forræði ákvarðana sem skipta öllu, jafnvel lífi og dauða, fyrir íbúa heimsbyggðar.

Til skamms tíma var ein pólitísk trú ríkjandi á vesturlöndum, líkt og kaþólsk kristni var ráðandi í Evrópu í lok miðalda. Frjálslynd alþjóðahyggja var boðorð dagsins. Undir hennar merkjum ríkti ómælt frelsi heima fyrir ásamt sívaxandi velmegun. Vesturlönd ætluðust til að aðrir tækju þessa trú.

Eftir fall Sovétríkjanna var Rússum ætlað að taka frjálslynda alþjóðahyggju. Rússland reyndi, undir Yeltsin, að meðtaka kennisetningar kapítalisma og frjálslyndis. Tilrauninni fylgdi veldisvöxtur spillingar og samfélagsólgu. Pútín kom til sögunnar um aldamótin og skóp stöðugleika á kostnað vestrænna gilda.

Þar með varð Pútínn djöfullinn í augum frjálslynda.

Eftir Rússland bar vestræna alþjóðahyggju niður í miðausturlöndum. Innrás Bandaríkjanna í Írak 2003 var tilraun til að umskapa landið í anda vestrænna gilda. Það mistókst herfilega, þótt litli djöfullinn þar, Hussein, væri auðveld bráð. En kennisetningin var ein og söm og tilraunin var endurtekin í Sýrlandi og Líbýu. Gadaffi fór sömu leið og Hussein en aðaldjöfullinn í Moskvu barg Assad forseta Sýrlands. Öll ríkin þrjú eru ónýt, í helgreipum ófriðar.

Til að skáka djöflinum Pútín stóðu Bandaríkin/ESB/Nató fyrir stjórnarskiptum í Úkraínu 2014, nágrannaríkis Rússa. Pútín stöðvaði það, yfirtók Krímskaga og sýndi vestrænu trúnni fingurinn í austurhéruðum Úkraínu þar sem ríkir borgarastyrjöld.

Frjálslynd alþjóðahyggja var að þrotum komin. Vestur í Bandaríkjunum tók Trump forsetaembættið frá frambjóðanda pólitíska rétttrúnaðarins, Hillary Clinton. Trump segir falleg orð um Pútín og sjálfkrafa verður hann að stórasta djöflinum í augum rétttrúaðra. En Trump á sér sína vini í villtrúnni. Rússland getur ekki verið óvinurinn, segir íhaldsmaðurinn og fyrrum forsetaframbjóðandi, Patrick J. Buchanan.

Wasington féll í hendur villitrúarmanns, ekki aðeins vegna misheppnaðrar utanríkisstefnu. Alþjóðvæðingin skilaði ekki velmegun til allra. Elítan fékk mest, alþýðan minnst. Og almenningur kaus Trump.

Önnur háborg frjálslyndrar alþjóðahyggju, Brussel, er í uppnámi. Eftir Brexit er Evrópusambandið í reiðileysi. Einn þekktasti blaðamaður Þýskalands, Henryk M. Broder, líkir Evrópusambandinu við Þýska alþýðulýðveldið sem haldið var uppi á lygum. Ef ESB væri fyrirtæki væri það löngu komið til gjaldþrotaskipta, segir Þjóðverjinn.

Trúin sem kenna má við frjálslynda alþjóðahyggju er komin á endastöð. Henni verður ekki bjargað. Óvissa er um hvað taki við. Við lifum fjarska spennandi tíma. Enda eru þeir lífshættulegir.

Nornaveiðar segir Trump

Brúnegg og valdefling RÚV

RÚV þrífst á þeirri hugmynd að vera mikilvæg valdastofnun. Áhrifaríkasta leiðin til að undirbyggja hugmyndina er sýna hvers RÚV-valdið er megnugt.

RÚV prufukeyrir reglulega sömu aðferðina: í Panama-skjölunum, tilræðinu við hæstarétt og nú síðast aðförina að Brúneggjum.

RÚV var á sínum tíma stofnað til að flytja fréttir og efla íslenska menningu. Sá tilgangur er löngu gleymdur. RÚV haslar sér völl sem valdastofnun í opinberri umræðu og misnotar reglulega það vald.

„Nú er mál að linni“

CIA: drepum Rússa - hatur frjálslyndra

Rússahatur er fyrsta boðorð frjálslyndra demókrata undir forystu Obama fráfarandi forseta og Hillary Clinton forsetaframbjóðanda. Frjálslyndir í Evrópu eru margir sömu skoðunar. Ástæðan er í meginatriðum tvíþætt.

Í fyrsta lagi þjónar Rússahatur þeim tilgangi að sameina pólitísk öfl sem standa höllum fæti. Frjálslyndir ESB-sinnar töpuðu í Brexit. ESB rekur sérstaka deild til að útmála Rússa sem óvin. Sigur Trump í Bandaríkjunum var ósigur frjálslyndra. Með því að kenna Rússum um ósigurinn er athyglinni beint frá raunverulegum ástæðum fyrir tapinu, sem er að almenningur gafst upp á alþjóðahyggju frjálslyndra.

Í öðru lagi standa Rússar gegn þeirri áráttu frjálslyndra að umskapa heiminn í anda vestrænna lífshátta. Bandaríkin reyndu að umskapa Írak með innrás 2003 og í framhaldi með afskiptum af borgarastyrjöldinni í Sýrlandi og í Líbýu. Rússar eru bandamenn stjórnvalda í Sýrlandi til áratuga og stóðu með Assad forseta gegn hagsmunum Bandaríkjanna.

Í nýrri útgáfu New Yorker, sem er frjálslynt tímarit, er enn ein greinin sem réttlætir Rússahatrið. Blaðamaðurinn Glenn Greenwald fer í gegnum greinina og lýsir blæbrigðum Rússahaturs frjálslyndra.

Greenwald birtir stutta ræmu úr viðtali við forstjóra leyniþjónustunnar CIA í tíð Obama forseta. Forstjórinn, Mike Morell, segir blátt áfram að nauðsynlegt sé að drepa Rússa, láta þá blæða.

Viðtalið er tekið í kosningabaráttu Trump og Clinton. Þegar forstjóri CIA segir opinberlega að nauðsyn sé að drepa Rússa, láta þá finna til tevatnsins, er augljóst að Rússahatrið er samofið stofnanaveldi Bandaríkjanna. Og það veit ekki á gott í samskiptum kjarnorkuvelda.

Ber fullt traust til Sessions

Forsetakvabb eiginkvenna dæmdra glæpamanna

Dæmdir glæpamenn eiga oft fjölskyldu sem líður önn vegna glæpaverkanna. Það er óhjákvæmilegt - en menn eiga hvorki að njóta né gjalda fjölskyldunnar.

Fjölskyldur og makar dæmdra glæpamanna hafa í flestum tilvikum vit á því að halda sér til hlés. Undantekningin er eiginkonur dæmdra fjárglæframanna sem með ósmekklegum hætti væla opinberlega um börnin sín og hlutskipti þeirra í tengslum við dóma eiginmannanna.

Nýjasta útgáfan af ósiðum eiginkvenna glæpamanna er að þær herja á forseta Íslands og heimta að hann tali þeirra máli. Sumir fjölmiðlar eru nógu ósmekklegir til að magna upp vælið.

Eiginkonurnar ættu heldur að bæta ímynd eiginmanna sinna með því viðurkenna sekt þeirra. Í tilfelli fjárglæframannanna er ótvírætt að þeir frömdu glæpi. Við munum öll eftir líkunum. Þau hétu: Landsbanki, Íslandsbanki og Kaupþing.

Golf er deyjandi íþrótt - gott fyrir náttúruna

Þeim fækkar sem stunda golfíþróttina, sem reyndar er á mörkum þess að vera íþrótt, og er það náttúruvæn þróun. Tillögur um breyttar reglur eru viðurkenning á vanda þessarar iðju.

Golfvellir taka til sín græn engi og tún sem betur væru nýtt undir almenningsgarða þar sem fjölbreytt útivist væri í fyrirrúmi.

Erlendis er dýrmætu vatni sóað í þessa hálfgildingsíþrótt og ógrynni af eiturefnum eru notuð til að halda náttúrulegum vexti lággróðurs í skefjum. 

Golf er upphaflega iðja efnafólks og meira hugsuð sem tómstund en íþrótt. Enginn skaði er þótt golf leggist af.

Stefnt að einföldun á golfreglum

ESB þolir ekki lýðræði

Vegna lýðræðislegra kosninga í Bretlandi og Bandaríkjunum er Evrópusambandið í uppnámi. Forseti framkvæmdastjórnar ESB, Jean Claude-Juncker, býður upp á 5 ólíkar útgáfur af Evrópusambandinu, sem veit sjálft ekki í hvorn fótinn það á að stíga.

En um leið og æðstu embættismenn Brusselvaldsins viðurkenna að komið er að tímamótum; að ræða þurfi framtíð ESB er almenningi gert ljóst að ekki komi til greina að hann skipti sér af framvindu mála.

Stjórnmálaflokkar í Danmörku ríða á vaðið og tilkynna bandalag gegn lýðræði þegar ESB á í hlut. Aðeins valdamenn samfélagsins eiga að ákveða málefni Evrópusambandsins. Skýrara getur það ekki verið: ESB þolir ekki lýðræði, bókstaflega.

Vilja ekki þjóðaratkvæði um ESB

Trump, Brexit og betri efnahagur

Þvert á spár vex efnahagskerfi Bandaríkjanna eftir sigur Trump í forsetakosningum. Brexit, þ.e. útganga Breta úr Evrópusambandinu, átti að vera slæmar fréttir fyrir efnahaginn. En það er öðru nær. Bretland er í fínum málum.

New York Times, sem keppist við að níða skóinn af Trump, birtir fréttaskýringu um jákvæðar horfur í bandarísku efnahagskerfi og leitar skýringa langt að og víða.

Kenning svartsýnna alþjóðasinna var að einangrunarstefna Trump og uppsögn Breta á alþjóðavæðingu í gegnum ESB yrði til að lama alþjóðavætt efnahagskerfi. Og allir myndu tapa.

En nú þegar við blasir að þau efnahagskerfi sem hafna alþjóðavæðingu sýna meiri vöxt en önnur er fótunum kippt undan þeirri skýringu að alþjóðavæðing sé forsenda betri efnahags.

Í hvað fara allir þessir peningar?

Píratar vilja ófrið í samfélaginu

Einn Pírati sakar forsætisráðherra um lygar, annar Pírati heimtar verkföll. Stjórnmálastefna Pírata er að efna til ófriðar í samfélaginu þar sem alið er á tortryggni og andúð.

Píratar eru á fallandi fæti í skoðanakönnunum. Þeir fengu minna fylgi í síðustu kosningum en þeir ætluðu sér.

Núna feta Píratar sömu slóð og Samfylkingin gerði allt síðasta kjörtímabil með alkunnum afleiðingum. Píratar kunna ekki að lesa skriftina á veggnum.

Sakar Bjarna um lygar

Fáar fréttir af mannfalli í Mósúl

Þegar sýrlenskar hersveitir sátu um Aleppo og nutu stuðnings Rússa voru fjölmiðlar sneisafullir af fréttum mannfall óbreyttra borgara.

Nú sækja hersveitir Íraka inn í Mósúl með aðstoð Bandaríkjamanna og Nató-ríkja. Fátt segir af mannfalli óbreyttra borgara.

Vestrænir fjölmiðlar fylgja vestrænni ritstjórnarstefnu. Nema hvað.

Þúsundir flúið Mósúl