Strútfuglapólitík sjálfstæðismanna

Sumir sjálfstæðismenn, t.d. þingmaðurinn sem skreið í morgunsárið inn á alþingi, kenna afstöðu flokksins til Evrópusambandsins um ófarirnar í kosningunum. Blaðamenn gleypa við þessu enda passar það vel við ESB-línu fjölmiðla. Spuninn gleymir einni staðreynd: Þjóðin er á móti inngöngu í Evrópusambandið, það hefur margítrekað komið fram.

Sjálfstæðisflokkurinn galt afhroð af þrem ástæðum. Í fyrsta lagi ber flokkurinn almenna pólitíska ábyrgð á einkavæðingu liðinna ára og að leiða til vegs engilsaxneska frjálshyggju en hvorttveggja voru forsendur auðvæðingar Íslands og hruns. Í öðru lagi var Sjálfstæðisflokkurinn uppvís að því að þiggja mútur frá auðmönnum og einstakir þingmenn sömuleiðis. Í þriðja lagi rak flokkurinn aumkunarverða kosningabaráttu þar sem tækifærismennskan í evruupptökutillögunni var hámarkið.

Röng pólitík, spilling og tækifærismennska eru þrenningin sem felldi Sjálfstæðisflokkinn. Til að endurreisa sig þarf flokkurinn að vera hreinskilinn. Evrópubulllydagþvættingur er varla ágætis byrjun. 

Uppreisnarmaður á tvöföldu kaupi

Þráinn Bertlesson og Borgarahreyfingin verða gera upp við sig hvort búsáhaldabyltingin og framboðið var til að skaffa sniðugu fólki tvöfalt kaup eða berjast gegn spillingu. Fordæmið sem Þráinn sýnir mun án efa leiða til þess að margir fleiri verði fylgjandi stjórnlagaþingi. Sumir gætu gert sér vonir um að vera á þreföldu kaupi við að véla um landsins gagn og nauðsynjar.

Þráinn íhugar heiðurslaun

Er 3% fylgi Ómars Evrópufylgi?

Samfylkingin bætti við sig þrem prósentum í fylgi, sem er sama fylgið og Íslandshreyfing Ómars Ragnarssonar fékk í síðustu kosningum. Íslandshreyfingin gekk í heild sinni, með skuldum og öllu, inn í Samfylkinguna í aðdraganda kosninganna.

Ómar vildi ekki drekkja íslensku landi fyrir útlenskar álbræðslur. Vill hann drekkja fullveldinu fyrir aðild að skrifræðinu í Brussel?

Evrópuákall breytist í æmt

Samfylkingin bætir við sig tveim þingmönnum útá töfralausnina Ísland í Evrópusambandið. Þriggja flokka stjórn Evrópusinna með Framsókn, Borgaraflokki yrðir brandari með 33 þingmenn og ekki á vetur setjandi.

Í gærkvöldi ætlaði þetta að fara verr þegar stefndi í 33 prósent fyrir Samfylkingu og 22 þingmenn. En morgunstund gefur gull í mund og minna Brusselfylgi meðal þjóðarinnar. 

27 nýir þingmenn

Stóra Evrópublöffið

Samfylkingin tókst að plata þjóðina með áróðri um að innganga í Evrópusambandið væri bjargræði Íslands. Skítug upp fyrir haus af fjármálahruni og mútustyrkjum vinnur Samfylkingin stórsigur í kosningunum. Þegar Samfylkingin verður rukkuð um inngönguloforðið blasir við að höfuðvígi andstæðinga aðildarumsóknar, Vinstri grænir, munu ekki ljá máls á því. Samfylkingin verður að leita annað og þá er Framsóknarflokkurinn og Borgarahreyfingin nærtækur kostur.

Miðað við kosningaloforðið verður Samfylkingin að láta á það reyna að setja saman ríkisstjórn Evrópusinna. Samfylkingin mun hins vegar ekki þora í þriggja flokka stjórn með óreyndu liði. Í Samfylkingunni ráða tækifærissinnar en þeir eru tæplega svo skyni skroppnir að veðja á þriggja flokka einsmálsstjórn.

Til hamingju með blöffið, Samfylking.

Ástþór illur, túlkuð Jóhanna og Evrópa hrynur

Ástþór er illur út í RÚV og maður finnur til samkenndar með misskilda snillingi íslenskra stjórnmála. Jóhanna Sig. þarf túlk til að skilja útlendinga og þeir til að botna í henni, samkvæmt Eyjunni. Allt er þetta við hæfi á kosningadegi. Heppilegur kvöldvökulestur Samfylkingar og Jóhönnu er grein Anatole Kaletsky í Times þar sem hann spáir fyrir evrópska hagkerfinu.

Evrópuófriður Samfylkingar

Samfylkingin boðar borgarastyrjöld á Íslandi þar sem fullveldi landsins er að veði. Forysta Samfylkingar hefði skrifað upp á Gamla sáttmála 1262 og fjögur hundruðum árum seinna hefði hún fallið á kné í Kópavogi og hyllt einveldi útlendinga. Forveri Samfylkingarinnar, Alþýðuflokkurinn, var heimili þeirra örfáu Íslendinga sem lögðust gegn stofnun lýðveldis.

Á morgun veljum við hvort Ísland eigi áfram að vera þjóð meðal þjóða eða skríða á hnjánum til Brussel.  Við kjósum Vinstri græna.

Samfylkingarfréttastofan RÚV

Kosningaskrifstofa Samfylkingar gæti hafa lagt niður fréttamatið fyrir fréttastofu RÚV síðasta kvöldfréttatímann fyrir kosningadag. Ekkert sem gæti sett Samfylkinguna og pólitík hennar í slæmt ljós skyldi á öldur ljósvakans.

Tvær fréttir í dag sem ættu erindi á fréttastofu með lágmarksmetnað: Fyrrum viðskiptaráðherra er uppvís að lygaþvælu um styrki frá Baugi. Í öðru lagi grænbók Evrópusambandsins um fiskveiðistefnuna sem sýnir svart á hvítu að hlutfallslegur stöðugleiki er hugtak sem ekki heldur vatni. En ákkúrat það hugtak er akkeri Samfylkingar og á að tryggja að flotar Evrópuþjóðanna leggi ekki undir sig Íslandsmið. Það stappar nærri faglegum fábjánahætti að fjalla ekki um þessa frétt.

Hvað fengum við í staðinn? Jú, það var hraunað yfir Kollu umhverfisráðherra, löng frétt um nefnd varaformanns Samfylkingarinnar sem byrjað var á í hádeginu og segir frá öllu því sem Samfylkingin ætlar að gera fyrir skilnaðarfjölskyldur landsins.

Þetta er einfaldlega ekki boðlegt.

Björgvin á flótta undan Baugsstyrk

Hallærislegasta fyrirbrigði sem til er hlýtur að vera stjórnmálamaður á flótta undan fjölmiðlum daginn fyrir kosningar. Björgvin G. Sigurðsson fyrrum viðskiptaráðherra og efsti maður á lista Samfylkingar í Suðurkjördæmi lætur ekki ná í sig í dag, samkvæmt visir.is, vegna þess að hann er flæktur í eigin lygaþvælu.

Svili Björgvins, Sigurður G. Guðjónsson, lögfræðingur og fyrrum stjórnarmaður í Baugsbankanum Glitni, kemur fram sem kosningastjóri Björgvins og harðneitar að fallni viðskiptaráðherrann hafi fengið styrk frá Baugi. DV hafði sagði frá þessum styrk. Lygin stendur í nokkra daga en þá viðurkennir samstarfsmaður Björgvins, Tómas Þóroddsson, að litli maðurinn með bassaröddina hafi fengið styrkinn.

Og Björgvin G. Sigurðsson lætur ekki ná í sig.

Þriggja flokka Evrópustjórn

Yfirvofandi er þriggja flokka Evrópustjórn Samfylkingar, Framsóknarflokks og Borgarahreyfingar. Samkvæmt skoðanakönnunum geta þessir þrír flokkar myndað meirihlutastjórn. Miðað við áherslur Samfylkingar í kosningabaráttunni, þar sem öll vötn falla til Brussel, hlýtur fyrsti kostur flokksins vera að mynda ríkisstjórn sem sækir um aðild Íslands að Evrópusambandinu.

Hvað gera bændur þá?