Sjálfstæðisflokkurinn, Píratar og hrár þjóðarvilji

Í forystu Sjálfstæðisflokksins vex þerri hugmynd ásmegin að til að ná kjósendum á sitt band verði flokkurinn að færast nær Pírötum í skoðunum. Bæði formaður og varaformaður Sjálfstæðisflokksins tala í þessa átt að undanförnu.

Um þessa stefnubreytingu er það að segja að Píratar eru ekki með nein málefni önnur en þau að vísa öllum helstu málum í þjóðaratkvæðagreiðslu. Sú stefna virkar fyrir Pírata enda auglýsa þeir sig sem uppreisnarafl gegn málefnum. Píratar eru flokkur hins hráa þjóðarvilja.

Í pólitískum annálum vesturlanda er ákall um hráan þjóðarvilja fylgifiskur upplausnarástands. Þegar konungsríkið Frakkland stóð á barmi byltingar kynnti Rousseau hugmyndina um almannavilja. Eftir hrun þýska keisaradæmisins kom til sögunnar austurríkisfæddur liðþjálfi og boðaði ,,ein Volk, ein Reich". Áhangendur þjóðarvilja láta þess sjaldnast getið, þegar þeir vinna málstaðnum fylgi, að einhver þarf að framkvæma þjóðarviljann. Þegar fólk vaknar upp við þann vonda draum að hafa valið sér yfirvald til að hrinda almannaviljanum í framkvæmd er of seint gripið í rassinn gripið. Í tilfelli Þjóðverja fengu þeir vanheilaga þrenningu ,,ein Volk, ein Reich, ein Führer."

Píratar geta leyft sér ákall til þjóðarvilja vegna þess að þeir eru pólitískt hreinir sveinar. Alveg eins og Dolli í Bæjaralandi eftir fyrra stríð. Sjálfstæðisflokkurinn er ekki hreinn pólitískur sveinn. Flokkurinn er móðurflokkur íslenskra stjórnmála og veitti þjóðinni málefnalega kjölfestu alla lýðveldissöguna.

Ef Sjálfstæðisflokkurinn tæki upp á því að boða þjóðaratkvæðagreiðslur um helstu mál jafngildir það yfirlýsingu um að flokkurinn standi ekki fyrir nein sérstök málefni. Flokkurinn byði sig fram til pólitískrar verktöku í þágu þjóðarvilja sem væri skilgreindur út í bæ. Aðeins tvær röklegar niðurstöður gætu komið út úr þessu ferli. Að Sjálfstæðisflokkurinn yrði safn skoðanalausra kjána annars vegar og hins vegar að flokkurinn yrði skálkaskjól fasista að framkvæma þjóðarviljann.

Einhver góðviljaður ætti að hnippa í Bjarna og Hönnu Birnu og segja þeim að hvorugt hlutverkið, kjána eða fasista, fari þeim ýkja vel.   

 

Björt framtíð eykur fylgi sitt

Hádegismóar, Bessastaðir og fullveldisflokkurinn

Í leiðara tekur Morgunblaðið undir varnaðarorð forseta Íslands um að ekki skuli breyta stjórnarskránni sem skrifuð er í anda borgaralegs lýðræðis á 19. öld og hefur fylgt þjóðinni frá fullveldi.

Morgunblaðið og Ólafur Ragnar túlka sjónarmið þess hluta þjóðarinnar sem vill ekki breyta lýðveldinu í leikvöll vinstrimanna til að henda á milli sín stjórnskipun landsins. Hafi einhver vafi leikið á því að vinstrimenn ala á sundrungu og ófriði hvarf sá efi síðasta kjörtímabil þegar vinstriflokkarnir kyntu undir innanlandsátökum.

Fullveldisflokkurinn er stærri en Sjálfstæðisflokkur og Framsóknarflokkur. Ef stjórnarflokkarnir koma sér ekki saman um brýnustu mál lýðveldisins verður að gera fullveldisflokkinn að formlegum stjórnmálaflokki.

Varar við breytingum á stjórnarskrá

Auðmannasiðferði: ég er góður, þú vondur

Þorsteinn Már Baldursson forstjóri og aðaleigandi Samherja fer töluvert nærri því að viðurkenna ,,mistök" í stóra gjaldeyrismálinu þar sem stórfelld notkun gjaldeyris fór ekki fram samkvæmt bókinni. Í fréttabréfi fyrirtækisins skrifar Þorsteinn Már

Ég hef ítrekað lýst yfir samstarfsvilja okkar til að upplýsa málið og hef aldrei útilokað að einhvers staðar kynnu að hafa átt sér stað mistök. Hins vegar hef ég alltaf sagt að við höfum unnið eftir bestu vitund.

Nú mál vel trúa því upp á Samherjamenn að þeir starfi samkvæmt bestu vitund í þágu hagsmuna fyrirtækisins og hafi meira af óvilja en ásettu ráði gert ,,mistök."

Það vekur þó grunsemdir að Samherjamenn vilja ekki una  öðrum þess að starfa samkvæmt bestu vitund. Þorsteinn Már sakar starfsmenn Seðlabanka um óeðlilegar hvatir og krefst þess að einhver verði látinn taka pokann sinn fyrir að fetta fingur út í ,,mistök" Samherja.

Sérfræði Þorsteins Más um hvatalíf manna hlýtur að byggja á innsæi í eigin hugarheim.

 

Þorsteinn: Tímabært að axla ábyrgð

Samfylkingin hótar - Ólafur Ragnar er vörnin

Samfylkingin og vinstrimenn hótuðu þjóðinni ESB-aðild, sömu aðilar hótuðu okkur Icesave-fjötrum. Núna hótar Samfylkingin og vinstraliðið að ganga i skrokk á stjórnarskránni með það fyrir augum að útvatna hana og setja stjórnskipun lýðveldisins í uppnám.

Linkuleg viðhorf sumra stjórnarþingmanna til hótana vinstriflokkanna vekja ugg um að ekki reynist hald í meirihluta þingsins í vörn gegn atlögu að stjórnarskránni.

Ólafur Ragnar Grímsson forseti er traust vörn gegn upplausnarliðinu. Tryggjum endurkjör hans á næsta ári.

Stjórnmálaflokkar á síðasta séns

Hvers vegna er RÚV á fjárlögum?

RÚV er ekki rekið í þágu þjóðarinnar heldur starfsmanna. Þetta gildir sérstaklega um rekstur fréttastofu.

Fréttatímar ganga út á að þjóna kenjum og tiktúrum fréttamanna sem eru að jafnaði nærri pólitískum viðhorfum vinstrimanna. Nýlegt dæmi um tiktúrufréttir RÚV eru viðtal við borgarstjóra þar sem fréttamaður leggur nánast borgarstjóra orð í munn og viðtal við ráðherra þar sem reynt var að stilla honum upp við vegg fordóma fréttamanns.

Fréttastofa RÚV er algjörlega óþörf og ætti að leggja niður. Við gætum notað sparnaðinn til að taka vel á móti flóttamönnum.

Framlög til RÚV lækka um 173 milljónir

Vond stjórnmál og málskot

Stjórnmál á Íslandi eitruðust við hrunið. Í aðdraganda hrunsins voru stjórnmálamenn og heilir stjórnmálaflokkar falir auðmanninum með hæsta boð. Eftir hrun skolaðist út sumt af spillta liðinu, minnst þó hjá þeim flokki sem duglegastur var að selja sig.

Valdaflokkar eftir hrun, Vinstri grænir og Samfylking, tölu ranglega að bylting hefði skilað þeim stjórnarráðinu. Ekkert er fjarri sanni. Kosningasigur vinstriflokkanna 2009 var niðurstaða lýðræðislegra kosninga. Múgæsing á Austurvelli er ekki bylting, hvort heldur múgurinn sé innan eða utan dyra þinghússins.

Ranghugmynd vinstrimanna að um byltingu leiddi þá út í gerræðisstjórnmál þar sem hnefaréttur meirihlutans skyldi ráða. Og það var eins við manninn mælt; um mitt kjörtímabil var vinstristjórnin ekki lengur með meirirhluta á alþingi. Viljinn til byltingar risti ekki dýpra.

Það er ekki tilviljun að ríkisstjórn Jóhönnu Sig. missti meirihlutann um sama leyti og Icesave-þjóðaratkvæðagreiðslur fóru fram. Neyðarréttur þjóðarinnar var virkjaður af forseta Íslands til að stemma stigu við gerræði ríkisvaldsins. Ríkisstjórnin varð að gjalti og gerði ósköp fátt seinni hluta kjörtímabilsins annað en að bíða örlaga sinna.

Málskot, hvort heldur hjá tilteknu hlutfalli þjóðar eða þings, mun ekki verja okkur fyrir vondum stjórnmálum.

Umræðan um málskot er hluti af byltingarhugarfarinu eftir hrun. Við erum með stjórnarskrá sem virkar og fyrirkomulag á neyðarrétti forseta til að skjóta málum til þjóðarinnar er staðfest með reynslu.

Breytum ekki því sem virkar. Höldum stjórnarskránni óbreyttri.

Málskotsréttur sé hjá alþingismönnum

Bretar bjóða heim múslímum, drepa sína eigin í útlöndum

Bretar bjóða múslíma velkoma til landsins í sömu andrá og breski herinn drepur breska múslíma í Sýrlandi. Þrír breskir liðsmenn Ríki íslam féllu í Sýrlandi, tveir fyrir breska hernum en sá þriðji var drepinn af bandaríska hernum.

Liðsmenn Ríki íslam eru herskáir múslímar. Þó nokkrir koma frá Vestur-Evrópu. Einn þeirra þriggja sem féllu ól með sér draum um að verða fyrsti breski forsætisráðherrann af asískum uppruna.

Bretland tekur við múslímum, fæðir og klæðir og gefur þeim færi á siðmenntuðu lífi. Sumir endurgjalda greiðann með því að taka upp vopn gegn vestrænum gildum undir merkjum Ríkis íslam. Kannski eru það nágrannar eða skólabræður í breska hernum sem fá það verkefni að taka múslímska samlanda af lífi án dóms og laga.

Siðmenning okkar er komin að þolmörkum.

 

Bretar taka við 20.000 sýrlenskum flóttamönnum

17% fall norsku krónunnar - Fylkisflokkurinn eldist illa

Norska króna er 17% ódýrari í íslenskum krónum í dag en fyrir ári. Norska krónan fellur til að laga sig að lægra olíuverði, en olía er meginútflutningur frænda okkar.

Engin umræða er í Noregi um að krónan sé ónýt eða að Noregur þurfi inn í Evrópusambandið til að fá ,,alvöru" gjaldmiðil.

Og yngsta frétt á heimasíðu Fylkisflokksins er orðin ársgömul.

 

Ríkjasmíði í Sýrlandi og breytt Evrópa

Stríðið í Sýrslandi byrjaði veturinn 2011, hluti af arabíska vorinu, lýðræðisvakningu sem náði til margra landa í þessum heimshluta. Assad forseti gerir allt sem hann getur til að halda völdum og andstæðingar hans eru margklofnir. Þeir hættulegustu eru Riki íslams sem stefnir að kalífaríki þar sem Sýrland og Írak eru nú.

Rússland og Kína styðja Assad forseta. Bandaríkin studdu í öndverðu hófsama uppreisnarmenn en þeir hafa tínt tölunni í stríði þar sem öfgarnar ráða. Íran styður einnig Assad forseta. 

Í sumar var haft eftir Obama Bandaríkjaforseta að líkur á samkomulagi um nýtt Sýrland hafi aukist með því að Rússar og Kínverjar skynjuðu að dagar Assad forseta væru senn taldir. Rússnesk uppbygging í Sýrlandi síðustu vikur bendir til hins gagnstæða.

Aðalritari Sameinuðu þjóðanna Ban Ki-moon viðurkennir að öryggisráðið, þar sem voldugustu ríkin sitja, hafi brugðist Sýrlandi. Játning aðalritarans er liður í viðbrögðum alþjóðasamfélagins við holskeflu flóttamanna frá Sýrlandi.

Arabar eru meginhluti Sýrlendinga. Flestir þeirra eru súnní múslímar, einn af hverjum tíu er kristinn og álíka tilheyrir trúflokki alavíta. Assad forseti og nánustu samverkamenn hans eru alavítar. Ef þeir hverfa frá völdum verður til valdatómarúm sem verður að fylla til að Sýrlandi sé stjórnað.

Vestræn nálgun á málefni Sýrlands er að smíða þurfi nýtt ríki utan um þá hópa sem landið byggja. Fæstir þessara hópa finna til samkenndar með sýrlensku þjóðerni. Ríkjasmíðin verður torsótt og tímafrek. Með flóðbylgju sýrlenskra flóttamanna yfir höfði sér er tíminn knappur á vesturlöndum.

Nýtt Sýrland verður ekki smíðað við samningaborðið á næstunni. Stríðsátök verða á dagskrá og heldur mun flóttamannastraumurinn aukast í bráð fremur en að dragi úr honum.

Flóttamenn frá Sýrlandi munu breyta Evrópu, ekki vegna þess að þeir eru svo margir, heldur af hinu að flæði þeirra inn í ríki Evrópusambandsins sýnir að landamæri ESB virka ekki.

Þegar það rennur upp fyrir íbúum ESB-ríkja að flóttamannavandinn mun aðeins aukast verður að breyta ESB verulega.

Tæknilegt sakleysi og sakleysi er sitthvað

Tæknilegt sakleysi í sakamálum felur í sér að rannsókn leiðir í ljós að ætlað brot mun ekki leiða til sakfellingar. Ástæður fyrir tæknilegu sakleysi geta verið margvíslegar, s.s. skortur á refsiheimildum, ónógar sannanir, óskýr lög og reglugerðir.

Í fáum orðum: maður getur verið sekur eins og syndin en tæknilega saklaus.

Málsvörn forstjóra Samherja í gjaldeyrismálinu er í fyrsta lagi að hann sé saklaus eins og nýfallin mjöll og í öðru lagi að Seðlabankinn láti stjórnast af einhverju öðru en faglegum sjónarmiðum.

Fréttatilkynning Seðlabanka útskýrir málefnalega tæknilegt sakleysi Samherja og forsvarsmanna félagsins.

Seinni liðurinn í málsvörn Samherja, um meintan illvilja Seðlabanka, fær illa staðist þar sem embætti sérstaks saksóknara tók kæru Seðlabanka til efnislegrar meðferðar sem leiddi til niðurstöðu um tæknilegt sakleysi. Ef málefnalegar ástæður væru ekki að baki kæru hefði ekki farið fram rannsókn.

Viðskiptafélagi Þorsteins Más frá tímum útrásar, Jón Ásgeir Jóhannesson, kenndur við Baug, heldur ávallt fram barnslegu sakleysi þegar á hann eru bornar sakir og kennir illvilja um opinberar ákærur. Jón Ásgeir er með fjölmiðla í sinni þjónustu til að undirstrika sakleysi sitt.

Þorsteinn Már ætti að finna sér betri fyrirmynd en Jón Ásgeir.

 

 

Tilraun til að breiða yfir mistök