Innrás Nató og Rússa í Úkraínu

Forseti Úkraínu segir í skilaboðum til Bandaríkjaforseta ekkert sé til sem heitir óveruleg innrás. En það er rangt. Fyrir átta árum var barist í austurhluta Úkraínu, Donbass.

Austurhlutinn er að mestu byggður Rússum sem tóku fagnandi ,,sjálfboðaliðum" er börðust við stjórnarhermenn studda af Nató og Evrópusambandinu. Í framhaldi var gert samkomulag, kennt við Minsk, um að hluta landið í sjálfsstjórnarhéruð. Stjórnin í Kiev braut samkomulagið. Úkraína í heild er betri verslunarvara en í bútum.

Evrópusambandið og Nató vilja Úkraínu til sín en Rússum er það þvert um geð. Skiljanlega þar sem Nató er stefnt gegn Rússlandi. Ef svo væri ekki yrði Rússum boðin aðild að félagsskapnum.

Nató er kaldastríðsgóss, hernaðarsamtök án tilgangs eftir að Sovétríkin gufuðu upp fyrir 30 árum. Til að halda lífi í samtökunum er herjað hér og þar s.s. Írak, Afganistan og kynt undir ófriði í Úkraínu.

Það má hafa samúð með Úkraínumönnum. Landsstjórnin er í lamasessi. Ýmist sitja við kjötkatlana Rússavinir eða Natódindlar. Vesturlönd draga upp þá mynd af Úkraínu að þar sé hnípin þjóð í vanda er óskar sér einskins annars en lifa í friði. Myndin kemur illa heim og saman við áráttu valdhafa að fénýta sér landfræðilega legu ríkisins. 

Ýmsar pælingar eru uppi um framhaldið. Fyrirfram er vitað að Nató og Bandaríkin verja ekki landamæri Úkraínu með hervaldi. Rússar taka þann hluta landsins sem þeir telja sig þurfa vegna öryggishagsmuna. Eða það verður samið um að Úkraína verði ekki Nató-ríki, hvort heldur í bráð eða lengd.

Vonandi nást samningar. 

Innrás Rússa vofir yfir

Orkupakkasvindl á íslenskum neytendum

Orkupakkar frá Evrópusambandinu eru ástæða svindlmarkaðar á rafmagni til neytenda. Allir raforkuinnviðir á Íslandi eru í opinberri eigu. Einfalt og sanngjarnt væri að heimili landsins fengju rafmagn frá einum aðila.

En vegna orkupakka ESB, sem íslensk stjórnvöld innleiddu í blóra við almannahag, er búinn til þykjustumarkaður. Fyrirtæki lifa sníkjulífi á þessum markaði og almenningur borgar brúsann með hærra rafmagnsverði.

Ef það er ekki beinlínis ætlun stjórnvalda að féfletta almenning ætti að bjóða öllum heimilum landsins smáforrit, app, sem leysir úr þessum heimatilbúna vanda. Smáforritið myndi sjálfkrafa velja ódýrasta rafmagnssalann hverju sinni. Síðan ætti að senda til föðurhúsanna orkupakka ESB og skipuleggja raforkumál á Íslandi af viti.

Það er ekki eins og gæði rafmagns séu ólík eða afhendingaröryggi. Þetta er eingöngu spurning um verð. 

Orkustofnun, vel að merkja, er útsendari ESB á Íslandi, og ætti ekki undir nokkrum kringumstæðum að koma að laus mála sem alfarið og eingöngu eru búin til af ESB og skammsýni íslenskra stjórnvalda.

En kannski er það stefna stjórnvalda að féfletta almenning og framselja fullveldi orkumála til Brussel. Þá þurfum við að skipta um ríkisstjórn. 

Ert þú hjá dýrasta rafmagnssalanum?

RÚV-gjald er mannréttindabrot

Í landinu er trúfrelsi. Maður getur staðið utan þjóðkirkjunnar. En það er ekki hægt að standa utan RÚV. Allir lögaldra Íslendingar eru krafðir um nefskatt sem rennur í hirslur RÚV.

Það má velja sér trúfélag, eða standa utan þeirra, en það er skylduaðild að RÚV.

Þegar skattgreiðendur voru skyldaðir að greiða útvarpsgjald var ekki vinnandi vegur að stofna ljósvakamiðil án aðkomu ríkissjóðs. Í dag er hægt að reka stafrænan miðil í bílskúr. Engin rök eru fyrir RÚV. Aftur standa mörg rök gegn ríkismiðli sem heftir frelsi borgaranna að velja sér fjölmiðil. 

Skylduaðild að RÚV er mannréttindabrot.

 

Fjármögnun BBC breytt

Bjarni óþarfur eða þingið?

Upphlaup á alþingi eru álíka merkileg og einelti á samfélagsmiðlum. Úlfaldi er gerður úr mýflugu til að koma höggi á einhvern saklausan fjarri vettvangi. 

Tilefnið til upphlaups á alþingi í gær er að Bjarni Ben fjármálaráðherra var ekki í þingsal þegar léttvægt frumvarp um frestun staðgreiðslu skatta og trygg­inga­gjalds fyrirtækja í veitingarekstri var á dagskrá.

Helga Vala þingmaður Sam­fylk­ing­ar­inn­ar sagði að hér væri ,,risa­stórt mál." Nei, þetta er smámál sem breið samstaða er um og algjör óþarfi að fjarmálaráðherra sé viðstaddur. Frumvarpið varð að lögum á einum degi. Þingmálin verða ekki öllu smærri.

Helga Vala er öðrum þingmönnum liðtækari að smána sjálfa sig, bæði innan þings og utan. Ekki kemur á óvart að hún leggist lágt.

Óvenjuleg er frammistaða nýs þingmanns Viðreisnar Sigmars Guðmundssonar. Hann sagði Bjarna sýna virðingarleysi með fjarveru. Auk Bjarna var annar þingmaður fjarverandi, Þorgerður Katrín formaður Viðreisnar. Sigmar er alinn upp á samfélagsmiðlum og kemur með ósið þaðan sem kallast tvöfalt siðferði. Ekki góð byrjun á þingferli.

Andrés utangátta Jónsson Pírati sakaði Bjarna um móðgun. En það er auðvitað ekki móðgun að fá kosningu á þing fyrir einn flokk en starfa fyrir annan. Sei, sei nei.

Alþingismenn sem standa að ómerkilegum upphlaupum vanvirða þjóðarsamkunduna. Punktur.     

„Er hæstvirtur fjármálaráðherra í rauninni óþarfur“

Bandalag RÚV og Fréttablaðsins: Samherjagrýlan skal lifa

RÚV keypti heilsíðuauglýsingu í Fréttablaðinu um helgina, auglýsti starf fréttastjóra og dagskrárstjóra. Í sama tölublaði birtist tvöfalt drottningarviðtal við Helga Selja og Stefán útvarpsstjóra. Um miðja síðustu viku gerði Fréttablaðið RÚV þann greiða að birta frétt er héldi Samherjagrýlunni á lofti.

RÚV berst fyrir lífi sínu og þarf á stuðningi annarra fjölmiðla að halda. Lögreglurannsókn á aðild RÚV að eitrun Páls skipstjóra og stuldi á síma hans er á síðustu metrunum.

Drottningarviðtal Fréttablaðsins við Helga Seljan og Stefán útvarpsstjóra gæti verið skrifað af almannatengli RÚV. Stefán er nýbúinn að fórna Rakel fréttastjóra en hún er ekki einu sinni nefnd á nafn. Rakel er ekki í handritinu,  aðeins einn er í aðalhlutverki. Hér talar útvarpsstjóri:

„Hvað Helga Seljan varðar sérstaklega þá er það sigur fyrir íslenska þjóð og blaðamennsku að þessi öflugi blaðamaður haldi áfram sínum störfum.“

Það er ekkert annað. Þjóðin mun farast og landið verður óbyggilegt ef Helgi Seljan hættir blaðamennsku. Ef svo er hvers vegna heldur Helgi ekki starfinu á RÚV? Hvers vegna er Jesú Kristur blaðamennskunnar sendur í útlegð á Stundina? Ræður Stebbi útvarpsstjóri ekki húsum á Efstaleiti? Af hverju gerir hann ekki Jesú-Helga að fréttastjóra? Ekki skortir meðmælin. 

Jú, það er þetta lítilræði með lögreglurannsóknina. Blaðamaður Fréttablaðsins lætur sér ekki detta í hug að spyrja um almælt tíðindi. Samsærið gengur út á að láta eins og allt sé með felldu þótt Efstaleiti standi í ljósum logum. Omertá heitir það á Sikiley þegar innvígðir félagar stunda afbrotaþöggun. RÚV er þegar með Stundina og Kjarnann í vasanum. Núna er komið bandalag við Fréttablaðið. Auglýsingasamningurinn við Efstaleiti hlýtur að vera feitur þegar fórnað er bæði fagmennsku og trúverðugleika. Einnig eru tvær stjórnendastöður lausar á Efstaleiti. Fé og stöðuveitingar kaupa málafylgju. 

RÚV skipulagði í sumar hvernig ætti að bjarga Glæpaleiti frá snörunni. Úr ósvífnum blaðamanni með siðadóm á bakinu átti að búa til helgisögu um píslarvætti. Á haustdögum var Helgi sendur í viðtal hjá Gísla Marteini að játa sig geðveikan vegna ,,árása" Samherja.

Svokallaðar ,,árásir" fólust í því að Samherji lét gera myndbönd til birtingar á You Tube sem sýndu aðra hlið á Namibíumálinu en RÚV hélt á lofti. Helgi hreinlega bilaðist þegar hann sá myndband um Namibíumálið sem hann ritstýrði ekki sjálfur. Svo mikið er víst að ekki var eitrað fyrir Helga og engu stolið frá honum. Samt á Helgi voða bágt, segir handritið.

Tilfallandi höfundur afhjúpaði leikritið. Þá gekk allt af göflunum. Virkir á Glæpaleiti tóku til starfa og heimtuðu tilfallandi höfuð á fati, bæði atvinnu- og ærulaust.

Fréttablaðið má reyna að blása lífi í Samherjagrýluna og fórna orðsporinu. Þeir sem kunna að lesa vita um falska ákæru fréttaengils sem sá sýnir að maður úti á rúmsjó gerði sér fyrirsát í 101 Reykjavík. Sannhelgur maður gengur ekki um ljúgandi stórsökum á meðborgara sína.

Glæpaleiti verður ekki forðað frá snörunni. Sorrí, Stebbi, en fréttastofa sem stundar glæpi, eitrun og gagnastuld, er ekki fréttamiðill heldur mafía. 

Konur deila um jafnrétti, farsótt og skóla

Katrín forsætis og Þorgerður Laufey formaður grunnskólakennara deila um hvort skólar eigi að vera opnir eða lokaðir í farsótt.

Skólar eiga að vera opnir, segir Katrín, enda vitað mál að konur eru oftar heima en karlar til að hafa auga með börnunum ef skólar loka.

Nei, aldeilis ekki, segir Þorgerður Laufey, við búum í jafnréttissamfélagi og karlar eru jafnmikið og konur heima og gæta bús og barna.

Ósagt í deilu þeirra stallsystra er að 90 prósent grunnskólakennara eru konur. Ef skólum yrði lokað væru allir kvenkennararnir heima.

Konur kjósa sér styttri vinnutíma en karlar. Konurnar í stétt grunnskólakennara eru nýbúnar að fella kjarasamning - einmitt af því að samningurinn stytti ekki nóg vinnutímann.

Það er látið að því liggja að kaupið sé ástæðan. En það er yfirvarp. Vinnutíminn er of langur að mati kvenna.

Það er líka yfirvarp að farsóttin sé ástæða deilna Katrínar og Þorgerðar Laufeyjar. Það er vinnutíminn.

Stundum, þegar karlar deila, liggur ástæðan ekki í augum uppi. Þegar konur deila gerir hún það sjaldnast.

„Skólar loka ef ekki er hægt að halda úti mannskap“

Fall Helga, neyðarkall Gunnars Smára

Gunnar Smári sósíalistaforingi ber sig aumlega eftir brotthvarf Helga Seljan frá RÚV. Sósíalistinn krefst neyðarfundar útvarpsráðs. Skiljanlega. Enginn starfsmaður RÚV hefur verið jafn þénanlegur málstað sósíalista og einmitt Helgi Seljan.

Í áratug, frá Seðlabankamálinu 2012, klappar Helgi þann stein að eitt öflugasta fyrirtæki landsins, Samherji, sé grimmt auðvald er fótum troði mannréttindi, landslög og stundi kapítalískt arðrán bæði hér heima og erlendis, einkum í Namibíu.

Fréttaflutningur Helga Seljan og RÚV í áratug fellur eins og flís við rass að boðskap sósíalista að einkaframtakið gerir ekki annað en að stela og ræna fátæka alþýðu.

Fleiri vinstriflokkar nutu góðs af afrekum Helga og RÚV. Píratar keyrðu á spillingarvinkilinn með auglýsingu á samfélagsmiðlum í allt sumar og fram að kosningum. Myndefnið var skip Samherja. Ung kona, frambjóðandi Pírata sem kallar sig ,,gellu", var í forgrunni og sagði Íslendinga eiga heimsmet í spillingu. Pírata-gellur klæddar í hvítt skyldu redda málinu.

Samfylkingin undirbjó í vor stórpólitíska sókn. Hugmyndafræðingurinn á ríkisframfæri, Hallgrímur Helgason, sló tóninn:  „Enga kurteisi, full force gegn þeim, nú duga engin vettlingatök, fokking samherjastjórn!“. Til stóð að uppræta þá sem höfðu minnstu samúð með útgerðinni í Samfylkingunni.

En svo dró úr áhuga Samfylkingar að stökkva á fordæmingarvagn RÚV. Þingkona Samfylkingar hringdi í Pál skipstjóra Steingrímsson, hún er gift frænda hans, til að afla frétta um aðför RÚV að lífi og eignum skipstjórans. Eftir símtalið sljákkaði ákafi samfylkingarfólks að gera Samherjamálið að kosningamáli. Málið gæti sprungið í andlitið á þeim. Sósíalistar og Píratar eru ekki með slíkar skrúplur enda höfða flokkarnir til jaðarhópa. Samfylkingin vill a.m.k. þykjast stofuhæf á betri heimilum.

Helgi og RÚV þjóna pólitísku hlutverki. Það tryggir þeim stuðning á alþingi, og þar með ríkissjóði, annars vegar og hins vegar á samfélagsmiðlum. Í tíð Helga og Þóru Arnórs ritstjóra Kveiks kom RÚV sér upp hliðarmiðlum, Kjarnanum og Stundinni.

Ásamt aðförinni að Samherja, felldi RÚV ríkisstjórn á grunni skjala sem ekki reyndust til, og efndi til upphlaups gegn hæstarétti. Sköpunarverk RÚV er gjarnan kórónað með útifundum á Austurvelli sem boðað er til í fréttatímum þjóðarmiðilsins. Helgi hóf störf á RÚV tveim árum fyrir hrun. Hann komst í gírinn í óreiðu eftirhrunsáranna, þegar ekki var spurt um heimildir fyrir fréttum heldur hávaða sem hægt var að búa til með raðfréttum. Fölsuðum skjölum var veifað framan í sjónvarpsáhorfendur. Almenningur trúði, þetta var jú á RÚV.

Kjarninn birtir útskýringu Helga á vistaskiptum frá RÚV yfir i dótturfélagið, Stundina. Í fyrirsögninni er haft eftir Helga: RÚV á ekki að þurfa að stilla upp í vörn.

Ha?

Ef RÚV á ekki að vera vörn þá hlýtur sókn að vera á dagskrá. En sókn fyrir hverju? RÚV er þjóðarfjölmiðill og á enga keppinauta á markaði eftir að Stöð 2 var og hét. Hvert á sóknin að stefna? Ríkisútvarpið á að vera, útskýrir Helgi,

ögrandi og erfitt. Hlust­endum og áhorf­endum er eng­inn greiði gerður með því að sitja undir kurt­eis­is­hjali við skoð­anir þess og heims­mynd öllum stund­um. Þannig hefur það ekki verið og má ekki verða.

Ef það er ekki ,,heimsmynd" þjóðarinnar sem á að fjalla um í ríkisfjölmiðlinum þá hverra?

Helgi Seljan hefur fyrir löngu svarað spurningunni með verkum sínum. RÚV á að fjalla um heimsmynd sósíalista, Pírata og annarra róttækra vinstrimanna sem vilja reglulega sinn fréttaskammt af ónýta Íslandi þar sem allt er í kalda koli og alþýðan bíður eftir byltingunni.

Á RÚV hafði Helgi og dagskráin hans aðgang að eyrum og augum landsmanna. Ekkert sem hann gerir á Stundinni sem ,,rannsóknablaðamaður" nær vitund almennings, í besta falli aðeins örfárra vinstrimanna. Helgi stundaði ekki blaðamennsku á RÚV til að upplýsa og greina frá; hann var talandi málgagn, boðberi heimsmyndar sem hann sennilega sjálfur skildi lítið í en gerði hann bæði frægan og verðlaunaðan. Strákpjakkur að austan biður ekki um meira.

Ísland er huggulegt land þar sem gott er að búa. Það mátti helst ekki segja það á RÚV á meðan Helgi Seljan fór þar með eitthvert dagskrárvald. Skáldaðar fréttir um arðrán, spillingu og mannfyrirlitningu voru efst á dagskrá.

Engin furða að sósíalistar og róttækir vinstrimenn séu með böggum hildar yfir falli Helga Seljan. Málgagnið hættir á þjóðarmiðlinum. Stundin mun ekki með árangri boða til fjöldafunda á Austurvelli. Helvítis fokking fokk.

Þjóðþekktur á bakvið tjöldin

Helgi Seljan axlar sín skinn á Glæpaleiti kortéri áður en lögreglurannsókn lýkur á aðkomu RÚV að eitrun Páls skipstjóra og símastuldi. Gögnin úr síma skipstjórans rötuðu í hliðarútgáfur RÚV, Stundina og Kjarnann. Ónefndir á RÚV höfðu hönd í bagga.

Rannsóknin á eitrun og stuldi er þekkt þótt niðurstaða dragist. Önnur lögrannsókn er ekki á margra vitorði. Þeirri rannsókn lauk í sumar með lögreglubréfi.

Efnisatriðin eru þau að áberandi maður í þjóðfélaginu sannfærði sjálfan sig að hann væri hundeltur af útsendara útgerðarfélags. Jú, sumir eru með fjörugt ímyndunarafl. Maðurinn fór til lögreglu og kærði útsendarann sem hann nafngreindi. Ekki nóg með það heldur tilgreindi maðurinn dagsetningar sem útsendarinn sat fyrir honum og töfraði einnig fram vitni að eineltinu. Á lagamáli heitir það meinsæri.

Lögreglan tók málið alvarlega, enda kærandi þjóðþekktur, sem fyrr segir. Rannsókn leiddi aftur í ljós að nafngreindi útsendarinn var til sjós, og það lögskráður, þá daga sem þjóðþekkti maðurinn sagði útsendarann einelta sig.

Eins og nærri má geta var lögreglan allt annað en kát þegar á daginn kom að hún var höfð að fífli með falskri kæru og skrifaði harðort bréf. Þeim þjóðþekkta varð svo um að hann tékkaði inn á geðdeild í kjölfarið. Tvö eintök eru til af bréfi lögreglunnar. Annað geymir sá þjóðþekkti, og fer með sem mannsmorð, en hitt er í fórum útsendarans sem var kærður.

Rannsóknarblaðamaður gæti upplýst málið með dagsetningum, nöfnum og fínerí. Jafnvel að einhver slíkur stundaði eintal sálarinnar og gerði loksins, loksins hreint fyrir sínum dyrum. Á Glæpaleiti er forsenda fyrirgefningar játning, iðrun og afsökun. Eru sumir haldnir slíku oflæti að játa ekki fólskuverkin, þótt sönnuð séu - gagngert til að halda þeim áfram á hjáleigunni eftir að vera úthýst af höfuðbólinu? 

 

 

 

Helgi Seljan til liðs við Stundina

Pírati platar Fréttablaðið

Enginn frá Samherja var ákærður í Namibíumálinu, þótt RÚV hafi ekki enn sagt frá því. Píratinn Atli Þór Fanndal, sem rekur skrifborðsfélagið Transparancy, tókst þó að plata Fréttablaðið til að skrifa frétt um að framsalskrafa sé ekki komin frá Namibíu.

Fyrst þarf að ákæra, síðan að krefjast framsals. Ástæða þess að ekki er ákært er að stjörnuvitni RÚV, Jóhannes uppljóstrari, er ekki trúverðugur. Í ofanálag neitar Jóhannes að fara til Namibíu að bera vitni. Þarlendir eiga ýmislegt sökótt við hann.

Í Fréttablaðinu er klausa um að íslenskir embættismenn séu spilltir:

Íslandsdeild Transparency þrýstir á namibísk yfirvöld að grípa til aðgerða varðandi íslenska embættismenn sem hafa verið bendlaðir við spillingarmálið.

Atli Þór kemur líka fram í namibískum fjölmiðli með sömu ásökun.

Ein gerð spillingar er að dreifa fölskum ásökunum. Í þá spillingu eru Píratar djúpt sokknir.

Hvað Fréttablaðið er að pæla með þessari vegferð er aftur ráðgáta.

 

 

 

Engin stunga, engin mannréttindi?

Bólusetningar, almennt talað, eru í þágu lýðheilsu. Á hinn bóginn hljóta þær að vera valfrjálsar. Ekkert lýðræðislegt ríkisvald má skylda borgara að taka tiltekið lyf, og bóluefni er lyf, þótt það sé í þágu lýðheilsu.

Þar stendur hnífurinn í kúnni. Lýðheilsa andspænis einstaklingsfrelsi. Á mótsögninni er engin lausn, a.m.k. engin góð. Við verðum að lifa með mótsögninni og það í sæmilegri sátt.

Tilfallandi höfundur er tvíbólusettur og örvaður. Hann mælir með bólusetningu fullorðinna. En það má ekki ganga á mannréttindi þeirra sem vilja ekki bóluefnið í sinn skrokk - af hvaða ástæðum sem það annars er. 

Einstaklingsfrelsið kemur stundum út sem sérviska fárra andspænis fjöldanum. En það eru einmitt sérvitringarnir sem minna okkur á gildi mannréttinda.