Sjálfstæðisstefna Miðflokksins

Útreið Brynjars og Sigríðar í prófkjöri Sjálfstæðisflokksins í höfuðborginni gefur Miðflokknum byr undir báða vængi. Tvímenningarnir voru á hægri væng höfuðborgarútgáfu móðurflokksins.

Þau öfl innan xd í Reykjavík sem kenna má við 101-Brussel bættu stöðu sína. Líklega sést glottið á Gísla Marteini í Kvosinni upp í Breiðholt.

Þriðji orkupakki ESB fær bæði fyrsta og áttunda sætið í prófkjörinu, með Gulla og Friðjóni.

Sigríður segist vera tilbúin ,,að leggja sjálf­stæðis­stefn­unni lið hvar og hvenær sem væri."

Einmitt. Sjálfstæðisstefnan gefur eftir í móðurflokknum en lifir góðu lífi í Miðflokknum.

Ekki á leið í annan flokk

Hvað borgaði RÚV Jóhannesi uppljóstrara?

Jó­hann­es Stef­áns­son upp­ljóstr­ar­inn í Sam­herja­mál­inu hringdi í fyrrum eiginkonu sína árið 2017 og krafðist sex milljóna króna, annars skyldi hann drepa hana. Upptaka er til af símtalinu.

Samstarfsmaður Jóhannesar,Yema-Y’Okungo, útskýrir í vitnisburði hvers vegna uppljóstrarinn var fjárþurfi: 

Yema-Y’Okungo segir jafnframt í yfirlýsingunni að Jóhannes hafi komist upp á kant við vafasama menn sem í skipulagðri glæpastarfsemi í Höfðaborg eftir að hafa safnað skuldum hjá hórmöngurum. Stafaði skuldin af því að Jóhannes var sagður hafa ítrekað nýtt sér þjónustu vændiskvenna milliliðalaust. Kveðst Yema-Y’Okungo hafa þurft að semja um skuldina við handrukkara sem sendir voru til að „innheimta“ hana.

Lífstíll Jóhannesar var þannig að hann þurfti peninga með öllum tiltækum ráðum. Áður hefur komið fram að vettvangur Jóhannesar var á mörkum viðskipta og suður-afrísku mafíunnar. 

Þetta er aðdragandi þess að Jóhannes gekk í þjónustu RÚV við að koma höggi á Samherja. RÚV hafði farið halloka gegn útgerðinni eftir misheppnaða atlögu í samstarfi við Seðlabanka Íslands. Jóhannes var verkfærið til að komast í vinningsstöðu gagnvart norðlensku útgerðinni.

Ekki er vitað hvað RÚV greiddi Jóhannesi fyrir þjónustuna. Sex milljónir er auðvelt að fela hjá stofnun sem veltir milljörðum.

Í frægu Kastljósviðtali 11. desember 2019 gaf Jóhannes til kynna ferlið að baki þeirri sannfæringu að Samherji væri vondi kallinn en hann sjálfur svo frómur að hann mátti ekki vamm sitt vita. Tilfallandi athugasemdir að kveldi 11. des. fyrir þrem árum voru þessar:

Á fjórtándu mínútu Kastljóssviðtalsins í kvöld segir Jóhannes þetta: ,,Fyrsta skrefið hjá mér var að upplýsa glæpi Samherja gagnvart kvótahöfum sem voru í samvinnu við þá. Svo þróaðist þetta lengra þegar ég fór að gera mér grein fyrir hvað var í gangi og hvað maður var hluti af." 

Spyrill Kastljóss var vitanlega of upptekinn af ,,umræðunni" um spillingu Samherja til að kveikja á orðum Jóhannesar og hvað þau þýða.

Jóhannes byrjar sem sagt því að vinna með namibískum kvótahöfum sem eru viðskiptafélagar Samherja. Hér er á ferðinni viðskiptadeila. Ef Jóhannes var enn í starfi hjá Samherja þegar hann tók að vinna fyrir namibísku kvótahafa er augljóst að hann hafi leikið tveim skjöldum.

Jóhannes segir að það var ekki fyrr en eftir að hann fór að vinna með ósáttum viðskiptafélögum Samherja að hann hafi gert sér ,,grein fyrir hvað var í gangi og hvað maður var hluti af". Hér getur Jóhannes ekki verið að vísa í neitt annað en meginþema umræðunnar, þ.e. meintar mútugreiðslur Samherja til namibískra embættis- og stjórnmálamanna.

Það rennur upp fyrir Jóhannesi, eftir atburðina, að hann hafi verið þátttakandi í spillingu. Nærtækt að álykta að meintar mútugjafir hafi haft fremur sakleysislegt yfirbragð fyrst þær fór framhjá honum í fyrstu. En það er allt önnur mynd en dregin var upp í Kveiks-þættinum. Þar skipti rauð íþróttataska sneisafull af peningum um hendur mútugjafa og þiggjanda. Sá sem ekki er meðvitaður um að hér sé á ferðinni eitthvað misjafnt, tja, hlýtur að vera meðvitundarlaus.

Peningar eru mikils virði, ekki síst fyrir mann í fjárþröng sem hundeltur er af afrískum glæpamönnum. Digrir sjóðir RÚV geta fengið hálf-meðvitundarlausa menn til að muna það sem ekki var.

Samfylkingin: kókaín og vændi er ok - Samherji ekki ok

Í dómsskjölum í Namibíu segja þrjú vitni, já þrjú, að Jóhannes uppljóstrari sé djúpt sokkinn í kókaín og kaupi vændiskonur í bílförmum. Meðal þeirra sem bera þessa háttsemi upp á Jóhannes er samstarfsmaður hans, Yema-Y’Okungo, að því er kemur fram í málsgögnum.

Jóhannes uppljóstrari er eina heimildin fyrir meintum brotum Samherja í Namibíu.

Með ályktun flokksstjórnar Samfylkingar er lögð blessun yfir kókaínneyslu og vændi en atvinnustarfsemi útgerðar sögð glæpsamleg.

Hvers á Ágúst Ólafur Ágústsson að gjalda?

Ríkisstjórnin grípi til aðgerða vegna Samherja

Samfylking og Píratar í taugaáfalli, RÚV þegir i skömm

Jóhannes uppljóstrari í Samherjamáli RÚV, Samfylkingar og Pírata fær útreið í dómsskjölum í Namibíu. Stjórnlaus kókaínneysla, vændiskaup og ofbeldi, segir í endursögn DV.

Fyrir viku sagði áhrifamaður í Samfylkingu: „Frá og með þessari helgi snúast komandi kosningar um Samherja. Ertu með Samherja eða ertu á móti.“ Siða-Sunna hjá Pírötum tók Jóhannes í drottningarviðtal.

Jóhannes var aldrei trúverðug heimild. Það sást langar leiðir þegar í upphafi.

RÚV þegir í skömm á meðan Samfylking og Píratar eru í taugaáfalli. Kosningabarátta Samfylkingar og Pírata er farin í vaskinn og tiltrú RÚV þegar komin í skolpið.

Ný stjórnarskrá og ESB-aðild áherslumál

Trump viðrar sannleikann, Facebook ritskoðar hann

Fjölmiðlar segja okkur stöðu vísindalegrar þekkingar á hverjum tíma. Eða svo á að heita. Við höfum ekki tíma til að lesa okkur til um vísindaleg álitamál og enn síður að leggjast í rannsóknir; það krefst áralangrar menntunar og þjálfunar.

Trump þáverandi Bandaríkjaforseti kenndi faraldurinn, sem lagði undir sig heimsbyggðina fyrri hluta árs 2020, við Kínaveiruna og vildi rannsókn á uppruna hennar. En, nei, fjölmiðlar þóttust vita betur og fundu ,,vísindalegar sannanir."

Fjölmiðlar sögðu veiruna hafa orðið til á kjötmarkaði í Wuhan í Kína. En nú er komið á daginn að veiran er að öllum líkindum manngerð, búin til á rannsóknastofu í Wuhan. Kínversk stjórnvöld í samvinnu við bandaríska vísindahagsmuni ákváðu að betra væri að búa til þau ,,vísindi" að uppruni veirunnar væri á kjötmarkaði fremur en á rannsóknastofu. Fjölmiðlar hlaðnir fordómum gegn þáverandi forseta Bandaríkjanna bitu glaðir á agnið og gleyptu ,,vísindin" hrá. Tucker Carlson rekur þessa hörmungarsögu á tíu mínútum.

Fjölmiðlar gengu lengra en að flytja gagnrýnislaust lygar kínverskra stjórnvalda og bandarískra hagsmunaaðila, sem vel að merkja komu úr vísindasamfélaginu. Fjölmiðlar úthúðuðu þeim sem keyptu ekki viðtekin sannindi og sökuðu þá um samsæriskenningar og rasisma. Samfélagsmiðlar eins og Facebook og Twitter úthýstu Trump og ritskoðuðu færslur sem efuðust um viðtekin sannindi.

Douglas Murry segir vestrænu elítuna, fjölmiðla og aðrar valdastofnanir, eiga eftir að iðrast þess að ganga erinda ósanninda og lyga.

Að mörgu leyti er Trump stórgallaður maður. Það segir nokkuð um ástand heimsins að Trump er handhafi sannleikans í Kínaveirumálinu. Og er ofsóttur fyrir vikið.

Trump í tveggja ára Facebook-bann

Arnar Þór og ógnin við frjálsa orðræðu

Arnar Þór Jónsson býður sig fram í prófkjöri Sjálfstæðisflokksins í SV-kjördæmi, Kraganum. Arnar Þór hefur að liðnum árum talað fyrir mikilvægum samfélagsmálum, ekki síst fullveldinu. Þá er hann óhræddur að hugsa sjálfstætt, samanber texta hér að neðan sem tekinn er úr grein Arnars Þórs.

Við þurfum menn eins og Arnar Þór á alþingi.

Lausleg athugun leiðir í ljós að allir þingflokkar á Alþingi Íslendinga vilja kenna sig við frjálslyndi. Þrátt fyrir allt framangreint verður ekki betur séð en að til hliðar við allt frjálslyndistalið þrífist annars konar pólitísk hugsun (jafnvel innan vébanda sumra stjórnmálaflokanna), sem er í öllum meginatriðum ófrjálslynd. Vaxandi áhrif slíkrar stjórnlyndrar hugsunar eru verulegt áhyggjuefni því með ráðríki, drottnunargirni og valdboðum er grafið undan stjórnarháttum sem byggjast á rökræðu og samkomulagi. Reglulega gefast tilefni til að spyrja hvernig frjálslyndið er virt í framkvæmd; hvort greina megi pressu frá fámennum hópi sjálfskipaðra siðgæðisvarða og/eða menningarvita sem vilja stjórna því hvernig aðrir tala, skrifa og jafnvel hugsa. Búum við í reynd við fámennisstjórn í þessum efnum, þar sem áherslan er ekki lengur á mikilvægi þess að hver og einn fái að velja eigin sannfæringu, heldur velji aðeins þá sannfæringu sem henni/honum ber að hafa? Er þá stefnt að fjölbreytileika í öllu nema skoðunum? Valdboðsstjórn þeirra sem telja sig hafa höndlað sannleikann er í stuttu máli ógn við frjálslynt lýðræði.

Félag háskólakarla

Félag háskólakvenna var stofnað 1928 þegar örfáar konur stunduðu háskólanám. Í dag er staðan þannig að 70 prósent háskólanema eru konur en aðeins 30 prósent karlar.

Æðsta prófgráða í háskóla er doktorspróf. Konur taka 75% doktorsprófa en karlar 25%, síðast þegar að var gáð.

Fyrir bráðum tíu árum spáði kona því að háskólar á Íslandi yrðu kvennaskólar.

En engum dettur í hug að stofna Félag háskólakarla.

Merkilegt.

Ný stjórn Félags háskólakvenna

Vísindamaður útskýrir loftslagsumræðuna

Judith Curry er loftslagsvísindamaður. Sem sagt ekki aðgerðasinni, ekki embættismaður alþjóðlegrar stofnunar, ekki launaður talsmaður hagsmunaaðila og ekki stjórnmálamaður. Heldur vísindamaður.

Í 15 mínútna fyrirlestri útskýrir Curry loftslagsumræðuna á mannamáli (þ.e. ensku mannamáli). Það er nóg að hlusta á fyrstu 4 mínútur fyrirlestursins en næstu 11 eru líka áheyrnarinnar virði.

Áður en þið farið með bænirnar í kvöld ættuð þið að gefa ykkur 4 til 15 mínútur að skilja loftslagsumræðuna.

Hér er hlekkur á fyrirlesturinn. 

Sigmundur Davíð skorar bótaflokkana á hólm

Danir tók fyrir það í dag að útlendingar sæki landið heim til að fá alþjóðlega vernd og framfærslu frá danska ríkinu. Útlendingar stunda það að kaupa far hjá glæpagengjum til Íslands og sækja um alþjóðlega vernd. Hér á landi eru bótaflokkar, bæði innan þings og utan, sem berjast fyrir fríu fæði og húsnæði til útlendinga á kostnað íslenskra skattgreiðenda.

Sigmundur Davíð, formaður Miðflokksins, er góðu heilli á annarri skoðun. Í dag spurði hann dómsmálaráðherra hvort ekki stæði til að fara dönsku leiðina - leið danskra jafnaðarmanna - og stemma stigu við misnotkun á kerfinu.

Áslaug Arna dómsmálaráðherra talaði fyrir hönd bótaflokkanna á alþingi. Sem minnir okkur á að Miðflokkurinn þarf að koma sterkur út úr þingkosningunum í september.

Hraunað yfir Umhverfisstofnun

Bráðum eru 3 mánuðir frá upphafi jarðeldanna við Grindavík. Ógrynni gróðurhúsalofttegunda dælist út í andrúmsloftið á hverri mínútu. Umhverfisstofnun, sem heldur bókhald um losun Íslands á gróðurhúsalofttegundum, ýmist lýgur með þögninni eða blekkir, þegar kemur að áhrifum eldgossins.

Algengasta gróðurhúsalofttegundin er vatnsgufa, H2O. Í alfræðiritum segir að útblástur í dæmigerðu eldgosi sé 85% vatnsgufa. Til samanburðar er koltvísýringur, CO2, aðeins 10% af útstreymi lofttegunda í eldgosi.

Öllum, sem á annað borð gefa því gaum, má vera ljóst að litla eldgosið í Fagradal eykur losun Íslands á gróðurhúsalofttegundum meira en nokkur mannleg starfsemi hér á landi. Eldgos er náttúrulegt fyrirbrigði og hefur áhrif á loftslag. Það er þekkt staðreynd.

Aftur er það ekki þekkt staðreynd, heldur vúdú-vísindi, að mannleg iðja breyti loftslagi jarðarinnar. Þar stendur hnífurinn í kúnni. Ef Umhverfisstofnun safnaði upplýsingum um losun íslenskrar náttúru á gróðurhúsalofttegundum og bæri saman við losun Íslendinga stæðu vúdú-vísindin afhjúpuð. Það skiptir nákvæmlega engu máli fyrir framlag Íslands til gróðurhúsalofttegunda þótt þjóðin færi öll í moldarkofa á ný og slökkti á öllum vélbúnaði.

Íslensk náttúra sér um framlag Íslands til loftslags á jörðinni. Eins og hún gerði löngu áður en landið byggðist.

Hraunið í Geldingadal urðar meira en mosa og móabörð.

 

 

Hraunið úr eldgosinu breiðir úr sér jafnt og þétt