Bogi: nánast glæpur og fullframinn

Þekktasta þulan á RÚV, Bogi Ágústsson, segir ,,nánast glæpsamlegt" hvernig Samherji kom fram við Helga Seljan.

Í fyrravetur gerði Samherji nokkur myndbönd til áhorfs á youtube sem andmæltu áróðri Helga Seljan og RSK-miðla. Þá kærði Samherji Helga til siðanefndar RÚV, sem taldi fréttamanninn þverbrjóta siðareglur stofnunarinnar. Það var ,,afbrot" útgerðarinnar. Til að koma í veg fyrir endurtekningu lagði útvarpsstjóri siðanefndina niður. Í millitíðinni var Helgi látinn fara frá RÚV. Stofnunin hafði ekki efni á að hafa siðbrjót á fóðrum.

Skyldi ætla að ,,nánast glæpur" væri heldur léttari á vogarskálunum en fullframinn. Ekki finnst þulunni frægu svo vera. Í hjali við Reyni á Mannlífi er ekki orði eytt á Þóru Arnórsdóttur samstarfsmanns Boga til margra ára.

Þóra er sakborningur í lögreglurannsókn, auk fjögurra annarra. Líkamsárás/manndrápstilraun með byrlun, gagnastuldur, stafrænt kynferðisofbeldi og brot á friðhelgi einkalífs eru sakargiftir. Ákæra verður að líkindum gefin út öðru hvoru megin við næstu helgi.

Líklega verður Bogi í fríi og þarf ekki að þylja upp fullframinn glæp. Sálarró gamallar þulu er í húfi. Glæpaleiti er ,,nánast" heiðarlegur vinnustaður.

 

Afturkræft veður? Jahérna

Sumarkuldinn í Reykjavík 2022 er óafturkræfur. Alveg eins og veðrið í gær er ekki afturkræft i dag. Einföld sannindi, sem þarf ekki að segja upphátt.

Eða svo skyldi maður ætla. En æðsti yfirmaður veðurfarsútreikninga á Íslandi, sjálfur veðurstofustjóri, telur brýnt að koma sjálfsögðum sannindum á framfæri. Árni Snorrason veðurstofustjóri er í viðtali á vísi.is undir fyrirsögninni:

Ís­lendingar verða að búa sig undir ó­aftur­kræfar af­leiðingar lofts­lags­breytinga

Hvað gengur hámenntuðum manninum til með að gefa til kynna að veður í dag gæti verið afturkræft á morgun- eða eftir ár, tíu ár? Er á ferðinni djúp speki eða fræðilega klædd fávísi?

Veðurstofan segir okkur veðrið næstu 4 til 7 daga með nokkrum líkindum. Allt umfram er ágiskun. En veðurstofustjóri þykist vita hvernig veðrið verður árið 2100, eftir 78 ár. Miklir menn erum vér, Vöggur minn.

Veðurstofustjóri getur ekki, frekar en aðrir, sagt hver sé kjörhiti jarðkringlunnar. Sú stærð er ekki þekkt. Veður breytist dag frá degi. Loftslag er veðurfar til lengri tíma, 30 ár og þar yfir. Náttúran hagar því svo til að loftslag breytist frá einum tíma til annars. Þótt sumir, sem eiga að heita sérfræðingar, hafi afmenntað sig og trúa að loftslag eigi að vera stöðugt lætur náttúran sér fátt um finnast.

Þegar Eiríkur rauði Þorvaldsson byggði Grænland fyrir árþúsundi var um 1,5 gráðu hlýrra á norðurslóðum en í dag. Getur veðurstofustjóri útskýrt? Trauðla báru víkingar ábyrgð á miðaldahlýskeiðinu.

William Happer er loftslagsvísindamaður sem kann sín fræði. Hann kenndi í Princeton og er höfundur yfir 200 ritrýndra vísindagreina. Reiknilíkön um loftslagsbreytingar framtíðar eru vísindaskáldskapur, segir Happer.

Spádóma um loftslag framtíðar byggir veðurstofustjóri á skáldskap, ímyndun.

Ábyggilega er embættismaðurinn grandvar og velmeinandi. Hvað gengur manninum til að gefa sig á vald Grétufræða?

Jú, þegar nógu margir á æðstu stöðum ánetjast kennisetningu verða þeir er vilja framgang í kerfinu að játa trú sína. Gerðist hjá miðaldakirkjunni og síðar í kommúnistaríkjum. Stofnanavald starfar með þessum hætti. Heilbrigð skynsemi víkur, órar ríkja.

Teorían um manngert veðurfar er ruslahrúga hindurvitna og wokeisma. Maður þarf beinlínis og bókstaflega að ganga fyrir vitsmunleg björg til að játast kenningunni.

En hvað gera menn ekki fyrir framgang í starfi? 

  

 

 

Kalt sumar minnir veðurfræðing á gamla tíma

RSK-miðlar fá liðsauka Gunnars Smára

Nýr fjölmiðill sósíalistaforingjans Gunnars Smára bætist við flóru vinstrifjölmiðla. Fyrir á fleti eru RÚV, Stundin og Kjarninn, RSK-miðlar. Nú kemur í góðar þarfir ríkisstyrkur Sósíalistaflokksins. RSK-miðlar eru á ríkisframfæri, RÚV alfarið.

Aðrir miðlar með sömu ritstjórnarstefnu eru Mannlíf og Fréttablaðið. Báðar útgáfurnar eru með auðmannaívafi.

Á fjölmiðlamarkaði má þekkja aðferðafræði vinstrimanna úr flokkspólitík. Þeir stofna flokka til að komast á ríkisjötuna. Flokkarnir fara hver í sínu lagi á kosningaveiðilendur að elta uppi kjósendur fyrir hvert kjörtímabil. Markmiðið er að ná í nægilega mörg atkvæði, um 2,5%, og fá ríkisfé. 

Flokkar vinstrimanna bjóða hver upp á sína útgáfuna af vinstripólitík og sama gera vinstrimiðlarnir. Þar er bitamunur en ekki fjár. Að baki liggur hugsunin að á hverjum tíma sé hægt að plata nógu marga til að fylkja liði um einhverja vinstrisérvisku.

Í leiðangri Gunnars Smára er endurnýtt samfylkingarfólk, Ólína fyrrum þingmaður, Vg-liðinn Þóra Ásgeirs og eflaust fleiri. 

Bæði í flokkspólitík og fjölmiðlarekstri er markmiðið það sama; að fá þægilega innivinnu velborgaða með frjálsum vinnutíma. Herfræðin er alltaf að féfletta almenning með einum eða öðrum hætti.

Einu liðamótin sem vinstrimenn nenna að hreyfa eru þar sem kjálki mætir kúpu. Málbeinið gefur sístreymi orða er flæða fram í fjölmiðlum og á þjóðarsamkundunni. Vitanlega er ekkert að marka orðin. En, sem sagt, á hverjum tíma er hægt að plata nógu marga til að halda svikamyllunni gangandi. Þannig er tryggt framlag úr ríkissjóði og þannig er almenningur féflettur.

Vinstriflokkar og fjölmiðlar þeirra eru fitulag á þjóðarlíkamanum sem þykknar með aukinni velmegun.

Gunnar Smári í fjölmiðlarekstur

Gorbatsjov breytti heiminum - til hins verra

Gorbatsjov, síðasti leiðtogi Sovétríkjanna, var góðmenni sem breytti heiminum til hins verra.

Gorbatsjov lagði niður Sovétríkin og felldi járntjaldið sem skipti heiminum, Evrópu sérstaklega, í austur og vestur. 

Eftir fall Sovétríkjanna var tekin upp í kommúníska hluta Evrópu regla sem annar góðviljaður maður kynnti heimsbyggðinni fyrir rúmri öld, Woodrow Wilson Bandaríkjaforseti. Þjóðríkjareglan, að hver þjóð ætti að eiga sitt ríki, er skynsöm og réttlát. En í framkvæmd eftir fyrri heimsstyrjöld bjó hún í haginn fyrir þá seinni.

Eins með upplausn Sovétríkjanna; hún var söguleg nauðsyn sem leiddi af sér óreiðu er ekki sér fyrir endann á.

Þegar eitt skipulag fellur, tvenn þýsk keisararíki eftir fyrra stríð og eitt rússneskt, fylgir upplausnarástand í áratugi. Í dag gímir heimurinn við afleiðingarnar af falli Sovétríkjanna á sléttum Úkraínu. Vestrið hyggst þar heimta sigurlaunin eftir uppgjöf Gorbatsjov í kalda stríðinu fyrir 30 árum.

Í kalda stríðinu var heimurinn öruggari og fyrirsjáanlegri. En hvorki var hægt að framlengja kalda stríðið né lengja líftíma Sovétríkjanna. Skipulagið eftir seinna stríð var gengið sér til húðar. 

Til að friðsamleg sundurlimun Sovétríkjanna og Austur-Evrópu hefði mátt ganga fram og verða liður í nýrri heimsskipan hefði hin hliðin á kaldastríðsjöfnunni, Bandaríkin og Vestur-Evrópa, orðið að þættast líkt og sovéska hlið jöfnunnar. En það stóð aldrei til. Sigurvegarinn vildi sín verðlaun. Mannlegur breyskleiki er samur við sig, tekur sigur í vegferð til glötunar fram yfir skynsama málamiðlun.

Jafnvel bestu menn, góðviljaðir og vandaðir, eru leiksoppar kringumstæðna.

Framlag Gorbatsjov, sem mun halda nafni hans á lofti um ókomna tíð, er að honum tókst að leysa í sundur heimsveldi á friðsaman hátt. Eftirleikurinn var ekki í hans höndum. 

Blessuð sé minning Mikhail Gorbatsjov, aðalritarans sem gerði flest rétt en fékk samt slæma útkomu.

„Breytti gangi sögunnar“

Þóra: nýtt handrit á Glæpaleiti

Við erum voða hissa, er viðkvæðið núna hjá blaðamönnum RSK-miðla vegna aðildar þeirra að líkamsárás með byrlun, gagnastuldi, stafrænu kynferðisofbeldi og broti á friðhelgi einkalífs.

Þóra Arn­órs­dótt­ir seg­ir í sam­tali við mbl.is að yf­ir­heyrsl­an hafi verið held­ur furðuleg upp­lif­un. „Það verður að minnsta kosti afar und­ar­legt ef meira verður úr þessu máli,“ seg­ir Þóra.

Þóra á RÚV og þrír aðrir blaðamenn á Stundinni og Kjarnanum (RSK-miðlum) voru kynnt til sögunnar sem sakborningar 14. febrúar sl. Það var ekki lögreglan sem kynnti alþjóð sakborninga heldur fjölmiðlar sjálfir. Sakborningar gætu verið fleiri. Raunar er öruggt að þeir séu a.m.k. fimm.

Í viðtengdri frétt mbl.is er haft eftir Saklausu-Þóru: ,,Hún seg­ir að hún hafi mest meg­ins verið spurð út í hluti sem hún gæti ekki tjáð sig um, vinnu sinn­ar vegna."

Ha?

Þóra birti ekkert efni úr síma Páls skipstjóra á RÚV. Það gerðu Kjarninn og Stundin. Er það í starfslýsingu Þóru á RÚV að gramsa í stolnum símum en birta ekkert efni? Tekur ríkisfjölmiðillinn reglulega við þýfi og dreifir til annarra fjölmiðla?

Við erum voða hissa. 

Fyrsta handrit RSK-miðla til að útskýra sakamálið var að lögreglan stundaði ofsóknir gegn fjölmiðlum. Lögreglan stendur að ,,aðför að blaðamennsku," sagði borginmannlegur Þórður Snær ritstjóri Kjarnans um miðjan febrúar. Hann taldi lögregluna á höttunum eftir heimildarmanni RSK-miðla. Viku seinna sagði Gísli Marteinn á RÚV að rannsókn lögreglu væri ,,klámhögg."

Lögreglan ofsækir blaðamenn, var sem sagt fyrsta útgáfan. Blaðamennirnir hefðu vitanlega í beinu framhaldi átt að leggja spilin á borðið, segja hvers kyns væri og útskýra aðkomu sína að málinu, bæði fyrir lögreglu og ekki síður almenningi.

En blaðamennirnir lögðu á flótta, útskýrðu ekkert og höfðuðu dómsmál til að komast undan skýrslutöku lögreglu. Ekki beittustu hnífarnir í skúffunni, glæpagengi RSK-miðla. Segja eitt en gera allt annað. Vanir að kaffæra  mál í fréttaflóði útúrsnúninga og hálfsannleika. 

Loksins, loksins eftir hálft ár skila Gísli, Eiríkur og Helgi og forsetaframbjóðandinn sér til lögreglu að gefa skýrslu. Augun standa á stilkum: málinu hlýtur ljúka eftir kaffispjall við lögguna.

Ef svo yrði væri refsilaust að gera líkamsárásir með byrlun, stela gögnum, stunda stafrænt kynferðisofbeldi og brjóta á friðhelgi einkalífs með þessari afsökun: ég er bara blaðamaður að gera frétt.

Í greinargerð lögreglu frá 23. febrúar sl., sem var lögð fram vegna dómsmáls Aðalsteins Kjartanssonar á Stundinni segir: ,,Lögreglan er með töluvert af símasamskiptum, tölvupóstum og annars konar samskiptum X við ákveðna fjölmiðlamenn." X er veik kona, náin Páli skipstjóra Steingrímssyni, sem var verkfæri í höndum blaðamanna við líkamsárás með byrlun og símastuldi. Blaðamenn sem notfæra sér andleg veikindi til að koma höggi á fólk eru dálagleg fyrirmynd. Í hvernig samfélagi fá slíkir fjölmiðlamenn verðlaun? 

Stafrænt kynferðisofbeldi stunduðu blaðamenn RSK-miðla í hjáverkum. Eiga þeir þó að heita heilir á geðsmunum.

Sími Páls skipstjóra var afritaður, klónaður, á Efstaleiti. Afritaði síminn geymdi einnig staðsetningarforrit. Snillingarnir á Glæpaleiti skildu eftir slóð sem verður rakin í ákærum og í dómssal. 

Við verðum öll voða hissa loksins, loksins þegar sannleikurinn um verðlaunablaðamennina verður tíundaður fyrir opnum tjöldum. Sennilega ekki í beinni útsendingu RÚV með Gísla Martein sem þulu.

 

 

 

 

Þóra og Aðalsteinn yfirheyrð í gær

Fréttin.is þorir, styðjum útgáfuna

Fréttin.is sker sig úr íslensku fjölmiðlakerfi. Útgáfan gerir sér far um að birta óvinsælar skoðanir í jafn ólíkum málaflokkum og lofslagsumræðunni, kynjafréttum og heilbrigðismálum.

Íslensk fjölmiðlun er einsleit. Bandalag þriggja fjölmiðla RÚV, Stundarinnar og Kjarnans, RSK-miðlar, er áhrifamikið um hvað teljast fréttir og hvað ekki. Sést best á þöggun alls þorra fjölmiðla um RSK-sakamálið. Fréttin sker sig úr, brýtur þögnina.

Skoðanir eru réttar eða rangar eftir rökstuðningi þeirra. Um fréttir gildir að engin frétt er betri en heimildin fyrir henni. Í öllum fjölmiðlum birtist efni sem heldur ekki máli, sé grannt skoðað. Fréttin er ekki undantekning. En Fréttin gerir sér far um að fylgja ekki rétttrúnaði sem þorri fjölmiðla er áskrifandi að. 

Pólitíski rétttrúnaðurinn í fjölmiðlakerfinu er hættulegur lýðræðinu. Upplýst samfélag þarf fleiri en eina skoðun, annars festumst við í allsherjarlygi; trúum að glæpir séu góðverk. Eins og RSK-miðlar hafa fyrir satt.

Fréttin nýtur ekki ríkisstuðnings, ólíkt flestum fjölmiðlum. 

Hægt er að styðja Fréttina.is með því að fara á heimasíðu útgáfunnar og leggja inn á reikning. Margt smátt gerir eitt stórt.

 

Þórður Snær, Þóra og glæpur ársins

Blaðamannafélag Íslands verðlaunaði í vor helstu afrek félagsmanna á liðnu ári. Þórður Snær og Arnar Þór af Kjarnanum fengu viðurkenningu fyrir ,,rannsóknarblaðamennsku ársins." Félagarnir fengu frá RÚV efni úr síma Páls skipstjóra Steingrímssonar og birtu. Feikileg rannsóknarvinna felst í að birta efni annarra - eins og nærri má geta.

Aðalsteinn Kjartansson á Stundinni fékk ,,blaðamannaverðlaun ársins." Hann gerði það sama og Þórður Snær og Arnar Þór, fékk texta ofan af Glæpaleiti og birti á Stundinni. Æðstu gæði íslenskrar blaðamennsku, samkvæmt fagfélagi stéttarinnar, er að afrita og líma.

Markmiðin verða vart háleitari, skyldi ætla. En jú, ef afritunin er fengin með glæpsamlegum hætti er það sérstakur bónus.

Þremenningarnir eru sakborningar í RSK-sakamálinu. Fjórði sakborningurinn, sem vitað er um, er Þóra Arnórsdóttir á RÚV. Réttarstaða blaðamannanna varð kunnug um miðjan febrúar. Verðlaunin fengu þeir í maí. Einstakt í sögu verkalýðsfélaga er að þau hvetji til skipulagðrar glæpastarfsemi. 

Í haust hlýtur Blaðamannafélag Íslands að verðlauna glæp ársins. Blaðamönnum RSK-miðla tókst að hnoða saman í eitt sakamál líkamsárás með byrlun, stafrænt kynferðisofbeldi, gagnastuld og brot á friðhelgi einkalífs, skv. greinargerð lögreglu dags. 23. febrúar í ár.

Afrekið verðskuldar verðlaun.

Verðlaunin verða sennilega afhent á Ítalíu. Að því gefnu, auðvitað, að ekki sé í gildi framsalsamningur milli þarlendra yfirvalda og Íslands.

Alræðisvald Stefáns útvarpsstjóra

Stefán Eiríksson útvarpsstjóri setti RÚV siðareglur í sumar. Siðareglurnar var hann með í smíðum í nokkra mánuði, samanber fundargerð 23. febrúar. Fjórða grein siðareglna RÚV er svohljóðandi:

Starfsfólk Ríkisútvarpsins rækir störf sín af ábyrgð, heilindum og heiðarleika. Starfsfólk Ríkisútvarpsins forðast að kasta rýrð á Ríkisútvarpið eða skaða ímynd þess og traust með framkomu sinni.

Í febrúar var upplýst að Þóra Arnórsdóttir ritstjóri Kveiks væri sakborningur í lögreglurannsókn, RSK-sakamálinu. 

Sakborningur verður sá er lögreglu grunar að sé sekur um refsiverða háttsemi. Stefán útvarpsstjóri veit þetta. Hann er lögfræðingur og fyrrum lögreglustjóri.

Engu að síður lætur Stefán Þóru annast umræðuþátt á RÚV vegna sveitarstjórnarkosninga í vor. Þóra hafði þá verið sakborningur í þrjá mánuði. Hún beitti undanbrögðum að komast hjá skýrslutöku hjá lögreglu og beitir enn.

Í þriðju grein siðareglna RÚV segir um grunngildi að stofnunin skuli stuðla að ,,félagslegri samheldni" þjóðarinnar.

Ekki stuðlar það að félagslegri samheldni að sakborningur í lögreglurannsókn, er varðar m.a. líkamsárás með byrlun, gagnastuld og stafrænt kynferðisofbeldi, stjórni umræðuþætti í aðdraganda kosninga.

Með því að gera sakborning að umræðustjóra í lýðræðislegum kosningum er réttarríkinu gefið langt nef. Þóra umræðustjóri er ígildi yfirlýsingar um að starfsmenn ríkisfjölmiðilsins séu hafnir yfir leikreglur samfélagsins. Það veit ekki á ,,félagslega samheldni."

Í títtnefndum siðareglum segir í tíundu grein:

Um brot gegn siðareglum þessum og afleiðingar slíkra brota fer eftir eðli máls hverju sinni. Útvarpsstjóri, eða eftir atvikum stjórn Ríkisútvarpsins ef málefnið varðar útvarpsstjóra sjálfan, skal þó ávallt hafa endanlegt ákvörðunarvald.

Stefán útvarpsstjóri getur ekki dæmt í eigin sök. Það stendur upp á stjórn RÚV að grípa í taumana. Stjórn RÚV er skipuð níu einstaklingum, sem tilnefndir eru af alþingi. Einn að auki situr stjórn, fulltrúi starfsmanna.

Stefán útvarpsstjóri og grunaðir starfsmenn hafa brotið gegn fjórðu grein siðareglna RÚV: ,,kastað rýrð á Ríkisútvarpið" og ,,skaðað ímynd þess og traust með framkomu sinni." Brotin eru framin af ásetningi, ekki slysni.

En þá vaknar spurning. Hvernig og hvert er hægt að kvarta undan broti á siðareglum RÚV? Um leið og Stefán útvarpsstjóri setti nýjar siðareglur í sumar lagði hann niður siðanefnd. Ellefta og síða greinin segir þetta skýrt:

Siðareglur þessar öðlast þegar gildi. Samhliða falla úr gildi eldri siðareglur og siðanefnd, sem starfar samkvæmt þeim, lætur af störfum.

Ef ekki er hægt að kvarta undan broti á siðareglum og enginn úrskurðar eru siðareglurnar orðin tóm. Síðasti úrskurður fráfarandi siðanefndar fordæmdi vinnubrögð samstarfsmanns Þóru, Helga Seljan. Stefán kemur í veg fyrir þann möguleika að dómbærir aðilar, óháðir RÚV, úrskurði um málefni stofnunarinnar. Siðferði innanhúss á Efstaleiti er ekki upp á marga fiska.

Siðareglur Stefáns eru með þeim innbyggða ómöguleika, hvað útvarpsstjóra sjálfan varðar, að stjórn RÚV getur ekki virkjað siðareglurnar nema fyrst lýsa yfir vantrausti á útvarpsstjóra.

Með siðareglunum tekur Stefán útvarpsstjóri sér nánast alræðisvald að úrskurða um siðferðisleg álitamál. Valdheimildirnar notar Stefán til að skjóta skjólshúsi yfir sakborninga í refsimáli annars vegar og hins vegar hindra að þjóðin verði upplýst um aðild starfsmanna RÚV að líkamsárás með byrlun, stafrænu kynferðisofbeldi, gagnastuldi og broti á friðhelgi einkalífs.

 

Þóra mætti ekki í lögregluyfirheyrslu

Þóra Arnórsdóttir ritstjóri Kveiks á RÚV mætti ekki í yfirheyrslu lögreglunnar vegna RSK-sakamálsins. Þóra er einn af fjórum þekktum sakborningum sem RÚV upplýsti 14. febrúar að væru grunaðir um aðild að líkamsárás með byrlun, stafrænu kynferðisofbeldi, gagnastuldi og brot á friðhelgi einkalífs.

Brotaþoli er Páll skipstjóri Steingrímsson en honum var byrluð ólyfjan 3. maí í fyrra. Vitað er að brotaþolar eru fleiri, en ekki hverjir.

Þrír sakborningar, sem vitað er um, Þórður Snær og Arnar Þór á Kjarnanum og Aðalsteinn á Stundinni, munu hafa gefið sig fram við lögreglu í byrjun ágúst. Þóra kom til landsins 11. ágúst og var boðuð til skýrslutöku daginn eftir. Hún mætti ekki. Allt frá fyrstu boðun skiptust blaðamenn RSK-miðla á að vera erlendis til að tefja framgang rannsóknar. Talið var að í byrjun ágúst hafi sakborningar sammælst um að hætta undanbrögðum. Þóra virðist á öðru máli.

Eftir yfirheyrslur þremenningana var Páli skipstjóra skipaður réttargæslumaður. Það felur í sér það mat lögreglu að hann hafi orðið fyrir alvarlegum brotum og eigi rétt á skaða- og miskabótum frá gerendum.

Eftir að Páli var byrlað var síma hans stolið og hann afritaður í höfuðstöðvum RÚV á Efstaleiti. Gögn úr símanum birtust sem fréttir í Kjarnanum og Stundinni 21. maí á liðnu ári. Engin frétt birtist á RÚV, sem var miðstöð skipulagningar og framkvæmdar aðgerða.

Páll kærði byrlun og stuld 14. maí 2021. Lögreglan safnaði gögnum sl. sumar og haust, m.a. með staðsetningarbúnaði síma Páls og hlerunum. Yfirheyrslur hófust í byrjun október.

Fyrstu viðbrögð Þóru, eftir að henni var tilkynnt að hún væri sakborningur um miðjan febrúar, voru að hún ætlaði að mæta á lögreglustöð samkvæmt boðun.,,Svo mæti ég bara sallaróleg í þessa skýrslutöku," sagði Þóra í viðtali við DV. 

En þegar alvara málsins rann upp fyrir Þóru og félögum kom annað hljóð í strokkinn. Í vetur og vor reyndu bæði Aðalsteinn og Þóra að tefja málið með kærum til dómstóla. Þau voru gerð afturreka í landsrétti og hæstarétti. Hvorki Aðalsteinn né Þóra svara í síma. Fjölmiðlar láta það gott heita og birta ekki fréttir af framvindu málsins. Þegjandi samkomulag er á milli blaðamanna og fjölmiðla að segja sem minnst, og helst alls ekkert, um afbrot blaðamanna. 

Alvarlegustu brotin gegn Páli skipstjóra eru líkamsárás með byrlun annars vegar og hins vegar stafrænt kynferðisofbeldi. Vitað er hver byrlaði Páli og stal síma hans, það var veik kona, nákomin Páli. Konan var verkfæri blaðamannanna sem hugsuðu skipstjóranum þegjandi þörfina fyrir að hafa andmælt fréttum RSK-miðla um Samherja, en það er atvinnuveitandi Páls.

Einn eða fleiri sakborningar dreifðu persónulegu myndskeiði af Páli og jafnöldru hans. Myndskeiðið var í síma Páls sem var afritaður á Efstaleiti. Samkvæmt lögum eru slík brot stafrænt kynferðisofbeldi.

Á meðan Þóra lætur ekki sjá sig í skýrslutöku lögreglu tefst málið. Venja er að sakborningar í sakamálarannsókn eru tvisvar boðaðir í yfirheyrslu, fer þó eftir eðli mála. Ef þeir sinna ekki boðun í tvígang er til í dæminu að gefa út handtökutilskipun og sakborningur sóttur af lögreglu. Þóra var boðuð í yfirherslu í febrúar og aftur í ágúst. Í þriðja sinn gæti hún mætt á lögreglustöðina með meiri fylgd en lögmanns.

 

 

Stjórn RÚV og siðareglur sakamanna

Síðasti fundur stjórnar RÚV var haldinn í mars, skv. heimasíðu. Að jafnaði fundar stjórnin tvisvar í mánuði, einu sinni í mánuði yfir sumarið. Feimni stjórnar RÚV að funda tengist lögreglurannsókn, RSK-sakamálinu, þar sem bæði núverandi og fyrrverandi fréttamenn stofnunarinnar eru sakborningar.

Fundurinn í mars var afgreiðslufundur. Aftur kom RSK-sakamálið fyrir á fundi stjórnar RÚV þann 23. febrúar. Viku áður var upplýst að sakborningar væru starfsmenn RÚV. Í fundargerðinni er ein setning, um að RSK-sakamálið hafi verið ,,rætt".

Í næstu efnisgrein fundargerðarinnar frá 23. febrúar segir að í mars kynni útvarpsstjóri endurskoðaðar siðareglur. Álíka vel fer á siðareglum á Glæpaleiti og að nefna snöru í hengds manns húsi.

RÚV hélt aðalfund í apríl. Í frásögn á heimasíðu ríkisfjölmiðilsins er ekki stakt orð um siðareglur. Ekki er heldur eytt orðum á þau nýmæli að stofnunin hýsi sakborninga.

En viti menn. Á miðju sumri, og án þess að kynna stjórn RÚV, að því er best verður séð, leggur útvarpsstjóri fram siðareglur dagsettar 13. júní 2022.

Loksins, loksins þegar útvarpsstjóri opinberar siðareglurnar vantar eftirfarandi ákvæði: starfsmenn RÚV stundi ekki, og taki ekki þátt í, a. líkamsárás með byrlun b. stafrænu kynferðisofbeldi c. gagnastuldi og d. friðhelgisbrotum á einkalífi fólks.

Siðareglur stofnunar, sem ekki tekur á siðlausum starfsmönnum sannanlega nátengdum lögbrotum, samanber sakborninga, eru siðareglur sakamanna.

Starfsmenn RÚV flýja réttvísina, fréttastofan er eins og aparnir þrír; sér hvorki né heyrir og má ekki mæla; útvarpsstjóri skrifar siðareglur með sakborninga sér við hlið. 

Engin furða að stjórn RÚV fundi ekki. Enginn fundur, engin pínleg þögn um yfirvofandi ákærur.

Siðrof umlykur Efstaleiti.