Eggjastokkar, eistu og börn

Kynfræðslu í grunnskólum hefur verið útvistað til félagasamtaka með undarlega hugmyndafræði, svo ekki sé dýpra í árinni tekið.

Fréttin fjallar um kynfræðslu í 6. bekk grunnskóla. Þar segir m.a.

„Hvort hefst kynþroskinn fyrr hjá þeim sem hafa eggjastokka eða þeim sem hafa eistu “, er eitt kennslubókadæmið. Svarið við því er að það hefjist fyrr hjá „þeim sem hafa eggjastokka“.

Hér væri einfaldara að segja: kynþroski hefst fyrr hjá stúlkum en drengjum. En nú má ekki tala um drengi og stúlkur í grunnskólum. Eistuhafi og eggjastokkaeigandi skal það heita.

Nú kynni einhver að halda að nýlenskan sé til að vernda börnin frá upplýsingum sem þau kunna ekki að fara með, að áherslan sé á líffæri en ekki kyn per se. En svo er alls ekki.

Grunnskólar í Reykjavík halda upp á ,,viku 6" í sjöttu viku ársins. Samkvæmt Fréttinni, sem fjallaði um málið fyrir tveim mánuðum, virðist skipulega unnið að brjóta niður eðlislæga blygðunarsemi barna. Í Fréttinni segir:

Heimilisfræðikennsla var líka samþætt kynfræðslu og voru dæmi þess að bökuð typpa- og píkubrauð eða kynfæri búin til úr leir í listgreinum með tilheyrandi flissi og gleði.

Myndin sem blasir við er sú að kyn séu ekki til en brýnt sé að halda kynlífi að grunnskólabörnum. Jafnvel í kennslu um heimilisfræði.

Til skamms tíma var börnum kennt að gjalda varhug við áleitni að líkama þeirra. Núna er boðskapurinn sá að líkaminn sé aðeins aðskiljanleg líffæri sem megi leika sér með. Náttúrlegar forvarnir, blygðunarsemi, eru skipulega brotnar niður.

Barnagirnd dulbúin sem uppeldi.

Lögreglan spyr Þórð Snæ um síma Páls skipstjóra

,,Aðspurður sagðist Þórður Snær aldrei hafa tekið við né séð símtækið hans Páls eða meðhöndlað það."

Tilvitnunin er tekin úr lögregluskýrslu 11. ágúst 2022. Þórður Snær Júlíusson ritstjóri Heimildarinnar, áður Kjarnans, var til yfirheyrslu.

Síma Páls skipstjóra var stolið 4. maí 2021 og færður blaðamönnum til afritunar. Þórður Snær vissi að lögbrot hefði verið framið. Í frétt Kjarnans 21. maí segir: ,,Ábyrgðarmenn Kjarnans vilja taka fram að umrædd gögn sem eru grundvöllur umfjöllunar miðilsins bárust frá þriðja aðila. Starfsfólk Kjarnans hefur engin lögbrot framið..." 

Lögreglan hefði ekki spurt Þórð Snæ hvort hann hefði séð eða meðhöndlað síma skipstjórans nema vera með gögn í höndunum. Í síma skipstjórans var smitrakningarforrit, vegna COVID-19, sem skráði öll símanúmer í nálægð. 

Það er lögbrot að ljúga í yfirheyrslu lögreglu.

Óværan var skeggjuð sem smitrakningin fangaði maívorið 2021. 

 

Sigmundur Ernir: byrlun lýsir metnaði og heilindum

Fyrrum ritstjóri Fréttablaðsins, áður þingmaður Samfylkingar, Sigmundur Ernir Rúnarsson, fjallar um stöðu fjölmiðla. Hann skrifar 

Það eru ekki eftir margir fjölmiðlar á Íslandi sem teystandi er til að rækja þetta hlutverk af metnaði og heilindum [feitletr. pv]. Þar koma þó upp í hugann fréttamiðlar á borð við Ríkisútvarpið – og þó það nú væri – og klárlega Heimildin sem hefur sýnt það og sannað að hún er reiðubúin að rannsaka það sem út af ber í samfélaginu af festu og þrótti.

RÚV og Heimildin eru í aðalhlutverki í byrlunar- og símastuldsmálinu, þar sem andlega veik kona var fengin til að byrla og stela gögnum fyrir fjölmiðla. Helmingur ritstjórnar Heimildarinnar, áður Kjarninn og Stundin, er með stöðu sakbornings.

Að kalla það ,,metnað og heilindi" að byrla og stela er nokkuð langt gengið, - jafnvel af vinstrimanni. 

 

Þóra keypti afritunarsíma í apríl, Páli byrlað í maí

Þóra Arnórsdóttir ritstjóri Kveiks á RÚV keypti Samsung síma í apríl 2021 og skráði á hann númerið 680 2140 í sama mánuði. Síminn er sömu gerðar og sími Páls skipstjóra sem hefur númerið 680 214X. Aðeins munar síðasta tölustaf á númerunum tveim. Til afritunar var nauðsynlegt að hafa síma sömu gerðar og skipstjórans, Samsung. Símarnir eru lagðir saman og afritunarforrit er ræst. Aðgerðin tekur nokkrar mínútur.  

Páli skipstjóra Steingrímssyni var byrlað 3. maí 2021, stuttu eftir símakaup Þóru. Nýr ónotaður sími með símanúmer líkt númeri skipstjórans beið á Efstaleiti. Ráðabruggið lá fyrir. Aðeins átti eftir að byrla og stela.

Staðsetningarbúnaður síma skipstjórans sýnir að á meðan Páll lá milli heims og helju á gjörgæslu Landspítala dagana 4. til 6. maí var síma hans stolið og farið var með hann á Efstaleiti, höfuðstöðvar RÚV. Þar var innihald síma skipstjórans afritað yfir á Samsung-síma Þóru.

Fréttamaður á Kveik og undirmaður Þóru, Aðalsteinn Kjartansson, var fyrirvaralaust fluttur af RÚV yfir á Stundina 30. apríl, þrem dögum áður en Páli var byrlað. Snögg vistaskipi Aðalsteins undirstrika að skipulagið skyldi vera á Efstaleiti en fréttaflutningur á Stundinni og Kjarnanum.

Stolnum síma Páls var skilað á sjúkrabeð hans áður en hann komst til meðvitundar. Skipulag RSK-miðla (RÚV, Stundin og Kjarninn) gerði ráð fyrir að skipstjórinn væri grunlaus. 

Úr afritaða símanum á RÚV með númerið 680 2140 voru einkagögn Páls send á Kjarnann og Stundina, m.a. skjáskot sem voru tekin af tölvupóstum skipstjórans. Skrifaðar voru fréttir á Efstaleiti með samræmdum boðskap um að skæruliðadeild starfaði hjá Samherja og skipstjórinn væri höfuðpaurinn. Kjarninn og Stundin birtu samtímis fréttir úr síma Páls 21. maí, rúmum hálfum mánuði eftir þjófnaðinn. RÚV birti ekkert.

Ástæða tafarinnar á birtingu fréttanna er að blaðamenn RSK-miðla vildu bíða í tvær vikur til að ekki væri hægt að fletta upp í staðsetningarforriti síma skipstjórans. Búnaðurinn geymir staðsetningu símans aðeins tvær vikur aftur í tímann. Eftir 19. maí voru ekki upplýsingar í síma skipstjórans um staðsetningu tækisins 4. og 5. maí. Eða svo töldu blaðamenn.

En Páll skipstjóri sá að átt hafði verið við símann þegar hann tók til við að nota tækið. Hann slökkti á símanum, sem þýðir að staðsetningarbúnaður geymdi upplýsingar um ferðalag tækisins í þjófahöndum. Skipstjórinn kærði málið 14. maí, viku áður en Stundin og Kjarninn birtu fyrstu fréttirnar upp úr símanum. 

Lögreglurannsókn leiddi til þess að fjórir blaðamenn fengu stöðu sakborninga 14. febrúar 2022. Þóra á RÚV og blaðamennirnir sem birtu fréttir úr síma skipstjórans; Þórður Snær, Arnar Þór og Aðalsteinn. Síðar var fimmta sakborningi bætt við, Inga Frey Vilhjálmssyni. Allir starfa þeir á sama miðlinum, Heimildinni, sem varð til með yfirtöku Stundarinnar á Kjarnanum nýliðin áramót.

Afritaða símann notuðu blaðamenn til ýmissa samskipta, bæði sín á milli og við byrlara Páls skipstjóra. Þegar hringt var úr afritaða símanum í byrlara Páls kom nafnið ,,ÞAK" sem lögregla telur að standi fyrir Þóra Arnórsdóttir Kveikur. Líklegt er að síminn hafi verið í fórum annarra en Þóru a.m.k. um stundarsakir. Það er t.d. ekki vitað til þess að Þóra hafi skroppið á fótboltamót á Akranesi sumarið 2021, en þar var síminn notaður skv. upplýsingum úr staðsetningarbúnaði.

Þar sem símanúmer Páls skipstjóra og númerið á afritunarsímtækinu eru keimlík var auðveldara að fela slóðina. Yfirlit um símtöl, t.d. á reikningum, sleppa tveim síðustu tölustöfum símanúmera af persónuverndarástæðum.

Rannsókn lögreglu beindist fyrst að meðferð blaðamanna á einkagögnum og brot á friðhelgi. Lögreglan vissi fljótlega hver byrlaði og stal símanum, andlega veik kona tengd Páli. Eftir því sem rannsókninni vatt fram vöknuðu grunsemdir um að RSK-blaðamenn höfðu komið að skipulagningu byrlunar og þjófnaðar.

Upplýsingar um Samsung símann sem Þóra keypti í apríl 2021 urðu lögreglu kunnar þegar leið á rannsóknina. Í janúar síðastliðinn staðfesti Stefán útvarpsstjóri að símanúmerið 680 2140 væri á Kveik, sem Þóra ritstýrði. Þar með liggja fyrir upplýsingar um aðdraganda tilræðisins gegn skipstjóranum. Blaðamenn í félagi við andlega veika konu lögðu á ráðin. Blaðamannafélag Íslands veitti verðlaun fyrir tiltækið. Fjölmiðlar þegja um málsatvik.

 

Hlutdeild í byrlun og þjófnaði er alvarlegra afbrot en meðferð og hagnýting stolinna gagna. Byrlun er líkamsárás, ef ekki banatilræði.

KÍ biðji Helgu Dögg afsökunar

Kennarasamband Íslands hljóp á sig þegar það fordæmdi Morgunblaðsgrein Helgu Daggar Sverrisdóttur kennara. Helga vekur athygli á einföldum staðreyndum sem á ekki að þurfa að segja upphátt, t.d.

Ég tel það sær­andi og móðgandi að segja barni að það sé kannski í öðrum lík­ama. Sé ekki það kyn sem það fædd­ist. [...] Barn hef­ur ekki þroska, getu eða þor til að mót­mæla slíku.

og

Það er van­v­irðandi hátt­semi við barn og for­eldra þess að halda því fram að heil­brigðis­starfs­fólk geti sér til um kyn barns­ins við fæðingu. Sam­kvæmt Mann­rétt­inda­dóm­stóln­um er það ekki dregið í efa, líf­fræðilegt kyn er það kyn sem barn fædd­ist og verður. Vegg­spjöld hanga uppi í leik­skól­um sem draga líf­fræðina í efa, sær­andi og van­v­irðandi hátt­semi.

Allt er er þetta laukrétt hjá Helgu, hversdagsleg sannindi, sem á ekki að lasta heldur lofa. Ef það er tilfellið að börnum er kennt að kyn sé ekki líffræðilegt, heldur hugdetta, er vanþekkingu haldið að börnum. Ef það er kennt að það sé ,,ágiskun" við fæðingu af hvoru kyni nýburinn er þá verður að grípa í taumana og forða börnum frá fáviskunni.

Kennarasamband Íslands ætti hið snarasta að biðja Helgu Dögg afsökunar. Helga Dögg talar fyrir heilbrigða skynsemi. Eins og málin standa núna er KÍ fylgjandi afmenntun og vanþekkingu. Fáviska hefur ekkert með mannréttindi að gera.

Ekki fer vel á því að stéttafélag kennara gangi sértrúarhópum á hönd sem telja jörðina flata, kynin fleiri en tvö og að hægt sé að fæðast í röngum líkama. Fáviska í nafni mannúðar er ekki boðleg afstaða þeirra sem kenna sig við menntun og þekkingu. 

Fordæma viðhorf Helgu

Áfengi og rétttrúnaður

Sig­ur­inn ligg­ur í upp­gjöf­inni er bók um alkahólisma. Höfundar eru hjónin Sig­ur­lína Davíðsdótt­ir og Ragnar Ingi Aðalsteinsson. Í viðtali er haft eftir Sigurlínu

Fyrsta skrefið er að átta sig á því að þær leiðir sem maður hef­ur farið í neysl­unni eru ónýt­ar og maður þarf að leggja þær al­veg til hliðar og taka upp al­veg nýja nálg­un. Þeim sem ekki tekst þetta tekst ekki að verða edrú.

Áfengi í óhófi leiðir einstaklinga í öngstræti. Neyslan gerir menn ,,ónýta". Tveir harðir kostir, sem báðir fela í sér uppgjöf, standa eftir. Uppgjöf gagnvart sjálfum sér eða gefa áfengið upp á bátinn.

Rétttrúnaður er með þau áfengu einkenni að annað tveggja gefst maður upp á sjálfum sér eða lætur rétthugsun lönd og leið. Rétttrúnaður og hjarðhugsun haldast í hendur. Hvergi er sést samhengið betur en í háskólasamfélaginu. Helgi Ás Grétarsson útskýrir

Það er að verða mjög skrýtin þróun í háskólunum. Pólitísk rétthugsun hefur náð miklum tökum á háskólasamfélaginu. Ákveðinn hópur hefur náð að ákveða hvað má tala um og hvað ekki. Oft er komið í veg fyrir að það sé verið að ræða efnisatriði mála og draga þannig úr sköpun. Það má ræða mjög neikvætt um suma málaflokka og sumt fólk, en ef það væri í hina áttina yrði fólk bara grillað á teini.

Rétttrúnaðurinn krefst undirgefni líkt og áfengi. Valið stendur á milli frjálsrar hugsunar og auðsveipni hjarðarinnar. Helgi Áss aftur

maður verður stundum að þora að vera hugrakkur og standa með eigin sannfæringu, þó að það kosti að einhverjir verði brjálaðir og segi eitthvað neikvætt um mann. Ef maður er alltaf tilbúinn að gefa eftir eitthvað af sínum karakter til að lífið sé þægilegra, þá molnar hægt og sígandi undan skapgerðinni og maður verður hægt og rólega að gufu sem stendur ekki fyrir neitt

Þægilegt líf í hjörðinni sem telur manni trú um að hvítt sé svart, að loftslagið sé manngert og hægt sé að fæðast í röngum líkama. Nei, takk, betra er að vera edrú á rétthugsun og taka á sig óþægindin að hugsa sjálfstætt.

Leyndarmálin fara með þig í gröfina

Bloggarar byrla ekki

Við erum ekki bloggarar, skrifar Aðalsteinn Kjartansson varaformaður Blaðamannafélags Íslands í leiðara.

,,Kjarninn og Stundin, hafa að uppistöðu verið þolendur," skrifar Þórður Snær Júlíusson ritstjóri og harmar skort á ríkisfé til ritstjórnar þar sem helmingur fréttamanna er sakborningar.

Aðalsteinn og Þórður Snær eru grunaði í byrlunar- og símastuldsmálinu. Hvorugur hefur upplýst almenning vitneskju sína um alvarlegt sakamál sem lögreglan hefur rannsakað í hálft annað ár. Blaðamennirnir voru boðaðir í yfirheyrslu í febrúar í fyrra en mættu ekki til skýrslutöku fyrr en hálfu ári seinna. Á meðan þeir bíða ákæru stefna þeir bloggara sem ekki byrlaði fyrir dóm. Sök bloggara er að segja félagana eiga beina eða óbeina aðild að máli þar sem þeir eru sakborningar.

Aðalsteinn er formaður nefndar Blaðamannafélags Íslands sem endurskoðaði siðareglur BÍ. 

Áður en Aðalsteinn lét hendur standa fram úr ermum var þriðja grein siðareglna Blaðamannafélags Íslands eftirfarandi:

Blaðamaður vandar upplýsingaöflun sína, úrvinnslu og framsetningu svo sem kostur er og sýnir fyllstu tillitssemi í vandasömum málum. Hann forðast allt, sem valdið getur saklausu fólki, eða fólki sem á um sárt að binda, óþarfa sársauka eða vanvirðu.

Þriðja greinin var vörn þeirra sem standa höllum fæti, t.d. andlega veikir, gegn ágangi blaðamanna. 

Nýverið tilkynntu Blaðamannafélag Íslands og Aðalsteinn nýjar siðareglur. Þriðja grein eldri siðareglna var felld niður í heild sinni. Nú er komið skotleyfi blaðamanna á fólk ,,sem á um sárt að binda". Eins og Aðalsteinn orðar það í leiðaranum: siðareglur ,,eru nú til endurskoðunar og mikilvægt er að þær endurspegli raunveruleikann sem blaðamenn starfa við í dag."

RSK-miðlar nýttu sér skotleyfið áður en það var gefið út. Þeir misnotuðu andlega veika konu til að byrla og stela. Sakborningur setur siðareglur sem réttlæta framinn glæp.

Bloggarar byrla ekki og starfa ekki eftir siðareglum sem réttlæta glæpi. Í höndum Þórðar Snæs, Aðalsteins og félaga er blaðamennska annað orð yfir siðleysi. 

Þóra varpar grun á aðra Kveiks-menn

Afritaður sími Páls skipstjóra Steingrímssonar fékk númerið 680 2140. Númerið er skráð á RÚV/Kveik, sem Þóra Arnórsdóttir ritstýrði þangað til febrúar í ár. Í yfirheyrslu lögreglu 16. mars s.l. var Þóra spurð hver hafði símann undir höndum vorið og sumarið 2021 þegar Páli skipstjóra var byrlað, síma hans stolið og hann afritaður á Efstaleiti.

Samkvæmt lögregluskýrslu sagði Þóra að átta starfsmenn væru á Kveik og síminn hafi gengið manna á milli, ,,eftir því hvaða verkefni væri verið að vinna."

Verkefnið vorið og sumarið 2021 var fyrst og fremst að afrita síma skipstjórans, koma gögnum úr símanum yfir á Stundina og Kjarnann til birtingar. Páli skipstjóra var byrlað 3. maí. Hann kærði til lögreglu 14. maí. Stundin og Kjarninn birtu fyrstu fréttir úr afritaða símanum 21. maí. RÚV birti enga frétt. Ríkisfréttamennirnir gáfu vinnu sína til Stundarinnar og Kjarnans. Opin spurning er hvort það hafi verið með vitund og vilja útvarpsstjóra.

Auk Þóru eru, svo vitað sé, fjórir aðrir sakborningar í byrlunar- og símastuldsmálinu. Þórður Snær Júlíusson, Arnar Þór Ingólfsson, Aðalsteinn Kjartansson og Ingi Freyr Vilhjálmsson. Allir eru þeir blaðamenn á Heimildinni, eftir sameiningu Stundarinnar og Kjarnans.

Með því að Þóra varpar grun á alla starfsmenn Kveiks gæti sakborningum fjölgað. Lögreglan þarf að ganga úr skugga um hverjir höfðu símann undir höndum á þegar lykilsamskipti fóru fram.

Afritaði síminn með númerið 680 2140 var sumarið og haustið 2021 notaður m.a. til að reyna að komast inn á bankareikninga Páls skipstjóra sem og reikninga hans á samfélagsmiðlum. t.d. Facebook. Þá var síminn notaður í samskipti við andlega veiku konuna sem byrlaði Páli, stal síma hans og kom í hendur blaðamanna.

Ein 85 samskipti við veiku konuna eru skráð á afritaða símann. Í þeim samskiptum sem hafa komið fram í yfirheyrslum yfir sakborningum er m.a. lagt á ráðin að eyða gögnum og dularfull skilaboð um að hafa samband við embætti héraðssaksóknara, sem þó fer ekki með rannsókn málsins. 

Í yfirheyrslu lögreglu 16. mars s.l. segir Þóra að mörg hundruð símtöl komi inn á þennan síma og kallar hún það ,,heimildarmenn" sem hringi inn og þeir njóti lagaverndar. En símanúmerið 680 2140 er óskráð. Á heimasíðu Kveiks eru gefin upp símanúmer starfsmanna, 680 2140 er þar hvergi að finna. Ekki heldur var númerið skráð á heimasíðuna árið 2021 þegar allur þorri samskipta við veiku konuna fóru fram.

Hvernig geta meintir ,,heimildarmenn" hringt í símanúmer sem hvergi er skráð?

Skrár tengdar þessari bloggfærslu:

• Kveikur haust 2021

Þóra Falak

Fjallkona samtímans heitir Þóra Falak. Boðskapurinn er ekki ást á landi, þjóð og menningu. Þríeinn sannleikur Þóru Falak er andstyggð, ógeð og afhjúpun.

Kveikur og Eigin konur eru vettvangur Þóru Falak, í boði Heimildar og trúfélagsins RÚV. Kveikur segir markmiðið ,,að afhjúpa misferli og misbeitingu valds." Eigin konur tala um ,,herferðir" gegn ,,kerfislægum vanda" þar sem beitt er ,,miskunnarlausri þöggun á þolendur, aðstandendur, aktívista og stjórnmálafólk" (les: vinstrimenn).

Samfélag andstyggðar og ógeðs sem Þóra Falak vinnur nótt og nýtan dag við að afhjúpa.

Íslenskt samfélag er þeim sem landið byggja ekkert sérstaklega óviðfelldið. Því þarf að ,,einfalda frásögnina" til sauðsvartur almúginn skilji eigin ömurleika.

Dæmisögur þarf að hanna og setja á merkimiða s.s. skæruliðadeild og ofbeldismenning. Að hætti marxista í gamla daga er greiningu og hugmyndafræði pakkað snyrtilega saman - til að almenningur átti sig ekki á að niðurstaðan, afhjúpunin, er gefin fyrirfram: við búum í samfélagi andstyggðar og ógeðs.

Helgisiðir fylgja ávallt sértrúarsöfnuðum. Árlega er samkoma þar sem veitt eru verðlaun þeim sem mest og best hafa þórufalakkað árið á undan. Það eru auðvitað Edduverðlaunin.

 

 

Edda Falak rýfur þögnina

Ábyrgð Stefáns á síma Þóru

Stefán Eiríksson útvarpsstjóri veit hvenær Þóra Arnórsdóttir ritstjóri Kveiks keypti Samsung símann sem notaður var til að afrita síma Páls skipstjóra í byrjun maí 2021. Upplýsingar um símakaupin eru í bókhaldi RÚV.

Stefán veit einnig hvenær Þóra skráði símanúmerið 680 2140. Það númer fór á Samsung símann sem notaður var til að afrita stolinn síma Páls skipstjóra. Í bókhaldi RÚV er nákvæm dagsetning hvenær símanúmerið var skráð á RÚV.

RÚV er opinber stofnun. Stefáni er treyst til að reka stofnunina innan ramma laga og reglna. Þegar fyrir liggur að útvarpsstjóri býr yfir upplýsingum sem varpa ljósi á alvarlegt og glæpsamlegt athæfi starfsmanna stofnunarinnar, sem tóku við stolnum síma og afrituðu hann, þá ber Stefáni skylda til að upplýsa þau málsatvik sem honum eru kunn. 

Yfirstandandi lögreglurannsókn er ekki afsökun fyrir útvarpsstjóra að koma í veg fyrir fréttaflutning af málefnum ríkisfjölmiðilsins. Ef RÚV ætlar að standa undir nafni sem fjölmiðill í þágu þjóðarhagsmuna ættu upplýsingar um hvenær Samsung síminn var keyptur og hvenær símanúmerið 680 2140 var leyst út að vera frétt á RÚV. 

Upplýsingar um aðild starfsmanna RÚV að afbrotum eiga erindi til almennings.