Tilfallandi athugasemdir

Þriðjudagur, 14. júní 2011

Björnsþáttur kemur á eftir Gnarrfaktor

Jón Gnarr og Besti flokkurinn fengu meðbyr í borgarstjórnarkosningum vegna þess að almenningur vildi ná sér niður á stjórnmálaflokkum. Fólk gaf flokkunum langt nef með því að kjósa yfirlýst bjánaframboð. Eftir að Samfylkingin gerði Jón Gnarr að borgarstjóra súrnaði brandarinn og engar líkur eru á því að sambærilegt framboð fái hljómgrunn í bráð.

Almenningur mun af vaxandi þunga krefjast stöðugleika í stað ójafnvægis, verða íhaldssamur á kostnað frjálslyndis, taka ábyrgð fram yfir ævintýramennsku, fullveldi framar ESB-aðild, velja alvörustjórnmál í stað spuna, kjósa reynslu fram yfir unggæðinshátt og endurgjalda trúnað með trausti.

Maðurinn sem er eins og sniðinn fyrir þjóðina eins og málum er háttað í dag er Björn Bjarnason. Sjálfstæðisflokkurinn þarf að taka á sig rögg og velja hann til forystu, eins og útskýrt var hér í gær.

Sjálfstæðisflokkurinn mælist með um 35 prósent í skoðanakönnunum undanfarið. Þeir sem eru eldri en tvævetra í pólitík vita að fylgi flokksins verður lamið niður fyrir 30 prósent í kosningum, sennilega langt þar undir. Stór ósigur tvennar þingkosningar í röð yrði móðurflokki íslenskra stjórnmála að fjörtjóni.

Núverandi forysta Sjálfstæðisflokksins er einangruð og les ekki rétt rúnir samtímans. Almennir félagsmenn flokksins verða að grípa í taumana og setja þann mann í söðulinn sem bestur er til þess fallinn. Sá maður er Björn Bjarnason.

Flokkur: Dægurmál | Breytt s.d. kl. 11:26 | Facebook