Kjarninn: RÚV stal síma Páls skipstjóra

Ritstjóri Kjarnans, Þórður Snær Júlíusson, viðurkennir að RÚV hafi staðið að stuldi á síma Páls Steingrímssonar skipstjóra hjá Samherja. Símanum var stolið aðfaranótt 4. maí eftir að eitrað hafi verið fyrir skipstjóranum og hann lá meðvitundarlaus í öndunarvél.

Játning Þórðar Snæs kemur fram í fréttaskýringu sem hann skrifaði 21. maí í Kjarnann. Þar segir

Ábyrgðarmenn Kjarnans vilja taka fram að umrædd gögn sem eru grundvöllur umfjöllunar miðilsins bárust frá þriðja aðila. Starfsfólk Kjarnans hefur engin lögbrot framið...

RÚV skipulagði og stjórnaði atlögunni að Páli skipstjóra. Verktaki á vegum RÚV sá um framkvæmdina. Tæknimaður ríkisfjölmiðilsins afritaði gögnin úr snjallsíma Páls. Fréttamaður í samvinnu við yfirmann á RÚV deildi gögnunum á milli Stundarinnar og Kjarnans. Vefritin tvö starfa í skjóli miðstöðvarinnar á Efstaleiti.

Aðalsteinn Kjartansson, sem RÚV lánaði á Stundina kortéri fyrir glæp, opnaði málið á Stundinni 21. maí, sama dag og Kjarninn. Aðalsteinn birti sína frétt kl. sex að morgni en Þórður Snær Kjarnafréttina tveim klukkustundum síðar, kl. 07:52. Síma Páls var stolið 17 dögum áður. Í rúmar tvær vikur var lagt á ráðin til að hámarka áhrifin á þjóðfélagsumræðuna. Miðstöð skipulagsins var á Efstaleiti.

,,Þriðji aðilinn" sem Þórður Snær talar um getur ekki verið neinn annar en RÚV. Fyrir utan RÚV er enginn ,,þriðji aðili" er gæti ritstýrt Stundinni og Kjarnanum og samstillt útgáfutíma. Bæði vefritin, vel að merkja, kynna sig sem sjálfstæða fjölmiðla. Í raun eru útgáfurnar leppar RÚV, enda ritstýrt frá Efstaleiti.

Eins og Þórður Snær segir: ,,Starfsfólk Kjarnans hefur engin lögbrot framið". RÚV skipuleggur og framkvæmir glæpina. Kjarninn og Stundin sjá um að koma afrakstri afbrotanna í umferð. Rúsínan í pylsuendanum er að fyrrverandi lögreglustjóri fer með húsbóndavaldið á Glæpaleiti.

Mistök RÚV í aðförinni að Páli skipstjóra

RÚV gerði þrenn afdrifarík mistök við þjófnaðinn á síma Páls skipstjóra.

Í fyrsta lagi flutti RÚV Aðalstein Kjartansson yfir á Stundina til að vinna úr gögnunum áður en síma Páls var stolið. Sú aðgerð staðfestir ásetning og aðild RÚV að glæpnum.

Í öðru lagi var síma Páls stolið, gögn afrituð, og símanum skilað. Í símanum eru upplýsingar um hvert hann fór á meðan símtækið var í höndum þjófanna. Lögreglan fékk heimild Páls til að rekja ferðalagið og viðkomustaði. Smitrakningarapp er í síma Páls, sem gefur upplýsingar um hvaða símar voru í nágrenni á meðan snjallsími Páls var í þjófahöndum. Lögreglan þarf dómsúrskurð til að nálgast þessar upplýsingar. Þegar um er að ræða lífshættulega atlögu ætti að vera auðsótt mál að fá heimild til að upplýsa glæpinn. 

Aldrei færri en tveir starfsmenn RÚV komu að síma Páls, fréttamaður og tæknimaður. Líklega einnig einhver af ritstjórn Kveiks. Svo er það vitanlega verktakinn, sem sá um þjófnaðinn. Þeir seku nánast gáfu sig sjálfir fram. Brotafólk reiðir ekki vitið í þverpokum, hvorki siðvit né hyggjuvit.

Í þriðja lagi gerði RÚV þau mistök að halda Pál heimskan og huglausan togaraskipstjóra. Páll veit sitthvað um tæknimál og býr að sterkri réttlætiskennd (fylgir postulanafninu). Skipstjórinn sá að átt hafði verið við símann á meðan hann var á gjörgæslu vegna eitrunar og gerði ráðstafanir til að upplýsingar í snjalltækinu eyddust ekki. Sjómaðurinn lyppaðist ekki niður þegar RÚV-valtarinn keyrði yfir hann, heldur tvíefldist. Norðlenskum togarakörlum er ekki fisjað saman.

RÚV-arar bíða ákæru og síðan dóms og laga. Sekir fá um síðir makleg málagjöld. Það kallast réttlæti.

 

Stundin og Kjarninn á spena RÚV

Án þess að stafkrókur sé um það í lögum og reglum RÚV er ríkisfjölmiðillinn í nánu faglegu og fjárhagslegu samstarfi við vefmiðlana Stundina og Kjarnann. RÚV notar jaðarmiðlana til að ráðast á andstæðinga sína, halda fréttum lifandi sem annars féllu dauðar, þagga niður fréttir sem eru óþægilegar og opna sóðaleg fréttamál sem RÚV endurómar.

Nýtt dæmi um þjónustuhlutverk Stundarinnar og Kjarnans er samstillt aðgerð gegn tilfallandi höfundi. Síðdegis á fimmtudag birti Stundin pistil Aðalsteins Kjartanssonar og leiðari Þórðar Snæs í Kjarnanum var sendur út þrem klst. síðar. Í báðum tilfellum var stuðst við fjölmiðlagreiningu Creditinfo sem er dýr í áskrift fyrir félitla jaðarmiðla en RÚV kaupir. Tímasetning var samstillt til að freista þess að hrinda af stað reiðibylgju á samfélagsmiðlum.

Félagarnir Aðalsteinn og Þórður Snær bera blak af RÚV vegna aðildar að glæpamáli sem er í lögreglurannsókn. RÚV stendur teprulegt álengdar, vikapiltarnir sjá um skítverkin.

Þegar RÚV skipulagði aðför að meðvitundarlausum manni í öndunarvél í vor til að stela frá honum gögnum var Aðalsteinn starfsmaður á Efstaleiti. Í tæka tíð fyrir glæpinn var hann fluttur á Stundina. Fyrir hádegi 30. apríl var Aðalsteinn starfsmaður RÚV en eftir hádegi var hann orðinn blaðamaður á Stundinni. Þetta er staðfest. Eftir hádegi var Aðalsteinn enn á launaskrá RÚV en í vinnu hjá Stundinni. Móðurfélagið skutlaði starfsmanni í dótturselskapið til að vinna myrkraverk.

Þórður Snær og meðeigandi hans í Kjarnanum eru reglulega í settinu á Efstaleiti að ræða þjóðmálin og leggja línurnar. RÚV fær hundslega tryggð og jaðarfólkið kynningu. 

Störf, verktakagreiðslur og fagleg umbun flæða frá Efstaleiti í Kjarnann og Stundina. Allt er þetta fjármagnað með ríkisfé, skatti sem almenningur er neyddur að inna af hendi.

Ríkisfjölmiðill kemur sér upp leppmiðlum til að styrkja stöðu sína á fjölmiðlamarkaði. Efnt til herferðar einn daginn en þann næsta slegin skjaldborg þegar upp kemst um strákinn Tuma og vinnubrögðin. Ríkisendurskoðun hefur af minna tilefni gert stjórnsýsluúttekt á ríkisstofnun.

Aðalsteinn opnaði svívirðilegasta fréttamál seinni ára 21. maí. Kjarninn og RÚV fylgdu í humátt á eftir og birtu raðfréttir af málinu til að festa í vitund almennings að skúrkar ynnu hjá Samherja.  Samræmdar aðgerðir og samstillt vinnubrögð. Afhjúpun Aðalsteins var fengin með glæp.

Þórður Snær segir að það sé allt í lagi að stela og stefna lifi fólks í voða til að ná í fréttir. Enginn blaðamaður með ögn af sjálfsvirðingu talar svona. Þetta er hrein og klár gangsteramenning. Ef allir hugsuðu eins og Þórður Snær væri ólíft á Íslandi. Misindismenn tækju fólk af lífi, bæði í eiginlegum og óeiginlegum skilningi, án nokkurra afleiðinga ef þeir aðeins titluðu sig blaðamenn eða heimildarmenn frétta.

RÚV er áferðafalleg miðstöð skítamenningar í nánu bandalagi við göturæsisútgáfur. Bandalagi RÚV, Stundarinnar og Kjarnans er ekkert heilagt. Afbrot eru skipulögð með þaulhugsaðri verkskiptingu, þau framkvæmd og síðan réttlætt.  Enginn er óhultur á meðan dýrið gengur laust.

Þórður Snær réttlætir glæp til að fá frétt

Þórður Snær Júlíusson ritstjóri Kjarnans sendir mér eftirfarandi pillu í leiðara:

Blaðamenn taka oft við gögnum sem eru jafn­vel fengin með ólög­mætum hætti. Þeir meta erindi þeirra og vinna úr þeim eftir reglum blaða­mennsku ef brýnt til­efni er talið til birt­ing­ar. Þeir fremja ekki lög­brot með þessu og fyrir því eru fjöl­mörg for­dæmi. 

Lög um fjöl­miðla tryggja svo heim­ild­ar­mönnum vernd gegn því að verða opin­berað­ir. 

Páll Vil­hjálms­son gefur þó ekk­ert fyrir ofan­greint. 

Rétt, ég gef ekkert fyrir það að blaðamenn séu þjófsnautar. Engar ,,reglur blaðamennsku" gefa blaðamönnum leyfi að höndla með þýfi. Né heldur að lögmætt sé að fremja glæp til að afla frétta. Enn síður að afbrotamenn fái sakaruppgjöf ef þeir þykjast ,,heimildarmenn" frétta.

Fjölmiðlar sem stunda glæpi eru ónýtir til að upplýsa afbrot annarra. Enginn getur í senn verið heiðarlegur og stundað lögbrot. Blaðamaður sem leggur að jöfnu heiðarleika og glæpaiðju er ekki upp á marga fiska. 

Þórður Snær er óopinber talsmaður RÚV. Að hann telji sjálfsagt að stunda glæpi til að afla frétta er fremur óhugnanlegur vitnisburður um ríkisfjölmiðil á villigötum.

Páley staðfestir lögreglurannsókn

Páley Borgþórsdóttir lögreglustjóri á Norðurlandi eystra staðfestir yfirstandandi lögreglurannsókn á stuldi síma Páls Steingrímssonar skipstjóra hjá Samherja.

Í samtali við Vísir.is segir Páley að frétta sé að vænta af rannsókninni eftir tvær vikur.

Tilfallandi athugasemdir sögðu frá lögreglurannsókninni þann 10. nóvember.

Það tók fjölmiðla heila níu daga að fá staðfestingu á tilfallandi bloggi.

Vel gert.

Aðalsteinn, Þórður Snær og þögn RÚV

Aðalsteinn Kjartansson, nú á Stundinni, hætti fyrirvaralaust á RÚV föstudaginn 30. apríl í vor. Aðalsteinn gaf loðin svör í viðtali, talaði um ,,persónulegar ástæður" og segist ætla í frí. Síðdegis sama dag segir Stundin í tilkynningu að Aðalsteinn sé orðinn blaðamaður þar á bæ. Leikritið var sett upp til að gefa Aðalsteini frjálsar hendur á Stundinni eftir glæp sem var skipulagður á Efstaleiti og stjórnað þaðan. 

Fjórum dögum eftir skyndileg vistaskipti Aðalsteins verður Páll Steingrímsson skipstjóri hjá Samherja fyrir eitrun og er fluttur á gjörgæslu. Síma hans er stolið. Gögn úr símanum fóru til Aðalsteins sem vann úr þeim og birti hann stóra frétt 21. maí um skæruliðadeild Samherja.

Gögnin sem Aðalsteinn nýtti sér voru afrakstur glæpsins, eins og rakið hefur verið.

Aðalsteinn skrifar í gær pistil í Stundina þar sem hann segist ekki hafa framið glæp. Enginn hefur sakað hann um tvöfalda glæpinn, eitrun og stuld. Aftur er morgunljóst að Aðalsteinn nýtti sér illa fengin gögn. Sá sem nýtir þýfi og hylmir er þjófsnautur.

Hvernig fékk Aðalsteinn gögnin úr síma Páls skipstjóra? Hverjir frömdu glæpinn?

Aðalsteinn kallar sjálfan sig blaðamann. En hann situr á upplýsingum um stórfellda glæpi ríkisstofnunar gegn almennum borgara. Aðalsteinn kýs að þegja. Blaðamenn sem ljúga með þögninni um mikilsverð málefni samfélagsins starfa ekki í þágu almannahagsmuna. 

Þórður Snær Júlíusson ritstjóri Kjarnans og samstarfsmaður RÚV skrifar leiðara með sama stefi og Aðalsteinn. 

En RÚV þegir. Alveg eins og þegar Namibíumálið tapaðist.

Aðalsteinn og Þórður Snær eru í verktöku hjá RÚV. Hver var verktakinn þegar Páll skipstjóri var sendur í öndunarvél til að stela af honum símanum?

Lögreglan rannsakar eitrun Páls skipstjóra

Lögreglan fékk lífssýni af Páli Steingrímssyni skipstjóra hjá Samherja í tengslum við rannsókn á lífshættulegu tilræði þegar síma Páls var stolið 4. maí í vor.

Síma Páls var stolið þegar hann lá í öndunarvél á gjörgæslu. Rannsókn lögreglu beinist m.a. að því að greina ástæður skyndilegra lífshættulegra veikinda skipstjórans. Í tölvupósti til Páls er hann beðinn um lífssýni til að ,,finna út hvort þú hafir orðið fyrir eitrun.“

Með tölvupósti er Páll einnig beðinn um heimild að tæknideild lögreglunnar afli upplýsinga hjá fjarskiptafyrirtækjum um ,,hvar síminn var á meðan þú varst meðvitundarlaus“. Þær upplýsingar staðfesta að sími Páls fór um hendur starfsmanna RÚV sem stálu úr símanum gögnum. Þau gögn voru notuð af RÚV, Stundinni og Kjarnanum í fjölmiðlaherferð gegn Samherja.

Rannsókn málsins er langt komin. Páley Borgþórsdóttir lögreglustjóri á Norðurlandi eystra fer með forræði rannsóknarinnar. Hún hefur verið í Reykjavík alla þessa viku. Búið er að yfirheyra starfsmenn RÚV, Stundarinnar og Kjarnans. Efnisatriði í drög að skýrslu liggja fyrir. Atburðarásin, með tímalínum og atvikalýsingum, er kunn. Andleg vanheilsa grunaðra hefur verið rannsökuð og læknisvottorð metin.

Fjölmiðlar þegja sem gröfin. Samfélag blaðamanna er fámennt. Menn eru vinir, kunningjar og samstarfsmenn, núverandi, fyrrverandi eða verðandi. Í vina- og hagsmunatengslum vill gleymast að starf blaðamanna er að upplýsa almenning um mikilsverð mál.

Ekki verða fréttamálin öllu stærri en þegar ríkisfréttastofa er bendluð við banatilræði og þaulskipulagðan gagnastuld frá manni sem liggur meðvitundarlaus í öndunarvél. Sá sem ekki sér fréttina, tja, hann er ekki blaðamaður heldur hagsmunavörður.

Á Efstaleiti er aftur það að frétta að fréttastjórinn Rakel hættir, sumir vilja í langt námsleyfi á meðan aðrir huga að nýjum vettvangi. Varla þó blaðamennsku. Afplánun telst ekki atvinna.

Stefán útvarpsstjóri getur ekki ráðið fréttastjóra með aðsetur á Litla-Hrauni eða Kvíabryggju. Þess vegna bíður hann með að auglýsa starfið.

Engin skýring á töf

RÚV er eitraða peðið, meðferðin á Lilju hræðir

Förum við ekki að fá nýjan ráðherra, nánast kjökraði Broddi Broddason fréttaþulur RÚV í hádeginu í gær (8:15).

Á Efstaleiti ríkir umsátursástand, bæði vegna afdrifa Namibíumálsins og lögreglurannsóknar. RÚV vantar bráðnauðsynlega ráðherra til að beita fyrir sinn vagn.

Ráðherraefni vilja helst ekki koma nálægt ráðuneyti menntamála sem RÚV heyrir undir. Í pólitískum kreðsum vita menn hvernig tekið er á þeim sem ekki spila með dagskrárvaldinu á Efstaleiti.

Lilju Alfreðs sitjandi menntamálaráðherra varð það á að gagnrýna RÚV í upphafi árs 2020. Áður hafði hún tekið undir það sjónarmið að RÚV ætti ekki að vera auglýsingamarkaði. Það er eitur í beinum RÚV-ara. Efstaleitisvélin var gangsett og birti raðfréttir um embættisglöp Lilju í smámáli sem e.t.v. stæði undir einni frétt eða tveimur í venjulegu árferði. Allur málatilbúnaður var lagður út á versta veg fyrir ráðherra, auðvitað undir formerkjum heiðarleika og fagmennsku. Raðfréttamorð á æru manna er fáguð sérgrein þeirra efst á Leiti.

Ég er að bugast, sagði Lilja haustið 2020 þegar RÚV hafði pönkast á henni í hálft ár. Lilja freistaði þess að kyssa vöndinn og lagðist á sveif með Efstaleiti að níða skóinn af Samherja í vor. En það var of seint og of lítið til að kaupa sér frið. RÚV-arar töldu að þeir sjálfir hefðu skorið sig úr snörunni með afhjúpun skæruliðadeildar Samherja. Í reynd hertu þeir að. Stuttu síðar tilkynnti RÚV hróðugt að ráðherrann væri farinn í veikindaleyfi, þó ekki á gjörgæslu.

Efstaleiti veit sem er að um leið og nýr menntamálaráðherra er kynntur til sögunnar má læsa klónum í hann og gera að bandamanni í baráttu RÚV fyrir tilveru sinni. Makki nýr ráðherra ekki rétt á hann á fæti fréttastofuna með dagskrárvaldið, líkt og Lilja.

RÚV er eitrað peð í táknrænum skilningi og bókstaflegum. RÚV getur orðið banabiti ráðherra. Eitrið úr skrokki togaraskipstjóra þekur veggi útvarpshússins. 

 

 

Ný ráðuneyti á teikniborðinu

Hvernig vissi RÚV að Páll skipstjóri færi á gjörgæslu?

Fjórum dögum áður en Páll Steingrímsson skipstjóri hjá Samherja missti meðvitund og var fluttur með sjúkraflugi frá Akureyri á gjörgæslu í Reykjavík gerði RÚV ráðstafanir til að stela síma skipstjórans.

Á meðan Páll lá milli heims og helju á gjörgæslu vegna skyndilegra veikinda var síma hans stolið. Gögn úr símanum voru afrituð af tæknimanni á vegum RÚV.

Eftir að hafa afritað gögnin sá RÚV til þess að símanum var skilað með leynd. Aðgerðin tók um 48 klukkustundir og var þaulskipulögð. RÚV, Stundin og Kjarninn notuðu gögnin til að klekkja á Samherja.

Hvernig vissi RÚV með 4 daga fyrirvara að fílhraustur Páll skipstjóri yrði skyndilega fárveikur og færi meðvitundarlaus á sjúkrahús? 

Lögreglurannsókn stendur yfir á ,,fréttaöflun" RÚV. Vinnubrögðin á Efstaleiti eru án hliðstæðu í vestrænni blaðamennsku. 

Vinsældir ríkisstjórnarinnar, 2 skýringar

Starfsstjórn Katrínar Jakobsdóttur nýtur fádæma vinsælda. Tvær skýringar eru nærtækar.

a. Þjóðin vill stöðugleika

b. Starfsstjórn er þrátt fyrir nafnið ekki starfssöm. Þannig er óskaríkisstjórn þjóðarinnar.

Fáorður stjórnarsáttmáli hæfir.

Meginhlutaverk ríkisvaldsins er að skapa borgurum landsins traustan ramma til að lifa sínu lífi.

Stundum er þörf á inngripum ríkisvaldsins, sbr. farsóttina. En þá er að takmarka sem mest hömlur og skerðingar. Í samanburði við útlönd hefur það tekist.

Stjórnmálamenn verða vinsælli eftir því sem þeir láta almenning meira í friði.

Stuðningur við ríkisstjórnina hefur aukist