Frelsið á bakvið grímu

Sóttvarnir auka frelsi einstaklingsins til að hylja ásjónu sína samborgurum. Á bakvið grímuna er einstaklingurinn frjálsari til að vera hann sjálfur og fela sig hnýsnum augum. Með grímu vex einnig öryggistilfinning. Allir verða sumpart eins. Einkennisklæðnaður sýnir samstöðu.

Hugsuninni varpar heimspekingurinn Matthew B. Crawford fram í lok samtals á Unheard þegar hann veltir fyrir sér hvers vegna sumum á heimaslóðum hans, í Kaliforníu, virðist líða vel með grímuskyldu.

Kalifornía er háborg frjálslyndis í Bandaríkjunum. En það eru einmitt frjálslyndir, bæði þar vestra og víðar á vesturlöndum, sem eru hvað ákafastir talsmenn samfélagslokana í nafni sóttvarna. Og þeim sem á annað borð er hleypt út undir bert loft skal svo sannarlega skylt að bera grímu í almannarýminu.

Pælingin er að vestrænt frjálslyndi er komið með upp í kok af taumlausu frelsi og vill samræmt göngulag fornt með stífum reglum og viðurlögum. Og grímuskyldu - vitanlega.

Ef sá bandaríski hittir þarna naglann á höfuðið mun Kínaveiran umskapa frjálslyndi í íhaldssemi. Tilfallandi athugasemdir misstu ekki svefn yrði sú raunin. 

Athugasemdir

[Helga Kristjánsdóttir, 1.5.2021 kl. 01:53]

Stór dökk gleraugu dylja opna gáttina inn í sál manneskjunnar sem ber þau.
Þeim er ekki skylt að ber þau frekar en gufugleypinn sem verður bráðum aflagður.

[Ragnhildur Kolka, 1.5.2021 kl. 08:19]

Þegar búið er að hræða úr fólki líftóruna finna kannski einhverjir fyrir öryggistilfinningu bakvið þennan bréfsnepil. Ekki þó allir, því nú hafa safnast >2 milljónir undirskrifta til að velta yfirstrump Kaliforníu úr ríkisstjóra-stólnum. Fyrir harðstjórataktik á tíma farsóttar,þegar aðeins var þörf fyrir aðgát og ábyrgð á eigin gerðum.