Verklag haturslögreglunnar

Haturslögreglan saksækir frjálsa orðræðu og stefnir mönnum fyrir dóm vegna þess að þeir hafa ekki réttar skoðanir.

Verklag haturslögreglunnar er hvergi kynnt almenningi. Haturslögreglan getur án fyrirvara ákveðið hvaða orðræðu skuli saksækja og lagt mann og annan í einelti á opinberum vettvangi.

Haturslögreglan starfar ekki samkvæmt forskrift lýðræðisþjóðfélags. Geðþóttavald lögreglu yfir frelsi borgaranna til að tjá sig í ræðu og riti er ættað úr smiðju alræðisríkja.

Lögregluvald yfir tjáningarfrelsinu á að afnema.


mbl.is Enginn listi haldinn vegna hatursglæpa
Tilkynna um óviðeigandi tengingu við frétt

Flóttafólk er byrði - Þorsteinn biður um sjálfsblekkingu

Flóttamenn eru byrði. Það eitt að flokka þá kostar milljarða, samanber fjárframlög til Útlendingastofnunar síðast liðin ár.

Eftir að búið að er flokka flóttamenn, og veita sumum hæli, þarf að hýsa þá og fæða og klæða. Það kostar aðra milljarða.

Aðlögun flóttamanna að íslensku samfélagi kostar líka peninga.

Ef vel tekst til geta flóttamenn orðið nýtir þjóðfélagsþegnar. En þangað til eru þeir byrði.

Þorsteinn Víglundsson félagsmálaráðherra biður okkur um að ,,hætta að líta á flóttafólk sem byrði".

Þorsteinn, sem enn er blautur á bakvið eyrun sem pólitíkus, biður samfélagið að taka þátt í sjálfsblekkingu. Eflaust er Þorsteinn vel meinandi þótt ekki stigi hann í vitið.


mbl.is „Hættum að líta á flóttafólk sem byrði“
Tilkynna um óviðeigandi tengingu við frétt

Meginregla í meiðyrðamálum staðfest

Gildisummæli um nafngreinda einstaklinga eru hluti af frjálsri orðræðu. Ef einhver segir einhvern skíthæl er það refsilaust. Ásökun um lögbrot er aftur annar handleggur. Lögin vernda æru manna gegn slíkum áburði.

Ólafur Arnarson var dæmdur í héraðsdómi fyrir aðdróttun um að framkvæmdastjóri LÍÚ hafi brotið af sér í starfi. Í dómnum segir:

,,Því hefur verið haldið fram við mig að mögulega viti enginn í stjórn LÍÚ um milljóna stuðning samtakanna við nafnlaus níðskrif á AMX – að framkvæmdastjórinn hafi einn ákveðið að nota fjármuni samtakanna með þessum hætti.“ þykir að mati dómsins mega skilja sem aðdróttun um umboðssvik og vanrækslu í starfi þar sem að með þeim sé gefið í skyn að stefnandi ráðstafi fjármunum LÍÚ í andstöðu við vilja stjórnar samtakanna og þá án heimildar. Stefndi hefur ekki sýnt fram á að ummælin séu sönn en fyrir því ber hann sönnunarbyrði.(undirstrikun pv).

Í þessu tilfelli staðfestir Mannréttindadómstóll Evrópu viðtekna dómavenju á Íslandi.


mbl.is Braut ekki gegn Ólafi í meiðyrðamáli
Tilkynna um óviðeigandi tengingu við frétt

Lýðræði, þjóðarvilji og týnd frásögn

Lýðræðið er í tilvistarvanda, segir einn ritstjóra BBC um úrslit bresku þingkosninganna sem skilaði Bretum stjórnarkreppu. Þriðjungur kjósenda sat heima. Í Frakklandi sat helmingur kjósenda heima - vildi ekki taka þátt í að móta pólitíska framtíð landsins sem er vagga nútímalýðræðis.

Lýðræðinu er ætla að leiða fram þjóðarvilja. En þjóðarvilji birtist í ráðandi frásögn. Einu sinni var velferðarríkið mál málanna, seinna varð frjálshyggja ríkjandi frásögn.

Skortur á ráðandi frásögn er regla fremur en undantekning í vestrænum ríkjum. Jafnvel í okkar litla einsleita landi er ekki að finna rauðan pólitískan þráð. Eða um hvað voru síðustu alþingiskosningar? Nei, einmitt, það er á huldu. Enda skiluðu kosningarnar okkur þriggja mánaða stjórnarkreppu.

Um tíma, tvo til þrjá áratugi í kringum síðustu aldamót, var alþjóðahyggja samnefnarinn. Eins og oft berast erlendir straumar seint til Íslands. Um síðir kom hún þó í líki ESB-umsóknar. En þá var botninn dottinn úr henni í vestrænum útlöndum. Fjármálakreppan 2008, evru-kreppan í framhaldi, flóttamannavandinn og loks, á síðasta ári, Brexit og sigur Trump í Bandaríkjunum, gerðu út af við glóbalisma sem frásögn.

Leit að nýrri frásögn stendur yfir. Þjóðernishyggja er vaxandi en einnig sósíalismi, sem hvorttveggja er góss úr fortíðinni. Menn leita til fortíðar þegar þeir sjá illa til framtíðarinnar. Og þess vegna er lýðræðið í kreppu.


mbl.is „Ég kom okkur í þessar ógöngur“
Tilkynna um óviðeigandi tengingu við frétt

Umsóknaræra Ástráðs

Ástráður Haraldsson ásamt nokkrum tugum lögfræðinga sótti um stöðu dómara við landsrétt. Líkt og ýmsir aðrir fékk Ástráður ekki stöðu við dóminn.

Ástráður stefnir ríkinu og fer fram ,,á milljón krónur í miskabætur vegna þeirrar ólögmætu meingerðar gegn æru hans sem fólst í ákvörðuninni."

Íslensk lögfræði getur orðið dálítið sérstök í meðförum fræðinganna sem um véla. Nýjasta nýtt er að umsóknaræra verður að féþúfu. Snoturt.


mbl.is Ástráður vill eina milljón í bætur
Tilkynna um óviðeigandi tengingu við frétt

Lögregluvandi Vinstri grænna og Pírata

Vinstri grænir og Píratar eru góðkunningjar lögreglunnar. Einatt þegar lögreglan kemst í fréttir vegna viðbúnaðar rísa upp á afturfæturna Vinstri grænir og Píratar og útmála Ísland sem lögregluríki.

Fyrir venjulega Íslendinga er lögreglan hluti af réttarríkinu og veitir borgurum öryggi.

Vinstri grænum og Pírötum er hvorki gefið um réttarríkið né öryggismál borgaranna. Þó er ný deild innan lögreglunnar þeim hugþekk. Sú heitir haturslögregla og á að uppræta ólögmætar hugsanir borgaranna. 


mbl.is 120 lögreglumenn á vakt vegna leiksins
Tilkynna um óviðeigandi tengingu við frétt

Trump er ekki vandamálið

Sitjandi Bandaríkjaforseti er á alla vegu og kanta vandamál. Hann er vandamál innanlands þar sem hluti stjórnkerfisins snýst gegn honum og hann er vandamál á alþjóðvettvangi þar sem pólitík hans er óútreiknanleg.

En samt. Bandaríkin höfnuðu innherja, Hillary Clinton, sem bauð upp á meira af því sama en völdu Trump sem lofað stríði við kerfið.

Trump er mótsögn. Hann er moldríkur en talar máli láglaunafólks, sem gerði hann að forseta. Trump lofaði að gera Bandaríkin að stórveldi á sama tíma og heimsbyggðin játast öll þeirri kennisetningu að Bandaríkin eru eina stórveldi jarðkringlunnar. Fékk hann umboð til að gera Bandaríkin að enn meira stórveldi? Varla, annað loforð hans var að draga úr áhrifum Bandaríkjanna á alþjóðavettvangi, stunda ekki tilgangslaus stríð í langt-í-burtistan.

Trump er ekki vandamálið. Hann er birtingarmynd vanda sem ekki er sérbandarískur. Vandinn felst í því að kerfi sem sett voru upp í kjölfar seinna stríðs og endurskipulögð eftir kaldastríðið eru úr sér gengin. Kerfin eru samtengd og þekkjast undir skammstöfunum eins og IMF, SÞ, Nató og ESB.

Bandaríkin eru helsti bakhjarl þessara kerfa. Í því samhengi þjónar Donald Trump tveim hlutverkum. Í fyrsta lagi er kjör hans skýr og ótvíræð vísbending að kerfin virka ekki. Í öðru lagi þjónar hann því hlutverki að vera blóraböggull fyrir biluð kerfi.

Í fréttaflutningi er öll áherslan á Trump í seinna hlutverkinu. En það er akki aðalhlutverkið. Aftur þjónar það hagsmunum úr sér gengnu kerfanna að gera Trump að helsta vandamáli heimsbyggðarinnar. Við sjáum fyrir augum okkar hápunkt alþjóðavæðingarinnar: sjálfsblekkinguna.


mbl.is Embættismenn í mál við Trump
Tilkynna um óviðeigandi tengingu við frétt

Frjálslynda vinstrið er deyjandi pólitík

Frjálslynda vinstrið með stjórnmálamenn eins og Hillary Clinton, Tony Blair, Hollande og Schulz er á hröðu undanhaldi.

Tvær pólitískar útgáfur eru með byr í seglin, þeir skora flokkakerfið á hólm, Trump í Bandaríkjunum og Macron í Frakklandi, annars vegar og hins vegar róttækir vinstrimenn á borð við Corbyn, Sanders og Mélenchon.

Frjálslynda vinstrið stendur fyrir alþjóðavæðingu og fjölmenningu síðustu áratuga, sem gefur nú eftir. Í staðin koma þjóðernishyggja og stéttapólitík.

 


mbl.is Fordæmalaust tap vinstri flokka
Tilkynna um óviðeigandi tengingu við frétt

Ameríkuvædd úr moldarkofa

Íslendingar voru ameríkuvæddir úr moldarkofum áratugina eftir seinna stríð. Nei, þetta er ekki ný uppgötvun, heldur hluti af sjálfsmynd Íslendinga í kringum 1970.

Norskir sjónvarpsmenn voru hér á ferð sumarið 1969 og gerðu 40 mínútna heimildarþátt um Ísland nútímans. Ivar Eskeland, sem veitti Norræna húsinu forstöðu fyrstu fjögur starfsár þess 1968-1972, víkur að þeirri hneigð Íslendinga að fyrirlíta sjálfa sig. Hann segir þá suma vonsvikna þegar hann svarar neitandi spurningu þeirra um hvort landinn sé ekki úr hófi ameríkuvæddur.

Goðsögnin um ameríkuvæðingu Íslendinga nærðist einkum á hraðri þéttbýlisþróun annars vegar og hins vegar fimm þúsund manna herliði Bandaríkjanna á Miðnesheiði.

Heimildarmyndin norska kippir stoðunum undan goðsögninni. Allir viðmælendur fréttamanns NRK tala norrænu. Hver með sínu nefi, eins og gefur að skilja. Sveinn Einarsson leikhússtjóri LR talar mjúkmælta sænsku og Hannibal Valdimarsson í hlutverki forseta ASÍ fer fram með vestfirska dönsku.

Það má velt fyrir sér hve margir af forsvarsmönnum menningar, atvinnulífs og stjórnmála ræddu í dag landsins gagn og nauðsynjar á skiljanlegri norrænu. Trúlega myndi þorri þeirra tala á ensku. En við myndum ekki kalla það ameríkuvæðingu.


Svavar, Corbyn og unglingafylgi róttækra öldunga

Svavar Gestsson, fyrrum formaður Alþýðubandalagsins, gerir því skóna að formaður breska Verkamannaflokksins, Jeremy Corbyn, sé vinstri grænn. Líklega er það rétt; væri Corbyn íslenskur yrðu Vinstri grænir flokksheimili hans.

Í alþjóðlegu samhengi er Corbyn jafnað við tvo aðra róttæka öldunga, Bernie Sanders og Jean-Luc Mélenchon, sem nýlega gerðu gott mót í bandarísku og frönsku forsetakosningunum.

Annað sem sameinar Corbyn, Sanders og Mélenchon er að þeir höfða meira til ungra kjósenda en þeirra eldri. Hvað veldur því að róttækir vinstrimenn á gamals aldri fá stuðning yngstu kjósendanna?

Nærtækasta skýringin er að unga fólkið hafnar kapítalismanum og leitar að valkosti við ríkjandi kerfi. Unglingarnir muna ekki þá tíð þegar sósíalisminn var praktíseraður í Sovétríkjunum og Austur-Evrópu. Það er ekki tilviljun að gömlu róttæklingarnir ná árangri í Vestur-Evrópu; austan Oder vita allar kynslóðir hvað sósíalisminn þýðir í framkvæmd.

Gömlu róttæklingarnir ganga á milli bols og höfuðs á frjálslyndum vinstrimönnum. Bernie Sanders veikti framboð Hillary Clinton í Bandaríkjunum, Corbyn stútaði Blairistum í Bretlandi og Mélenchon skilur eftir sig sviðna jörð frjálslynda sósíalista í Frakklandi.

Til að stöðva framrás róttæka öldungavinstrisins verða hægrimenn að kveikja á þeirri staðreynd að meiri kapítalismi er ekki svarið. Það er engin eftirspurn eftir einkavæðingu og markaðslausnum, allra síst þar sem reynslan sýnir yfirburði samfélagsrekstrar, í heilbrigðismálum og menntakerfinu.

Til að halda völdum losaði Theresa Mey sig við ráðgjafa sína, sem kunnu ekki að lesa tímanna tákn. Á Íslandi eru Vinstri grænir næst stærsti flokkur landsins og þess albúnir að verða stærstir, - jafnvel þótt formaður þeirra sé ekki beinlínis öldungur. Landsfundur Sjálfstæðisflokksins í haust ætti að ígrunda málefnastöðu sína og læra af mistökum breska Íhaldsflokksins.


mbl.is Ráðgjafar May segja af sér
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband