RÚV styrkir stöðu sína í pólitíkinni

Hagsmunahópurinn á Efstaleiti fer að stórum hluta með dagskrárvaldið hér á landi. RÚV stjórnar fréttaflutningi, ákveður hvað eru fréttir og undir hvaða formerkjum þær eru sagðar.

RÚV er rekið fyrir skattfé almennings. Hagsmunahópurinn er í óformlegum bandalögum við þingmenn og stjórnmálaflokka.

Sigmar Guðmundsson fer beint úr höfuðstöðvum RÚV á Efstaleiti í framboð fyrir Viðreisn. Hagsmunahópurinn styrkir stöðu sína.

Sigmar í framboð fyrir Viðreisn

Píratar: Ísland er ónýtt

Píratar líta á Ísland sem þriðja heims þjóðríki þar sem allt er vaðandi í spillingu og almenningur undir hæl auðmanna. 

Píratar óska eftir að útlendingar komi til landsins og hafi eftirlit með með þingkosningunum i haust. Íslendingum sjálfum sé ekki treystandi fyrir frjálsum lýðræðiskosningum.

Spurning hvort Píratar þurfi ekki að finna sér nýtt þjóðríki fyrir hagsmunabaráttuna. Það eru takmörk fyrir því hve íslenska þjóðin getur brauðfætt marga sem krefjast þægilegrar innivinnu á góðu kaupi skattborgaranna. Í huga Pírata er það ónýt þjóð sem ekki skaffar þægilega innivinnu handa þeim sem eru of góðir til að dýfa hendi í kalt vatn.

Vill að ÖSE hafi eftirlit með alþingiskosningum

Siða-Sunna og Helgi Seljan: brotafólkið lyftir Jóhannesi

Helgi Seljan fréttamaður RÚV gerði Jóhannes Stefánsson frægan.

Mörgum spurningum er ósvarað um Jóhannes, t.d. hvort hann sé hættur að hringja ölóður í fólk og hóta lífláti, tengslin við suður-afrísku mafíuna, og síðast en ekki síst hvers vegna Jóhannes fattaði ekki fyrr en hann var kominn í bandalag með fyrrum viðskiptafélögum Samherja að óhreint mjöl var í pokahorni útgerðarinnar það syðra.

Ekkert af þessum atriðum mun verða rætt í spjalli Þórhildar Sunnu þingmanns Pírata við Jóhannes. Helgi Seljan hafði aðeins áhuga á Samherjahatri Jóhannesar. Sama gildir um Þórhildi Sunnu.

Þórhildur Sunna og Helgi Seljan eiga það sameiginlegt að vera siðbrjótar. Þórhildur var úrskurðuð brotleg við siðareglur alþingis en Helgi við siðareglur RÚV. 

Siðsemi er hvorki einkenni Pírata né hagsmunahópsins á Efstaleiti. Þórhildur Sunna og Helgi Seljan eru prýðileg dæmi um valdafrekju og yfirgang þar sem tilgangurinn helgar meðalið.  Annað er þingmaður en hitt RÚV-ari. En þau ganga til sömu verka; níða aðra í þágu sjálfsupphafningar.

 

Jóhannes ræðir málefni Samherja við Þórhildi

Samherjakonan og stolinn sími Páls - hvar er Helgi Seljan?

Arna Bryndís lögmaður Samherja má ekki vera ræðismaður Kýpur, segir Björn Leví pírati. Ástæðan er sú að stolinn sími Páls Stein­gríms­son­ar, sem einnig er starfsmaður Samherja, sýndi að Arna Bryndís og Páll töluðu máli Samherja.

Píratinn Björn Leví finnur sem sagt glæp þar sem fólk vinnur vinnuna sína.

Vinstrimenn og hagsmunahópurinn á Efstaleiti hljóta að kalla til rannsóknarblaðamanninn Helga Seljan til að upplýsa starfsglæpi Örnu Bryndísar og nafna. Helgi kann þá list að töfra fram skjöl og pappíra til framdráttar málstaðnum.

Óþarfi er að fjölyrða um stuldinn á síma Páls. Góða fólkið stundar ekki glæpi.

„Skæruliði“ Samherja er ræðismaður Kýpur á Íslandi

Lög á fjölmiðla, Katrín

Óvandaðir fjölmiðlar stunda eineltisfréttamennsku með samsæriskenningum spillingu hér og þar án heimilda fyrir ásökunum. Hagsmunahópurinn á Efstaleiti gengur jafnvel enn lengra og gerir samkomulag við aðra ríkisstofnun um að knésetja fyrirtæki. Þegar siðareglur eru sannanlega brotnar hefur það engar afleiðingar, eins og nýlegur siðadómur RÚV staðfestir.

Nú þegar allir fjölmiðlar, RÚV og niður úr, eru komnir á opinbera framfærslu hlýtur að koma til skoðunar að setja lög um starfshætti fjölmiðla og tryggja lágmarksgæði og koma í veg fyrir misbeitingu fjölmiðlavalds. 

Ekki satt, Katrín forsætis?

Tímabært að endurskoða fjölmiðlalögin

Píratar: sekt, uns sakleysi sannað

Píratar reka félag sem heitir Transparency International. Félagið sendir reglulega frá sér yfirlýsingar um að Ísland sé gerspillt. Raunverulegur tilgangur félagsins er að skapa Pírötum pólitísk sóknarfæri.

Í nýrri yfirlýsingu er Samherja-málið mjólkað. Þar kemur fyrir þessi setning:

Fyrirtæki og einstaklingar sem sanna vilja sakleysi sitt...

Það er vitanlega kjörstaða fyrir Pírata að ásökun jafngildi sekt. Í samvinnu við hagsmunahópinn á Efstaleiti er hægt að dreifa ásökunum um spillingu og krefja fólk og fyrirtæki um ,,sönnun á sakleysi."

Hornsteinn réttarríkisins er sakleysi uns sekt er sönnuð. Píratar snúa meginreglunni á hvolf: sekt, uns sakleysi er sannað.

Píratískur fasismi í sauðagæru.

Umhverfisstofnun blekkir, lýgur með þögninni

Umhverfisstofnun segir eldgosið í Geldingadölum ekki hálfdrætting í losun gróðurhúsalofttegunda á við bílaumferðina. Frosti Sigurjónsson skrifar af því tilefni:

Hið rétta er að eldgosið losar hátt í fjórfalt meira magn af CO2 dag hvern en öll bílaumferð á landinu. (Gosið losar ríflega 10 þúsund tonn af CO2 á dag skv. upplýsingum Veðurstofunnar en skv. upplýsingum Umhverfisstofnunar losaði vegaumferð á Íslandi alls 952 þúsund tonn CO2 ígíldi árið 2019 sem gerir 2,6 þúsund tonn á dag. 10/2,6= 3,84

En það er meira sem hangir á spýtunni. Vatnsgufa H20 er gróðurhúsalofttegund ekki síður en koltvísýringur CO2. Ógrynni vatnsgufu streymir frá Geldingadölum sem þarf að taka með í reikninginn þegar áhrif jarðeldanna eru metin m.t.t. losun gróðurhúsalofttegunda.

Áður hefur verið minnst á leyndarhyggjuna í umræðunni. Umhverfisstofnun er með á forsíðu sinni umfjöllun um skammtímaáhrif eldgossins. En stofnunin leggur sig fram um að ýmist blekkja eða ljúga með þögninni þegar kemur að langtímaáhrifum.

Það er löngu vitað að loftslagsumræðan er andsetinn pólitík. En það má gera þá kröfu til opinberrar stofnunar að hún sé málefnaleg og byggi á gögnum en ekki pólitík.

Júróvisjón og ástand vestrænnar menningar

Söngvakeppnin kennd við Evrópu er menningarfyrirbæri. Þar má lesa hvernig háttar samfélaginu sem fyrirbærið tilheyrir. 

Glitrandi skrautbúningar og frökk sviðsframkoma réð ferðinni í sumum atriðum. Þar sveif yfir vötnum andi hnignunar. Búlgaría tefldi fram saklausri stúlku sem dásamaði föður sinn. Úkraína sýndi þjóðlegan fróðleik með hvassri þjóðernishyggju. Atriði Frakklands var óður til veraldarhyggju þar sem innflytjandi söng nútímaútfærslu af þjóðsöngnum La Marseillaise. Framlag Þjóðverja var yfirlýsing að þeim þætti keppnin leiðinleg. Bretar sendu Brexit-framlag.

Ítalska sigurlagið var dauðarokk hljómsveitar með norrænu nafni og söngvara sem ekki vissi almennilega í hvaða heimi hann ferðaðist.

Framlag Íslendinga var heilsteyptur þjóðarsómi, bæði söngatriðið og stigakynningin. Sviðsatriðið var upptaka í leikskólastíl þar sem sungið var á útlensku. Stigakynningin var senuþjófur. Búralegur kynnir gaf 12 stig til dægurlags sem ekki var í keppninni.

 

Segist ekki hafa neytt kókaíns

RÚV yfirtekur BÍ - en kvartar undan Samherja

Fréttamenn á RÚV eru í Félagi fréttamanna, sem er innan vébanda BHM. En til að styrkja stöðu sína ákváðu RÚV-arar að yfirtaka Blaðamannafélag Íslands, BÍ, með framboði Sigríðar Daggar.

Heiðursmannasamkomulag hefur verið um að fréttamenn RÚV láti BÍ í friði enda taka þeir laun samkvæmt kjarasamningi Félags fréttamanna. 

Yfirtaka RÚV á BÍ var gagngert til að styrkja stöðu RÚV í áróðursstríði gegn Samherja. Sigríður Dögg var varla sest í formannsstólinn þegar hún hóf atlögu að Morgunblaðinu fyrir að birta auglýsingu frá Samherja. 

En, sem sagt, Samherji má ekki hafa skoðun á hvernig RÚV sækir sér skotfæri í áróðursstríðinu. Segir RÚV.

Samherji hafi reynt að hafa áhrif á formannskjör BÍ

Samsæri gegn veruleikanum

Hversdagslegur skilningur á veruleikanum er sá að hann sé óháður hvað fólki finnst og sýnist, einfaldlega er. Stundum er snúið að lýsa veruleikanum og sumt er alltaf háð innri vitund. Það er til dæmis hægt að sýna beinbrot með tækni sem gegnumlýsir líkamann en ekki hægt með sama hætti að sýna tilfinninguna að vera fótbrotinn. Tilfinningin er bundin við einstaklinginn sem finnur hana.

Engu að síður. Veruleikinn er hlutlægur og liggur utan vitundar okkar, þótt okkur finnist margt misjafnt um þennan veruleika.

Samsæriskenningar eiga það sameiginlegt að spila á tilfinningar manna fremur en að lýsa hlutveruleikanum. Loftslagssamsærið, að jörðin sé að farast vegna manngerðs veðurfars, er tilbúningur, hönnuð frásögn. Í einn stað sækir loftslagssamsærið flugufót í vísindin en í annan stað spilar samsærið á heimsendatrú sem fylgt hefur manninum frá örófi alda. Biblían segir frá efsta degi, Völuspá frá ragnarökum. Al Gore og Gréta Thunberg klappa steininn um óbyggilegan heim vegna koltvísýrings. Í stað guðs og Loka kemur CO2.

Kínaveiran er ósýnileg auganu, líkt og guð, Loki og koltvísýringur. En með þekktri tækni er hægt að finna veiruna, greina og búa til mótefni. Sögulok skyldi ætla. En, nei, það hlýtur að vera eitthvað meira á bakvið, alheimsafl sem prufukeyrir heimsendi með farsóttinni.

Eitt einkenni á heiminum, veruleikanum sem sagt, er að hann verður ekki skilinn til fulls. Maðurinn sem tegund er afurð náttúrunnar. Eplið kennir ekki eikinni að vaxa. Vandi mannsins er takmarkaður skilningur en nær óendanlegt ímyndunarafl.

Nýjasta samsæriskenningin snýst um fljúgandi furðuhluti. Æðstu hermálayfirvöld í Bandaríkjunum, Pentagon, eru sögð birta innan skamms skýrslu sem rennir stoðum undir vitsmunalíf utan veruleikans. Einmitt það sem við þurfum núna: fljúgandi álfa á Teslum sem keyptar voru fyrir rafmynt.

Eru álfar kannski menn? er spurt í dægurlagatextanum. Svarið er þetta: ekkert nema.

Faraldur samsæriskenninga nær fótfestu í Evrópu