Samfylkingin tapar - Dagur formaður í stað Árna Páls

Á landsvísu tapar Samfylkingin stórt en gerir gott mót í Reykjavík með Dag B. Eggertsson í forystu. Gangi fram sem horfir verður kallað á Dag til forystu á landsvísu strax í haust.

Árni Páll Árnason reynir að markaðssetja Samfylkinguna sem hægrisinnaðan ESB-flokk en það er dæmt til að misheppnast. Hægrimenn með ESB-sannfæringu eru einfaldlega ekki nógu margir til að bæta upp fylgistapið meðal vinstrimanna.

Reykvíkingar sem kjósa Dag í lok maí eru í reynd að skipta um formann í Samfylkingunni. 

Icelandair ekki of stórt til að fara í gjaldþrot

Ísland er ekki Vestmannaeyjar og Icelandair er ekki Herjólfur. Ef Icelandair er í raun ónýtt fyrirtæki, með óhæfa stjórnendur og óbilgjarna flugmenn, þá eigum við að leyfa fyrirtækinu að fara í gjaldþrot.

Ísland verður ekki án lífsnauðsynlegra samgangna ef Icelandair hættir flugi, líkt og Eyjamenn myndu einangrast án Herjólfs. Yfir tíu áætlunarflugfélög fljúga til Íslands. 

Lífeyrissjóðirnir eiga Icelandair að stærstum hluta. Þeir bera ábyrgð á yfirgengilega heimskulegri launastefnu sem hyglar milljónafólkinu á toppnum en skilur launþega eftir. Meinsemd Icelandair er að æðstu stjórnendur eru oflaunaðir í hlutfalli við aðra starfsmenn.

Ef ríkisvaldið ætlaði að grípa inn í launadeilur Icelandair við flugmenn þá yrði jafnframt að setja lög á laun forstjóra og yfirmanna félagsins. Og þar með væri Icelandair orðið ríkisflugfélag enda bæri ríkisvaldið ábyrgð á rekstrinum.

Eigendur, stjórnendur og starfsmenn Icelandair bera sameiginlega ábyrgð á fyrirtækinu. Þessir aðilar munu tapa mestu ef fyrirtækið fer í þrot. 

Skýr skilaboð ríkisstjórnarinnar um að lagasetning komi ekki til greina til að leysa launadeilu flugmanna er skynsamlegasta og ábyrgasta afstaðan.

 

 

 

Ógnar 500 flugferðum

Forstjóri Icelandair segi af sér

Björgólfur Jóhannsson forstjóri Icelandair ber ábyrgð á ógöngum félagsins og ferðaþjónustunnar. Björgólfur hugsar meira um að hlaða undir sjálfan sig og nánustu samverkamenn en að byggja upp samheldni í fyrirtækinu.

Björgólfur á að segja af sér hið snarasta. Stjórnin ráði nýjan forstjóra á 50 prósent lægri laun og þá er hægt að fara að tala við flugmenn.

Ábyrgð Björgólfs er því meiri að hann er jafnframt formaður Samtaka atvinnulífsins. Ef hann sjálfur kveikir ekki á perunni verða lífeyrissjóðirnir, sem eiga stærsta hlutinn í Icelandair, að reka manninn.

Fjölmargir afpanta Íslandsferð

Sjálfstæðisflokkurinn er aulinn í sauðagærunni

Hann hefnir sín sauðsháttur forystu Sjálfstæðisflokksins, að koma til móts við flokkslegu ESB-örverpin með því að hætta við afturköllun ESB-umsóknar annars vegar og hins vegar leiða ESB-sinna til forystu í höfuðborginni.

Í stað þess að standa í ístaðinu og bera fram þá stefnu sem flokkurinn var kjörinn til að framfylgja fyrir ári er stöðugur afsláttur gefinn óbilgjörnu minnipokafólki sem getur ekki einu sinni að safnað undirskriftum án þess að svindla. 

Sjálfstæðisflokkurinn fær sína verstu kosningu í höfuðborginni í manna minnum vegna þess að fólk treystir ekki aulum í sauðagæru. 

Samfylking stærst í borginni

Leyfum Icelandair að blæða út

Ofurlaun forstjóra Icelandair og æðstu stjórnenda eru fordæmi fyrir flugmenn. Ríkisstjórnin á ekki að skera forstjórann úr snörunni sem hann hnýtti sér sjálfur. 

Að stofni til er Icelandair flugmannafélag. Forverar félagsins, Flugfélag Íslands og Loftleiðir, voru stofnuð af flugmönnum. Forstjórar voru með rúm flugmannslaun. Í tíð Sigurðar Helgasonar  var forstjórinn með 1,5-föld flugmannslaun. Snillingurinn sem stýrir félaginu núna er með þreföld flugmannslaun auk fríðinda.

Icelandair er rotið félag sem á ekki að bjarga með lagsetningu. Forstjóri félagsins, Björgólfur Jóhannesson, er jafnframt formaður Samtaka atvinnulífsins sem mótað hefur kjarastefnu sem aðeins er fyrir almenna launþega en ekki stétt forstjóra. Launþegar fá skammtað skít úr hnefa en forstjórarnir maka krókinn.

Björgólfur situr sem forstjóri í skjóli lífeyrissjóðanna sem tóku þátt í útrásarruglinu með auðmönnum og lærðu ekkert af þeirri reynslu. 

Látum Icelandair blæða út, verða gjaldþrota ef ekki vill betur. Icelandair var einu sinni djásn íslenskra fyrirtækja en er orðið græðgisöflum að bráð. Engin hætta er á að landið verði samgöngulaust - enda fljúga hingað reglulega fleiri en tíu áætlunarflugfélög.

Það á ekki að setja lög í þágu veruleikafirrtra forstjóra og óábyrgra eigenda. 

Lög á flugmenn ekki útilokuð

Launasjálftektin í háloftum byrjar á jörðu niðri

Forstjórar stunda launasjálftekt á Íslandi og nú í æ ríkari mæli í skjóli lífeyrissjóða sem eiga stóra hluti í helstu fyrirtækjum landsins. Forstjórar landsins og klíkubræður þeirra í stjórnum fyrirtækja og lífeyrissjóða skapa fordæmi sem flugmenn Icelandair hyggjast fylgja.

Icelandair er ekki jafn einrátt í flugi til og frá landinu og löngum áður. Ein tíu eða tólf félög  bjóða áætlunarflug hingað. Hörmungarstaðan hjá Icelandair gefur öðrum tækifæri; Wow kom með fulla vél af farþegum frá Kaupmannahöfn áðan en gær var innan við helmingur sætanna seldur.

Skæruhernaður 200 flugmanna Icelandair heldur vonandi áfram nógu lengi til að kenna þeim sjálfum lexíu og fyrirtækinu. Þegar flugmenn Icelandair sækja um hjá Wow eru ekki í boði heildarlaun upp á 1,5 m. kr. á mánuði. Og þegar Icelandair verður að skera niður starfsemina vegna þess að farþegar leita annað þá kannski skilja lífeyrissjóðirnir að launasjálftekt æðstu stjórnenda er ekki til farsældar.

Fleiri ferðum til Ameríku aflýst

ESB ber ábyrgð á óöldinni í Úkraínu

Viktor Janúkóvítsj var löglega kjörinn forseti Úkarínu. Þegar hann hafnaði samstarfssamningi við Evrópusambandið ákvað elítan í Brussel að styðja andstæðinga Janúkóvítsj sem steyptu honum af stóli. Pútín Rússlandsforseti notaði upplausnina í kjölfarið til að styrkja stöðu sína í Úkraínu, m.a. með því að innlima Krím.

Evrópusambandið hratt af stað atburðarás sem það réði ekki við og hefði betur farið fram af meiri varkárni.  Á þessa leið greinir Evrópuþingmaðurinn Daniel Hannan stöðu mála í Úkraínu.

Jose Manuel Barroso, forseti framkvæmdastjórnar ESB, viðurkennir óbeint að vangeta sambandsins hafi komið fram í Úkraínu-deilunni vegna þess að ESB sé alltof upptekið af því að deila um hvernig ákvarðanir eru teknar - fremur en að fjalla um stefnumörkun og einstök stefnumál.

Evrópusambandið er klofið í afstöðu sinni til Úkraínu. Opinberu afstöðunni er andmælt af sterkum pólitískum hópum í Þýskalandi sem gagnrýna hörkuna í afstöðu ESB til Rússa.  Helmuth Schmidt, fyrrum kanslari Þýskalands, telur innlimun Pútíns á Krímskaga fullkomlega eðlilega aðgerð.

Úkraínudeilan sýnir vangetu Evrópusambandsins að fóta sig í valdatafli alþjóðstjórnmála. Annað tveggja hlýtur að gerast, að sambandið haldi áfram að gliðna og verða æ marklausari á alþjóðavettvangi eða að ógnin af Rússum, raunveruleg eða ímynduð, stórauki samrunaþróunina í átt að Stór-Evrópu sem yrði mótvægi við forræði Rússa í Austur-Evrópu.

Greiða atkvæði um sjálfstæði

Skæruhernaður flugmanna Icelandair

Það væri tillitssamara af flugmönnum Icelandair að fara einfaldlega í verkfall og fá eina af þrem rökréttum niðurstöðum; A. brjóta á bak aftur ríkjandi launastefnu með tilheyrandi afleiðingum; B. gera Icelandair gjaldþrota og C. fá á sig lög.

Skæruhernaður flugmanna bitnar illa á farþegum sem fá að vita með nokkurra klst. fyrirvara að flugi er aflýst vegna þess að flugmenn eru hættir yfirvinnu og/eða boða veikindaforföll. Þetta eru ósmekklegar aðfarir hálaunamanna, svo vægt sé til orða tekið.

Samkvæmt tekjublaði Frjálsrar verslunar eru heildarlaun flugmanna Icelandair á mánuði 1500 til 1700 þús. kr. og eru það þreföld mánaðarlaun Meðal-Jónsins. Margur þiggur minni laun og lætur sér ekki til hugar koma að læðast aftan að samborgurum sínum.

„Stöndum ekki að skæruhernaði“

Aðeins stríð getur bjargað ESB

Til að bjarga Evrópusambandinu þarf styrjöld. Sameiginlegt mynt er misheppnuð; sameiginlegt regluverk er misheppnað; sameiginlegt þing er algerlega misheppnað - eins og kosningar síðar í mánuðinum leiða í ljós.

Evrópusambandið tekur einatt stökk í samrunaátt þegar stórfelld ógn steðjar að. ESB varð til í skugga kalda stríðsins og sameiginlegur gjaldmiðill var ákveðinn þegar Þýskaland sameinaðist og ógnaði valdajafnvæginu innan sambandsins.

Til að búa til Stór-Evrópu úr Evrópusambandi sem er að gliðna í sundur þarf stríð. ESB-elítan mun kætast ef meiri ófriður losnar úr læðingi í Úkraínu. Það yrði ekki í fyrsta sinn í sögunni sem stjórnmálamenn nota stríð til að bjarga sér úr sjálfskaparvíti.

Haft neikvæð áhrif á útflutning Breta

Ríkisstjórnin og drykkfelldi presturinn

Um prest sem þótti sopinn góður var sagt að hann væri ónærgætinn sjálfum sér. Um ríkisstjórn Sigmundar Davíðs má segja að hún ség ónærgætin sjálfri sér með því að farga málinu sem skóp ríkisstjórnarflokkunum tveim sóknarfæri á síðasta kjörtímabili: andstöðunni við ESB-umsókn Samfylkingar.

Ríkisstjórnin segist ætla að koma ,,stóru málunum" í höfn en bíða með afturköllun umboðslausu umsóknarinnar. Með leyfi: ESB-málið er langstærsta pólitíska deilumál seinni tíma stjórnmálasögu Íslands.

Svokallað ,,stórt mál" ríkisstjórnarinnar er að gefa heimilum landsins fé, og kalla það skuldaleiðréttingu. En þetta er ekki stærra mál en svo að heimilin eru í fínni stöðu nú þegar og þurfa ekki á gjafagjörningi ríkisstjórnarinnar að halda. Svokölluð skuldaleiðrétting er aðeins redding á yfirboði Framsóknarflokksins í kosningabaráttunni - og það er ekki stórt mál.

Ríkisstjórnin er ekki allsgáð þegar hún hættir við afturköllun á ESB-umsókninni. Dómgreindarleysi ríkisstjórnarinnar í stórmáli verður henni að fótakefli allt kjörtímabilið og skapar andstæðingum hennar viðspyrnu.

Samkomulag um þinglok