RÚV býr til staðreynd úr skoðun

Almenna reglan í vestrænni blaðamennsku er aðskilnaður skoðana og staðreynda. Blaðamenn eiga að segja staðreyndir í fréttum. Skoðanir eru í leiðurum dagblaða og afmörkuðum þáttum álitsgjafa, hvort heldur ljósvakamiðlum eða prentútgáfum.

RÚV hefur þróað aðferð til að breyta skoðunum í staðreyndir. Viðtal fréttamanns RÚV við Bjarna Benediktsson fjármálaráðherra í hádeginu er skýrt dæmi.

Fréttamaður fær viðtal við ráðherra undir fölsku yfirskini, að ræða barnabætur. Það heyrist þegar hlýtt er á viðtalið, fyrri hlutinn er um málefni. En í miðju viðtali vendir fréttamaður kvæði sínu í kross og fer að tala um hvers vegna Jón Gunnarsson sé ráðherra og Brynjar Níelsson aðstoðarmaður hans. Það er raunverulegur tilgangur viðtalsins, eins og sést á textaútgáfunni og fyrirsögn fréttarinnar.

Fréttamaðurinn breytir skoðun örfárra í viðurkennda staðreynd. Bjarni er þýfgaður um skoðanir öfgafólks, að Jón Gunnarsson eigi ekki að vera ráðherra vegna þess að hann sé karl og á röngum aldri. Yfirskinið er frétt en innihaldið er hrein og klár skoðanapólitík. Fréttamaður brýtur meginreglu blaðamennsku, að aðskilja fréttir frá skoðunum.

Ég skil ekki spurninguna, segir Bjarni réttilega. Enda er spurningin spuni fréttamanns sem lifir í hliðarveruleika aðgerðasinna. Þannig starfar fréttastofa RÚV.

 

Athugasemdir

[Heimir Lárusson Fjeldsted, 7.12.2021 kl. 19:31]

Ekki alveg nýlunda í starfsemi RUV. Ríkisfjölmiðillinn grefur sína gröf af festu.

[Grímur Kjartansson, 7.12.2021 kl. 21:05]

Systurstofnun RUV í Svíþjóð rannsakar hvar mesta kynlæga ofbeldið liggur

De tvingas välja mellan säkerheten och skolan | SVT Nyheter

[Kristinn Sigurjónsson, 8.12.2021 kl. 15:39]

RÚV hefur algjörlega farið á límingunum vegna Brynjars.  Brynjar hefur lagt fram frumvarp um að eitt mesta, versta og alvarlegasta ofbeldi gegn börnum verði refsivert.  Tálmunaofbeldi getur valdið börnunum bæði varanlegum andlegum og líkamlegum skaða.   Börn sem verða fyrir þessu ofbeldi hafa lélega sjálfsmynd og leiðast frekar út í eiturlyf og frekar út í sjálfsvíg.   RÚV forðast eins og heitan eldinn að fjalla um skaðsemi tálmunarofbeldis en hagar orðum sínum eins og það sé gagnrýnisvert að vilja forða börnum frá þessu ofbeldi og það sé kvenfyrirlitning.  Siðleysi RÚV ríður ekki við einteyming