ESB-sinni gróf undan mér - jamm

Fyrir nokkrum árum starfaði ég hjá opinberri stofnun sem var í töluverðum samskiptum við háskóla landsins. Eftir bloggfærslu um Evrópumál (og já þær eru orðnar nokkrar) þá hafði háskólaprófessor samband við yfirmann minn og kvartaði. Þetta veit ég vegna þess að yfirmaður minn sagði mér frá þessari kvörtun.

Það er alvanalegt að hinir og þessir taki upp símann eða skrifi tölvupóst til að finna að því að sumir aðrir notfæri sér tjáningarfrelsið til að hafa skoðun á þessu eða hinu. Rétt eins og það er réttur okkar að hafa skoðun, þá hafa Pétrar og Pálar og Skugga-Baldrar út í bæ sinn rétt að kvarta.

Háskólamenn, sumir hverjir, virðast halda að fólk eigi ekki rétt á að kveinka sér undan skrifum þeirra. Það er hálf-hallærislegt viðhorf að vælukjóar grafi undan gagnrýnendum með umkvörtunum. Ef þeir sem gagnrýna þola ekki andbyr ættu þeir kannski að finna sér annað áhugamál.  

Samfylkingardeild XD er ávísun á tap

Sjálfstæðisflokkurinn sýndi sig veiklulegan á landsvísu þegar forystumenn kiknuðu í hnjánum vegna upphlaups samfylkingardeildarinnar, Benedikts J. og Þorsteins Pálssonar, sem kröfðust þess að flokkurinn efndi ekki kosningaloforð um að afturkalla ESB-umsókn Samfylkingar.

Til að mæta kröfum ESB-sinna var leiddur til forystu í höfuðborginni Halldór Halldórsson, sem kemur úr litlu samfylkingardeildinni ásamt þeim ofannefndu auk Sveins Andra, auðvitað.

Og hvað gerist þegar Sjálfstæðisflokkurinn býður fram samfylkingarmann í sauðagæru? Jú, flokkurinn tapar á því en Samfylkingin styrkist.

Til að sýna að það sé líf í Sjálfstæðisflokknum, og að flokkurinn standi fyrir eitthvað annað en eftirgjöf, þá á að efna til sumarþings og afturkalla ESB-umsókn Samfylkingar frá síðasta kjörtímabili.

Eftirgjöf er ávísun á tap - eins og borgarstjórnarkosningarnar munu sýna svart á hvítu.

Meirihlutinn í borgarstjórn heldur

ESB-sinnar falsa undirskriftasöfnun

Undirskriftarsöfnun ESB-sinna er fölsuð. Fréttatilkynning ESB-sinna segir að 53.555 hafi skrifað undir. Talning sýnir að af þessum fjölda eru 15.767 sem óska nafnleyndar.

Það er vitanlega galið að bjóða upp á nafnleynd í opinberri undirskriftarsöfnun. Bara það eitt er gerir
undirskriftasöfnunina ómarktæka.

Í fréttatilkynningunni er sagt að fyrir Ferli ehf. hafi yfirfarið undirskriftalistana. Og hvað er fyrir nokkuð fyrirtækið Ferli ehf. Jú, þar er fyrir á fleti G. Valdimar Valdemarsson einn af aðstandendum félagsins Já Ísland sem stendur að undirskriftasöfnuninni.

G. Vald, eins og hann er kallaður, hætti í Framsóknarflokknum á sínum tíma þegar þegar ESB-stefnunni var hafnað. Og núna dúkkar hann upp sem óháður eftirlitsaðili með undirskriftasöfnun ESB-sinna.

Vinnubrögð ESB-sinna eru fyrir neðan allar hellur.

 

Trúnaðarbrestur á 365, jæja

365-miðlar eru í eigu Jóns Ásgeirs Jóhannessonar, kenndum við Baug, sem eignaðist fyrirtækið í frægum viðskiptum fyrir rúmum áratug.

Allan útrásartímann stöðu blaðamenn þétt við hlið eigandans, sem saup marga viðskiptafjöruna og átti m.a. stórt í Glitni/Íslandsbanka er varð gjaldþrota. Blaðamenn 365-miðla gerðu einnig ,,skoðanakannanir" á sínum tíma til að sýna fram á þjóðin studdi útgáfuveldi Baugs gegn ríkisstjórninni, sem vildi setja fjölmiðlalög er tryggðu fjölræði í umræðunni.

Frétt um að starfsmaður 365-miðla hafi gerst brotlegur vegna skoðanakönnunar í Reykjanesbæ kallar á eftirfarandi spurningu: á Jón Ásgeir hagsmuna að gæta í Reykjanesbæ? 

Trúnaðarbrestur starfsmanns 365

Flugmenn með þreföld meðallaun

Meðalheildarlaun á Íslandi eru 526 þúsund á mánuði. Flugmenn eru með eitthvað í kringum 1500 til 1700 þúsund á mánuði. Eðlilegt er að fjarvistir frá heimilum hækki laun umfram meðaltalið og eflaust er eitthvað annað sem má tína til.

Hér áður notuðu íslenskir flugmenn þau rök að launin þeirra yrðu að vera alþjóðlega samkeppnishæf - annars færu þeir annað. Þeir tala ekki lengur á þessum nótum og skýringin líklega sú að flugmennska á alþjóðavísu gefur töluvert minna í aðra hönd en kaup hjá almenningshlutafélaginu Icelandair.

Þegar við bætist að flugmenn láta ekki uppi um kröfugerð sína þá er óhætt að segja að þeir njóti ekki yfirþyrmandi samúðar almennings sem sættir sig við þriðjung af launum flugmanna.

(aths. í upphaflegri færslu var tala um fjórfaldan launamun  og miðað við regluleg laun - réttari samanburður er heildarlaun).

Fella niður 26 ferðir á morgun

Uppgjör við hrunið í Reykjanesbæ

Árni Sigfússon og græðgistjórnmál réðu ríkjum á útrásartímum í Reykjanesbæ. Eigur bæjarins voru seldar til að fjármagna skýjaborgir. Hitaveitan var gerð að fjárplógsstarfsemi innlendra og erlendra auðmanna. Stolt bæjarins til áratuga, Sparisjóður Keflavíkur, fór í gjaldþrot enda var hann virkjaður í þágu græðginnar.

Árni Sigfússon var bæjarstjóri allan þennan tíma og Sjálfstæðisflokkurinn í meirihluta. Um Árna er sagt að hann sé svo sannfærandi sölumaður að þegar atvinnuleysingi kemur til hans í viðtal, og segir farir sínar ekki sléttar, fer hann út með bros á vör eftir að Árni telur honum trú um að atvinnuleysi sé ávísun á fastar tekjur - þótt þær heiti bætur.

Íbúar í Keflavík og Njarðvík eru tilbúnir í uppgjör við Árna og félaga og afþakka frekari þjónustu hrunkvöla. Það er merki um heilbrigði almennings suður með sjó.

Meirihlutinn fallinn í Reykjanesbæ

ESB-sinnar svindla - Óskar Nafnleyndar er fjölfaldaður

Undirskriftarsöfnun felst í því að maður skrifar undir stuðningsyfirlýsingu við tiltekið málefni. Þessi stuðningsyfirlýsing er merkingarlaus nema maður kannist opinberalega við hana. Allir eldri en tvævetur skilja þessa einföldu meginreglu.

Nema ESB-sinnar. Þeir bera Óskar Nafnleyndar á borð fyrir alþjóð og kalla það stuðningsyfirlýsingu við málstaðinn. Vinnubrögðin lýsa svindláráttu ESB-sinna; aðlögunarferli heita óskuldbindandi viðræður; evra er betri en króna þótt hún valdi eymd og atvinnuleysi um allt meginland Evrópu; ESB-umsókn má senda til Brussel án þjóðaratkvæðagreiðslu en alls ekki afturkalla nema með þjóðaratkvæðagreiðslu.

Undirskriftarsöfnun ESB-sinna er algerlega ómarktæk. Og að auglýsa að  53.555 Íslendingar hafi skrifað undir þegar Óskar Nafnleyndar er fjölfaldaður inni í þessari tölu sýnir einbeitta ósvífni ESB-sinna.

Hvers vegna er Rússland ekki í ESB?

Rússland er meiri Evrópuþjóð en t.d. Tyrkland, hvort heldur sem er mælt á sögulegan, landfræðilegan eða menningarlegan mælikvarða. Engu að síður er Tyrkland umsóknarríki að Evrópusambandinu en Rússland ekki.

Frá sjónarhorni Brussel er Rússland of stórt fyrir Evrópu. Séð frá Moskvu er Evrópusambandið verkfæri tveggja þjóða sem réðust inn í Rússland á síðustu öld og öldinni þar á undan. Til að verjast ásókn Frakka og Þjóðverja þurfa Rússar að eiga vinveittar ríkisstjórnir í Austur-Evrópu. 

Evrópusambandið og Rússland munu ekki ganga í eina sæng heldur takast á um forræðið yfir Austur-Evrópu. Hér er á ferðinni gamalkunnugur stórveldaslagur þar sem Úkraína er fyrsta fórnarlambið.

Valdajafnvægið, sem ákveðið var í lok seinni heimsstyrjaldar, er í upplausn. Valdajafnvægi mun ekki nást fyrr en áhrifasvæði Evrópusambandsins annars vegar og hins vegar Rússa verða skilgreind upp á nýtt. Spurningin er hve margir þurfa að þjást áður en valdajafnvægið finnst.

Evrópa og einræði embættismanna

Evrópusambandið byggir á þeirri hugmynd að lokaður klúbbur manna ákveði stærri og smærri atriði í lífi borganna. Embættismennirnir telja sig vita hvað almenningi sé fyrir bestu. Eftir því sem lýðræðislegt aðhald embættismanna Evrópusambandsins minnkar því spilltari verða þeir.

Á þessa leið er greining Egon Flaig á Evrópusambandið í bókinni ,,Gegen den Strom". Flaig er sagnfræðingur, með fornöld sem sérsvið. Hann mætir embættismanna ESB sem almennur borgari og hrýs hugur við tilhugsuninni að félagsskapur manna sem þurfa ekki að standa ábyrgð gerða sinna gagnvart almenningi skuli ráða ferðinni á meginlandi Evrópu.

Blaðamaðurinn Henryk M. Broder tekur bók Flaig til umfjöllunar og segir hana bregða ljósi á þróun sem fjölmiðlar almennt og yfirleitt leiða framhjá sér. Ef ekki verður gripið í taumana og fullveldi þjóða endurreist munu niðurlag bókarinnar verða að áhrínisorðum:

Es hilft uns nichts, Weltbürger zu werden, wenn in dieser Welt die Rechte und der Raum des Bürgers verloren gehen. (Það stoðar lítt að verða heimsborgari, ef réttindi og lífsrými tapast)

Fréttamenn RÚV og fagleg uppgjöf

Þegar fréttamaður stefnir vegna gagnrýni á frétt er það yfirlýsing um faglegt þrot. Fréttir eru frásagnir af tíðindum dagsins. Eðli frétta er að þær segja sjaldnast allan sannleikann og í þeim skilningi er stök frétt aðeins framlag til umræðunnar.

Frétt sem þolir ekki umræðu heldur er farið með í réttarsal til að fá þar vörn dómstóla stendur einfaldlega ekki undir nafni. Slík frétt er eins og nátttröll í dagsbirtu.

Hádegisfrétt RÚV, sem gangrýnd var í þessu bloggi 16. júlí sl., var hlutdræg og dró upp einhliða mynd af ESB-ferlinu. Með því að breyta lykilatriði í fréttinni, þýðingunni á ,,accession process", í sjónvarpsfréttum þá um kvöldið viðurkenndi RÚV að hádegisfréttinni hefði verið ábótavant.

Í stað þess að senda bloggara vinsamlega kveðju með þökkum fyrir uppbyggilega gagnrýni ákvað RÚV-liðið að stefna. Það var hvorki faglegt né viturlegt.

Páll sýknaður í meiðyrðamáli