Almenningur stærsti fjármagnseigandinn

Almenningur myndi tapa mest á ótímabæru afnámi verðtryggingar. Í gegnum lífeyrissjóði eru launþegar stærsti fjármagnseigandinn á Íslandi. Verðtrygging þjónar því hlutverki að lántakendur borgi tilbaka þá fjárhæð sem þeir tóku að láni, auk vaxta.

Fyrir daga verðtryggingar voru vextir neikvæðir; þeir sem tóku lán borguðu ekki nema hluta til baka og lánveitandinn sat uppi með tapið.

Í umræðunni er málum iðulega stillt þannig upp að verðtrygging sé í þágu banka og kapítalista. Því fer fjarri. Verðtryggingin er í fyrsta lagi til að tryggja launþegum lífeyrisgreiðslur í framtíðinni. Í öðru lagi er verðtrygging efnahagsleg kjölfesta með því að hún dregur úr freistnivandanum sem okkur er allof tamur, að lifa um efni fram og treysta á aðrir borgi reikninginn.

Takmarka verðtryggingu

Unnur Brá og Vigdís kunna utanríkismál

Hagsmunir Íslands eru í nærumhverfi okkar og nátengdir næstu grönnum, Grænlendingum og Færeyingum. Vestnorræna ráðið, sem er vettvangur þjóðþinga þessara standríkja, hvetur til myndunar vestnorræns efnahagssvæðis með fríverslun sem meginmarkmið. Ríkisstjórnin hlýtur að taka hvatninguna til sín enda í samræmi við stjórnarsáttmálann.

Áhersla Íslands í utanríkismálum á að vera á þeim heimshluta sem við búum í, Norður-Atlantshafinu, en ekki á meginlandi Evrópu, líkt og í tíð vinstristjórnar Jóhönnu Sig.

Unnur Brá Konráðsdóttir þingmaður er formaður Vestnorræna ráðsins. Einnig situr í ráðinu Vigdís Hauksdóttir þingmaður. Unnur Brá er fyrrverandi varaformaður Heimssýnar og Vigdís er núverandi formaður félagsins sem lagði grunninn að uppgjörinu við Brusselstefnu vinstristjórnarinnar.

Unnur Brá og Vigdís eru fulltrúar framtíðarstefnu Íslendinga í utanríkismálum.

Vilja stofna vestnorrænt efnahagssvæði

Geðveikir ofsóttir

Af fréttaumfjöllun Morgunblaðsins að dæma níðast heilbrigðisyfirvöld á geðveikum, sem bæði eru sviptir sjálfræði að nauðsynjalausu og dópaðir að óþörfu. Jafnframt vita geðveikir upp á hár hvaða úrræði eru heppilegust við krankleika sínum, samkvæmt mbl.is

Þegar Moggi er búinn að knýja fram að þeir geðveiku yfirtaki geðheilbrigðisþjónustuna hlýtur næsta mál á dagskrá að vera að fangar fái umsjón með Fangelsismálastofnun. 

Í alvöru talað: má ekki biðja um jafnvægi i umfjöllun? Það er varla svo að heilbrigðiskerfið ofsæki geðveika. Eða hvað?

„Vildi ekki fara og var sett í járn“

Stórveldapólitík í Evrópu

Úkraína er á barmi borgarastyrjaldar vegna deilna um hvort landið eigi að halla sér til vesturs, í átt að Evrópusambandinu, eða í faðm rússneska bjarnarins. Austurlandamæri Evrópusambandsins eru ekki skilgreind heldur togast þau og teygjast eftir valdahlutföllum stórvelda. 

Fyrir hundrað árum var önnur togstreita um landamæri Evrópu vesturveldanna og Rússlands. Serbar, sem voru skjólstæðingar Rússa, vildu stækka veldi sitt á kostnað tvíríkisins Austurríkis-Ungverjalands. Metnaður Serba var neistinn sem kveikti fyrri heimsstyrjöld.

Úkraína er leiksoppur Evrópusambandsins og Rússlands. Hvort um sig stórveldið vill auka áhrif sín og völd á kostnað hins. Þannig er stórveldapólitík rekin frá árdögum. Úkraína er smáþjóð í þessu samhengi, þótt mannfjöldinn þar sé 45 milljónir.

Ísland er hvorki landfræðilega né sögulega aðili að valdastreitu meginlandsstórveldanna í Evrópu og ætti að halda sér í öruggri fjarlægð, m.a. með því að standa utan Evrópusambandsins.

„Eins og landið skiptist í tvennt“

Boðvald staðreyndanna og ráðandi frásögn

Eðliseinkenni mannsins er að tileinka sér skoðanir í samræmi við staðreyndir. Innbyggt í fólki almennt og yfirleitt er vilji til að finnast það vera með staðreyndirnar sín megin. Stjórnmálamenn þekkja þessa hneigð og reyna iðulega að selja skoðanir sem staðreyndir klæddar í búning frásagnar.

Um árabil var sú skoðun seld sem staðreynd að Evrópusambandið væri forsenda friðar, framfara og hagsældar í Evrópu. Almenningur vítt og breitt um álfuna fékk í áratugi að heyra margvíslegar frásagnir byggðar á þessu stefi. Núna er að verða breyting þar á. Í meira en fimm ár, allt frá kreppunni 2008, hlaðast upp staðreyndir sem eru í beinni mótsögn við frásögnina um að ESB væri efnahagslegur hornsteinn Evrópu.

Krónískt atvinnuleysi upp á tugi prósenta og ríkisgjaldþrot í Suður-Evrópu eru staðreyndir sem öskra á almenning. Þessar staðreyndir rata inn í nýja frásögn, sem t.d. Heimssýn tæpir á í bloggi; önnur útfærsla á sömu frásögn er hér og leiðari Morgunblaðsins í dag sagði enn aðra útgáfu.

Nýja frásögnin um Evrópusambandið er að það standi í vegi fyrir aðlögun efnahagskerfa óhjákvæmilegum efnahagssveiflum. Þessi frásögn er orðin ráðandi í umræðunni. Evrópusambandið reynir að kaupa sér tíma, lofar t.d. að leysa efnahagsvanda Spánar á tíu árum.

Boðvald staðreyndanna breytir ráðandi frásögn um Evrópusambandið, bæði á meginlandi Evrópu og á Íslandi. Ráðandi frásögn skilar sér í niðurstöðum í kosningum, eins og t.d. sást á kosningum til alþingis á liðnu vori þegar Samfylkingin fékk 12,9 prósent atkvæðanna. 

Yfir 26% atvinnuleysi á Spáni

Traust, lífskjör og verðbólga

Traust í samfélaginu er i lágmarki eftir hrun. Niðurstöður atkvæðagreiðslu um kjarasamninga eru afleiðingar af tortryggni launþega gagnvart atvinnurekendum og ríkisvaldi. Launþegar báru hitann og þungann af hruninu og ætla sér ekki að verða skildir eftir og láta efri lögum samfélagsins að njóta ávaxtanna af endurreisninni. 

En jafnframt er morgunljóst að ekki er í boði að gera innistæðulausa kjarasamninga sem hleypa verðbólgunni af stað.  Eftir að mörg stéttafélög felldu kjarasamninga er staðan á vinnumarkaði viðkvæm en það er engin ástæða til að ætla annað en farsæl laun finnist.

Niðurstaða atkvæðagreiðslu um kjarasamninga er ekki uppreisn heldur tilkynning um óánægju. Það þarf að hlusta á þessa óánægju og koma til móts við hana - en án þess að fórna því meginmarkmiði að koma á stöðugleika og þar með undirstöðu undir betri lífskjör til framtíðar.

Laun hækka mikið en kaupmáttur lítið

Forysta ASÍ stendur ekki ein að þjóðarsátt

Forysta ASÍ gerði allt sem í hennar valdi stóð að semja skynsamlega í þágu heildarhagsmuna. Tilgangur samninganna var að leggja grunn að stöðugleika á vinnumarkaði og undirbyggja kaupmáttaraukningu til lengri tíma.

Á hinn bóginn voru Samtök atvinnulífsins ekki nógu öflug að berja á sínum félagsmönnum um að halda af verðhækkunum hjá sínum félagsmönnum. Og ríkisstjórnin bakkaði heldur ekki nóg vel upp það markmið forystu ASÍ að halda aftur af hækkunum á gjaldskrám.

Valkosturinn við ASÍ-leiðina er verðbólgusamningar sem allir tapa á. Það sem á að gerast núna er að ríkisstjórnin verður að koma með innspil í þágu meginmarkmiðs samninganna jafnframt því sem Samtök atvinnulífsins verða að gefa eftir prósentubrot til að slaka kauphækkunum yfir þrjú prósentin.

Og í stað þess að hallmæla forystu ASÍ eigum við að þakka henni að meta heildarhagsmuni ofar skammtímahagsmunum.

Flóabandalagið felldi samninginn

Þrír vinstriflokkar með 11 til 17% fylgi, öllu er óhætt

Samfylkingin, Björt framtíð og VG eru með á bilinu 11 til 17 prósent fylgi. Flokkarnir eru langt frá því að ná meirihluta og skerðir það framtíðarhorfur þeirra allra. Til að vinstriflokkarnir verði raunverulegur valkostur við í landsstjórninni verða þeir að ná meira en 50 prósent fylgi, samtals.

Þrír vinstriflokkar eru á hinn bóginn ekki líklegir að toppa á sama tíma og því allar líkur á að þeir verði hressilega undir 50 prósent markinu í fyrirsjáanlegri framtíð, - nema einhver pólitískur jarðskjálfti verði hér á landi.

Össur Skarphéðinsson bjó til Bjarta framtíð á síðasta kjörtímabili til að hirða upp óánægjufylgi frá Samfylkingar. Álíka skynsemi var að baki stofnun Bjartrar framtíðar og ESB-umsóknar; hvorugt útspilið var hugsað til enda. Núna stendur Björt framtíð Samfylkingunni fyrir þrifum. Samfylkingin ætlaði að verða norrænn flokkur sósíaldemókrata en með 17 prósent fylgi er það markmið brandari.

Björt framtíð er komin með stöðu í flokkakerfinu, fær ríkispeninga í áskrift og skaffar liðsmönnum sínum bitlinga líkt og aðrir flokkar. Flokkurinn reynir að skilgreina sig nærri miðju en er merktur uppruna sínum í bak og fyrir. 

Þrír vinstriflokkar munu alltaf að einhverju marki þvælast hver fyrir hinum. Í aðdraganda kosninga er ekki trúverðugt að bjóða þriggja flokka ríkisstjórn sem valkost við tveggja flokka stjórn.

Íslands hamingju verður allt að vopni: því fleiri sem vinstriflokkarnir eru því minni líkur að þeir fái landsstjórnina í sínar hendur.

Samfylking bætir við sig fylgi

Menntarugl í ráðuneyti

Siðferðismælikvarðar sem menntamálaráðuneytði krefst að skólar leggi á nemendur sína er ekki tilviljun heldur afrakstur af forheimskandi forræðishyggju sem grafið hefur um sig í ráðuneytinu um árabil.

Sígildar hugmyndir um menntun eru látnar víkja fyrir tískuhugmyndum úr kynjafræði og lítt ígrunduðum áhyggjum af loftbólum eins og samfélagsmiðlum.

Þjóðmenningunni er úthýst úr skólum enda hafa síðustu menntamálaráðherrar lítt hirt um að rækta garðinn hér heima.

Ruglið um að skólar leggi siðferðislegt mat á nemendur sýnir hversu langt menntamálaráðuneytið er komið frá menntun og menningu yfir í sósíalíska forræðishyggju.

27 milljónir atvinnulausir í Evrópusambandinu

Ísland er vin í eyðimörk atvinnuleysis og eymdar í Evrópusambandinu og hingað leitar fólk í leit að betri lífskjörum. Samkvæmt nýrri skýrslu ESB eru 27 milljónir íbúa sambandsins atvinnulausir. Og það sem meira er þá fjölgar þeim sem eru með vinnu en teljast samt fátækir.

Ástæðan er sú að illa launuð hlutastörf eru algengari eftir kreppuna 2008 en áður. Þegar atvinnuleysi er jafn gríðarlega mikið og raun ber vitni fjölgar láglaunastörfum en hálaunastörfum fækkar.

Hópurinn ,,fátækir þrátt fyrir vinnu" stækkaði jafnvel í þeim löndum ESB þar sem atvinnuástand hefur verið með skárra móti, t.d. í Þýskalandi. Fátækt miðast við laun sem eru lægri en 60 prósent af meðallaunum. 

Langtímaatvinnuleysi er tvöfalt meira í dag en fyrir kreppu 2008. Undir skilgreininguna fall þeir sem eru lengur en eitt ár án atvinnu.

Skýrslan segir jafnframt að konur í ESB-ríkjum búi við lægri laun en karlar og að möguleikar kvenna á starfsframa verri en karla.

Pólverjum fjölgaði um 790