Þolendur, skotleyfi fjölmiðla og fjárkúgun

Trúum þolendum kynferðisbrota er viðkvæðið frá Katrínu forsætis, Guðna Th. forseta og niður virðingarstiga þjóðfélagsins.

Kennisetningin ,,trúum þolendum" gefur fjölmiðlum skotleyfi á nafngreinda einstaklinga, meinta gerendur. Þolandi þarf ekki að leggja fram eitt einasta sönnunargagn. Hann er jú þolandi og við trúum.

,,Trúum þolendum" gerir ásökun og sekt að sama hlutnum. Skotleyfi fjölmiðla felur í sér að meintur gerandi sé óalandi og óferjandi og er meðhöndlaður sem slíkur. Í ferlinu frá ásökun til aftöku er aldrei spurt um málsatvik, sönnunarfærslu eða varnir sakbornings.

Þegar ásökun jafngildir sekt er freistandi að þola ekki einhvern og búa til geranda. Freistingin eykst ef hægt er að fá góðan pening fyrir að vera þolandi. Stígamót ímyndunar og veruleika eru sumum óglögg. Fantasíur og seðlar eru ekki bestu hjálpartækin til að greina á milli þess sem er - og er ekki.

Hvernig menning er það annars sem leyfir aftöku án dóms og laga og blessar fjárveitingar til þess arna?

 

Ekki eitt sannleikskorn - hvaða menning er það?

Hörður Felix Harðarson, lögmaður knattspyrnumannsins Kolbeins Sigþórssonar,skrifar

Konan sem steig fram, og hefur farið mikinn í fjölmiðlum, lýsti því svo að lögmaður á vegum KSÍ hafi haft samband við hana og boðað hana til fundar með meðlimum stjórnar KSÍ til að ganga frá „þagnarskyldusamningi“. Vakti þetta mikla athygli enda án nokkurs vafa fréttnæmt ef einhver á vegum sambandsins hefði gegnt þessu hlutverki. Síðar kom fram hjá umræddri konu að undirritaður hafi að líkindum verið sá lögmaður sem í hlut átti. Í þessari frásögn er hins vegar ekki eitt sannleikskorn. Undirritaður átti aldrei í samskiptum við konuna, var ekki að vinna fyrir KSÍ í þessu máli, boðaði ekki til fundar með stjórnarmanni KSÍ og bauð henni ekki á nokkrum tímapunkti „þagnarskyldusamning“.

Hörður Felix rekur þann miska og tjón sem skjólstæðingur hans hefur orðið fyrir og spyr: ,,Er þetta raunverulega það þjóðfélag sem við viljum lifa í? Er það rétt og eðlilegt að einstaklingar séu fordæmdir og útskúfaðir með þessum hætti, án dóms og laga?"

Réttmætar spurningar.

Önnur spurning: hvað kallast sú menning þar sem frásögn með ,,ekki eitt sannleikskorn" ræður ferðinni um orðspor manna og afkomu?

 

 

Lögmaður Kolbeins segir ákvörðun KSÍ misráðna

Réttlátt veðurfar og ranglát eldgos

Er eldgosið í Fagradal réttlátt? Spurningin á ekki við þar sem náttúran er hvorki réttlát né ranglát. Hún einfaldlega er.

Litla eldgosið losar meira af koltvísýringi, CO2, en öll bílaumferð á Íslandi. Fyrir suma er heilmikið ranglæti að koltvísýringur fari út í andrúmsloftið. En aðeins ef kenna má manninum um útblásturinn.

Fyrir þúsund árum, þegar Íslendingar bjuggu á Grænlandi, var 1,5 gráðu hlýrra en í dag. Hvorki Eiríki rauða né Leibba syni hans datt í hug að þakka réttlátu veðurfari að hægt var að stunda kvikfjárrækt í Grænlandi og skreppa til Vínlands í sumarfrí.

Í samtímanum er trúarþörfin ríkari en fyrrum. Við trúum að maðurinn stjórni veðurfari á jörðinni og að náttúran sé í aukahlutverki. Með öðrum orðum trú á bull, ergelsi og firru.

 

Þjóðhagsráð fundaði um réttlát umskipti

Tilraun til mannorðsmorðs - hvaða menning er það?

,,Ég var far­inn að ef­ast um sjálf­an mig og far­inn að velta fyr­ir mér hvort ég væri bú­inn að tapa glór­unni," skrifar Benedikt Rúnar Guðmundsson, þjálfari kvennalandsliðsins í körfubolta, eftir að tilraun var gerð til að hafa af honum æruna með mynd- og fréttafölsun. 

Tvisvar þurfti Benedikt að bera af sér upplognar sakir. Hann kærði til lögreglu einstakling en svo kom til sögunnar fjölmiðill og hjó í sama knérunn.

Hvað heitir menningin sem býr til tilræðismenn að mannorði fólks?

Benedikt: „Hrikaleg upplifun“

Gömul kona leiðir unga menn í gildru

Guðrún Jónsdóttir á Stígamótum vill að ungir knattspyrnustrákar tali opinberlega um nauðganir.

Þetta er gildra.

Ef fótboltastrákar taka til við að ræða nauðganir játa þeir aðild að því sem Guðrún kallar ,,nauðgunarmenningu". 

En það er ekki til nein ,,nauðgunarmenning". Orðið er hugarfóstur Guðrúnar og öfgafemínista.

Sem betur fer eru þeir fáir sem nauðga. Þeir hafa ekki með sér félagsskap, svo vitað sé, og eru ekki afmarkaður minnihlutahópur sem tileinkar sér siði og háttu er mætti kallast menning.

Guðrún vill að saklausir piltar taki þátt í fantasíu eldri konu. Tilboðið er ekki sett fram af góðum hug heldur lúmsk tilraun að fá fram játningu ungra manna að þeir séu siðlausir og illa innrættir.

Gangi piltarnir í gildruna eru þeir orðnir meðlimir í fantasíuklúbbi Guðrúnar og öfgafemínista. Klúbburinn hefur öll einkenni sértrúarsafnaðar, með kreddur og fordóma. Guðrún segir að safnaðarmeðlimir ,,þurfa að játa það að þeir geti með engu móti fullyrt að allir séu þeir með hreinan skjöld." Menn eiga sem sagt að leita að syndinni, bæði hjá sjálfum sér og öðrum. Stígamót selja syndugum aflátsbréf á nokkrar milljónir stykkið.

Strákarnir okkar gerðu vel í því að afþakka tilboð Guðrúnar.

Biden er uppgjöfin, Trump var sigurinn - 1. sept. 1939 og 2021

Endalok frjálslyndrar heimsvaldastefnu voru tilkynnt alþjóð 1. september 2021. Yfirlýsing Joe Biden Bandaríkjaforseta um að land hinna frjálsu og huguðu sé ekki lengur alheimslögregla markar tímamót.

Biden fylgir stefnumörkun Trump um að aðeins lífsnauðsynlegir hagsmunir Bandaríkjanna réttlættu stríðsátök. Munurinn er sá að Trump kynnti stefnu sína af styrk og festu en Biden með skottið á milli fótanna. Trump sýndi Bandaríkin sem öflugt herveldi. Biden stýrir niðurlægðu þjóðríki. Forsetatíð Biden er komin í pappírstætarann þótt aðeins séu liðnir 8 mánuðir frá því hún hófst.

Tímasetning uppgjafarinnar er söguleg. 1. september 1939 er upphaf seinna stríðs. Þegar stríðinu lauk tóku Bandaríkin sér lögregluvald heimsbyggðarinnar.  

Undir merkjum frjálslyndrar alþjóðahyggju, sem í raun var vestræn heimsvaldastefna, var efnt til stríðsrekstur í Úkraínu, Sýrlandi, Líbýu, Írak og Afganistan á þessari öld.

Heimurinn er annar eftir 1. september 2021. Breytingarnar verða ekki jafn dramatískar og eftir 1. september fyrir 82 árum. En þær verða róttækar.

„Viturleg ákvörðun og sú besta fyrir Bandaríkin“

ESB stjórnar Íslandi í gegnum EES

Evrópusambandið stjórnar því hvort Bandaríkjamenn fái leyfi til að heimsækja Ísland. Ástæðan er aðild Íslands að EES-samningnum.

Evrópusambandið krefst þess að íslensk lög falli úr gildi þegar þau stangast á við reglur ESB, eins og rekið er á Fullveldi.is Ástæðan er EES-samningurinn.

Niðurstaða: Ísland þarf að segja upp EES-samningnum.

Ekki velkomnir til Íslands án brýns erindis