Opin landamæri eru lífshættuleg

Sóttvarnir eru óhugsandi án landamæra. Það blasir við eftir glímuna við farsóttina frá Kína.

Kórónuveiran gerði hugmyndina um opin landamæri lífshættulega.

Líf innan landamæra er betra, öruggara og farsælla en líf án landamæra.

Stendur ekki og fellur með opnun landamæra

Svarti dauði var sem sagt áníðsla á náttúrunni

Svarti dauði drap um 30 prósent íbúa Evrópu, líklega um 25 milljónir. Samkvæmt viðtengdri frétt voru ástæður svarta dauða:

Hömlu­laus skógareyðing, skefja­laus út­breiðsla land­búnaðar, námugröft­ur og þróun innviða, sem og hag­nýt­ing villtra dýra­teg­unda 

En, sem sagt, svarti dauði herjaði á Evrópu um miðja 14. öld, kom til Íslands snemma á 15. öld. Við köllum þetta tímabil miðaldir og þær voru ekki alveg í gær.

Skrítið með náttúruna. Hún refsar okkur með farsótt hvort sem við búum í torfkofa eða einbýlishúsi á Seltjarnarnesi.

Aðeins ein tegund ábyrg fyrir faraldrinum

Ríkisútboð á fjölmiðlun

Ef fjölmiðlun er spurning um að flytja fréttir og vera vettvangur umræðu á íslensku væri einfaldast að ríkið myndi bjóða út fjölmiðlun. Ríkið gerði samning við lögaðila, einn eða fleiri, um að flytja svo og svo margar fréttir og tiltekinn fjölda skoðanapistla.

Hvers vegna er ekki löngu búið að efna til slíks útboðs?

Ekkert ves, þeir fá samning sem best bjóða. Alveg eins og þegar ríkið býður út vegagerð og mannvirkjaframkvæmdir.

 

 

„Myndi grafa undan tilveru fjölmiðla“

Á að bíða af sér hretið eða pakka saman? Enginn veit svarið

Enginn veit hve langvarandi ferðakreppan verður í kjölfar farsóttarinnar. Kannski verður ferðasumarið 2021 eins og í venjulegu árferði.

En kannski verður ekkert venjulegt árferði framar í ferðaþjónustu, hún verði ekki sú atvinnugrein hér á landi sem hún var nýliðinn áratug. Ekki það að hún leggist af, heldur að ferðavenjur breytist og kalli á annars konar þjónustu. Enginn veit.

Ráðstafanir ríkisstjórnarinnar veita fyrirtækjum svigrúm að draga sig til hlés og leggja á ráðin, hvort þau ætli að bíða af sér hretið eða hætta útgerðinni.

Meira er ekki hægt að gera í tímum óvissu.

Tekur langan tíma að vinna okkur úr kreppunni

Samband Trump og fjölmiðla - fíkill og díler

Trump er háður fjölmiðlaumræðu. Án umræðunnar hefði hann ekki náð kjöri 2016. Með Trump sem viðfangsefni tryggja fjölmiðlar sér athygli sem er forsenda fyrir rekstri þeirra.

Kjósum fréttina, ,,vote the story", er amerískt blaðamannaorðtak. Fíkniefnasalinn fyrirlítur fíkilinn en veit að án hans verða engin viðskipti.

Blaðamenn kjósa fréttina og Trump nær endurkjöri í haust.

Ummæli um sótthreinsivökva voru kaldhæðni

Ólíkt hafast þau að, Efling og VR

Efling boðar til verkfalla sem munu fækka störfum og auka atvinnuleysi. VR efnir til funda með Samtökum atvinnulífsins til að verja störf og kaupmátt í samdrætti.

Efl­ing­ar­fólk læt­ur ekki kúga sig til hlýðni, seg­ir Sól­veig Anna Jóns­dótt­ir formaður Efl­ing­ar.

Eflingarfólk lætur aftur sósíalista í forystu Eflingar kúga sig til atvinnuleysis.

Trauðla góð skipti.

Framhald verkfallsaðgerða samþykkt

Milljarðar til ferðaþjónustunnar

Á hverjum mánuði yfir sumartímann fara milli 60 og 70 þúsund Íslendinga til útlanda. Í ár fara þeir ekki neitt vegna farsóttar í útlöndum.

Í venjulegu árferði eyða þessir 160 - 210 þúsund landsmenn, sem ferðast til útlanda á sumrin, einhverjum milljörðum króna. Íslenskir ferðamenn eru alþjóðalega þekktar eyðsluklær.

Landsmenn munu halda áfram að ferðast. En núna innanlands.

Ferðaþjónustan situr á gullnámu. Áður er sumarið er úti biðja menn þar á bæ um framhald á einangrun landsins.

Katrín við Spiegel: „Komum tvíefld til baka“

Samfélagssáttmáli, frelsi og hlýðni

Samfélagssáttmáli er hugmynd úr upplýsingunni sem kom við sögu í bandarísku byltingunni 1776 og þeirri frönsku síðar á sömu öld. Hugmyndin dúkkar nú upp á Fróni með Víði Reynissyni úr þríeykinu gegn farsóttinni.

Víðir, Þórólfur og Alma, þríeykið, glíma við sama vanda og öll heimsins ríki sem urðu farsóttinni að bráð. Hvernig á að losa um hömlur á daglegu lífi fólks án þess að smit gjósi upp aftur og seinni bylgja kórónuveirunnar skelli á með tilheyrandi dauðsföllum og hruni heilbrigðiskerfa?

Frelsi til athafna undir stjórnvaldi í þágu þegnanna var lykilhugmynd í bandarísku byltingunni. John Locke er aðalhöfundur þessarar útgáfu samfélagssáttmála. Í Frakklandi bar meira útfærslu Rousseau. Yfirvöld eiga að stjórna í þágu þjóðarvilja. Frelsi og hlýðni eru ekki endilega andstæður, en þarna á milli geta orðið átök.

Lítið ber á umræðu um nauðsyn samfélagssáttmála í öðrum vestrænum ríkjum. Hugmyndin vísar í byltingarástand og yfirvöldum er þvert um geð að gefa byltingarorðræðu undir fótinn. Nóg eru samt vandræðin.

Á Íslandi varð aldrei borgaraleg bylting. Sú sem kennd er við Jörund var meira brandari en bylting. Af því leiðir er hugmyndin um samfélagssáttmála ekki galin þegar hömlum verður aflétt. Þó væri ráð að klæða hugmyndina í íslenskan búning. Til dæmis svona:

Samfélagssáttmáli um tillitssemi.

Víðir tók sér frídag, kom tilbaka pólitískur

Í gær tók Víðir Reynisson yfirlögregluþjónn hjá almannavörnum sér frí frá daglegum blaðamannafundi farsóttar-þríeykisins.

Víðir kemur þrælpólitískur tilbaka; mannkynið í húfi, samfélagssáttmáli og ritstýrðir fjölmiðlar eru meðal orðanna sem flutu í dag úr munni geðþekka lögreglumannsins.

Notaði Víðir frídaginn í sellufund með Vinstri grænum? Tók einhver úr óreiðu-teymi Kötu Jak. hús á Víði í gær til ræða landsins gagn og nauðsynjar á tímum drepsóttar?

Víðir virkar vel sem grandvar embættismaður. En um leið og hann verður málpípa pólitískra skoðana, en ekki heilbrigðar skynsemi, hverfur trúverðugleikinn.

Vonandi þarf Víðir ekki annan frídag í bráð.

 

„Sameiginlegt verkefni alls mannkyns“

Veiruvarnir: engar ferðir til útlanda í ár

Tveggja vikna sóttkví á þá sem koma til landsins, gildir bæði um heimamenn og útlendinga. Þetta eru ráðstafanir sem Bretar íhuga að grípa til.

Ef þetta verður línan er tómt mál að tala um ferðaþjónustu í ár.

Nema fyrir innlenda ferðamenn.

Þórólfur ætlar ekki til útlanda í ár