Kynvitund nýbura

Í nýju tölvukerfi fyrir breskar ljósmæður að skrá nýbura er ekki gert ráð fyrir kyni, sveinbarni eða meybarni, heldur kynvitund, ,,gender identity". Telegraph upplýsir.

Lifandi nýburi er með meðvitund, annars væri barnið andvana fætt. Meðvitund og líkami eru samstofna. Ef annað vantar er ekkert líf. Barnslega einfalt að skilja. Sumir fullorðnir eru að vísu úti að aka í þessum málum sem öðrum.   

 

Sumir segja að barn geti fæðst af röngu kyni. En sé það hægt fylgir sjálfkrafa möguleikinn að fæðast með ranga meðvitund. Hvers vegna heldur enginn fram að stundum sé líkaminn réttur en meðvitundin röng? Hér er á ferðinni skekkja er bíður leiðréttingar. Einstaklingar með ranga meðvitund eiga að fá sinn samastað í litrófi fjölbreytileikans. Annað er mismunun.

 

Tilfellið er, vitanlega, að börn fæðast hvorki í röngum líkama né með ranga meðvitund. Líffræðilega er það ómögulegt. Þótt breytileiki sé á nýburum lifandi fæddum er alltaf þetta tvennt: meðvitund og líkami. Að því marki sem meðvitundin er hlutlæg heilastarfsemi er hún samkynja líkamanum. Sá hluti sem ekki er efnislegur, hugsunin, er kynlaus.

 

Aftur er allt hægt með ímynduninni. Í skapandi leikjum eru börn oft aðrar tegundir en homo sapiens; hlébarðar, gíraffar, slöngur og skordýr. Fullorðnir gera sér að leik að verða oggulitlir í glensinu. ,,Og ef ég væri orðinn lítil fluga ... ég eflaust gæti kitlað nefið þitt," er enn raulað af alþýðu manna.

 

Hvað er þetta með kynvitund nýbura í Bretlandi? Jú, samkvæmt áreiðanlegum heimildum úr innsta hring innvígðra,  urðu þau leiðu mistök í landi Darwins að kyn og tegund víxluðust í nýja forritinu. Ljósmæður, eftir að villan verður leiðrétt, skrá nýbura eftir tegundarvitund, ,,species identity". Þetta er rökrétt afleiðing þegar ímyndunin leikur lausum hala í raunheimi.

 

Foreldrar verða spurðir, enda nýburi ómálga. Er barnið þitt hæna, slanga, fluga, ljón, hestur, hundur eða köttur? Kannski risaeðla?

Vanskil eru ekki mannréttindi

Óreiðufólk í fjármálum gerir lán skilvísra dýrari en ella. Lífeyrissjóður sem lánar vanskilafólki gengur á eigur sjóðsfélaga, þeirra sem eiga sjóðinn og treysta á hann til framfærslu.

Ekkert samhengi er á milli óreiðufólks í fjármálum annars vegar og hins vegar launatekna og eigna. Efnalitlir geta verið óskilvísir jafnt sem þeir efnameiri.

Þeir sem einu sinni standa ekki í skilum eru líklegir til að falla aftur í sömu gryfju, að greiða ekki skuldir sínar.

Það liggur í augum uppi að skilja þarf sauðina frá höfrunum. Lánastofnanir, hvort heldur bankar eða lífeyrissjóðir, verða að vita hverjum er treystandi og hverjum ekki. Það er engin sanngirni að skilvísir fái sömu meðferð og skuldseigir.

Að því sögðu er vitanlega krafa að meðferðin á fjármálasögu fólks sé málefnaleg.

Telja Creditinfo hafa farið á svig við leyfi

Björn Leví kennir dyravörðum um dólgshátt Arndísar ölvuðu

Pírataþingmaðurinn Björn Leví ásakaði dyraverði skemmtistaðar um harkalega og niðurlægjandi meðferð á þingmannsins Arndísi Önnu K. er leiddi til afskipta lögreglu. Arndís Anna K. var handtekin aðfaranótt laugardags á skemmtistaðnum Kíkí.

Í fyrstu yfirlýsingu Arndísar Önnu K. um málið segir

Ég hef skilning á því að starf dyravarða á skemmtistöðum sé erfitt og ekki síst með fullt hús af fólki í misjöfnu ástandi, þó mín upplifun hafi verið sú að þarna hafi framganga þeirra verið óþarflega harkaleg og niðurlægjandi. Ég hef talað við fyrirsvarsmann staðarins sem bað mig afsökunar fyrir þeirra hönd, sem mér þykir afar vænt um.

Björn Leví tók undir ásakanir Arndísar Önnu K. og kenndi dyravörðum um að klósettdvöl á skemmtistað endaði með lögregluafskiptum og handtöku.

Fyrstu viðbrögð Arndísar Önnu K. reyndust lygar þegar nánar var að gáð. Næstu viðbrögð voru einnig lygi. Þar sagðist klósettþingmaðurinn ekkert hafa gert neitt af sér, annað en að dveljast á salerninu og það kæmi almenningi ekki við.

Í þriðju atrennu tók að glitta í sannindi hjá Arndísi Önnu K. Þingmaðurinn viðurkenndi að hafa verið ofurölvi og með dólgshátt. ,,Ég streittist á móti og var dónaleg," sagði klósettfarinn og baðst afsökunar.

Í fyrstu útgáfunni sagðist Arndís Anna K. hafa verið beðin afsökunar á framferði dyravarða en í þriðju útgáfu er það hún sem biðst afsökunar - en þó ekki dyraverðina sérstaklega. Afsökunin í þriðju útgáfunni er almenn.

Björn Leví lætur þau orð sín enn standa að dyraverðir á Kíkí hafi gengið harkalega fram og niðurlægt samflokksmann sinn. Hvorki Björn Leví, varaþingflokksformaður Pírata, né Þórhildur Sunna þingflokksformaður, svara fyrirspurnum fjölmiðla. (RÚV reynir að vísu ekki að fylgja málinu eftir; skylt er skeggið hökunni).

Í tilfallandi bloggi er vakin athygli á að Píratar beri ábyrgð þingmennsku Arndísar Önnu K. Hún ber ábyrgð á eigin gjörðum en þingflokkur Pírata ábyrgist pólitíska stöðu klósettþingmannsins.

Ekki er ábyrgðin rismikil þegar bæði þingflokksformaður né varaþingflokksformaður leggja á flótta frá spurningum fjölmiðla. Má ekki búast við yfirlýsingu frá Sigríði Dögg Auðunsdóttur formanni Blaðamannafélags Íslands, og fréttamanni RÚV, um að fólk í valdastöðu eigi ekki að komast upp með að senda frá sér fréttatilkynnar í stað þess að svara spurningum fjölmiðla? 

Björn tjáir sig ekki frekar

Namibíumálið, byrlunin og Björn

Í nóvember 2019 hófst Namibíumálið með Kveiks-þætti á RÚV. Aðalfréttamaðurinn var Helgi Seljan sem jafnframt var miðlægur í seðlabankamálinu. Í báðum tilvikum var Samherji skotskífan. Í seðlabankamálinu átti norðlenska útgerðin að hafa brotið gjaldeyrislög. Í Namibíumálinu var ásökunin mútur til namibískra embættis- og stjórnmálamanna.

Seðlabankamálið reyndist eineltisblaðamennska. Helgi böggaði mann og annan en fór með fleipur og fölsuð gögn. Namibíumálið er til úrlausnar fyrir dómstólum í Afríkuríkinu. Enginn Samherjamaður er ákærður en tíu heimamenn fyrir skatt- og umboðssvik. 

Ásamt Helga Seljan og RÚV stóðu blaðamenn á Stundinni og Kjarnanum að Namibíumálinu, þ.e. RSK-miðlar. Einn blaðamannanna er Ingi Freyr Vilhjálmsson. Hann bjó Namibíumálið í hendur bróður sínum, Finni Þór Vilhjálmssyni, saksóknara hjá embætti héraðssaksóknara, sem hóf rannsókn í kjölfar Kveiks-þáttarins.

Finnur Þór viðurkenndi óbeint, með bréfi til Namibíu í október 2022, að ekkert hefði fundist á Íslandi er benti til lögbrota Samherja. Í bréfinu er óskað eftir upplýsingum er gætu rennt stoðum undir áfengar ásakanir Jóhannesar Stefánssonar uppljóstrara, sem er eina heimildin fyrir Namibíumálinu. Ekkert saknæmt fannst í Namibíu. Ári eftir bréf Finns Þórs er yfirmaður hans, Ólafur Þór Hauksson héraðssaksóknari, kallaður til á RÚV að vitna um að Namibíumenn hafa svarað Finni Þór. En það er ekkert að frétta. Upplýsingarnar frá Namibíu eru ekki nógu merkilegar til að verða að gögnum málsins. 

Af Finni Þór saksóknara er það að frétta að hann er orðinn dómari við héraðsdóm Reykjavíkur. Aðeins er eftir að tilkynna útfarardag Namibíumálsins á Íslandi. Af greiðasemi við RSK-miðla er tilkynningunni frestað.

Byrlunar- og símastuldsmálið er framhald seðlabanka- og Namibíumálanna. Það hófst 3. maí 2021 með byrlun Páls skipstjóra Steingrímssonar og stuldi á síma hans. Miðstöð glæpsins var í höfuðstöðvum RÚV á Efstaleiti. RÚV birti enga frétt, það gerðu Stundin og Kjarninn með samræmdum hætti 21. maí 2021. Um síðustu áramót sameinuðust Stundin og Kjarninn undir merkjum Heimildarinnar.

Lögreglurannsókn hófst á byrlunar- og símastuldsmálinu eftir kæru Páls skipstjóra 14. maí 2021. Fimm blaðamenn RSK-miðla eru sakborningar: Arnar Þór Ingólfsson, Þórður Snær Júlíusson, Aðalsteinn Kjartansson, Ingi Freyr Vilhjálmsson og Þóra Arnórsdóttir. Ekki er vitað til þess að Helgi Seljan sé sakborningur. Það gæti breyst.

Um síðustu áramót var rannsóknin langt komin og búist var við ákæru í byrjun árs. Ný gögn komu þá fram í málinu. Þóra Arnórsdóttir ritstjóri Kveiks reyndist hafa keypt Samsung síma í apríl til að afrita síma Páls skipstjóra - en Páli var byrlað í maí. Í framhaldi óskaði lögreglan eftir upplýsingum frá Google og Facebook um samskipti byrlara, þáverandi eiginkonu skipstjórans er glímir við andleg veikindi, og blaðamanna. Marga mánuði tekur að fá upplýsingarnar enda stíf formskilyrði sem þarf að uppfylla.

Lögreglan var með upplýsingar um símhringingar á milli blaðamanna og byrlara sem og sms-skeyti: ,,You got mail". Tilgátan er að tölvupóstar og/eða spjall á Facebook veiti upplýsingar um hvað fór á milli blaðamanna og byrlara áður en ráðist var til atlögu. 

Síminn sem Þóra keypti fyrir RÚV í apríl 2021 og samskipti blaðamanna við byrlara í aðdraganda atlögunnar að Páli skipstjóra 3. maí 2021 leiða að líkindum í ljós að um skipulegt samsæri var að ræða. Björn Bjarnason fyrrv. ráðherra fjallar um málið og segir

Sú opinbera stofnun sem býr við mestan álitshnekki vegna alls þessa er sjálft ríkisútvarpið. Ástæðan er sú afstaða stjórnenda þess að horfast ekki í augu við afleiðingar óvandaðra vinnubragða með því að gera hreint fyrir sínum dyrum. Þeir hafa eitthvað að fela.

Björn var á sínum tíma menntamálaráðherra og yfirmaður RÚV. Stefán Eiríksson útvarpsstjóri horfist ,,ekki í augu við afleiðingarnar," líkt og Björn segir. Útvarpsstjóri losaði sig við Helga Seljan áramótin 2021/2022 og Þóru Arnórsdóttur rúmu ári síðar. Strax haustið 2021 varð Rakel Þorbergsdóttir fréttastjóri að taka pokann sinn. Engar skýringar, aðeins uppsagnir lykilmanna. Ætlar Stefán að segja, þegar ákært verður, að enginn ákærðra sé lengur í starfi? Verður það vörnin?

RÚV er miðstöðin í seðlabankamálinu, Namibíumálinu og byrlunar- og símastuldsmálinu. RÚV svarar ekki fyrir háttsemi sem er margfalt lögbrot, faglega óverjandi og siðleysið uppmálað. Ríkisfjölmiðillinn veldur ómældum skaða saklausra einstaklinga og brýtur skipulega á lögaðilum með hreinan skjöld. Stofnunin sjálf er ófær um að taka til í eigin ranni. Nei, Stefáni verður ekki kápan úr klæðinu því að segja ákærða ekki lengur á launaskrá. RÚV-ómenningin dafnar sem aldrei fyrr þótt brotafólk hrökkvi af skaftinu. 

Ölvun, óspektir og raðlygar Arndísar K.

Ég var niðurlægð af dyravörðum og fékk frá þeim afsökunarbeiðni, sagði Arndís K. þingmaður Pírata á sunnudagskvöld. RÚV tók orð þingmannsins trúanleg og birti í fyrirsögn.

Í gærmorgun birti Nútíminn ítarlega frásögn af atburðinum á skemmtistaðnum Kíkí aðfaranótt laugardags. Þar kemur fram að Arndís K. hafi dáið áfengisdauða á salerninu og brugðist hin versta við er hún var vakin og neitað að yfirgefa staðinn.

Fyrsta útgáfa Arndísar K. var að henni hafði dvalist á salerninu og af þeim ástæðum verið vísað á dyr með harkalegum og niðurlægjandi hætti. Nútíminn sýndi fram á að svo væri ekki. Þingmaðurinn, meðvitundarlaus af vímu, var vakinn en neitaði að yfirgefa staðinn við lokun. Dyraverðir urðu að kalla til lögreglu svo koma mætti bálreiðum þingmanni og ofurölvi út úr húsi.

Virkar ekki eins og Arndís K. ætti inni afsökunarbeiðni frá dyravörðum. Frekar hitt að hún ætti að biðjast afsökunar. Um miðjan dag í gær mætti hún með hroka og sagði háttsemi sína engum koma við.

Í hádeginu í gær segir Arndís K. í viðtali við mbl.is: „Ég var ekki að gera neitt sem fólki kem­ur við.“

Þingmaður er opinber persóna. Það sem þingmaður gerir á opinberum vettvangi, t.d. skemmtistað, er opinbert mál og kemur almenningi við. 

Síðdegis í gær er komið enn annað hljóð í strokkinn hjá Arndísi K. Loksins, loksins viðurkennir þingmaðurinn ölvun og óspektir, samanber viðtengda frétt.

Eftir að hafa reynt að ljúga sig frá málinu í einn og hálfan sólarhring tekur að glitta í sannleikann.

Dauðadrukkinn þingmaður Pírata veldur óspektum á almannafæri. Það er fréttin. Aukafréttin er að Arndís K. er raðlygari. 

Arndís K. ber ábyrgð á sinni persónu. Píratar bera ábyrgð á þingmanninum Arndísi K.

„Ég var dónaleg og streittist á móti“

Leigubíll lögreglu fyrir Arndísi K. pírata

Þingmaður Pírata Arndís Anna K. Gunnarsdóttir var handtekinn af lögreglu á skemmtistað. Að sögn Arndísar Önnu er ástæða handtökunnar að henni dvaldist á klósettinu.

Saklaus ferð á salernið leiðir til handtöku. Trúlegt? Nei. Dyraverðir fara tæplega inn á salerni þótt einhver sé þar lengur eða skemur. Ekki heldur kalla dyraverðir til lögreglu nema brýna nauðsyn beri til.

Þakkir Arndísar Önnu til lögreglu fyrir að veita henni leigubílaþjónustu, skutla henni heim eftir handtöku, eru skringilegar, svo ekki sé meira sagt. Nýtti þingmaðurinn sér stöðu sína sem þjóðkjörinn fulltrúi og fékk sérmeðferð? Það væri ekki í fyrsta sinn sem þessi þingmaður Pírata leikur tveim skjöldum.

Arndís Anna er lögmaður og aðgreinir ekki á milli lögmannsþjónustu og þingmennsku. Þingmaðurinn varð uppvís sl. vetur að veita íslenskt ríkisfang til skjólstæðinga sem hún hafði þjónustað sem lögmaður. Tilfallandi fjallaði um málið 

Einkahagsmunir lögfræðingsins eru að skapa verðmæti fyrir kaupendur þjónustu. Þingmaðurinn skaffar þau gæði. Þegar lögfræðingurinn og þingmaðurinn eru einn og sami einstaklingurinn, Arndís Anna, er á ferðinni spilling í sinni tærustu mynd.

Á salerni skemmtistaðar á föstudagsnótt sturtaði Arndís Anna niður þingmannsferlinum. Gott ef ekki líka þingflokki Pírata. 

Segist þakklát lögreglu fyrir viðbrögðin

Leki úr landsrétti til Þórðar Snæs kærður, ekki rannsakaður

Þórður Snær Júlíusson sakborningur í byrlunar- og símastuldsmálinu fékk upplýsingar úr landsrétti sem fengnar voru með lögbroti. Starfsmaður landsréttar braut trúnað og starfsskyldur og kom upplýsingunum til Þórðar Snæs ritstjóra Kjarnans, nú Heimildarinnar. Málið var kært en hefur ekki verið rannsakað. Stutt er í að málið fyrnist.

DV afhjúpaði lekann til Þórðar Snæs. Gögn sem voru send til dómstólsins vegna kæru Aðalsteins Kjartanssonar, meðsakbornings Þórðar Snæs í byrlunar- og símastuldsmálinu, komust í hendur Þórðar Snæs. Milliliðurinn var Gunnar Ingi Jóhannsson lögmaður Aðalsteins.

Í frétt DV frá í maí í fyrra segir:

DV ræddi stuttlega við Gunnar Inga sem kannast ekki við að hafa afhent umrædd gögn. DV ræddi einnig við Þórð Snæ, sem staðfestir að hann hafi lesið rannsóknargögn í málinu en segist hins vegar ekki sjá ástæðu til að tilgreina nánar hvað gögn hann hafi séð. „Ég hef lesið þau rannsóknargögn sem afhent voru í Landsrétti og ég sé ekki ástæðu til að tilgreina nánar hver þau eru. Hafi verið gerð þau mistök að afhenda of mikið af gögnum sé ég ekki að það sé mitt vandamál.

Gunnar Viðar skrifstofustjóri landsréttar staðfesti í viðtali að einhver hafi lekið upplýsingum, sem lögregla sendi dómnum, til óviðkomandi - Þórðar Snæs.

Lögregluembættið á Akureyri, sem fer með rannsókn byrlunar- og símastuldsmálsins, kærði lekann til lögregluembættisins í Reykjavík. Samkvæmt tilfallandi heimild er ekki enn farið að rannsaka lekann. Enginn hefur verið kallaður til yfirheyrslu. Í byrjun næsta árs fyrnist málið.

Leki úr dómskerfinu dregur út tiltrú og trausti á réttarkerfinu í heild. Ef starfsmenn dómstóla brjóta starfsskyldur án afleiðinga er komið hættulegt fordæmi.

 

 

Þrýst á Úkraínu að semja við Rússa

Leynilegt samkomulag er á milli Biden Bandaríkjaforseta og Scholz kanslara Þýskalands að binda endi á Úkraínustríðið og þvinga Selenskí forseta að samningaborðinu. Þýska útgáfan Bild segir að Bandaríkin og Þýskaland muni draga úr stuðningi við Úkraínu til að knýja á um samninga. Það verði gert á bakvið tjöldin. Opinberlega verði sagt að stuðningur haldi áfram en í reynd fær Úkraína minni pening og færri vopn. 

Aðrir fjölmiðlar, t.d. Telegraph, taka upp á sína arma frétt Bild og segja vaxandi þrýsting á Úkraínu að semja. Útlitið er svart á vígvellinum.

Gagnsókn Úkraínu, sem hófst 4. júní í sumar, rann út í sandinn í september. Víglínan breyttist litið sem ekkert. Síðan hafa Rússar sótt í sig veðrið og ógna nú Adievka, hernaðarlega mikilvægri borg í Donbass-héruðunum. Rússar ráða um fimmtungi Úkraínu. Innrás Rússa, sem hófst í febrúar 2022 hefur kostað um 300 til 500 þúsund mannslíf.

Yfirlýst markmið Rússa er tvíþætt. Í fyrsta lagi að tryggja réttindi rússneskumælandi ríkisborgara Úkraínu. Í öðru lagi að koma í veg fyrir að Úkraína gangi í Nató. Hernaðarbandalagið með Úkraínu innanborð myndi ógna öryggishagsmunum rússneska ríkisins, er viðkvæðið í Moskvu.

Varla er tilviljun að í gær birtist viðtal við David Arakhamia sem fór fyrir úkraínsku sendinefndinni er ræddi friðarsamkomulag við Rússa í mars 2022, tveim mánuðum eftir að stríðsátök hófust. David Arakhamia segir að Rússar hafi fyrst og fremst viljað tryggja að Úkraína yrði hlutlaust land, yrði ekki Nató-ríki. Drög að samkomulagi voru undirrituð í Istambúl, Tyrklandi.

Boris Johnson þáverandi forsætisráðherra Bretlands fór til Kænugarðs, með umboð frá Biden Bandaríkjaforseta, eftir að Istambúl-drögin voru undirrituð, og setti Selenskí forseta úrslitakosti. Vesturlönd myndu hætta stuðningi við Úkraínu ef samið yrði við Rússa. Þar með var friðarsamningur úr sögunni. Úkraína stendur og fellur með vestrænu fjármagni og vopnum.

Í mars 2022 var staða Úkraínu öllu betri en hún er í dag. Landið var um það bil í heilu lagi og mannfall enn tiltölulega lítið. Í dag eru Rússar búnir að innlima Donbass-héruðin í Rússland auk héraðanna Kherson og Saparósíja. Um 200-300 þúsund Úkraínumenn hafa fallið. Efnahagskerfið er stórskaddað og innviðir að hruni komnir. Milljónir hafa flúið land. Konur eru sendar á vígvöllinn og deyja þar í skotgröfum. Herkvaðning gildir um alla á aldrinum 17 til sjötugs.

Selenskí forseti neitar alfarið að semja við Pútín starfsbróður sinn í Moskvu. Kannski verður það ekki hann sem semur. Ef leyniáætlunin, sem Bild segir frá, fær framgang lýkur stríðinu líklega öðru hvoru megin við áramót og ekki seinna en næsta vor, í tæka tíð fyrir bandarísku forsetakosningarnar 5. nóvember á næsta ári. Stríðslok verða með eða án Selenskí sem forseta Úkraínu.     

Séra Friðrik fái 3 ára friðhelgi

Vegna ,,há­værr­ar op­in­berr­ar umræðu og gagn­rýni inn­an sam­fé­lags­ins í garð séra Friðriks" er tekin ákvörðun um að fjarlægja styttu af séra Friðriki Friðrikssyni á horni Lækjargötu og Amtmannsstígs. Styttan á 70 ára sögu.

,,Háværa" umræðan er ekki nema þriggja vikna gömul. Tilfallandi gerði athugasemd 4. nóv. og sagði m.a.

Séra Friðrik á enga afkomendur er geta borið hönd fyrir höfuð hans. Tilfallandi hafði hvorki af honum að segja né kristilegum æskulýðssamtökum sem tengd eru nafni hans. Óvilhöllum blasir þó við að atlagan að minningu séra Friðriks byggir ekki á traustum grunni. 

Á þeim þrem vikum sem liðnar eru hafa ekki birst upplýsingar sem renna stoðum undir upphaflega slúðrið. Kannski koma þær upplýsingar fram en kannski ekki.

Einar Þorsteinsson formaður borgarráðs segir að ákvörðun hafi verið tekin um að styttan verði fjarlægð en ekki hvenær.

Í stað þess að hlaupa til og láta undan hávaða, þar sem fjöður varð að fimm hænum, væri ráð að staldra við.  

Tíminn mun leiða í ljós hvort innistæða sé fyrir hálfkveðnum vísum um að séra Friðrik hafi komið þannig fram við börn að óverjandi sé að minning hans sé heiðruð.

Borgarráð gæti gefið styttunni af séra Friðrik friðhelgi í þrjú ár. Komi fram upplýsingar er staðfesta að ekki sé ástæða til að heiðra minningu manns sem margir reyndu af góðu einu þá verði styttan fjarlægð. Ef ekki standi styttan kjur.

Kristilegt vopnahlé er við hæfi í þessu hávaðamáli. 

 

Samstaða um styttuna af séra Friðriki

Sigríður Dögg, Aðalsteinn og vantraustið á blaðamönnum

Blaðamenn finna á eigin skinni að þeim er ekki treyst. ,,Komið fram við fjölmiðla eins og óþekka krakka," er ramakvein í búningi fréttar á RÚV. Tilefni fréttarinnar er að blaðamenn fá ekki óheft aðgengi að hamfarasvæðinu í Grindavík. Svikulir blaðamenn koma óorði á fjölmiðla, sem þegja ósómann. Forysta stéttafélags blaðamanna er í höndum skattsvikara og sakbornings.

Fréttaljósmyndari RÚV reyndi húsbrot á grindvískt heimili þegar hann fékk aðgang að svæðinu. Formaður Blaðamannafélags Íslands, Sigríður Dögg Auðunsdóttir, fréttamaður á RÚV, fordæmdi ekki innbrotstilraunina.

Sigríður Dögg ruggar ekki bátnum. Sjálf er hún uppvís að skattalagabrotum en neitar að gera grein fyrir þeim. 

Fimm blaðamenn á Heimildinni og RÚV eru sakborningar í byrlunar- og símastuldsmálinu. Fram hefur komið að andlega veik kona var misnotuð af blaðamönnum til að byrla og stela. En það er engar fréttir í fjölmiðlum að hafa um málið.

Útvarpsstjóri er ekki krafinn sagna um aðkomu RÚV að byrlunar- og símastuldsmálinu. Miðstöð glæpsins var á RÚV, sem þó birti engar fréttir upp úr stolnum símanum, það gerðu Stundin og Kjarninn, sem nú heita Heimildin, og er á barmi gjaldþrots. Enginn fjölmiðill segir fréttir.

Varaformaður stjórnar RÚV lætur bóka á stjórnarfundi ,,mikilvægi þess að fréttastofa starfi í samræmi við lög og virði friðhelgi borgaranna í hvívetna." Fjölmiðlar fjalla ekkert um lögleysuna á ríkisfjölmiðlinum. Síðasta fundargerð stjórnar RÚV er frá 27. september. Hvers vegna líðst útvarpsstjóra að birta ekki fundargerðir?

Brotaþolinn í byrlunar- og símastuldsmálinu, Páll skipstjóri Steingrímsson, vakti athygli á að verðlaunaðasti blaðamaður seinni ára, Helgi Seljan, lagði fram falska kæru til lögreglu. Helgi sakaði mann um umsáturseinelti og fékk starfsfélaga til skrifa upp á kæruna sem vitni. Sá kærði var út á sjó á þeim tíma sem Helgi sakaði hann um að sitja um heimili sitt. Engar fréttir um falska kæru verðlaunablaðamannsins. Það er stórfrétt að rannsóknaritstjóri, hvorki meira né minna, á ríkisstyrktum fjölmiðli standi að falskri kæru til lögreglu. 

Dæmin hér að ofan eru um svikula blaðamenn, sumir grunaðir um alvarleg lögbrot, og fjölmiðla sem eru meðvirkir í þögn um mikilsverð samfélagsleg málefni - siðleysi og lögbrot í röðum blaðamanna.

Traust til blaðamanna og fjölmiðla dvínar hratt. Það stendur upp á stéttina sjálfa að gera hreint fyrir sínum dyrum. En ekkert gerist. Er líklegt að formaður Blaðamannafélags Íslands boði opinn fund um siðleysi og lögbrot félagsmanna? Hvað með varaformanninn, Aðalstein Kjartansson á Heimildinni, sem er sakborningur í byrlunar- og símastuldsmálinu? 

Er til nokkurt annað dæmi um stéttafélag norðan Alpafjalla þar sem formaðurinn er skattsvikari og varaformaðurinn sakborningur í glæparannsókn?

Blaðamannastéttin grefur eigin gröf,- og það nokkuð rösklega.

Kæra takmörkun á aðgangi fjölmiðla