Einar ruglar saman veðri og loftslagi

Fyrir 5 dögum sagði veðurfræðingur á Veðurstofu Íslands ,,að ekki sé kom­in nein lang­tímaspá fyr­ir versl­un­ar­manna­helg­ina sem mark er á tak­andi." Ein­ar Svein­björns­son veður­fræðing­ur þykist aftur á móti vita hvernig veðrið verður eftir mörg ár.

Einar veit vitanlega ekkert um veðurfar framtíðarinnar. Ekki frekar en að hann viti kjörhita jarðarinnar. Sumt veit enginn, m.a. þetta tvennt: veður langt fram í tímann og kjörhita jarðar.

Þeir sem tala faglega um loftslagsmál gera skýran greinarmun á veðri og loftslagi. Veðurfræðingurinn Anthony Watts heldur úti fréttasíðu um loftslagsmál. Hann útskýrir muninn sem Einar ruglar með: ,,Veður er atburður sem getur varað í nokkrar mínútur og upp í nokkra daga [...] Loftslag er meðaltal veðurs yfir 30 ára tímabil skv. skilgreiningu Alþjóðaveðurfræðistofnunarinnar, VMO." 

Hvers vegna ruglar Einar með hugtök? Jú, til að ala á ótta almennings. Einar er fangi pólitískrar hugmyndafræði sem kennir að heimurinn sé á heljarþröm vegna manngerðra loftslagsbreytinga. Þegar óvenjuleg hlýindi mælast stekkur Einar fram en hann þegir í kuldakasti. Einar og sálufélagar handvelja staðreyndir sem falla að hugmyndafræðinni en líta framhjá staðreyndum sem mæla gegn. Skipulagðar blekkingar.

Hugmyndafræðin er skáldskapur, ekki vísindi. Engin hamfarahlýnun á heimsvísu hefur átt sér stað síðan mælingar hófust. Síðustu 150 ár hefur heimurinn hlýnað um 1 gráðu, segi og skrifa eina gráðu á selsíus. 

Í viðtalinu vitnar Einar í eina rannsókn ,,þar sem rann­sak­end­ur komust að þeirri niður­stöðu að tvö­föld­un á CO2 í loft­hjúpi gæti valið þeirri hringrás­ar­breyt­ingu að sumri í þá veru að þurrk­ar og hit­ar yrðu al­geng­ari í Evr­ópu." Orðalagið blekkir enda hannað til þess. Ef ekki er hægt að spá um veðrið nema nokkra daga fram í tímann er röklega ómögulegt að segja til um loftslag framtíðar.

Spádómar um loftslag framtíðarinnar eru álíka ábyggilegar og spá um veðrið verslunarmannahelgina eftir 5 ár. Sérfræðingar sem standa undir nafni vita þetta. Til dæmis William Happer loftslagsvísindamaður og fyrrum prófessor í Princeton til áratuga: spár um loftslag framtíðar eru vísindaskáldskapur.

Með því að nota kennivald sitt sem veðurfræðingur til að boða kukl ryður Einar brautina fyrir fasista er vilja afnema frjálsa orðræðu. Hugmyndafræðin um manngert loftslag stenst ekki skoðun og því verði að banna andmæli. Fasismi í nafni manngæsku.

„Þessar hitabylgjur verða alltaf tíðari“

Woke hjálpar Rússum, valþröng Selenskí

Rússar eiga vaxandi vinsældum að fagna í Afríku, skrifar Telegraph sem er and-rússneskur miðill, líkt og þorri vestrænna fjölmiðla.

Woke-hugmyndafræðin tröllríður vesturlöndum síðustu ári. Hugmyndafræðin málar hvíta vesturlandabúa sem rasista og síðnýlendukúgara. Orðræðan spilar beint upp í hendurnar á Rússum sem, þótt hvítir séu, voru aldrei nýlenduveldi. Og, það sem meira er, engin woke-hugmyndafræði er í Rússlandi.

Samningurinn í Tyrklandi, milli Úkraínu og Rússlands, með blessun Sameinuðu þjóðanna, um kornútflutning forðar fátækum þjóðum Afríku frá hungursneyð. Pútín græðir á þessu, segir Telegraph gremjulega.

Samningurinn er sagður einn af nokkrum sem voru undirritaðir samtímis í Istambúl. Aðeins hluti samninganna er opinber. Stjórnmálaskýrendur segja að Pútin hafi fengið það sem hann þurfti.

Úkraínumenn virðast hafa verið neyddir af bakhjörlum sínum, vesturlöndum, að skrifa undir. Til að auglýsa vanmátt stjórnarinnar í Kænugarði skutu Rússar flugskeytum á Ódessu, einu hafnarborg Úkraínu við Svartahaf, og mana Selenskí að lýsa samningana dauða og ógilda. Ef Selenskí gerir það situr hann uppi með Svarta-Pétur, óvinur sveltandi þjóða.

Woke-vesturlönd stjórna fréttaumfjöllun Úkraínudeilunnar en Pútín ræður atburðarásinni.

Rússum er ekki treystandi að mati Selenskí

Skoðun rannsökuð, en ekki leki

Sigríður J. Friðjónsdóttir ríkissaksóknari ætlar að ,,skoða" ummæli Helga Magnúsar Gunnarssonar vararíkissaksóknara. Í raun eru ummælin rannsökuð. Annars myndi Sigríður einfaldlega segja sína skoðun á skoðunum Helga.

Í vor var framið alvarlegt trúnaðarbrot í landsrétti þegar rannsóknagögnum var lekið til RSK-miðla sem hýsa sakborninga í alvarlegu refsimáli er varðar byrlun og gagnastuld. Alvöru glæpir, sem sagt, ekki skoðanaglæpur. Tilfallandi athugasemd 24. maí fjallaði um málið: 

Engin fordæmi eru fyrir því að starfsmaður landsréttar leki trúnaðargögnum, staðfestir Gunnar Viðar skrifstofustjóri landsréttar í Fréttablaðinu. En einmitt það gerðist í vor þegar gögnum var lekið í RÚV, Stundina og Kjarnann, RSK-miðla. Gögnin varða lögreglurannsókn á byrlun og gagnastuldi þar sem fjórir blaðamenn RSK-miðla eru sakborningar. 

Engin rannsókn var gerð á lekanum, hvorki af hálfu landsréttar né ríkissaksóknara. Það má sem sagt grafa undan réttarríkinu með því að spilla sakamálarannsókn á alvarlegum glæp. En það má alls ekki hafa sína skoðun á samfélagsmálum. Rétttrúnaðurinn trompar réttarríkið. 

Ummæli Helga til skoðunar hjá ríkissaksóknara

Slaufun að kröfu Andra Snæs

Heimurinn brennur og ritstjórn Morgunblaðsins á að leggja niður störf þegar Staksteinar birta tilfallandi gagnrýni á heimsendaspár vegna loftslags af mannavöldum. Á þessa leið er málflutningur Andra Snæs Magnasonar rithöfundar á Fjölmiðlanördum á Facebook. Stundin endurómar.

Tilefnið er blogg þar sem vitnað er í tvo íslenska veðurfræðinga, bandarískan loftslagsvísindamann, auk annarra heimilda, og dregnar ályktanir sem eru Andra Snæ ekki að skapi.

Fyrir þrem árum krafðist Andri Snær þöggunar gagnrýnisradda á manngert loftslag. Síðan hefur slaufunarmenningin vaxið og dafnað. Nú er tímabært að krefjast að starfsfólk fjölmiðla leggi niður störf ef svo ber við að vitnað er í aðra en handhafa rétttrúnaðarins.

Menn eins og Andri Snær eru óvinir frjáls samfélags viti borinna manna. Í menningargúlagi Andra Snæs er aðeins ein skoðun leyfð og rökræður bannaðar. 

Árið 2019, sama ár og hann heimtaði þöggun, var Andri Snær í fréttum vegna andlátsfregnar sem hann samdi um jökulinn Ok er rithöfundurinn sagði vera að hverfa vegna manngerðs veðurfars. Andri Snær fíflaði Katrínu forsætis með sér í pílagrímsför á hálendið með minningarskjöld. En jökullinn hvarf 59 árum áður, eins og rifjað var upp í tilfallandi athugasemd. Náttúran hafði framið glæpinn fyrir tveim kynslóðum en Andra Snæ var í mun að kenna núlifandi Íslendingum um voðaverkið. 

Ofstæki kjána er öðrum þræði skoplegt en hinum þræðinum sorglegur vitnisburður um menningarástand.

 

Trump sýknaður en samt sekur

Trump þáverandi forseti stjórnaði ekki atlögunni 6. janúar 2021 að þinghúsinu í Washington. Ekki frekar en að Pútín Rússlandsforseti hafi tryggt kjör Trump haustið 2016. Stórar ásakanir en ósannar. 

Andstæðingar Trump segja hann ekki njóta trausts. Rökin eru þau að þótt Trump sé saklaus eru ásakanir svo alvarlegar að ótækt sé að Trump fái kjör á ný, jafnvel þótt hann hafi til þess kjörfylgi.

Málflutningurinn er tímanna tákn. Saklausir menn eru sekir ef ásakanir eru nógu stórar. 

Fylgdist með árásinni í sjónvarpinu og gerði ekkert

Ný heimsskipan eftir stríð

Stofnað var til Úkraínustríðsins með ásetningi beggja stríðsaðila að breyta heinspólitíkinni. Vestrið, þ.e. Bandaríkin og Nató, gerðu bandalag við Úkraínustjórn um að klekkja á Rússum.

Obama þáverandi forseti Bandaríkjanna sagði 2014 að Rússland væri veikt og yrði að kenna lexíu; þá að standa og sitja eins og vestrið býður. Vesturlönd byggðu upp Úkraínuher frá grunni, með fjármagni, vopnum og þjálfun skv. handbókum Nató.

Rússar líta á stríðið sem prófstein á það hvort landið eigi sjálfstæðan tilverurétt án þess að krjúpa fyrir Bandaríkjunum og Nató. Pútín talar um nýja heimsskipan að loknu hernaði. 

Eftir að stríð skall á í febrúar var lokað á allar málamiðlanir. Annar aðilinn verður að tapa og hinn að sigra. Aðeins fræðilegur möguleiki er á jafntefli. Það jafntefli, í formi friðarsamninga, yrði annað tveggja á rússneskum forsendum eða vestrænum.

Ef vesturlönd og Kænugarður sigra er Rússland búið að vera. Nágrannar Rússa, gömlu sovétlýðveldin, myndu narta í hræið og fyrirsjáanlegur innanlandsófriður ylli endalokum rússneska ríkisins. 

Sigri Rússland réðu vesturlönd ekki lengur dagskrá heimsmálanna. Vesturlönd yrðu ekki lengur einráð fyrirmynd ríkja Asíu, Afríku og Suður-Ameríku. Rússland í bandalagi við Kína yrði mótvægi.  

Vestur-Evrópa, þ.e. ESB, verður sérstaklega illa úti ef Rússar fara með sigur af hólmi. Vegna landfræðilegrar legu, hernaðarlegs vanmáttar og hráefnafátæktar, orka og korn, verður Vestur-Evrópa háð velvilja rússneskra yfirvalda í mun meira mæli en hingað til. Fullmikið væri að segja Evrópusambandið á rússnesku áhrifasvæði. En það stappar nærri. (Innan sviga: Hjörtur J. Guðmundsson bendir á hæpinn málflutning íslenskra ESB-sinna, sem halda friður og öryggi fáist í Brussel.)

Vígaferlin á sléttum Garðaríkis breyta heiminum. Til átaka var stofnað með einbeittum ásetningi stórvelda að útkljá með ófriði ágreining sem mátti leysa með samningum.  Almenningur finnur á eigin skinni hörmungar stríðsins. Breska útgáfan Guardian birtir myndband úkraínskar konu sem örvæntir um eiginmanninn er skal með góðu eða illu á vígvöllinn. Menningarþjóðir þurfa sitt fallbyssufóður.      

 

 

Rússar einbeita sér ekki lengur aðeins að austrinu

Kalt Ísland, heitt Bretland - hvað með það?

,,Fyrstu 15 dagar júlímánuðir hafa verið í kaldara lagi í Reykjavík. Meðalhiti þeirra er 10,4 stig, -0,8 stigum neðan meðallags sömu daga 1991 til 2020 og -0,7 stigum neðan meðallags síðustu tíu ára. Hitinn raðast í 19. hlýjasta sæti (af 22 á öldinni)", skrifar Trausti Jónsson veðurfræðingur.

Þannig er það með veðrið, það er breytilegt milli landssvæða og breytist frá einum tíma til annars. Loftslagsváin er ýkjusaga, sagði annar gamalreyndur íslenskur veðurfræðingur, Magnús Jónsson; ,,Hlýnun sem lík­lega er orðin um 1°C á síð­ustu 150 árum þar sem lang­tíma­með­al­hiti jarð­ar­innar hefur hækkað um 0.1°C á hverjum 15 árum að jafn­að­i." 

Loftslagsvísindamaðurinn John Christy var svo vinsamlegar að gefa Láru á Refskinnu færi á spjalli um veður. Christy heldur gagnabanka í samvinnu við félaga sinn Roy Spencer um hitafar lofthjúpsins annars vegar og hins vegar spádóma hamfarasinna. Í áratugi hafa spádómar um hamfarahlýnun reynst rangir.

En svo koma nokkrir heitir dagar og fullyrðingar um sameignlegt sjálfsmorð mannkyns streyma frá fólki sem á að heita með fullu viti, eins og António Guterres, aðalframkvæmdastjóri Sameinuðu þjóðanna. Sameinuðu þjóðirnar handvöldu vísindamenn sem trúa á manngert veður fyrir meira en 30 árum. Ástæðan var pólitísk, ekki vísindaleg. Sameinuðu þjóðunum vantaði hlutverk á alþjóðavísu.

Hamfaraspámennskan er stóriðnaður sem freistar þess að valta yfir þau sannindi að náttúran en ekki maðurinn stjórnar veðrinu.

Hitinn yfir 40 gráður í fyrsta sinn

Fíkn, vændi og ómöguleiki

Fíkn er hugarástand. Langt leiddur fíkill er skeytingarlaus um annað en fullnægju fíknarinnar. Forsenda fyrir bata er að fíkill viðurkenni ástand sitt. Iðulega gerir hann það ekki fyrr en öll sund eru lokuð.

Sumir vinstrimenn vilja lögleiða fíkniefni en þora ekki að segja það upphátt. Þeir bera fyrir sig fíkla, segja þá eiga bágt og ekki skuli refsa þeim tvöfalt. En sjálfskaði er ekki refsing heldur sjálfskaparvíti. Ef lög banna eitthvað og einhver brýtur þau refsilaust eru lögin tilgangslaus.

Frjálshyggjumenn hlynntir lögleiðingu fíkniefna koma til dyranna eins og þeir eru klæddir (almennt er þetta munurinn á vinstri- og hægrimönnum) og segja fullveðja einstaklinga eiga sjálfa að ákveða hvað þeir innbyrða.

Rök frjálshyggjumanna eru málefnalega og siðferðilega sterkari en vinstrimanna, enda híma þeir ekki í skápnum með afstöðu sína.

Sömu rök frjálshyggjumanna gilda um lögleiðingu vændis. Einstaklingurinn eigi sig sjálfur og megi selja aðgang að skrokknum séu kaupendur fyrir hendi.

Tillaga, eða öllu heldur hugmynd, heilbrigðisráðherra um að fíklar fái refsilaust að höndla með ólögleg fíkniefni skapar hvata tómstundaneytenda, sem enn eru ekki fíklar, að lýsa sig háða eiturlyfjum. Ekki er það hlutverk stjórnvalda að hvetja fólk til sjálfsskaða.

Lögleiðing fíkniefna verður aðeins gerð með rökum frjálshyggjumanna. Önnur rök eru meira og minna siðlaus og óverjandi. Slái lögleiðing fíkniefna í gegn er hindrunum fyrir lögleiðingu vændis rutt úr vegi. Lögleiðing sjálfsskaða með fíkniefnum en róttækari breyting en að leyfa vændi. Óhófleg vímuefnanotkun er meiri misþyrming en að selja og kaupa blíðu.  Annað hvort á einstaklingurinn rétt að ráðstafa skrokk sínum eða ekki. 

Pólitíski ómöguleikinn er sá að fyrr frýs í helvíti en að vinstrimenn og frjálshyggjumenn verði sammála.

Harla gott fyrir okkur íhaldsmennina. Við heiðrum gildi er gæta jafnræðis milli einstaklingsfrelsis og samfélagsheilla.

Tillagan sé ekki framkvæmanleg

Selenskí rekur æskuvin, landráð á æðstu stöðum

Ívan Bakanov, yfirmaður SBU, úkraínsku leyniþjónustunnar, er landráðamaður sagði Selenskí forseti í gær og rak hann úr embætti. Bakanov er æskuvinur Selenskí og viðskiptafélagi. Bakanov stjórnaði framleiðslu á sjónvarpsþáttunum ,,Þjónn fólksins", um framhaldsskólakennara er varð forseti. Selenskí lék aðalhlutverkið og sigraði í forsetakosningum í framhaldi.

Hreinsanir í æðstu embættum í Kænugarði um helgina leiddu einnig til falls Irenu Venediktovu ríkissaksóknara.

Staðkunnugur álitsgjafi tengir hreinsanir helgarinnar við ásakanir um að starfsmannastjóri Selenskí forseta, Andriy Yermak, sé á rússneskum mála. Bandarískur þingmaður, Victoria Spartz, ber fram þær ásakanir. Þingmaðurinn er fæddur í Úkraínu.

Úkraínskir embættismenn í héruðum herteknum af Rússum vinna með hernámsliðinu. 651 mál samverkamanna eru til rannsóknar, segir Selenskí. Í mörgum tilfellum eru um að ræða undirmenn Bakanov og Venediktovu.

Landráð á stríðstíma er oftast dauðasök. Ekki fer neinum sögum af afdrifum burtrekinna embættismanna.

Úkraínskir embættismenn eru sumir hverjir nátengdir Rússlandi. Bakanov æskuvinur, til dæmis, á rússneska eiginkonu. Faðir Yermak starfsmannastjóra er yfirmaður í rússneska hernum.

Rússar þegja og njóta tíðinda helgarinnar, segir fréttamaður Die Welt í Moskvu.

Stjórnin í Kænugarði er sjálfri sér sundurþykk. Hreinsanir helgarinnar ala á ótta og tortryggni. Á vígvellinum er andstreymi og óreiða á heimavígstöðvum. Vestræna verkefnið í Garðaríki er að fara í hundana.

 

 

Selenskí rekur ríkissaksóknarann

Þórður Sær gjaldfellir Jóhannes - og sjálfan sig

Jóhannes Stefánsson uppljóstrarinn í Namibíumálinu fær þessa umsögn í Kjarnanum undir ritstjórn Þórðar Snæs Júlíussonar:

Jóhannes hafi svo lýst fjár­hagskröggum sem hann væri í vegna áfeng­is- og fíkni­efna­neyslu og að hann væri að leita leiða til að bæta mann­orð sitt.

Ennfremur:

Hatuikulipi sagði að vegna „stöðugrar fíkni­efna­notk­un­ar“ Jóhann­esar hafi hann skaðað alvar­lega samn­inga sem gerðir voru milli Sam­herja og kvóta­rétt­hafa í Namib­íu. Hann hafi líka ítrekað þurft að borga trygg­ingu til að losa hann úr fang­elsi

Tilvitnanir hér að ofan eru teknar úr tveim fréttum í Kjarnanum, sem birtust í fyrradag, föstudaginn 15. júlí. Fréttirnar byggja á namibískum fjölmiðlum sem greina frá málaferlum þar syðra er hófust með fréttahrinu RSK-miðla (RÚV, Stundin og Kjarninn) í nóvember 2019 - Namibíumálið. Aðeins namibískir aðilar eru ákærðir, enginn Íslendingur eða íslenskur aðili.

Eina heimild RSK-miðla í Namibíumálinu er Jóhannes uppljóstrari, sem hingað til hefur verið í helgra manna tölu, bæði hjá RSK-miðlum og Samfylkingunni og Pírötum. Bragð er að þá barnið finnur.

Í föstudagsfréttum Kjarnans er einnig fjallað um hvernig Jóhannes lék tveim skjöldum, þóttist ýmist vera starfsmaður Samherja eða kominn í bandalag með öðrum, t.d. Ísfélaginu.

Tilfallandi athugasemdir fjölluðu fyrir ári síðan um þessa þætti í fari Jóhannesar, að hann vissi hvorki upp né niður hvað hann var að segja - sjá hér og hér. 

Ef Þórður Snær ritstjóri væri aðeins meiri blaðamaður og aðeins minni áróðursmaður hefðu bjöllur átt að hringja í kollinum á honum um leið og hann sá til Jóhannesar. Gaurinn með nafn guðspjallamannsins er einfaldlega ótrúverðug heimild. Blaðmenn eiga að byggja fréttir á trúverðugum heimildum, ekki slúðri fólks sem á andlega bágt. En sumir blaðamenn eru í áróðri þótt þeir þykist skrifa fréttir.

Þórður Snær ásamt þremur öðrum blaðamönnum á RSK-miðlum er með stöðu sakbornings í sakamáli er varðar byrlun og gagnastuld til að réttlæta Namibíumálið. Jóhannes er ekki einn um andleg bágindi.