Atlaga RÚV að Jóni og Brynjari misheppnaðist

Í fyrradag reyndi RÚV að vekja reiðiöldu á samfélagsmiðlum gegn Jóni Gunnarssyni dómsmálaráðherra og aðstoðarmanni hans, Brynjari Níelssyni. Markmiðið var tvíþætt. í fyrsta lagi að knýja fram afsögn annars eða beggja og í öðru lagi sýna mátt fréttastofu RÚV í þjóðfélagsumræðunni.

Atlagan byrjaði í hádegisfréttum þegar fréttamaður stillti Bjarna Benediktssyni upp við vegg i skringilegu viðtali. Yfir daginn var málinu haldið vakandi á netútgáfu RÚV. Um kvöldið var Jón kallaður til yfirheyrslu í Kastljósi. Helmingur yfirheyrslunnar gekk út á að útmála Brynjar óalandi og óferjandi.

Líkt og í öðrum sambærilegum tilvikum er RÚV í samstarfi við aðgerðasinna. Í þessu tilfelli öfgafemínista sem sjá svart þegar minnst er á miðaldra hvíta karla. Hugmynd RÚV var að aðrir fjölmiðlar stykkju á vagninn og birtu eltifréttir og tækju þannig óbeint undir kröfuna um afsögn. En fjölmiðlar voru önnum kafnir í KSÍ-málinu og bitu ekki á agn Efstaleitis að þessu sinni.

Eftirtekjan á samfélagsmiðlum varð rýr, engin reiðibylgja. Öfgafemínistar eru fámennur hópur. Þeir gátu ekki bætt upp með gargi almennt áhugaleysi á aðför að ráðherra dómsmála og aðstoðarmanni hans. Vinstrimenn á alþingi komu heldur ekki til hjálpar. Að jafnaði er þar þó á vísan að róa. Kannski að þingheim gruni maðk í mysunni á Glæpaleiti.

Atlaga RÚV sýnir víðáttuna á milli hlutverks ríkisfjölmiðilsins, að segja fréttir, og starfshátta fréttastofunnar þar sem skipulega er leitast við að kynda undir vantrausti og valda óróa i samfélaginu. Misheppnaða reiðibylgjan gefur til kynna þverrandi áhrifamátt RÚV á þjóðfélagsumræðuna. Ísland batnar fyrir vikið.

Þriðji aðili ritstýrir Kjarnanum og Stundinni. Hver?

Að morgni dags 21. maí birtu Stundin og Kjarninn tvær ítarlegar fréttaskýringar. Stundin birti kl. 0600 og Kjarninn 7:52. Báðar fréttaskýringarnar byggðu alfarið á gögnum er stolið var frá Páli skipstjóra Steingrímssyni á meðan hann var meðvitundarlaus vegna eitrunar.

Þórður Snær Júlíusson ritstjóri er höfundur pistilsins í Kjarnanum. Hann segir í rammagrein með fréttaskýringunni:

Ábyrgðarmenn Kjarnans vilja taka fram að umrædd gögn sem eru grundvöllur umfjöllunar miðilsins bárust frá þriðja aðila. Starfsfólk Kjarnans hefur engin lögbrot framið...

Þessi þriðji aðili er utanaðkomandi. Hann stendur fyrir lögbrotinu, samkvæmt orðum ritstjórans. Þriðji aðilinn úthlutar Stundinni og Kjarnanum stolnum gögnum. Gögnin út síma skipstjórans eru flokkuð til að úr verði tvær fréttasýringar. Sama fréttin en efnisatriðin ekki þau sömu. Þriðji aðilinn kann til verka í fréttamennsku. Jafnframt ákveður þriðji aðili hvenær efnið skuli birt, að morgni dags 21. maí. Það skapar tækifæri fyrir reiðibylgju: netheimar loga. Þriðji aðilinn veit hvernig skal hámarka samfélagsleg áhrif fréttaflutnings.

Stundin og Kjarninn kynna sig sem sjálfstæða fjölmiðla er lúti eigin ritstjórn. Út á það fá miðlarnir ríkisstyrk. En samt er það þriðji aðili sem ritstýrir báðum útgáfum. Hér er um að ræða falskar forsendur og misnotkun á almannafé.

Hver getur þriðji aðilinn verið? Það kemur aðeins einn aðili til greina, RÚV. 

(Aths.ritstj: Tilfallandi athugasemdir þiggja ekki ríkisstuðning. Páll Vilhjálmsson ritstýrir einn, án aðkomu þriðja aðila.)

 

 

RÚV býr til staðreynd úr skoðun

Almenna reglan í vestrænni blaðamennsku er aðskilnaður skoðana og staðreynda. Blaðamenn eiga að segja staðreyndir í fréttum. Skoðanir eru í leiðurum dagblaða og afmörkuðum þáttum álitsgjafa, hvort heldur ljósvakamiðlum eða prentútgáfum.

RÚV hefur þróað aðferð til að breyta skoðunum í staðreyndir. Viðtal fréttamanns RÚV við Bjarna Benediktsson fjármálaráðherra í hádeginu er skýrt dæmi.

Fréttamaður fær viðtal við ráðherra undir fölsku yfirskini, að ræða barnabætur. Það heyrist þegar hlýtt er á viðtalið, fyrri hlutinn er um málefni. En í miðju viðtali vendir fréttamaður kvæði sínu í kross og fer að tala um hvers vegna Jón Gunnarsson sé ráðherra og Brynjar Níelsson aðstoðarmaður hans. Það er raunverulegur tilgangur viðtalsins, eins og sést á textaútgáfunni og fyrirsögn fréttarinnar.

Fréttamaðurinn breytir skoðun örfárra í viðurkennda staðreynd. Bjarni er þýfgaður um skoðanir öfgafólks, að Jón Gunnarsson eigi ekki að vera ráðherra vegna þess að hann sé karl og á röngum aldri. Yfirskinið er frétt en innihaldið er hrein og klár skoðanapólitík. Fréttamaður brýtur meginreglu blaðamennsku, að aðskilja fréttir frá skoðunum.

Ég skil ekki spurninguna, segir Bjarni réttilega. Enda er spurningin spuni fréttamanns sem lifir í hliðarveruleika aðgerðasinna. Þannig starfar fréttastofa RÚV.

 

Vinstrimenn vilja bólupassa

Samfylking og Píratar eru fylgjandi mismunun óbólusettra. Helga Vals segir ,,pukrast" með málið og Þórhildur Sunna tekur undir.

En í stað þess að lýsa sig fylgjandi mismunun segja þær stöllur að taka þurfi ,,umræðuna." Þetta er sama orðalag og margir ESB-sinnar notuðu þegar þeir vildu ekki eða þorðu ekki að gangast við sannfæringu sinni.

Frjálslynda vinstrið varð stjórnlyndara í farsótt, bæði hér heima og erlendis. Það er afleiðing áratugaþróunar. Rauður þráður er í gegnum ESB-áráttu til loftslagsfræða Grétu Thunberg og yfir í bólu-apartheit. Góða fólkið er á sama stað og þýskur almenningur á þriðja áratug síðustu aldar. Stjórnlynd frelsun er boðorðið. Hægrimenn vita aftur að stjórnlyndi og frelsi er sitthvað.

Þeir sem eru á móti bólu-apartheit segja það upphátt. Fylgjendur krefjast ,,umræðu." Góða fólkið er og verður alltaf huglaust og leitar skjóls í altækri hugmynd, - helst með foringja. 

Segja umræðuna erfiða en vert að taka hana

Fréttastjóri RÚV: engin auglýsing

Fyrir mánuði var tilkynnt að Rakel Þorbergsdóttir fréttastjóri RÚV hættir störfum um áramót.

Enn hefur staðan ekki verið auglýst. Aðeins þrjár vikur eru til áramóta.

Stefán útvarpsstjóri segir ekki neyðarástand á RÚV. En hann getur samt ekki auglýst eftir fréttastjóra.

Lögreglurannsókn stendur yfir á starfsháttum RÚV og aðkomu stofnunarinnar að eitrun og stuldi.

Stefán útvarpsstjóri veit ekki enn hvaða starfsmenn Efstaleitis liggja undir grun og sæta e.t.v. ákæru.

Það er ástæðan að staða fréttastjóra er ekki auglýst.

En þetta má ekki segja upphátt. Glæpir fjölmiðla sæta fréttabanni. Blaða- og fréttamenn stunda ekki upplýsingamiðlun til almennings þegar starfsbræður og systur eiga í hlut. Í Norður-Kóreu standa fjölmiðlar vörð um leiðtoga landsins. Á Íslandi eru fjölmiðlar samtaka um að fjalla ekki um glæpi og spillingu í eigin ranni.

Líkt og í Norður-Kóreu eru fjölmiðlar á Íslandi á framfæri ríkisins. Ef ekki væri fyrir Tilfallandi athugasemdir yrðu engar fréttir sagðar af lögbrotum og spillingu í skúmaskotum valdsins. 

Tjáning, kyn og frelsi

Kennarar eiga á hættu ofsóknir ef þeir ræða kynjamál við nemendur sína, segir í frétt Telegraph. Tilefnið er lagafrumvarp á breska þinginu um kynvitund, sem ætlað er að uppræta mismunun.

Snúið mál atarna. Ástæðan er sú að þrennu ólíku er slegið saman; kynhneigð, kynvitund og hvort kynin séu tvö, þrjú, fimm eða seytján.

Til að flækja mál enn frekar eru undir í umræðunni frelsi einstaklingsins annars vegar og hins vegar almenn þekking okkar á veruleikanum.

Fyrst orðabókarskilgreiningar:

a. Kynhneigð snýst um að hvaða kyni fólk laðast. Flestir eru gagnkynhneigðir, sumir samkynhneigðir og einhverjir færri tvíkynhneigðir.

b. Kynvitund er sannfæring um af hvoru kyni fólk er. Sumir vilja segja af hvaða kyni, eins og kynin gætu verið 3, 5, 17 eða 300.

Tiltölulega breið samstaða er um að fólk sé einrátt um kynhneigð sína. Það kemur engum öðrum við en einstaklingnum sjálfum hvort hann sé gagn-, sam- eða tvíkynhneigður. Mannréttindi eru að sérhver hafi rétt til að þjóna sinni hneigð.

Kynvitund er réttindamál í þeim skilningi að ég hef fullkominn rétt til að vera í huga mér Páll fyrir hádegi en Guðrún eftir hádegi. Karl að morgni en kerling að kveldi. Málið verður snúnara ef ég ætlast til þess að samfélagið lagi sig að tvöfaldri kynvitund minni.

Lítilfjörlegt dæmi eru kyngreind salerni. Samfélagið samþykkir ekki að ég noti sem Páll karlasalerni fyrir hádegi en ég sem Guðrún fari á kvennaklóið eftir hádegi. Ókyngreind salerni eru lausn sem mælt er með en erfitt að hrinda í framkvæmd. Ókyngreindir búningsklefar á sundstöðum og íþróttahúsum eru ekki á dagskrá vegna inngróinnar blygðunarsemi kynjanna.

Og það er einmitt heila málið. Kynin eru tvö en ekki þrjú, fimm eða seytján. Þótt ég hafi fullan rétt á að vera í huga mér Páll fyrir hádegi en Guðrún síðdegis þá breytir sá réttur ekki þeirri hlutlægu staðreynd að kynin eru tvö. Einhverjir örfáir, um 0,05%, fæðast með tvíræð kyneinkenni. Stöku einstaklingar telja sig karl í konulíkama og öfugt. En þessir örfáu breyta ekki almennri líffræðilegri staðreynd.

Í Bretlandi sagði þingmaður að kynin væru tvö og óbreytanleg. Hann bætti við: ég fæ haturspóst fyrir að segja þetta upphátt.

Öll þessi vandræði með kynjaumræðuna má rekja til háskóla sem hættu að leita skilnings á heiminum og tóku upp þá kenningu síðmarxista að verkefnið væri að breyta heiminum. Bernska háskólafólks er enn ekki orðin stórvandi á Fróni. Höldum því þannig. 

Blaðamannaverðlaun afturkallist

Fyrir tveim árum verðlaunaði Blaðamannafélag Íslands falsfrétt. RÚV og Stundin, Helgi Seljan, Aðalsteinn Kjartansson og tveir aðrir fengu verðlaunin. BÍ hlýtur að afturkalla sæmdina enda fékkst hún út á ósannindi.

Í umsögn dómnefndar segir að fréttamálið sé um

ásakanir á hendur Samherja um mútugreiðslur í tengslum við starfsemi fyrirtækisins í Namibíu. Umfjöllunin byggði á staðhæfingum fyrrum starfsmanns Samherja í Namibíu og miklu magni gagna...

Namibíumálið er ein stór falsfrétt hvað viðvíkur Samherja. Jóhannes uppljóstrari fór með staðlausa stafi. Samherji fékk enga ákæru á sig. Eina sem Samherji gerði í Namibíu var að veiða fisk og selja. Fullkomlega löglegt, síðast þegar að var gáð. ,,Rannsóknablaðamennska" Helga Seljan og félaga var að segja löglega starfsemi glæpsamlega. ,,Rannsóknin" var ekki annað en rætið slúður klætt í fréttabúning.

Sigríður Dögg Auðunsdóttir, formaður Blaðamannafélags Íslands, heimtar ríkisfé til fjölmiðla. Fjölmiðlar dunda sér við framleiðslu falsfrétta og verðlauna sjálfa sig fyrir ósómann. Formaður BÍ krefst opinberrar niðurgreiðslu á ósannindum. Almenningur er krafinn um greiðslu fyrir að láta ljúga að sér.

Án afturköllunar á téðum verðlaunum er félag blaðamanna ábekingur óheilinda og blekkinga. Tilgangur blaðamennsku er að segja satt og rétt frá tíðindum líðandi stundar. Blaðamenn eiga ekki að taka upp á sína arma ótrúverðugan ógæfumann með langsóttar samsæriskenningar um glæpi í framandi heimsálfu. Blaðamenn sem láta etja sér á slíkt forað eiga betur heima á annarri deild en ritstjórn.

Alþingi getur sóma síns vegna ekki veitt almannafé í svikamyllu verðlaunaðra ósanninda. Það stendur upp á Blaðamannafélag Íslands að gera hreint fyrir sínum dyrum og afturkalla verðlaun fyrir ,,rannsóknablaðamennsku" ársins 2019.

 

Nauðgun, eitrun og RÚV

Hádegisuppsláttur RÚV í gær var lögreglurannsókn á meintri nauðgun knattspyrnumanna. Önnur lögreglurannsókn er ekki í fréttum RÚV. Sú rannsókn gengur undir nafninu Fjórmenningarklíkan á Glæpaleiti.

Það ættu að vera hæg heimatökin hjá fréttastofu RÚV að afla upplýsinga og þýfga grunaða um vitneskju um eitrunina á Páli skipstjóra og gagnastuldinn. Vitni og grunaðir eru innanbúðar á RÚV.

En lögreglurannsókn á RÚV er ekki frétt á Efstaleiti. Fréttastofa RÚV þegir og þá ganga allir fjölmiðlar í þagnarbindindi. Pælingin er að breyta veruleikanum með þögninni. Það tókst í Namibíumálinu.

Klíkan á Glæpaleiti fer með dagskrárvald opinberrar umræðu í lýðveldinu á Fróni.

Katrín sendir RÚV pillu

Forsetaúrskurður um skiptingu stjórnarmálefna milli ráðuneyta setur fjölmiðla undir atvinnu- og nýsköpunarráðuneytið. RÚV er þar í flokki og eftirlit með ,,aðgangi barna að kvikmyndum og tölvuleikjum" auk fjölmiðlanefndar og prent- og netmiðlum.

Katrín forsætis fylgdi úr hlaði breytingum á stjórnarráðinu og sagði

„Rök­ræða og jafn­vel stöku rifr­ildi eru mik­il­væg for­senda þess að við leiðum fram kosti og galla hvers máls. Við þurf­um því að sýna skoðunum annarra meiri virðingu en stund­um er gert í hana­slag nets­ins og hollt að muna að það er eng­inn sem er hand­hafi alls hins rétta og góða í sam­fé­lag­inu.“

RÚV heldur sig ,,handhafa alls hins rétta og góða í samfélaginu" og skipuleggur fjölmiðlaherferðir í því skyni. Á spena ríkisfjölmiðilsins eru tvær netútgáfur, Stundin og Kjarninn, sem höggva í sama knérunn. 

Ríkismiðillinn er ekki lengur hluti íslenskrar menningar í skiptingu stjórnarráðsins á málaflokkum. Áður naut RÚV virðingar. En nú er Snorrabúð stekkur; fjölmiðlalyngið á Efstaleiti galandi góðfólki að leik. 

Lög um Stjórnarráðið endurskoðuð

Siðareglur CNN og RÚV

Chris Cuomo, fréttamaður CNN, var gert að taka pokann sinn eftir að hafa ruglað saman hlutverkum sínum sem fréttamaður annars vegar og hins vegar bræðralagi við Andrew Cuomo, fyrrverandi borgarstjóra New York borgar. 

Eina sem Chris gerði, skv. BBC, var að vera full hjálplegur bróður sínum. Brot á siðareglum er litið alvarlegum augum á vestrænum fjölmiðlum.

En ekki á RÚV. Þar þykir sjálfsagt að fréttamenn véli með stolin gögn fengin með eitrun.

Hjörtum mannanna svipar kannski saman í Súdan og Grímsnesinu. En ekki siðum CNN og RÚV. 

Bróðir Cuomo rekinn af CNN