Hvenær keypti Þóra Samsung síma?

Páli skipstjóra Steingrímssyni var byrlað 3. maí 2021. Daginn eftir var flogið með hann frá Akureyri á gjörgæslu í Reykjavík. Samsung síma skipstjórans var stolið á meðan hann var meðvitundarlaus á Landspítalanum. Steinsnar frá spítalanum í Fossvogi eru höfuðstöðvar RÚV á Efstaleiti.

Staðsetningarbúnaður í síma skipstjórans sýnir að í þjófahöndum fór símtækið í ferðlag yfir á RÚV þar sem síminn var afritaður. Eftir afritun var símtækinu skilað á sjúkrabeð Páls skipstjóra.

Afritun á Samsung símum er gerð með forriti. Símarnir eru lagðir saman og forritið flytur öll gögn úr gamla símanum yfir þann nýja. Aðgerðin tekur nokkrar mínútur.

Afritaður sími skipstjórans fékk símanúmerið 680 2140. Númerið er sérvalið. Aðeins skeikar einum tölustaf á síma Páls sem hefur númerið 680 214X. 

Símanúmerið 680 2140 er skráð á Kveik/RÚV, samkvæmt upplýsingum frá Stefáni Eiríkssyni útvarpsstjóra. Þóra Arnórsdóttir er ritstjóri Kveiks á þessum tíma. Undirmenn hennar eru vorið 2021 m.a. Helgi Seljan og Aðalsteinn Kjartansson. Föstudaginn 30. apríl 2021, þremur dögum áður en skipstjóranum var byrlað, var Aðalsteinn fluttur af ritstjórn Kveiks yfir á Stundina. Afar sjaldgæft, jafnvel einsdæmi, er að fréttamaður á RÚV skipti um starf í hádeginu.

Aðalsteini og vinnuveitendum hans á RÚV og Stundinni var umhugað að tilkynna alþjóð að fréttmaðurinn skipti um vinnustað þennan tiltekna dag, 30. apríl. Vistaskiptin tilkynnti Aðalsteinn sjálfur á Facebook og fékk fjölmiðlaumfjöllun eins og til var stofnað. Hann kvaðst ekki hættur í ,,rannsóknablaðamennsku".

Aðalsteini var ætlað að taka við gögnum sem enn voru ekki komin í hendur samstarfsmiðlanna RSK (RÚV, Stundarinnar og Kjarnans). Skipulagið var á Efstaleiti en RÚV ætlaði ekki að birta neinar fréttir - Stundin og Kjarninn sáu um þá hlið málsins. Það gekk eftir. Stundin og Kjarninn birtu efni úr síma skipstjórans samtímis að morgni 21. maí 2021.

Flutningur Aðalsteins af RÚV yfir á Stundina þrem dögum fyrir byrlun Páls skipstjóra eru kringumstæðurök fyrir aðild RSK-miðla að undirbúningi og skipulagi glæpsins.  

Til að afrita síma skipstjórans þurftu blaðamenn að vita hvernig símtæki hann notaði. Ef blaðamenn vissu það ekki gátu þeir ekki fyrirfram keypt rétt símtæki. 

Hafi Þóra keypt Samsung síma eftir byrlun Páls er mögulegt að RSK-miðlum hafi verið ókunnugt um fyrirhugaðan glæp. Sími Páls hafi svo að segja komið fyrirvaralaust upp á Efstaleiti og þaðan hafi efninu verið miðlað til Stundarinnar og Kjarnans. Í því tilfelli stundaði ríkisfjölmiðillinn heildsölumiðlun á fréttum. Ekki beinlínis faglegt en heldur ekki glæpsamlegt. Þórður Snær og Arnar Þór á Kjarnanum og Aðalsteinn fengu þá blaðamannaverðlaun fyrir að birta fréttatilkynningu frá RÚV. 

En hafi Þóra keypt Samsung síma áður en Páli var byrlað og leyst út símanúmerið 680 2140 væri óhætt að álykta um aðild RSK-miðla að tilræðinu gegn Páli skipstjóra Steingrímssyni.

Vitanlega myndi tilfallandi bloggari ekki draga neina slíka ályktun. Hann er með dóm á bakinu frá héraðsdómi Reykjavíkur að það sé brot á friðhelgi blaðamanna og æru að draga rökréttar ályktanir. 

Moggabloggið sigrar RÚV, Egill tapar sér

Fréttamenn RÚV eru sakborningar í byrlunar- og símastuldsmálinu. Fréttastjóri var knúinn til afsagnar og sá sem tók við er kominn í leyfi frá störfum. Á páskadagskrá RÚV er 60 ára byrlunarmál en ríkisfjölmiðillinn þegir um byrlun og gagnastuld í rauntíma þar sem fréttamenn RÚV eiga hlut að máli.

Moggabloggið er opinn og frjáls vettvangur fyrir hvern sem er að tjá skoðanir og segja fréttir sem fjölmiðlar sameinast að þegja um.

Í þessu ljósi ber að lesa breiðsíðu Egils Helgasonar gegn Moggablogginu. 

Dagskrárvald RÚV og fylgimiðla er á fallandi fæti. Stjórnmálamenn veigra sér að styðja opinberlega ríkisfjölmiðil sakborninga. Rætt er um að taka Efstaleiti af auglýsingamarkaði.

Egill er læs á tímanna tákn. En honum er um megn að draga rökrétta ályktun. Flóttaleiðin er að fordæma boðbera válegra tíðinda, skjóta sendiboðann.

 

 

 

Veika konan, ÞAK, héraðssaksóknari og siðareglur BÍ

Símanúmerið 680 2140 er skráð á Kveik/RÚV sem Þóra Arnórsdóttir stýrði til skamms tíma. Stefán Eiríksson útvarpsstjóri hefur staðfest það. Símanúmerið er á afrituðum sína Páls skipstjóra Steingrímssonar sem var byrlað 3. maí 2021, síma hans stolið, tækið afritað á RÚV og skilað tilbaka þar sem skipstjórinn lá meðvitundarlaus á gjörgæsludeild.

Afritaði síminn var notaður til samskipta á milli RSK-blaðamanna. Gögn voru send úr símanum til Aðalsteins Kjartanssonar á Stundinni og Þórðar Snæs og Arnars Þórs á Kjarnanum sem birtu skjáskot af efni símans í skipulagðri fréttaherferð sem hófst 21. maí 2021.

Afritaði síminn var einnig notaður til samskipta við andlegu veiku konuna sem stal síma skipstjórans og kom í hendur blaðamanna.

Afritaði síminn sýndi skammstöfunina ,,ÞAK" þegar send voru úr símanum smáskilaboð, SMS. Lögreglan telur að ÞAK standi fyrir Þóra Arnórsdóttir Kveikur.

Tilfallandi athugasemd fjallaði um töluverð samskipti milli ÞAK og veiku konunnar þann 24. ágúst 2021. Á þeim tímapunkti var lögreglan enn að safna gögnum, engar yfirheyrslur höfðu farið fram. Mögulega höfðu blaðamenn andvara á sér enda hafði komið fram í fjölmiðlum að Páll skipstjóri kærði málið 14. maí þá um vorið.

Komið hefur á daginn að 24. ágúst 2021 var Þóra í samskiptum við veiku konuna í gegnum einkasíma sinn, sama dag og ÞAK, þ.e. afritaði síminn, var samtals átta sinnum í samskiptum við veiku konuna. Samskiptin milli ÞAK og veiku konunnar voru smáskilaboð, SMS, á meðan Þóra talaði við hana úr einkasíma.

Lögreglan telur að blaðamenn, tveir eða fleiri, hafi skipst á að nota afritaða símann, sem merktur er ÞAK, í samskiptum við konuna. Hvort veika konan áttaði sig á að hún ætti í samskiptum við tvo aðila en ekki einn er óvíst. Hitt er vitað að jafnan eftir samskipti við RSK-blaðamenn tóku aðstandendur konunnar eftir að henni hrakaði. Ranghugmyndir og ímyndanir urðu verri. Aðstandendur hafa borið saman skráð samskipti á milli veiku konunnar og RSK-blaðamanna og komist að þeirri niðurstöðu að vont versnaði eftir að blaðamenn voru í sambandi.

Í samskiptunum 24. ágúst 2021 leitar konan ráða hjá RSK-blaðamönnum. Skilaboðin eru stutt. Lagt er á ráðin um að breyta aðgengi að tölvum og símum. Þá er einnig talað um að konan afhendi blaðamönnum síma sinn. Væntanlega til að torvelda rannsókn réttvísinnar, eyða gögnum. Samskiptin byrja klukkan níu að morgni og standa fram til um eitt eftir hádegi. Laust fyrir kl. eitt skrifar ÞAK merkilega setningu og sendir veiku konunni:

Ok. Ég athuga m héraðssaksóknara.

Héraðssaksóknari fer ekki með rannsóknina á byrlunar- og símastuldsmálinu heldur lögreglan á Norðurlandi eystra. Hvaða blaðamaður ætlaði að ,,athuga með héraðssaksóknara" og í hvaða tilgangi?

Þeir blaðamenn sem veika konan hleypti næst sér, samkvæmt upplýsingum sem liggja fyrir á þessu stigi málsins, eru Þóra og Helgi Seljan á RÚV og Aðalsteinn Kjartansson og Ingi Freyr Vilhjálmsson á Stundinni, nú á Heimildinni.

Þóra, Aðalsteinn og Ingi Freyr eru sakborningar. Óvíst er með Helga. Bróðir Inga Freys er Finnur Þór Vilhjálmsson, saksóknari hjá embætti héraðssaksóknara.

RSK-blaðamenn höfðu veiku konuna að leiksoppi. Þeir vissu að hún gekk ekki heil til skógar. Þriðja grein siðareglna Blaðamannafélags Íslands hljómaði svona:

Blaðamaður vandar upplýsingaöflun sína, úrvinnslu og framsetningu svo sem kostur er og sýnir fyllstu tillitssemi í vandasömum málum. Hann forðast allt, sem valdið getur saklausu fólki, eða fólki sem á um sárt að binda, óþarfa sársauka eða vanvirðu.

Þriðja greinin vísar beint í ástand veiku konunnar sem blaðamenn misnotuðu í byrlunar- og símastuldsmálinu.

Fyrir hálfum mánuði tilkynnti Blaðamannafélag Íslands nýjar siðareglur, samþykktar 23. mars 2023. Þriðja grein eldri siðareglna var felld niður. Nú þurfa blaðamenn ekki lengur að hafa áhyggjur að valda ,,saklausu fólki, eða fólki sem á um sárt að binda, óþarfa sársauka eða vanvirðu." 

Formaður nefndarinnar sem breytti siðareglum Blaðamannafélagsins er Aðalsteinn Kjartansson sakborningur í byrlunar- og símastuldsmálinu. 

Meiri ótti, færri börn: Z-kynslóðin

Barnsfæðingar hér á landi eru í frjálsu falli, er haft eftir sérfræðingi í málaflokknum. Kynslóðin sem ætti að bera uppi barnsfæðingar er á alþjóðvísu kennd við Z og fæddist á síðasta áratug 20stu aldar.

Bandaríski félagsfræðingurinn Jonathan Haidt segir Z-kynslóðina yfirhlaðna ótta við allt og alla og búi að skertri félagslegri færni og dómgreind. Allt þrennt má rekja til samfélagsmiðla, segir sá bandaríski.

Z-kynslóðin fékk óttann matreiddan af frjálslyndum vinstrimönnum, hippakynslóðinni. Al Gore, fyrrum varaforseti Bandaríkjanna, er einn höfuðsmiður ímyndarinnar um manngert veður, að koltvísýringur, CO2, valdi ragnarökum. Hver vill fæða barn sem mun stikna í manngerðu helvíti?

Tveir punktar á einni glæru staðfesta að öll hugmyndafræðin um manngert loftslag er uppspuni. Jarðfræðingurinn Ian Plimer sýndi glæruna á ráðstefnu í vetur. 

Fyrri punkturinn er þessi: Aldrei hefur verið sýnt fram á að koltvísýringur af mannavöldum, sem er aðeins 3 prósent af koltvísýringi í andrúmsloftinu, valdi hlýnun.

Seinni punkturinn: Ef það væri sýnt fram á að manngerður koltvísýringur ylli hlýnun yrði jafnframt að sýna fram á að 97 prósent koltvísýrings andrúmsloftsins, sem er náttúrulegur, valdi ekki hlýnun.

Koltvísýringur er náttúrleg lofttegund sem er undirstaða alls plöntulífs á jörðinni. Án koltvísýrings væri jörðin óbyggileg. En blessuðum börnunum er kennt að óttast náttúruleg fyrirbæri. Engin furða að þau sýni lítinn áhuga að fjölga sér þegar þau komast á æxlunaraldur.  

Fréttablaðið undanfari RSK-miðla

Auðmaðurinn Helgi Magnússon átti og rak Fréttablaðið og Hringbraut. Helgi er einn af stofnendum Viðreisnar, ef ekki stofnandi, og er áhugasamur um ESB-aðild Íslands. Fréttablaðið endurspeglaði pólitískar áherslur Helga og Viðreisnar í leiðaraskrifum og fréttastefnu.

Helgi er ekki spurður hvers vegna hann lokaði útgáfunni. Kannski sökum þess að ástæðan er augljós. Fréttablaðið tapaði of miklum peningum til að hægt væri að réttlæta útgerðina.

Almennt gildir um fjölmiðlun að margir eru kallaðir en fáir útvaldir. Fjölmiðlar eru alltaf álitlegur kostur fyrir áhugamenn um framgang pólitískra sjónarmiða. Fjölmiðlar í heild fara með stærstan hluta dagskrárvalds umræðunnar, fara nálægt því að stjórna hvaða málefni fá athygli og hvað er látið liggja í þagnargildi.  

Til að fjölmiðill nái árangir þarf meira til en pólitísk áhugamál eigenda. Fjölmiðill þarf einnig að þjónusta almenning í einhverjum skilningi. Stundum þarf ekki meira en að leiða saman auglýsendur og lesendur/áhorfendur. Fréttablaðið var frá fyrstu tíð fríblað, ókeypis fyrir almenning. Auglýsendur fjármögnuðu útgáfuna.

Þekktasti eigandi Fréttablaðsins, ef ekki sá alræmdasti, Jón Ásgeir Jóhannesson, kenndur við Baug, notaði blaðið í tvennum tilgangi. Hann keypti auglýsingar fyrir hönd Bónuss, Hagkaupa og þeirrar samsteypu annars vegar og hins vegar beitti hann útgáfunni til að stýra opinberri umræðu í eigin þágu.

Frægasta tilvikið um spuna í þágu Jóns Ásgeirs hófst  þann 1. mars 2003 þegar Fréttablaðið birti fjögurra dálka forsíðufrétt með fyrirsögninni Óttuðust afskipti forsætisráðherra. Fréttin gekk út á það að Davíð Oddsson hefði staðið á bakvið lögreglurannsókn á Baugi sem hófst árið áður. Í framhaldi kom á daginn að Baugur hafði boðið Davíð 300 milljónir króna í ,,sporlausum peningum" til að ganga í lið með auðvaldinu.

Leynt var farið með eignarhald Jóns Ásgeirs á Fréttablaðinu þegar atlagan gegn Davíð hófst. Á ritstjórnarhlið málsins véluðu tveir menn sem kunna að aka seglum eftir vindi. Gunnar Smári var ritstjóri og Reynir Traustason blaðamaðurinn sem skrifaði mútufréttina.

Frá og með 1. mars 2003 hélt innreið sína í blaðamennsku aðferðafræði við vinnslu frétta sem RSK-miðlar tóku upp á sína arma. Aðferðin er gera falsfréttir trúverðugar með endurtekningu. Á 20 árum þróuðust falsfréttir yfir í byrlun og gagnastuld. Siðbrot urðu lögbrot.

Enginn biður um endurreisn Fréttablaðsins. Nafnið er órjúfanlega tengt spillingu íslenskrar blaðamennsku.

 

  

Áhugi á að endurreisa Hringbraut

Transkarl getur ekki orðið faðir

Mannréttindadómstóll Evrópu úrskurðaði að transkarl geti ekki verið faðir að lögum. Transkarl er líffræðilega fædd kona sem kallar sig karl. Um er að ræða þýskan transkarl sem ól barn og vildi fá lögskráningu sem faðir en ekki móðir.

Die Welt greinir frá málinu og segir að transkarlinn hafi fullreynt úrræði í þýska réttarkerfinu til að fá sig skráðan sem föður. Málinu var áfrýjað til Mannréttindadómstólsins sem staðfesti niðurstöðu þýskra yfirvalda. Transkarl getur ekki verið faðir þar sem viðkomandi er líffræðilega kona og skal skráð sem móðir.

í transumræðunni vegast á tvenn ósamrýmanleg sjónarmið. Í fyrsta lagi einstaklingsréttur, að skilgreina sig á hvaða hátt sem maður kýs. Í öðru lagi líffræðilegar staðreyndir, að kynin séu aðeins tvö og meðfædd.

Málamiðlun á milli ólíku sjónarmiðanna virðist borin von. Þeir sem eru trans standa á því fastari en fótunum að þeir séu í raun og sann annað kyn en það sem náttúran gaf þeim við fæðingu. Á hinum endanum telst það almenn og viðurkennd þekking að líffræði, óháð löngun, sannfæringu eða vilja, ráði kyni.

Mannréttindadómstólinn segir að líffræðilegar staðreyndir ákvarði kyn. Af því leiðir eru transkarlar mæður svo fremi að viðkomandi sé foreldri.

Í Bretlandi er hafin endurskoðun á jafnréttislögum. Markmiðið er að verja líffræðilegt kyn. Konur eru í forystu fyrir kröfunni um að harðar staðreyndir fái forgang á kostnað hugmyndafræði um að kyn sé valfrjálst.

 

Þingmenn selja aðgang að Íslandi

Þingmaður Pírata viðurkennir að veita útlendum skjólstæðingum íslenskan ríkisborgararétt. Arn­dís Anna Krist­ín­ar­dótt­ir Gunn­ars­dótt­ir var sá þingmaður sem Jón Gunnarsson dómsmálaráðherra hafði í huga þegar hann talaði um mútuþæga þingmenn.

Arndís Anna og félagar hennar, sem hún segir einnig starfa með sama hætti, voru fljótir að leggja fram vantraust á dómsmálaráðherra og freistuðu þess að búa til fjölmiðlafár til að fella ráðherrann ef ekki ríkisstjórnina.

Arndís Anna og þeir þingmenn sem hygla skjólstæðingum sínum verða að gera grein fyrir hvernig skjólstæðingasambandinu er háttað og svara því hvers vegna þingmennirnir sögðu sig ekki frá afgreiðslu ríkisborgararéttar. 

Tvöfalt siðleysi Arndísar Önnu og félaga blasir við. Þeir starfa í þágu erlendra skjólstæðinga og hneykslast þegar þeim er borið það á brýn. Viðkomandi þingmenn starfa ekki í þágu þjóðarinnar. Það eru aðrir hagsmunir en íslenskir sem þeir bera fyrir brjósti.

 

 

Þingmenn tengdir umsækjendum

Blaðamenn sem óvinir lýðræðis

,,Öflug og vönduð blaðamennska, þar sem tjáningarfrelsið er í fyrirrúmi, er forsenda lýðræðis," er fyrsta setningin í nýjum siðareglum Blaðamannafélags Íslands. Þrír blaðamenn, Þórður Snær, Arnar Þór og Aðalsteinn Kjartansson, allir á Heimildinni, hafa ýmist stefnt tilfallandi bloggara eða hóta stefnu vegna umfjöllunar á lögreglumáli þar sem blaðamennirnir eru sakborningar. Ekki sýnir það virðingu fyrir tjáningarfrelsi.

Blaðamennirnir vita að bloggari er með heimildir fyrir umfjöllun sinni. Lögmaður Aðalsteins skrifar í hótunarbréfi til bloggara: ,,Af lestri vefsíðu þinnar er ljóst að þú hefur undir höndum rannsóknargögn lögreglu um málið sem lögreglan á Norðurlandi eystra er með til rannsóknar."

Blaðamenn hafa sem sakborningar aðgang að rannsóknargögnum. En þeir skrifa ekkert heldur þegja blaðamenn og vilja að allir aðrir þegi. Bloggari skrifar um byrlunar- og símastuldsmálið og fær á sig stefnu fyrir að tjá sig.

Hvers vegna fjalla blaðamenn ekki sjálfir um málið? Sakborningarnir vita manna best hvernig þeir komust yfir síma Páls skipstjóra Steingrímssonar. Það þýðir ekki að bera fyrir sig vernd heimildamanna. Lögreglan segir í febrúar í fyrra að hún viti hver heimildamaðurinn er, andlega veika konan sem byrlaði skipstjóranum.

Blaðamennirnir vissu að lögbrot var framið. Arnar Þór og Þórður Snær skrifuðu þegar þeir birtu fyrstu fréttina úr síma skipstjórans að afbrot var undanfari en tóku fram að þeir sjálfir hefðu ,,engin lögbrot framið." Er það ekki hlutverk blaðamanna upplýsa afbrot? Hvers vegna ganga blaðamenn RSK-miðla ekki fram fyrir skjöldu og greina almenningi frá vitneskju sinni um tilræðið gegn skipstjóranum, stuldi á síma hans og meðferðina á einkagögnum? 

Í nýjum siðareglum segir að almenningur eigi rétt á ,,að fá sannar upplýsingar." Hvert á almenningur að leita ef blaðamenn þegja sem fastast um sakamál þar þeir sjálfir eru sakborningar? Nú, auðvitað til þeirra sem fjalla um málið, s.s. tilfallandi bloggara. Ekki er um auðugan garð að gresja hjá öðrum blaðamönnum og fjölmiðlum. Þeir meira og minna þegja í þágu félaga sinna og vina - sakborninganna.

Með framferði sínu grafa blaðamenn eigin gröf. Blaðamenn og fjölmiðlar sem þegja um mikilsverð málefni þjóna ekki hagsmunum almennings. Blaðamenn sem krefjast þöggunar og höggva að tjáningarfrelsinu eru, samkvæmt eigin skilgreiningu, óvinir lýðræðisins.

Þakkir

Tilfallandi bloggari stendur í þakkarskuld við lesendur. Fyrir viku skrifaði hann blogg í tilefni af dómi héraðsdóms Reykjavíkur að bloggari skyldi greiða tveim blaðamönnum Heimildarinnar 2,5 milljónir fyrir að skrifa um byrlunar- og símastuldsmál Páls skipstjóra og aðild RSK-miðla.

Nokkrir lesendur höfðu haft samband og óskað eftir að styðja bloggara að áfrýja dómi héraðsdóms. Af því tilefni var opnaður fjárvörslureikningur hjá KRST lögmönnum til að þangað mætti beina fjárstuðningi.

Undirtektirnar voru slíkar að það söfnuðust tveir þriðju fjárhæðarinnar sem bloggari stendur frammi fyrir að greiða. Tæplega hundrað manns lögðu sitt af mörkum.

Launamanni er dýrt spaug að andæfa RSK-miðlum og meðhlaupurum þeirra. En þegar lesendur leggjast jafn kröftuglega á árarnar og raun ber vitni er ekki um annað að ræða en að halda áfram siglingunni þótt gefi á bátinn.

Kærar þakkir fyrir stuðninginn. Hann er ómetanlegur.

Fjárkúgun Aðalsteins: ein milljón, annars málssókn

Einn af sakborningunum í byrlunar- og símastuldsmálinu, Aðalsteinn Kjartansson, blaðamaður á Heimildinni, áður Stundinni, krefur tilfallandi bloggara um eina milljón króna.

Gunnar Ingi Jóhannsson lögmaður skrifar kröfubréfið sem er dagsett 27. mars sl. Gefinn er tíu daga frestur á milljóninni og afsökunarbeiðni. Annars verður tilfallandi bloggara stefnt fyrir ærumeiðingar.

Aðalsteinn er þriðji sakborningurinn sem sækir að bloggara fyrir að fjalla um aðild blaðamanna að byrlun Páls skipstjóra Steingrímssonar og stuldi á síma hans. Þórður Snær og Arnar Þór fengu bloggara dæmdan til að greiða sér 2,5 milljónir króna fyrir síðustu helgi. Eftir helgi skrifar lögmaður Aðalsteins og vill milljón. Þeir eru fundvísir á breiðu bökin, sakborningarnir.

Blaðamennirnir þrír vilja ekki að skrifað sé um aðild þeirra að ljótasta máli íslenskrar fjölmiðlasögu. Blaðamenn notfærðu sér andlega veika konu til að byrla og stela gögnum í byrjun maí fyrir tveim árum. Páll skipstjóri kærði verknaðinn til lögreglu 14. maí 2021.

Viku seinna birtu Aðalsteinn á Stundinni og Þórður Snær og Arnar Freyr á Kjarnanum samræmdar fréttir upp úr gögnum skipstjórans. Þeir vissu að fréttirnar voru fengnar með glæpsamlegu athæfi, byrlun og stuldi. ,,Starfsfólk Kjarnans hefur engin lögbrot framið," skrifuðu Þórður Snær og Arnar Þór en slepptu framhaldinu: andlega veik kona var fengin til verksins. Allir með snefil af sómakennd hefðu strax hætt umfjöllun og birtingu efnis og farið með vitneskju sína til lögreglu þegar ljóst var að alvarlegt lögbrot var framið. Blaðamenn RSK-miðla forhertust í þeim ásetningi að komast upp með glæp. 

Bloggari sagði fyrst frá rannsókn lögreglu 2. nóvember 2021. Tilfallandi taldi að málið yrði brotið til mergjar af fjölmiðlum landsins sem myndu freista þess að upplýsa sérkennilegt sakamál sem blaðamenn virtust eiga aðild að. En nei, þögnin ein réð ríkjum í heimi fjölmiðla á ísa köldu landi. Það er frétt þegar maður bítur hund en það er ekki frétt þegar blaðamenn eiga aðild að byrlun og stuldi. Blaðamennska skal veita siðlausum friðhelgi.

Rúmum tveim vikum síðar svöruðu Þórður Snær á Kjarnanum og Aðalsteinn á Stundinni með samræmdum hætti sama daginn - siðlausu tvílembingarnir þora ekki að standa einir, alltaf tveir eða fleiri saman. Siðlaus haltur leiðir blindan hrotta. Aðalsteinn skrifaði undir fyrirsögninni Svar við ásökun um glæp. Fyrirsögn Þórðar Snæs var Glæpir í höfði Páls Vilhjálmssonar. Víðóma verðlaunasiðleysið valdi bloggara hin verstu orð.

Væri bloggari lítill hræddur héri að fóta sig í opinberri umræðu hefði hann glúpnað og skriðið ofan í holu. Samræmd breiðsíða frá verðlaunablaðamönnum um að tilfallandi dómgreind væri álíka og Eddu Falak ylli lítt reyndum ónotum. En tilfallandi er eldri en tvævetra, hafði heimildir og vissi siðlausu blaðamennina ljúga eins og þeir eru langir til.

RSK-miðlar eru vanir að komast upp með lygi. Þeir stjórna umræðunni og ákveða hvað skal heita frétt og hvað ekki. Með dagskrárvaldið að vopni spígspora þeir um allar koppagrundir og úthluta sekt og sýknu; jarða mann og annan undir holskeflu samræmds fréttaflutnings.

Spurningin sem bloggari stóð frammi fyrir var þessi: á að láta drýldna ofstopamenn stjórna umræðunni? Miðaldra hvítur karlmaður hlaut að svara nei, eineltishrottarnir færast í aukana ef þeim er ekki veitt viðnám. Bloggskrif héldu áfram, fjölmiðlalömbin þögðu.

Rannsókn lögreglu leiddi til þess að fjórir blaðamenn, þremenningarnir og Þóra Arnórsdóttir á RÚV, fengu stöðu sakborninga 14. febrúar 2022. Þeir mættu ekki til yfirheyrslu fyrr en um haustið. Sakborningarnir sprikluðu í opinberri umræðu og töldu tjáningarfrelsið i hættu ef blaðamönnum yrði gert skylt að gefa skýrslu. Ást þeirra siðlausu á tjáningarfrelsinu er svo fölskvalaus að þeir stefna bloggara fyrir að tjá sig.

Miðstöð glæpsins gegn Páli skipstjóra var RúV, sem fyrrum lögreglustjóri, Stefán Eiríksson, stjórnar. Hvorki heyrðist hósti né stuna frá Glæpaleiti um innanhússrannsókn eða athugun á aðild fréttamanna að glæp. Nokkuð mannfall var þó tilkynnt. Rakel Þorbergsdóttir fréttastjóri lét sviplega af störfum haustið 2021, Helgi Seljan þá um áramótin og loks var sakborningnum Þóru Arnórsdóttur fleytt yfir á aðra ríkisstofnun, Landsvirkjun, í febrúar síðast liðinum. Ári eftir að hún fékk stöðu grunaðrar í glæparannsókn. 

Enn þegja fjölmiðlar. Heiðarleg undantekning er frétt Andrésar Magnússonar í Morgunblaðinu um fimmta sakborninginn, Inga Frey Vilhjálmsson, sem einkum er þekktur fyrir að vera helmingur dúósins bræður í glæpum.

Um nýliðin áramót var lögreglurannsóknin langt komin. Nýjar heimildir breyttu atburðarásinni. Þær heimildir gáfu til kynna að blaðamenn, einn eða fleiri, voru með í ráðum áður en Páli skipstjóra var byrlað 3. maí 2021. Áður bentu kringumstæðurök einkum til aðildar blaðamanna en nú komu til skjalanna handfastari gögn. Meðal þessara gagna eru sími sem notaður var til afritunar á síma Páls skipstjóra og símanúmer á þann síma, skráð á RÚV.

Hvorki hafa RSK-blaðamenn gert grein fyrir aðild sinni að málinu né hafa aðrir fjölmiðlar þýfgað starfsfélaga sína og krafist svara. Tilfallandi bloggari er svotil einn um að flytja fréttir af málinu.

RSK-blaðamenn stefna bloggara fyrir að flytja fréttir sem þeir að öðru leyti geta haldið frá almenningi. Það er mergurinn málsins. Meðvirkni með siðleysi einkennir fjölmiðlaþögnina.

Í kröfubréfi Aðalsteins eru kostirnir skýrir. Ein milljón og afsökunarbeiðni annars verður bloggara stefnt fyrir dóm. Blaðamenn kunnugir byrlun og þjófnaði víla auðvitað ekki fyrir sér fjárkúgun.  Milljón króna spurningin er hvort tilfallandi kaupi sig frá frekari vandræðum og éti orð sín í ofanálag. 

Kyngja og þegja. Svona eins og fjölmiðlar.