Leiði er líka nám

Samfélagsmiðlar og tæknilausnir eru viðkvæðið í skólastaumræðunni. Kennsla verði að taka mið af vettvangi barna og unglinga, annars er hætt við að ungmennunum leiðist.

En leiði er líka nám. Ungt fólk lærir af því að leiðast. Að vera einn með sjálfum sér og sínum hugsunum stuðlar að þroska.

Sigurður Pálsson skáld fann rithöfundinn í sér þegar honum leiddist í bókfærslu í MR fyrir hálfri öld.

Allt nám er í grunninn sjálfsnám. Skólar búa til aðstæður til náms og kennarar freista þess að halda nemendum við efnið. En nám lýtur ekki venjulegum lögmálum þar sem innbyrt efni skilar tiltekinni útkomu. Sjálfsnám verður til í huga einstaklingsins. Og þótt hæpið sé að gefa algilda forskrift fyrir alla er annað ólíklegt en að leiði komi þar við sögu.

Í leiðanum finnur maður best fyrir verkefninu sem allir glíma við ævina á enda. Að skilja sjálfan sig.

 

Sjálfstæðisflokkurinn og sólkerfi stjórnmálanna

Síðustu kosningar skiluðu þeirri  niðurstöðu að landinu verður ekki stjórnar án Sjálfstæðisflokksins. En þrátt fyrir það nær móðurflokkur stjórnmálanna ekki þriðjungsfylgi.

Sjálfstæðisflokkurinn undir þessum kringumstæðum verður að finna samnefnara með þings og þjóðar til að halda stöðu sinni sem miðja sólkerfis stjórnmálanna.

Það felur í sér að forðast séráhugamál minnihlutahópa innan flokksins, eins og að selja áfengi í matvöruverslunum eða einkavæða heilbrigðiskerfið og þjóðarflugvöllinn.

En Sjálfstæðisflokkurinn verður líka að brjótast undan sérhyggju hagsmunahópa, t.d. ferðaþjónustunnar, sem leggst gegn einföldun skattkerfisins þar sem byrðum er jafnt dreift.

Ef vel tekst til verður Sjálfstæðisflokkurinn áfram miðja sólkerfisins, þjóðinni til heilla.

Stendur ekki til að selja flugstöðina

Kaupfélögin á milli auðvalds og sósíalisma

Kaupfélögin voru sjálfsprottinn félagsrekstur sveitafólks. Það fyrsta var stofnað á meðan enn giltu lög um vistaskyldu. Enginn mátti búa án búfjár og þeir sem ekki áttu bú urðu að ráða sig í vist hjá bónda.

Þótt þilskip væru gerð út yfir sumarmánuði voru fiskveiðar að mestu bændaútgerð. Vinnuaflið fór úr sveitunum á vertíð yfir háveturinn þegar búskapurinn var í dvala.

Saga kaupfélaganna er samofin þéttbýlismyndun, ungmennafélagshreyfingunni og baráttu þjóðarinnar til sjálfstæðis. Án kaupfélaganna hefði umbylting bændasamfélagsins áratugina fyrir og eftir 1900 orðið sársaukafyllri. Kaupfélögin tryggðu að vaxandi velmegun skilaði sér heim í sveitina.

Helsti keppinautur kaupfélaganna var innlent og erlent auðvald í formi einkarekinna hlutafélaga. Miðstöð Íslandsverslunar flutti frá Kaupmannahöfn til Reykjavíkur um 1900 en kaupfélögin tryggðu að sveitirnar voru ekki afskiptar.

Banabiti kaupfélaganna var sósíalismi sem bjó til yfirstétt kommisara er fleyttu rjómann en skömmtuðu félagsmönnum skít úr hnefa.

 

Elsta kaupfélaginu slitið

Frjálslyndur fasismi; stimplar hófsama sem öfgamenn

Maajid Nawaz er hófsamur múslími, jú, þeir finnast, sem vill siðbæta múslímatrú og ná henni úr höndum ofstækismanna er myrða mann og annan í nafni trúarinnar. Nawas setti saman bók með þekktum guðleysingja og frjálslyndum í þokkabót, SamHarris.

En nú bregður svo við að frjálslynd samtök í Bandaríkjunum hafa sett Nawas á lista yfir öfgamenn er berjast gegn múslímatrú (sem væntanlega er þá hin prýðilegasta í höndum herskárra múslíma). Nawas veit ekki hvaðan á sig stendur veðrið og skrifar langa grein um ofsóknir frjálslyndra gagnvart hófsömum.

Nawas er ekki sá eini sem ber sig illa undan frjálslyndum fasisma. Fjölmiðlamaðurinn Fareed Zakaria, hófsamur miðjumaður múslímskrar ættar, kvartar undan ofstopa frjálslyndra gegn frjálsri orðræðu.

Frjálslyndi fasisminn þolir aðeins eina skoðun. Frjálslyndir fasistar eru þar í sama bát og herskáir múslímar. Ef það kæmi til þess að hóparnir yrðu einir á báti er hætt við að þeir múslímsku myndu varpa frjálslyndum fyrir borð enda þola sanntrúaðir ekki frjálslyndar skoðanir eins og kynjajafnrétti, samkynhneigð, trúfrelsi og önnur vestræn mannréttindi. En frjálslyndum er ekki gefin spektin að skilja þessa hluti.

Jón Ásgeir og heiðarleikinn

Jón Ásgeir Jóhannesson kemur við sögu í nokkrum hrunmálum og var dæmdur sekur í sumum. Þá er Jón Ásgeir rauður þráður í hrunskýrslu alþingis.

Í dómsmálum, opinberum rannsóknum og almennri umræðu eru Jón Ásgeir og heiðarleikinn eins fjarri og norðurpólinn suðurskautinu.

Aðeins heiðarlegir menn geta á von á því að Jón Ásgeir saki þá um óheiðarleika.

Jón Ásgeir svarar Grími Grímssyni

Trump og Pútín hættulegri en Ríki íslams

Kaldastríðshaukurinn og fyrrum forsetaframbjóðandi í Bandaríkjunum, John McCain, segir Pútín Rússlandsforseta meiri ógn við Bandaríkin en Ríki íslams. Þýskir stjórnmálamenn segja Trump ógna við heimsfriðinn, með því að selja vopn til Sádí-Arabíu, og jafnframt að sitjandi forseti Bandaríkjanna grafi undan lífi á jörðinni með andstöðu við sáttmála gegn loftslagsbreytingum.

Trump, eins og þeir vita sem fylgjast með fréttum, er sakaður um að vera handbendi Pútíns Rússlandsforseta, sem á að hafa blandað sér í bandarísku forsetakosningarnar síðast liðið haust og nánast tryggði Trump embættið.

Af ofanrituðu má ljóst vera að leiðandi öfl vestrænna ríkja vita ekki í hvorn fótinn þau eiga að stíga. Gömul bandalög eru í uppnámi, t.d. milli Bandaríkjanna og Evrópu. Óljóst er hvort sé verra herskáir múslímar eða að Pútín sé forseti í Rússlandi.

Grundvallarágreiningur er um greiningu á stöðu alþjóðamála og ekkert samkomulag er um mat á öryggishagsmunum. Og aukast þá heldur vandræðin, eins og kerlingin sagði.

Segir Trump veikja Vesturveldin

Kosningar og stjórnarkreppa

Síðustu kosningar skiluðu okkur stjórnarkreppu, í þrjá mánuði var ekki hægt að setja saman ríkisstjórn.

Nýjar kosningar eru ekki líklegar að breyta stóru í pólitísku landslagi og enn síður að annað stjórnarmynstur sé í kortunum.

Sitjandi ríkisstjórn er veik en stjórnarandstaðan þó veikari. Þar við situr.

Stefnir í söguleg kosningasvik

Borgaralaun og ríkisforsjá

Borgaralaun eru að allir borgarar njóti lágmarkaframfærslu án tillits til stöðu í samfélaginu eða annarra tekna.

Fyrirkomulagið í dag er að almannatryggingar og önnur félagsleg úrræði aðstoða þá sem vegna skertrar framfærslugetu geta ekki séð um sig og sína.

Borgaralaun fela í sér víðtæka ríkisforsjá þótt hennar sjái ekki stað í sjálfri hugmyndinni. Í samfélagi borgaralauna sér ríkið um framfærslu einstaklinganna. Ríkið hlýtur, bæði beint og óbeint, að áskilja sér rétt til inngripa í líf einstaklingsins. Kannski er þá betur heima setið en af stað farið.

Myndu ekki minnka fátækt

Hvítir bannaðir í París

París er ein af höfuðborgum Evrópusambandsins. Í miðborg Parísar verður í sumar efnt til hátíðar sem er að stórum hluta bönnuð hvítu fólki. Aðeins þeldökkum er leyfður aðgangur. Guardian segir að ef til vill verði hátíðin bönnuð.

Þegar almannarými er frátekið fyrir blökkufólk, en bannað fólki sem er hvítt á hörund, er eðlilegt að Evrópusambandið snúi sér annað en til Bandaríkjanna og Bretlands í leit að samherjum.

Alsír og Marakkó eru orðnir náttúrulegir bandamenn Evrópusambandsins.

Ekki hægt að stóla á Bandaríkin og Bretland

Sigmundur sameiningartákn vinstrimanna

Vinstrimiðillinn RÚV kallar reglulega til sín skjólstæðinga sína, vinstrimenn af ýmsum sortum, til að vitna. Bæði er þetta gert í fréttum og spjallþáttum.

Vinstrimönnum gengur erfiðlega að finna samnefnara innan eigin raða. Þess vegna eru þeir í svo mörgum flokkum. Á alþingi eru þeir fjórklofnir en utan þings var um daginn stofnaður sósíalistaflokkur til að auka á kraðakið.

Vegna skorts á samstöðu innan eigin raða finna vinstrimenn sér sameiningartákn meðal andstæðinga sinna. Um aldamótin og fram yfir hrun var Davíð Oddsson sameiningartáknið en síðustu ár er Sigmundur Davíð Gunnlaugsson kominn í hlutverkið.

Sameiningartákn vinstrimanna eiga það sameiginlegt að vera öflugir stjórnmálamenn, vilja ekki bylta stjórnarskránni, eru andvígir ESB-aðild en hlynntir stöðugleika og starfa í þágu almennings. Það segir töluverða sögu um vinstrimenn hverja þeir velja sem sameiningartákn. Sigmundur Davíð má vel við una.

Snúist um þörf Sigmundar fyrir völd