Aftökur án dóms og laga - borgarastyrjöldin er hafin

25 fyrrum foringjar í franska hernum óttast borgarastyrjöld þar í landi. Óttinn stafar af vangetu og mótþróa innflytjenda að aðlagast vestrænum lífsháttum.

Nýverið var frönsk tveggja barna móðir skorin á háls fyrir utan lögreglustöð. Morðinginn var múslími. Í frétt af tilræðinu segir að morðinginn hafi verið skotinn til bana á vettvangi.

Franska lögreglan hefur tekið upp siðu og háttu bresku lögreglunnar sem skýtur á færi tilræðismenn við líf almennra borgara.

Skjóta til að drepa var til skamms tíma ekki stefna lögreglu í Vestur-Evrópu. En eftir að fjölmenningin hélt innreið sína með tilheyrandi hryðjuverkum kenndi neyðin naktri konu að spinna. Eða öllu heldur lögreglunni að skjóta og spara skattfé er færi í rannsókn og réttarhöld. Þegar velþóknun Allah er réttlæting morða eru dómstólar óþarfir.

Aftökur án dóms og laga sýna réttarríkið í öngstræti. Í þeim skilningi er borgarastyrjöldin þegar hafin.

Valda usla með ummælum um borgarastríð

Falsfrétt á RÚV: ESB-vandræði má ekki nefna

Viðtengd frétt á mbl.is er um stjórnarkreppu í Finnlandi vegna björgunarpakka sem Evrópusambandið krefst af Finnum. Eins og fyrri daginn er ESB fjárþurfi og krefst framlaga.

RÚV er með sömu frétt en þar er ekki vikið einu aukateknu orði að ástæðu pólitísku kreppunnar í Finnlandi. Í allri fréttinni, sem er ítarleg, er ekki eitt einasta orð um fjárkröfur ESB á hendur Finnum. RÚV segir:

Einkum er tekist á um efnahagsaðgerðir næstu ára til að koma landinu út úr COVID-kreppunni og fjármögnun þeirra aðgerða, ekki síst um hversu langt ríkissjóður eigi og megi teygja sig í lántökum í þessu skyni.

Eins og nærri má geta eru Finnar sjálfir með á hreinu að fjárkröfur Evrópusambandsins er ástæða stjórnarkreppunnar Sendum ESB sterk skilaboð, segir í umfjöllun þarlendra fjölmiðla.

RÚV hefur löngum verið miðstöð ESB-áróðurs á Íslandi. Falsfréttir eru sérgrein þeirra á Efstaleiti.

Harðar deilur á finnska þinginu

ESB hótar Bretum

Evrópusambandið hótar Bretum refsitollum vegna lausra enda í Brexit-samkomulagi um Norður-Írland.

Þá hóta frönsk yfirvöld að beita ESB fyrir sér og skaða breskar fjármálastofnanir ef Bretar leyfa ekki frönskum sjómönnum veiðar í landhelginni.

Þetta eru tvær svipmyndir af vinnulaginu í Brussel.

Rugl er betra en regla í alþjóðavegabréfum

„Ef hvert land er með sín­ar regl­ur, hvert með sitt kerfi og hvert með sín­ar kröf­ur, þá mun það rugla farþega í rím­inu og flug­fé­lög­in sömu­leiðis,“ segir Ak­b­ar Al Baker, for­stjóri rík­is­flug­fé­lags Kat­ar.

Þarna talar forstjórinn um veiruvegabréf, sem er annað nafn á alþjóðlegu vegabréfi. Guð hjálpi okkur ef forstjórinn fær áheyrn. Alþjóðavegabréf kallar á alþjóðlegt yfirvald að gefa út og framfylgja alþjóðskírteini.

Veiruyfirvald á alþjóðavísu yrði ESB á sterum. Nei, takk. 

Stjórnandi Qatar Airways svartsýnn

Lilja og RÚV: tjáningarfrelsið er aðeins fyrir ríkisfjölmiðla

Lilja menntamálaráðherra segir Samherja hafa gengið of langt þegar fyrirtækið gerði myndbönd til birtingar á samfélagsmiðlum um sína hlið á RÚV-áróðrinum gegn norðlensku útgerðinni.

Fjölmiðlapólitísk vændiskaup teljast siðleg í ranni Samfylkingar. Þingmaður Samfylkingar stillti Lilju upp við vegg eftir herútboð RÚV um helgina.

Menntamálaráðherra hefði mátt standa betur í ístaðinu og varið hornstein mannréttinda sem er tjáningarfrelsið. Myndbönd Samherja á You-Tube eru hóflegt andsvar við raðfréttum RÚV þar sem beint og óbeint er sagt að glæpamenn stjórni Samherja.

RÚV smjattar á orðum Lilju og segir:

Lilja Alfreðsdóttir, mennta- og menningarmálaráðherra, telur Samherja ganga of langt í viðbrögðum sínum við fréttaflutningi Ríkisútvarpsins. Mikilvægt sé að fjölmiðlar séu frjálsir og geti fjallað um málefni líðandi stundar.

Með leyfi að spyrja: minnkar frelsi RÚV ef Samherji gerir myndband á You-Tube?

Í meðförum Lilju og RÚV er tjáningarfrelsið aðeins fyrir ríkisrekna fjölmiðla. 

Lilja segir Samherja ganga of langt

Ósæmilegt tilboð RÚV til þingmanna vegna Helga Seljan

Helgi Seljan var dæmdur fyrir brot á siðareglum RÚV. Vörn fréttamanns RÚV var að hann mætti víst brjóta siðareglurnar og flétta saman gildisdómum og fréttum. Þegar hallaði á Helga í héraði tók hagsmunahópurinn RÚV málið upp á alþingi götunnar.

Um helgina kynnti RÚV liðssöfnuðinn. Bubbi Morthens fékk rauða dregilinn á laugardag fyrir fésbókarfærslu. Með íhygli fræðimannsins komst poppsöngvarinn að þeirri niðurstöðu að Helgi færi með ,,nakinn sannleika". Samherjaböggið er orðið heilagur sannleikur í meðförum listamannsins. Liðugt er krítað.

Á sunnudag var félagsskapur pírata virkjaður í þágu glataðs málstaðar. ,,Fordæmalaust túlkunarstríð" heitir það á píratísku og þykir vont að hráar fjölmiðlalygar fái ekki viðtöku sem sannindi.

Fyrirsögn RÚV á rantið hans Bubba er ,,Það sem slær mann sérstaklega er þögn þingmanna". Hagsmunahópurinn á Efstaleiti er sem sagt með standandi tilboð til þingmanna: lýsið yfir stuðningi við Helga Seljan og RÚV mun launa ykkur greiðann með vinsamlegri umfjöllun á kosningaári. Tilboðið er fjölmiðlapólitískt vændi.

RÚV getur rótast í ruslahrúgunni á Efstaleiti til hinsta dags. En það kemur fyrir lítið. Fjölmiðill sem skilur ekki muninn á áróðri og frétt er siðferðilega og faglega gjaldþrota.

Hagsmunalandið Ísland - og óseðjandi metnaður

Seðlabankastjóri, í lélegri vörn fyrir svikula embættismenn, sagði landinu stjórnað af hagsmunahópum. Það þóttu fréttir, mestar hjá þeim sem þykjast ekki vita - eða vilja ekki vita - hvernig kaupin gerast á eyrinni.

Ísland er hagsmunaland og hefur alltaf verið. Frá landnámi var hér ættarveldi. Einar sjö ættir börðust um völdin á Sturlungaöld. Norska konungsvaldið reri undir, gerði bandalög þvers og kruss á ættirnar. Kirkjuvaldið, sem spratt upp úr goðavaldi ættanna, reif sig laust og gerði bandalag við konungsvaldið til höfuðs höfðingjaættunum. Fyrrum höfðingjaættir urðu staðarhaldarar kirkjunnar annars vegar og hins vegar embættismenn konungs.

Kirkjuvaldi og konungi laust saman 300 árum eftir Sturlungaöld. Með siðaskiptunum hafði konungsvaldið betur. Á nýöld stunduðu betri bændur og kirkjuhöfðingjar ábatasöm viðskipti við Englendinga og síðar Þjóðverja í trássi við konung. Því veseni lauk með einokuninni í byrjun 17. aldar. Danskir kaupmenn og innlendir leiksoppar urðu máttugir ásamt hálfdönsku yfirvaldi.

Hraðspólum inn í 20. öldina og sjáum fjórflokkinn taka á sig mynd fyrir miðja öldina. Undir yfirskini lýðræðis átti fjórflokkurinn landið og miðin. Ef einhver vildi verða barnakennari í Reykjavík þurfti hann flokksskírteini í Sjálfstæðisflokknum. Ég ólst upp í Keflavík. Ef menn sáu fyrir sér vinnu í tollinum á flugstöðinni á Miðnesheiði þurfti velvild krata - Alþýðuflokksins - sem útbýtti þeim gæðum.

Ekki svo að skilja að eymd og volæði hafi fylgt fjórflokknum. Öðru nær. Velmegun og hagsæld jókst alla 20stu öldina  almenningi til hagsbóta. En hvert sem litið var voru hagsmunir.

Og þannig er það enn. Fjórflokkurinn er fyrir bí en ekki hagsmunir. Þeir eru fleiri og dreifðari. RÚV er hagsmunamiðstöð starfsmanna á Efstaleiti. Embættismenn hafa komið ár sinni svo vel fyrir borð að fái þeir ekki laust embætti geta þeir farið í mál við ríkið og fengið einar 20 til 30 milljónir í bætur. Verkalýðsfélög og lífeyrissjóðir eru hagsmunabandalög sem sjá um sína. Og svo má áfram telja.

Til að skilja Íslendinga, bæði fyrrum og nú til dags, þarf að hafa tvennt á hreinu. Í fyrsta lagi hagsmuni, samanber sem að ofan segir. Í öðru lagi metnað einstaklinga sem er hóflegur í sumum en óseðjandi hjá öðrum.

Kolbeins saga Óttarssonar Proppé, Helga saga Seljan, Gunnars saga Smára, Ingu saga Sæland, Þorvalds saga Gylfasonar og saga Rósu B., eru nokkrar samtímasögur, valdar af handahófi, til að vekja athygli á fólki sem getur ekki hugsað sér heiminn án þess að það sjálft sé í aðalhlutverki. Að breyttu breytanda gæti þetta fólk verið úr Sturlungasögu. 

Hagsmunir og metnaður. Sturla Þórðarson og óþekktir höfundar Íslendingasagna kunnu skil á gangverki mannlífsins.

Umdeilanlegt að höfða mál gegn starfsmönnum

Ódýr vörn seðlabankastjóra fyrir óverjandi háttsemi

Starfsmaður Seðlabanka Íslands átti í samstarfi við Helga Seljan á RÚV að niðurlægja norðlenskt útgerðafyrirtækja með ásökunum um lögbrot sem ekki reyndist fótur fyrir. Þetta er stutta sagan um seðlabankamanninn, Helga Seljan og Samherja.

Þegar Seðlabankinn hóf rannsókn á Samherja vorið 2012 taldi ég, líkt og allur þorri landsmanna, að um væri að ræða heiðarlegt stjórnvald að rannsaka rökstuddan og málefnalega grun um brot Samherja á gjaldeyrislögum. Margar tilfallandi athugasemdir voru skrifaðar til stuðnings Seðlabankanum og Samherji gagnrýndur, sjá t.d. hér og hér.

En það var ekkert eðlilegt við upphaf rannsóknar Seðlabanka Íslands á meintum gjaldeyrisbrotum Samherja. Helgi Seljan hafði farið með ónýta pappíra, sem hann kallaði skjöl í fleirtölu, og reynt að fá opinberar stofnanir í lið með sér að klekkja á Samherja. Málatilbúnaðurinn reyndist þvættingur frá a til ö. Í ofsóknum Helga Seljan og RÚV gegn Samherja spilaði starfsmaður Seðlabanka Íslands með og ljáði upplognum ásökunum trúverðugleika. Í þessu tilfelli brást embættismaðurinn og Seðlabankinn þar með trausti almennings.

Nú kemur sitjandi seðlabankastjóri, Ásgeir Jónsson, sem vel að merkja tók við búinu löngu eftir Samherjamál, og ber fram þá vörn að Samherji ofsæki starfsmenn bankans. Nei, Ásgeir. Samherji vill réttlæti.

Ertu á móti réttlæti, Ásgeir Jónsson?

 

Íslandi að miklu leyti stjórnað af hagsmunahópum

Kínaveiran og tvær frásagnir íslenskar

Tvær meginfrásagnir eru af farsóttarvörnum á Íslandi. Sú fyrri er að yfirvöldum, þ.e. þríeykinu og ríkisstjórn, hafi tekist vel upp. Íslendingar urðu ekki fyrir stórfelldum skerðingum á daglegu lífi sínu vegna sóttvarna samtímis sem dauðsföllum var haldið í lágmarki og heilbrigðiskerfinu var ekki riðið á slig. Íslendingar koma hvað best út í alþjóðlegum samanburði á viðbrögðum stjórnvalda við Kínaveirunni.

Seinni frásögnin um sóttvarnir á Fróni er öfgaútgáfan. Undirflokkar hennar eru tveir. Inga Sæland í Flokki fólksins og nærsveitarmenn, t.d. sumir í Samfylkingu, vildu loka landinu ótímabundið á meðan heimsfaraldurinn gengi yfir. Seinni undirflokkurinn á sér talsmenn meðal gúlag-lögfræðinga og í Sjálfstæðisflokknum er telja stórfelld mannréttindabrot að skikka fólk í sóttkví.

Fyrri frásögnin er rétt. Sóttvarnir á Íslandi voru hóflegar en árangursríkar. Seinni frásögnin er röng, kemur ekki heim og saman við veruleikann.

En öll eru þessi mál ofurviðkvæm, einkum á kosningaári. Þess vegna eru hertar sóttvarnir á Keflavíkurflugvelli ekki ræddar á ríkisstjórnarfundi. Sem er pínulítið fyndið, satt best að segja, og til marks um að einhverjir pólitískir hópar hér á landi halda enn dauðahaldi í annan hvorn undirflokk öfgafrásagnarinnar.

Hertar aðgerðir ekki ræddar á ríkisstjórnarfundi

Trausti veit, Biden ekki

Meðalhiti á Íslandi síðustu 200 ár hefur hækkað um 0,8 gráður á öld, segir Trausti Jónsson veðurfræðingur og byggir á tiltækum gögnum.

Hækkun á meðalhita um 1,6 gráðu á 200 ára tímabili er engin hamfarahlýnun heldur eðlileg náttúruleg sveifla.

Á þessu tveggja alda tímabili eru styttri skeið þar sem hiti fer ýmist hækkandi eða lækkar. Svona svipað og veðrið, sem breytist frá degi til dags. Trausti skrifar: ,,Hiti á kuldaskeiðinu 1965 til 1995 var lengst af lægri heldur enn hann var á hlýskeiðum 19.aldarinnar [við kölluðum það kuldaskeið sem nítjándualdarmenn hefðu kallað hlýskeið]."

Biden Bandaríkjaforseti og heimselítan vilja telja okkur trú um að náttúrulegar sveiflur á hitafari séu af mannavöldum. Biden og heimselítan eru fangar trúarbragða. Trausti talar vísindi.

Losun gróðurhúsalofttegunda helminguð fyrir 2030