Sanna og Úrsúla um Ameríku og evrópskt siðferðisþrek

Játningar tveggja leiðtoga í Evrópu síðasta sólarhringinn eru fréttnæmi. Sanna Marin, forsætisráðherra Finna, sagði í Eyjaálfu að Evrópa væri háð Ameríku. Án Bandaríkjanna væri Evrópa upp á náð og miskunn Rússa. 

Sanna heimsótti Ísland áður en hún hélt héðan hálfan hnöttinn. Á Fróni sagði hún að Úkraína yrði að sigra Rússa. Séu þessi tvenn ummæli Sönnu lögð saman þýða þau að Evrópa sé á forræði Bandaríkjanna.

Sleppi Bandaríkin hendinni af Evrópu verður álfan að rússnesku áhrifasvæði.

Meiri líkur en minni eru á að Bandaríkin næstu árin reki hlédrægari utanríkisstefun en síðustu þrjátíu ár. Árangurinn svarar einfaldlega ekki kostnaði. Þýskur herforingi, Kujat, segir bandarísk yfirvöld leggja sig í líma að koma í veg fyrir stigmögnun Úkraínustríðsins. Bandaríkin neita stjórninni í Kænugarði um langdræg vopn, s.s. eldflaugar, sem ná inn í Rússland.

Rússar geta flutt mannskap og vopn óhindrað og stillt upp á vígvellinum. Úkraínu getur það ekki, hver þumlungur landsins er í skotfæri Rússa. Kujat segir Rússa hingað til aðeins hafa notað lítið brot af herstyrk sínum. Úkraína, aftur, skrapar botninn og fær stöðugt minni birgðir frá vesturlöndum. Skriftin á veggnum er öllum læs. Fyrr heldur en seinna tapar Úkraína, - nema samið verði um frið.

Yfirvofandi stefnubreyting í Washington skilur Evrópu eftir í lítt eftirsóknarverðri stöðu. Þeir á Íslandi sem vilja inngöngu í Evrópusambandið ættu að íhuga framtíðarsýn þar sem Brussel tekur mið af hagsmunum Rússlands, beinlínis af illri nauðsyn.

Seinni ummælin, sem urðu fréttaefni í gær, koma einmitt frá Úrsúlu von der Leyen, forseta framkvæmdastjórnar ESB. Hún flutti ávarp á Írlandi. Þar líkti hún stöðu Íra fyrrum, þegar þeir börðust við ofurefli með frelsisþrá eina að vopni, við Úkraínu samtímans. Samlíkingin fellur ekki í kramið hjá Englendingum. Ávarp Úrsúlu er ,,handan þess að vera viðbjóðslegt," er haft eftir enskum þingmanni.

England sat yfir hlut Íra, allt frá dögum Normannakonunga á miðöldum og fram á síðustu öld. Samlíking forseta ESB á Englendingum og Rússum hittir í hjartastað djúpa vestræna sannfæringu: við stöndum ofar Rússum að siðferði og menningu.

Samlandi Úrsúlu flutti sitt síðasta útvarpsávarp 21. apríl 1945. ,,Bolsévikkar [Rússar] standa við borgarmörk Berlínar," sagði hann, ,,framtíð Þýskalands og Evrópu er í húfi." Tíu dögum síðar var mælskumaðurinn allur. Hann féll fyrir eigin hendi og tók með sér í eilífðina eiginkonu og ung börn, fimm dætur og einn son.

Evrópskt siðferðisþrek andspænis Rússum er samt við sig í dag og það var á dögum þriðja ríkisins.

„Við værum í vandræðum án Bandaríkjanna“

Endalausa stríðið í Evrópu rumskar

Fjárkröfum Pólverja á hendur Þjóðverjum vegna innrásarinnar 1. september 1939 er að nokkru leyti svarað með landakröfum Þjóðverja sem imprað hefur verið á, Pólverjum til lítillar skemmtunar.

Eftir stríðslok voru landamæri Póllands færð í austur, á kostnað Þjóðverja. Pólverjar á hinn bóginn töpuðu landi í austri til Úkraínu sem þá var hluti Sovétríkjanna. Um leið og Pólverjar gera fjárkröfu á þá þýsku undirbúa þeir landakröfu á fyrrum pólskt land sem er hluti Úkraínu. Rúmenar og Ungverjar gera einnig tilkall til héraða í Ungverjalandi.

Söguleg breyting landamæra á meginlandi Evrópu er gerð í stríðum og eftirmálum þeirra. Tilefni innrásar Þjóðverja í Pólland 1939 var þýskur minnihluti í Póllandi, sem Versalasamningurinn eftir fyrra stríð 1914-1918 færði Pólverjum.

Gjöf Krútsjoff þáverandi sovétleiðtoga á rússneskum Krímskaga til Úkraínu á sjötta áratugnum bjó í haginn fyrir ósætti til framtíðar. Gjöfin var til marks um bræðraþel Rússa og Úkraínumanna í sovésku ríkjabandalagi.

Í anda sama kærleika fengu Finnar sjálfstæði frá Rússlandi eftir stofnun Sovétríkjanna. Besti vinur barnanna, prestlærlingurinn Stalín, taldi finnsku gjöfina full rausnarlega og tók með vetrarstríðinu tilbaka þau finnsku héruð er næst stóðu Pétursborg.

Kalda stríðið frysti landamæri Evrópu. Á þeim tíma óx úr grasi kynslóð vestrænna valdamanna sem trúði á vald sannfæringar fremur en hervald. Evrópusambandið er þar hákirkjan. Unglingadeild kirkjunnar boðar engin landamæri, no borders.

Í kringum aldamótin var vestrænt sannfæringarvald orðið slíkt að stórfelldur útflutningur hófst til Afganistan, Írak, Líbýu og Sýrlands. Vestræna hákirkjan steytti þar á skeri íslamskrar trúarmenningar.

Ófarir í landi spámannsins kenndu vestrinu enga lexíu. Ímyndin um einn heim vestrænan var of sterk til að standast freistinguna. Krossferð í austurveg var sett á dagskrá.

Úkraínustríðið afhjúpar þá blekkingu að sannfæringarvald trompi hervald. Meintir siðferðilegir yfirburðir mega sín lítils án vopna. Til að nota vopnin þarf hermenn.

Liðlega hundrað ár eru síðan ungir evrópskir karlmenn voru í milljónavís leiddir eins og sláturfé í skotgrafirnar á Flandri. Í framhaldi af þeim óskapaði festu öfgar rætur, fasismi og kommúnisti. Annað stríð hófst sem skildi eftir sig Auschwitz.

Endalausa stríðið í Evrópu rumskar eftir 70 ára svefn. Ráðamenn álfunnar kunna vonandi fótum sínum forráð og hemja stríðslöngunina sem vaknaði með hroka. Til að sefa löngunina þarf raunsæi og hófstillingu.

Við Volgubakka er ekki næg eftirspurn eftir vestrænni menningu. Ekki frekar en í löndum spámannsins. Eitt einkenni þessarar menningar er að þeir sem áður kenndu sig við frið og umburðarlyndi, frjálslyndir vinstrimenn, eru helstu stríðsæsingarmenn vestursins. Þeir vilja bara ekki með nokkru móti fórna eigin blóði, en sem mestu af því slavneska. Það eitt og sér vitnar um úrkynjun.   

 

Stríðsskaðabætur frá Þjóðverjum tímabærar

3 Nató-ríki vilja sneiðar af Úkraínu

Nató-ríkin Pólland, Rúmenía og Ungverjaland hafa augastað á vesturhéruðum Úkraínu. Pólland er lengst komið með sínar áætlanir, segir einyrki sem hlerar slavnesku umræðuna. Héruðin voru fyrrum hluti ríkjanna þriggja.

Þórdís utanríkis segir að ,,viðnámsþróttur" ríkja skipti máli. Sá þróttur má sín lítils í raunpólitík. Þar gildir að kjósa sér af kostgæfni óvini ekki síður en vini. Úkraína valdi sér Nató að vini og söðlaði glæp á óhapp; gerði Rússland óvinveitt. 

Meint vinaríki Úkraínu leggja á ráðin um að skipta með sér herfanginu sem Rússar sjá um að afla með sigri á austurvígstöðvunum.

Forseti framkvæmdastjórnar Evrópusambandsins segir í yfirlýsingu, sem síðar var dregin tilbaka, að 100 þúsund úkraínskir hermenn hafi fallið. Efnahagur og innviðir eru í rúst, milljónir eru á flótta frá heimkynnum sínum.

Blóðfórnum Úkraínu til Nató er svarað með áætlunum að lima í sundur Garðaríki er færi gefst. Með slíka vini er tæpast þörf á óvini.

Raunpólitík, Þórdís, ræður för. Viðnámsþróttur ræðst af dómgreind. Þar blífur að eiga föruneyti annars vegar og hins vegar andstæðinga til samræmis við veruleika en ekki óskhyggju. 

Þórdís ræddi stöðu landa í nágrenni við Rússland

Tvöföldun á CO2 ylli 0,75 gráðu hækkun

Ef koltvísýringur, CO2, tvöfaldaðist í andrúmsloftinu, úr rúmlega 400 ppm í 800 ppm, myndu gróðurhúsaáhrifin aðeins aukast um 1%, segir loftslagsvísindamaðurinn William Happer. Meðalhiti jarðarinnar gæti hækkað um 0,75 gráður. Enginn tæki eftir breytingunni.

En svo koma stjórnmálamenn og segja heimsendi í nánd. Fjölmiðlar eru hljóðnemar upphrópana og bæta í vitleysuna. ,,Hæsta CO2-gildi sögunnar mældist á Mauna Loa í maí 2021, hvort sem miðað er við núverandi mælingar eða mælingar á ískjörnum sem ná hundruð þúsunda eða milljónir ára aftur í tímann," segir í leiðara Fréttablaðsins. Þetta er þvættingur. Í jarðsögunni hafa yfir 7000, sjö þúsund, ppm af CO2 mælst í andrúmslofti, en er núna 400 ppm og myndi engu breyta þótt magnið tvöfaldaðist.

Bavíanabúggí stjórnmálamanna og fjölmiðla kyndir undir forheimskun loftslagsumræðunnar og veldur hugarangri þeirra sem hafa tiltrú á fólki og miðlum sem ekki standa undir traustinu.

Rökin fyrir heimsendaspám vegna hækkandi CO2-gilda eru reiknilíkön með innbyggðum forsendum að hækkun CO2 leiði til keðjuverkana - hamfarahlýnunar. Reiknilíkan með rangar forsendur gefur ranga niðurstöðu.

Happer segir í viðtalinu að gögn úr ískjörnum um fornveðurfar sýna það orsakasamhengi að hækkun hita komi á undan hækkun koltvísýrings. Heimsendaspár hafa endaskipti á orsök og afleiðingu, segja að koltvísýringur valdi hækkandi hita. Gögnin segja annað. Reynslan staðfestir gögnin. Gróðurþekja jarðar er meiri núna en á síðustu öld, enda koltvísýringur fæða plantna. Meiri koltvísýringur gerir jörðina grænni. Árvisst, að hausti á norðurhveli, fella tré lauf og barr sem rotnar. Við það hækkar koltvísýringur í andrúmslofti en lækkar að vori við ljóstillífun plantna.

Happer var prófessor í Princeton. Á tíunda áratugnum veitti Happer forstöðu rannsóknastofnun bandaríska orkumálaráðuneytisins. Þetta var í árdaga loftslagsfræða sem nú tröllríða háskólasamfélaginu. Hluti af starfi Happer var að kalla til vísindamenn af ólíkum fræðasviðum til að ræða rannsóknir og aðferðafræði. Hann tók eftir að loftslagsvísindamenn vildu síður en aðrir mæta í málsstofur að kynna rannsóknir sínar. Þá sjaldan þeir mættu voru loftslagsfræðingarnir móðgunargjarnir úr hófi og lítt samræðuhæfir um aðferðafræði. Þessi einkenni fylgja þessum svokölluðum vísindamönnum enn þann dag í dag. Þeim líður best að tala við fávísa stjórnmála- og fjölmiðlamenn sem gleypa hrá ósannindin.

Loftslagsfræði hamfarasinna eru gervivísindi sem þola ekki dagsljósið og röklega umræðu. Menn eiga að trúa, ekki skilja. Alla öldina hafa þeir spáð hamfarahita en náttúrulegt loftslagið hæðist að þeim og breytist lítt. 

Hamfaraspámennskan, segir Happer, leiðir okkur í ógöngur og má ekki halda áfram. Hverskyns vitleysu er haldið á lofti. Pólitísk stefnumótun tekur mið af bábiljufræðum en ekki haldbærum rökum.

Tvö lekamál - ólík viðbrögð

Eftir að myndbandi af hópslagsmálum var lekið af lögreglu voru viðbrögð snör.  Fjölmiðlar, RÚV sérstaklega, nánast kröfðust rannsóknar á lekanum. Málið kært, upplýst og refsað á einni viku.

Í vor varð uppvís leki úr landsrétti í tengslum við RSK-sakamálið. Tilfallandi blogg fjallaði um málið 24. maí:

Engin fordæmi eru fyrir því að starfsmaður landsréttar leki trúnaðargögnum, staðfestir Gunnar Viðar skrifstofustjóri landsréttar í Fréttablaðinu. En einmitt það gerðist í vor þegar gögnum var lekið í RÚV, Stundina og Kjarnann, RSK-miðla. Gögnin varða lögreglurannsókn á byrlun og gagnastuldi þar sem fjórir blaðamenn RSK-miðla eru sakborningar. 

Viðtakandi lekans var Gunnar Ingi Jóhannsson lögmaður sem óðara kom gögnunum til Þórðar Snæs Júlíussonar ritstjóra Kjarnans. Gunnar Ingi sýndi af sér hegðun sem illa samræmist starfsreglum lögmanna.

Engir fjölmiðlar gera kröfu um að upplýst verði um lekann úr landsrétti. Lekinn var í þágu blaðamanna RSK-miðla.

Er það svo að hagsmunir fjölmiðla ráða ferðinni þegar yfirvöld ákveða hvaða leka réttarkerfisins skuli rannsaka og hvenær leki er hið besta mál?  

Ekki við störf eftir að hafa lekið upptökunni

Færeyingar kaupa ekki Rússahatrið

Rússahatrið er vestrænt bandalag viljugra þjóða bandarískrar heimsvaldastefnu. Færeyingar taka ekki þátt og endurnýja fiskveiðisamning við Rússa sem er frá tímum Sovétríkjanna.

Fáar vestrænar þjóðir þora að taka sér Færeyinga til fyrirmyndar. Í öðrum heimsálfum, Asíu, Suður-Ameríku og Afríku, eru þær aftur margar sem láta sér í léttu rúmi liggja valdabrölt Bandaríkjanna, ESB og Nató í Austur-Evrópu. Heimsbyggðin hefur séð vestrænt forræði í framkvæmd í Afganistan, Írak, Sýrlandi og Líbýu og finnst ekki mikið til koma.

Stríðið í Úkraínu er siðferðilega, pólitískt og efnahagslega rangt. Það byrjaði ekki 24. febrúar í ár, þegar Rússar réðust inn í Úkraínu, heldur vorið 2008 þegar Bandaríkin og Nató gáfu út yfirlýsingu um að Úkraína yrði Nató-ríki.

Hernaðarbandalaginu er stefnt gegn Rússlandi. Með Úkraínu í Nató eru Rússum allar hernaðarlegar bjargir bannaðar. Það er nóg að horfa á landakortið til að sjá það. Það hefði verið vesturlöndum útgjaldalaust að láta Úkraínu vera hlutlaut ríki á milli Nató og Rússlands. En það stóð aldrei til. 

Úkraína er verkfæri til að ná forræði yfir Rússlandi. Vesturveldin munu berjast á sléttum Garðaríkis til síðasta Úkraínumannsins. 

Færeyingar kaupa ekki vestrænan yfirgang. Virðing. 

Færeyingar framlengja umdeildan samning við Rússa

Loftslagssvindlið, Climategate, 12 ára

Climategate er tólf ára. Tölvupóstar afhjúpuðu vísindamenn sem beittu svindli og bolabrögðum til að verja kenninguna um að loftslag væri manngert en ekki náttúrulegt. Vísindamennirnir stungu undir stól gögnum, lögðu á ráðin að vísindagreinar sem ekki féllu að kenningunni fengju ekki birtingu og að miðaldahlýskeiðið yrði ritskoðað í burtu úr þekkingarforðanum. Allt til að blekkja, ekki upplýsa.

Í tilefni af afmælinu eru nokkrar valdar tilvitnanir úr tölvupóstum svindlaranna birtar.

Ef loftslagsvísindi virkuðu sem skyldi yrði samsærismönnum Climategate úthýst úr vísindasamfélaginu, - a.m.k. þangað til þeir sæju að sér og lofuðu bót og betrun.

En loftslagsvísindi eru að stórum hluta trúarbrögð, ekki vísindi, segir Richard Lindzen sem kann sín loftslagsfræði. Ómerkilegu fræðingunum er lyft á stall í þágu pólitískra hagsmuna.

Einn þeirra vísindamanna sem þeir ómerkilegu baktöluðu, Judith Curry, kom nýlega fram í viðtali og sagði það sem allir utan safnaðarins vita: loftslagið lýtur náttúrulegum ferlum en ekki manngerðum. Það er engin loftslagsvá.

Mun sértrúarsöfnuðurinn taka sönsum? Nei, eðli sértrúarhópa er taka ekki mark á rökum og reynslu. Trú veitir fullvissu. Bábiljur skapa pólitíska vígstöðu. 

Vísindi, sem standa undir nafni, eru alltaf með þeim fyrirvara að ný gögn gætu umbylt viðurkenndri niðurstöðu. Vísindi og efi haldast í hendur. Af því leiðir hógværð sem ávallt er í andstöðu við trúarsannfæringu. 

Kristrúnarismi

Frjáls vinnumarkaður gerir frjálsa samninga. Atvinnurekendur og launþegar bera ábyrgð. Ef samið er um hærri laun en fyrirtækin ráða við fara þau í gjaldþrot. Ef samið er um lægri laun en fólk sættir sig við hættir það á vinnumarkaði og fer heim, í íbúðina sína eða til Póllands. Einfalt. 

Ekki hjá Kristrúnu Frostadóttur formanni Samfylkingar. Hennar sýn er að ríkið skuli ábyrgjast kjarasamninga í félagi við Seðlabanka Íslands. Sósíalismi þar sem samið er um ríkislaun. Enginn er ábyrgur nema skattgreiðendur. Kjaramál verða óábyrg opingáttarstefna, líkt og landamæraeftirlitið. Ákvarðanir eru teknar á grunni óskhyggju án tengingar við veruleikann. 

Kristrúnarismi er að kjarasamningar verði fjármagnaðir með ríkissjóði annars vegar og hins vegar með peningaprentun. Ríkirábyrgð launa elur á áhættusækni og skapar freistnivanda bæði hjá atvinnurekendum og launþegasamtökum. Slagorðið ,,ríkið reddar" er ávísun á óreiðuástand. 

Formaðurinn blekkir í þágu málstaðarins. Kristrún segir að við séum að koma ,,úr ástandi þar sem fjár­magn­s­tekj­ur hafa verið í hæstu hæðum." Hlutabréfamarkaðurinn er í mínus þetta árið, bankavextir líka. Lífeyrir og sparifé fólks brennur upp í verðbólgu. Þeir einu sem sjá hækkun eru fasteignaeigendur.

Allur þorri fasteignaeigenda býr í sínu húsnæði. Kristrún sér ofsjónum yfir hækkun fasteigna og gefur til kynna húseignaskatt, sem einu sinni hét ekknaskattur enda lagðist hann þyngst á elsta aldurshóp húseigenda.

Viðkvæði Kristrúnar er að samfélagið sé of flókið til að einstaklingar og samtök þeirra beri ábyrgð. Ríkið verði að koma til skjalanna. Stóri bróðir mun áður en yfir lýkur skammta lífskjörin eins og skít úr hnefa. Kristrúnarismi er sósíalismi í sauðagæru.

Segir sýn Bjarna einfaldaða mynd af samfélaginu

Verkó vill verðbólgu, ástæðan er einföld

Sósíalistarnir í verkalýðshreyfingunni hóta Seðlabanka Íslands verkfalli. Ástæðan? Jú, seðlabankinn hækkaði vexti til að kveða niður verðbólgu.

Verðbólga er í reynd fjármagnsflutningur frá sparifjáreigendum til lántakenda.

Verðbólga gengur á annarra manna fé. Eins og sósíalistar.

Tryggja þarf að virði peninganna brenni ekki upp

Leki, glæpir og hagsmunir

,,Myndböndum af árásinni líklega lekið af lögreglunni," segir í ávítunartón í frétt RÚV. Myndbandið sýnir átök glæpahópa. Áhersla RÚV er öll á lekann en ekki efni myndbandsins.

,,Rannsókn á lekanum í forgangi," segir RÚV í framhaldsfrétt. Ekkert um dramatíska myndbandið.

Á myndbandið ekki erindi til almennings? Er það ekki upplýsandi fyrir samfélagsástand?

Í RSK-sakamálinu var framinn glæpur, byrlun og stuldur. RÚV, Stundin og Kjarninn réttlættu glæpinn með því að fréttaefnið sem hafðist upp úr afbrotinu ,,átti erindi við almenning."

En átök glæpahópa eiga ekki erindi til almennings. Aðalfréttin þar er hver lak myndbandi um afbrot á opinberan vettvang til að þjóðin mætti sjá og heyra hvernig brotamenn bera sig að. 

Glæpaleiti finnur til samstöðu með sínum líkum.

Árásarmyndskeið líkast til leki frá lögreglu