Össur og Kínarök Steina Páls

Þorsteinn Pálsson fyrrum ritstjóri hjá Jóni Ásgeiri Baugsstjóra og þar áður formaður Sjálfstæðisflokksins þykir yfirleitt ekki stórkarlalegur í yfirlýsingum. Um helgina sagði hann þó tvennt sem er haft í flimtingum. Annars vegar að það yrði áfall fyrir þjóðina ef Sjálfstæðisflokkurinn héldi þeirri stefnu til streitu að draga til baka umsókn Íslands um aðild að Evrópusambandinu. Hins vegar að val Íslendinga stæði á milli Kína og Evrópusambandsins.

Taugaveiklun Þorsteins stafar að tillögu að þingsályktun sem Unnur Brá Konráðsdóttir þingmaður Suðurlands og þingflokkur Sjálfstæðisflokksins standa að um að draga skuli umsóknina tilbaka. Meðflutningsmenn Unnar Brár koma úr öllum flokkum nema Samfylkingunni.

Þorsteini til vorkunnar er hann ekki einn um pólitískt taugaáfall vegna tillögu Unnar Brár. Össur Skarphéðinsson hæstráðandi til sjós og lands í Samfylkingunni rauk upp til handa og fóta og bauð þjóðstjórn.

Tillaga Unnar Brár undirstrikaði eina mikilvægustu staðreynd íslenskra stjórnmála nú um stundir: Samfylkingin stendur einangruð í Evrópusambandsmálinu. Kratar í felubúningi sjálfstæðismanna standa berstrípaðir. Þegar Kínahræðsla er orðið rökvopn er fokið í flest skjól.

Gjaldþrot bílalánafyrirtækja

Bílalánafyrirtækin þola ekki 40 til 70 prósent lækkun eignasafna sinna í kjölfar Hæstaréttardóms um ólögmæti gengistryggingar. Stærstu lánafyrirtækin, Lýsing og SP fjármögnun, komast á vonarvöl. Lýsing er í eigu Existu en SP er dótturfyrirtæki Landsbankans. Ríkisvaldið getur ekki lagt dótturfélagi Landsbankans lið en sniðgengið Lýsingu.

Allar líkur eru á að fjármögnunarfyrirtækin fari lóðbeint á hausinn þegar sú vitneskja hefur síast inn að upphaflegur krónuhöfuðstóll lána gildir óverðtryggður en með álagi á Libor-vexti. Líkleg vaxtaprósenta verður 5-7.

Dómur Hæstaréttar staðfestir enn og aftur að ræningjasiðferði réð ríkjum hér á útrásartímum.

Ef flokkakerfið heldur velli

Flokkakerfið fékk kjaftshögg í sveitarstjórnarkosningunum en óvíst er hvort það hafi verið rothögg. Seiglu kerfisins sem Jónas frá Hriflu lagði grunninn að á fyrsta þriðjungi síðustu aldar er við brugðið. Haldi kerfið velli eru engu að síður breytingar í vændum.

Samfylkingin nær ekki að skáka Sjálfstæðisflokknum og þar með er yfirlýst markmið tilraunarinnar frá 1999 fyrir bí. Samfylkingin fékk 19 prósent í borgarstjórnarkosningum og mælist 22 prósent í síðustu Gallup könnun.

VG fékk þau skilaboð í borginni að sértrúarlínan eigi ekki upp á pallborðið hjá kjósendum. VG fékk góða kosningu víða úti á landi og mælist með 27 prósent fylgi í Gallup.

Framsóknarflokkurinn slítur enn með arfleifð Halldórs Ásgrímssonar og Finns Ingólfssonar sem útrásar-ESB bræðingur sem fólki býður við. Ný forysta stöðvaði blæðinguna og er á réttri leið.  Flokkurinn er með þetta 15-18 prósent fylgi en á inni.

Sjálfstæðisflokkurinn reif sig upp fyrir 30 prósentin og mun ekki líta tilbaka nema eitthvað óvænt komi upp.

Vinstri flokkarnir munu ekki ná meirihluta á ný og sitjandi vinstristjórn verður sú síðasta. Sjálfstæðisflokkurinn verður í lykilstöðu áfram sem endranær.

 

Stefnulaus niðurskurður og stjórnarmyndurnarviðræður

Ríkisstjórnin býður ekki upp á neina framtíðarsýn og blasir við að niðurskurðurinn verður handahófskenndur og eftir því ósanngjarn. Andspyrnan gegn niðurskurði verður hörð og nær víða árangri sem veldur ríkisstjórninni enn frekari erfiðleikum.

Spurt verður um gæluverkefni eins og umsókn Samfylkingarinnar um ESB-aðild og hvort hægt sé að réttlæta þá sjö milljarðar króna sem leiðangurinn kostar.

Ríkisstjórnin er klofin í herðar niður í afstöðunni til niðurskurðar. Jóhanna Sig. boðar stjórnkerfisbreytingu í nafni niðurskurðar en þingmenn VG telja annað búa að baki tillögum forsætisráðherra.

Stjórnaramyndunarviðræður Össurar á miðju sumri eru viðbragð við fyrirsjáanlega erfiðu pólitísku hausti.

„Niðurskurði til háskóla verður nú að linna“

Auðrónadeildin og Samfylkingin

Össur Skarphéðinsson undanríkisráðherra fleytti þjóðstjórnarhugmynd í morgun, um hádegi var hugmyndin löskuð og síðdegis sokkin. Eymdarákall Þorsteins Pálssonar í Fréttablaðinu um að sjálfstæðismenn tækju saman við Samfylkinguna að koma landinu inn í ESB gerði sitt til að gata útspil Össurar.

Veik ríkisstjórn verður hér ríkjandi þangað til Sjálfstæðisflokkurinn tekur af skarið um það hvernig flokkur hann ætlar sér að verða. Í grófum dráttum eru kostirnir tveir. Auðrónadeildin með Guðlaug Þór, Árna Sigfússon, Þorstein Pálsson, Ólaf Stephensen og fleiri vilja græðgisvæðinguna í sparifötin; selja auðlindir í hendur útlendinga, koma Íslandi í ESB, áfengi í matvöruverslanir og samstarf við Samfylkinguna. Auðrónadeildin er um fjórðungur af Sjálfstæðisflokknum en hefur áhrif umfram stærð vegna þess að hún er einsleit.

Stærsti hluti Sjálfstæðisflokksins er ekki enn búinn að ná áttum eftir hrun. Hugmyndir sem þó hefur náð samstaða um er að Ísland standi utan ESB, uppbrot á viðskiptasamsteypum, stífari reglur um fjármálafyrirtæki og millistéttarpólitík m.t.t. skatta og velferðarmála.

Náttúrulegur bandamaður auðrónanna er Samfylkingin; samstarfsaðilar heilbrigða hluta flokksins er Framsóknarflokkur og VG.

 

ESB er austræn samvinna

Eftir fall Berlínarmúrsins fluttist þungamiðja Evrópusambandsins austur á bóginn. Stærstu verkefnin liggja í austrinu. Gömlu hjáríki Sovétríkjanna eru í endurmenntun hjá ríku Vestur-Evrópuþjóðunum. Samskipti við stór Evrópuríki utan ESB, s.s. Úkraínu og Rússland, verða ofarlega á dagskrá ESB næstu áratugi. Í suðaustri er Tyrkland sem æskir inngöngu í ESB og þar er hliðið að múslímalöndum. 

Íslenskir aðildarsinnar reyna að telja okkur trú um að aðild að ESB sé framhald af vestrænni samvinnu sem íslensk stjórnvöld tóku upp eftir seinna stríð með aðild að NATO. Evrópusambandi getur ekki undir nokkrum kringumstæðum verið arftaki NATO í einni eða annarri mynd. Kjarninn í NATO er samvinna þvert yfir Atlantshafið.

Norður-Ameríka, GIUK-hliðið (Grænland, Ísland og Bretland) og meginland Evrópu eru þeir þrír landfræðilegu þættir sem NATO er ofið úr.

Evrópusambandið horfir í austurátt vegna þess að þar eru meiri hagsmunir og fleiri vandamál að fást við. Vitanlega þætti ESB ágætt að fá Ísland inn í sambandið enda myndi það gera sig gildandi á norðurslóðum og öll stórveldi á öllum tímum hafa áhuga á útþenslu.

Hagsmunir Íslands liggja á nærsvæðum okkar. Okkar næstu nágrannar, Grænlendingar og Færeyingar, eru náttúrulegir bandamenn ásamt Norðmönnum. Næsta svæði þar á eftir er Skotland, Írland, Kanada, Bandaríkin og England.

Við eigum að nýta mannafla og fjármuni utanríkisþjónustunnar til að byggja upp samstöðu í nærumhverfi okkar en ekki að flengjast til Brussel.

Minnihlutastjórn VG og kosningar

Ríkisstjórnin er í minnihluta á alþingi, rúinn trausti og trúverðugleika. Kosningar þurfa að fara fram fyrr heldur en seinna. Næsta verkefni er að setja saman fjárlög fyrir næsta ár og lóðsa þau í gegnum alþingi.

Ríkisstjórn Jóhönnu Sig. er ónýt vegna þess að annar stjórnarflokkurinn, Samfylkingin, rekur sundrungarpólitík.

Minnihlutastjórn VG er besta niðurstaðan við þessar kringumstæður. Stjórnin fengi hlutverk starfsstjórnar sem kæmi nauðsynlegum málum áfram í breiðri sátt.

Það er auðvelt að koma á minnihlutastjórn VG. Sjálfstæðisflokkur og Framsóknarflokkur kæmu sér saman að veita stjórninni stuðning að gefnum skilningi að þetta sé starfsstjórn.

Kosningar yrðu vorið 2011. 

Ekki til í þjóðstjórn

Á eftir afneitun Össurar kemur uppgjöf

Afgerandi meirihluti þjóðarinnar er á móti helförinni til Brussel. Atvinnugreinar sem eru hryggstykkið í endurreisninni, sjávarútvegur og landbúnaður, eru ákveðið á móti. Í haust stendur valið milli þess að setja sjö milljarða króna í þetta gæluverkefni Samfylkingar og loka sjúkradeildum. Á alþingi liggur fyrir þingsályktunartillaga um að draga umsóknina um aðild að ESB tilbaka. Þingmenn úr öllum flokkum nema Samfylkingunni eru á tillögunni.

Össur vill þjóðstjórn.

Össur og Samfylkingin eru komin á leiðarenda. Jóhanna Sig. ruglar í þjóðhátíðarræðu og flokksstofnanir eru í mótsögn við sig sjálfar.

Össur vill þjóðstjórn.

Forsætisráðherra mælir fyrir frumvarpi um sameiningu ráðuneyta. Þrír þingmenn VG flytja yfirlýsingu á alþingi um að þeir muni greiða atkvæði gegn málinu. Ríkisstjórnin er komin í minnihluta á þingi.

Össur vil þjóðstjórn...

...vegna þess að það er eini möguleiki hans á að halda ráðherraembætti.

Össur hlynntur þjóðstjórn

50 ára söguvitund aðildarsinna

Söguvitund Sjálfstæðra Evrópumanna takmarkast við síðustu hálfa öld eða svo. Dæmin sem tilfærð eru um alþjóðlega samninga eru öll yngri en lýðveldisstofnunin sem gerði þessa samninga mögulega. Lýðveldisstofnunin var lokatakmark þjóðfrelsisbaráttunnar.

Aðild að ESB grefur undan fullveldinu með því að flytja forræði okkar mála til Brussel. Síðast misstum við forræði okkar mála með Gissurarsáttmála við Hákon gamla Noregskonung. Það tók okkur 650 ár að fá fullveldið tilbaka.

50 ára söguanalísa handa þjóð sem er þúsund ára og rúmlega það er heldur klén frammistaða. Aðildarsinnar eru eins og áður með brækurnar á hælunum.

„Verði þjóð meðal þjóða“

Dýrafjörður í gær, óupplýst ESB-afstaða í dag

 Í gær misfór formaður Samfylkingarinnar með fæðingarstað Jóns Sigurðssonar. Í dag skrifar framkvæmdastjórn flokksins texta þar sem Samfylkingin gortar sig af óupplýstri ákvörðun um ESB-aðild.

Lítum á þessa setningu í ályktun framkvæmdastjórnarinnar

Íslenska þjóðin getur einungis tekið upplýsta ákvörðun um hvort aðild þjóni hagsmunum Íslendinga þegar samningur liggur fyrir. 

Í næstu málsgrein segir 

Samfylkingin styður aðild Íslands að Evrópusambandinu.

Það liggur enginn samningur fyrir og því getur Samfylkingin ekki hafa tekið upplýsta ákvörðun þegar flokkurinn sagðist styðja aðild Íslands.

Samfylkingin er sannkallaður ruslflokkur íslenskra stjórnmála, frá toppi til táar.

 

Ákvörðunin veigamikið skref